!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Украдени пари и накит од куќа во Тетово


Тетово, 12 ноември, 2017 - 17:28 (META) 

Непознати сторители ограбиле куќа во сопственост на Џ.К. во Тетово вчера откако со употреба на сила и тврд предмет ја отвориле пластичната шибер балконска врата од приземјето.

Крадците одзеле 700 евра, два црни ковчега во кои имало златен накит и бижутерија и кутија со златен ѓердан со што предизвикале вкупна материјална штета од околу 600.000 денари.


Ограбени двајца малолетници во Скопје под закана со нож


Скопје, 12 ноември, 2017 - 13:59 (META) 

Две непознати лица вчера извршиле разбојништво врз двајца малолетници од Скопје во центарот на градот.

Министерството за внатрешни работи соопшти дека синоќа околу 18.00 часот во Скопје на ул.“Димитрија Чуповски“, две непознати лица со закана со нож извршиле разбојништво врз двајца малолетници М.Т. и Н. М. од Скопје, одземајќи им околу 1200 денари, а потоа со трчање се упатиле кон плоштад “Македонија“.

Од МВР велат дека се преземаат мерки за пронаоѓање на лицата. Ова е трет случај на напад со нож и ограбување малолетници во Скопје во изминатите 48 часа. Претходните два беа извршени во петокот на булеварот „Партизански одреди“.


Нападнати и ограбени тројца малолетници на Партизанска


Скопје, 11 ноември, 2017 - 16:30 (META) 

На булеварот „Партизански одреди“ синоќа се извршени две разбојнишва врз малолетници, откако непознати лица нападнале две малолетни лица од Ресен и Другово и едно лице од Скопје.

Министерството за внатрешни работи соопшти дека во првиот случај во 18.05 часот во Скопје кај автобуската постојка извршено е разбојништво врз две малолетни лица А.М. од Ресен и М.Б. од село Другово кичевско, штитеници на домот „Здравко Цветковски“. Додека чекале автобус им пришле три непознати лица на возраст од околу 20 години, двајца од нив извадиле ножеви и со закана им побарале да им дадат сѐ што имаат во себе, по што А.М. извадил 300 денари кои ги имал во себе и им ги дал, а М.Б. го фатиле за врат и го удриле со тупаници во пределот на главата, по што избегале.

Случајот синоќа во 21 часот го пријавил А.Г. вработен во домот „Здравко Цетковски“. Полицијата презема мерки за пронаоѓање на сторителите и расчистување на случајот.

Второто разбојништво се случило 10 минути подоцна, односно во 18,15 часот во непосредна близина на Универзална сала во кое, исто така, три непознати лица со закана со нож извршиле разбојништво врз седумнаесетгодишниот Д.Г. и му одзеле 300 денари.

Случајот го пријавила неговата мајка во полиција синоќа во 21.45 часот. Секторот за внатрешни работи Скопје презема мерки за пронаоѓање на сторителите и расчистување на случајот.


Кривична пријава за скопјанец кој се обидел да ограби две менувачници


Скопје, 11 ноември, 2017 - 13:27 (META) 

Секторот за внатрешни работи Скопје до надлежното Основно јавно обвинителство поднесе кривична пријава против Б.Н. (45) од Скопје, поради сомнение дека се обидел да ограби две менувачници, во Карпош и во Центар.

Како што соопшти МВР, Б.Н. првото од двете дела го извршил на 2-ри овој месец, околу 13,35 часот, на ул. Московска, на подрачјето на општина Карпош, во менувачницата „Сиба Комерц“. Откако влегол во менувачница, на вработената и се претставил дека е службено лице од Управата за јавни приходи, и наредил веднаш да ја отвори вратата која води кон канцеларијата на вработените. Вработената ја одбила наредбата и побарала од Б.Н. да се легитимира, по што тој изреволтиран излегол надвор. Но, по кратко време повторно се вратил во менувачницата, носејќи со себе камен со кој започнал да го крши заштитното стакло од пултот, со цел да влезе во канцеларијата и да ги одземе паричните средства кои претпоставил дека се наоѓаат таму. Од силните удари, заштитното стакло пукнало, по што вработената го вклучила безбедносниот аларм, а Б.Н. се откажал во својата намера, излегол од менувачницата и се упатил во непознат правец.

Второто кривично дело го извршил по четири дена, на 7-ми овој месец, околу 13,30 часот, на бул.„Партизански Одреди“, на подрачјето на општина Центар, во менувачница „Линда“. Овој пат влегол во менувачницата, пристапил кон работниот пулт, по што извадил пиштол и го вперил кон вработениот кој се наоѓал зад заштитното стакло на пултот и му наредил да му ги даде парите. Вработениот одбил да ја послуша наредбата, по што пријавениот го репетирал пиштолот и со цевката тропнал на заштитното стакло. Во тој момент вработениот пред менувачницата забележал полициски службеници од единицата Алфа, почнал да вика и да бара помош, по што Б.Н. го ставил пиштолот во внатрешноста од својата јакна и со забрзан чекор излегол од менувачницата, со цел да побегне. Полициските службеници му наредиле да застане, му извршиле претрес при што кај него пронашле еден пластичен пиштол.
Б.Н. е приведен во полициска станица, каде што е извршен разговор во кој детално ги појаснил кривичните дела.

Истиот ден, извршено е и препознавање од страна на оштетените, кои потврдиле дека приведениот е лицето кое се обидело да ги ограби менувачниците.


Девет години и два месеци казна затвор за Бобан Смилевски за грабежот во НЛБ


Скопје, 3 ноември, 2017 - 12:29 (META) 

Бобан Смилевски доби девет години и два месеци затвор за милионскиот грабеж што го изврши во НЛБ. Неговиот брат Горан Смилевски, второобвинет во случајот, е осуден на шест години и шест месеци затвор.

Третообвинетиот Борис Минчевски доби пет години и два месеца, а Мирослав Каевски беше условно осуден на две години и судот му изрече забрана за отуѓување и за давање под закуп на недвижен имот. Со одлуката, судот го одзеде и возилото „голф“ кое се споменува во обвинението.

Според обвинителниот акт, тие се товарат дека од НЛБ украле првин 400.000 швајцарски франци и 375.000 евра, а потоа уште 2 милиони швајцарски франци и 270.000 евра.

Четворицата обвинети за грабежот ја признаа вина, но не открија што сториле и каде се украдените пари.

Судијата Дарко Тодоровски висината на казните ја образложи со фактот дека обвинетите не откриле каде се украдените пари.

Со пресудата тројцата првообвинети се задолжени и во рок од една година по правосилноста на пресудата, солидарно да ја надоместат штетата на банката.

Смилевски во завршните зборови ја призна вината и рече дека парите ги украл бидејќи имал долгови, а тој и семејство живееле под закани.

– Делото не е од лукративна причина и не е за да се оствари имот за себе или за кој било друг. Бев во долгови и во последните два месеци бев под закани, јас и семејството. Губењето самоконтрола ме доведе до ова. За себе можам да кажам дека сум бил пример во приватниот живот, општеството, а до кражбата за себе можам да кажам дека не сум бил криминалец, ниту имам криминален ум – рекол Смилевски во својот завршен збор.


Првообвинетиот за грабежот во НЛБ тврди дека парите ги украл поради долгови


Скопје, 27 октомври, 2017 - 13:37 (META) 

Бобан Смилевски, првообвинетиот за грабежот во НЛБ, во завршните зборови ја призна вината и рече дека парите ги украл бидејќи имал долгови, а тој и семејство живееле под закани, пренесува „Фокус“.

– Делото не е од лукративна причина и не е за да се оствари имот за себе или за кој било друг. Бев во долгови и во последните два месеци бев под закани, јас и семејството. Губењето самоконтрола ме доведе до ова. За себе можам да кажам дека сум бил пример во приватниот живот, општеството, а до кражбата за себе можам да кажам дека не сум бил криминалец, ниту имам криминален ум – рекол Смилевски во својот завршен збор.

Тој додал дека другите обвинети ненамерно ги вмешал, па затоа побара тој да биде казнет наместо нив.

– Колку е поблага казната и колку побргу се вратам во општество, ќе почнам побргу да придонесувам – рекол Смилевски.

Тој им се извини на своите родители за нанесениот стрес и срам, како и на својата сопруга која ја оставил со две малолетни близначиња.

Објавата на пресудата за овој случај е закажана за 3 ноември.

Претходно, Обвинителството побара највисоки казни за четворицата обвинети во случајот – Бобан Смилевски, неговиот брат Горан Смилевски, Борис Минчевски и Мирослав Каевски.

Според обвинителниот акт, тие се товарат дека од НЛБ украле првин 400.000 швајцарски франци и 375.000 евра, а потоа уште 2 милиони швајцарски франци и 270.000 евра.


Обвинителство бара 10 години затвор за обвинетите за грабежот во НЛБ


Скопје, 27 октомври, 2017 - 12:41 (META) 

Основното јавно обвинителство Скопје, во завршните зборови за милионскиот грабеж во НЛБ, денеска побара од судот на обвинетите да им одреди највисока казна, која според Кривичниот законик изнесува 10 години затвор.

Четворицата обвинети, Бобан Смилевски, неговиот брат Горан Смилевски, Борис Минчевски и Мирослав Каевски, на претходното рочиште ја признаа вината, но не открија каде се парите и што сториле со нив. Денеска и тие треба да дадат завршни зборови.

Обвинителството бара највисока казна за првообвинетиот Бобан Смилевски бидејќи ја искористил довербата во банката и ги убедил другите да ги уништат доказите по кражбата, додека за неговиот брат, Горан Смилевски, се бара идентична казна бидејќи откако ги примил парите, го фрлил телефонот и не открива каде се парите.

Единствена олеснителна околност, која може да влијае на намалување на казната, според Обвинителството, би било тоа што обвинетите претходно немале сторено кривични дела.

Адвокатите на обвинетите, пак, бараат поблаги казни бидејќи нивните клиенти ја признале вината и биле угледни луѓе во општеството, односно Горан Смилевски е претседател на Синдикатот на вработените во Народна банка, поради што, според неговиот адвокат, уживал висок општествен углед и добивал признанија и високи оценки за неговата работа.

Според обвинителниот акт, обвинетите, искористувајќи ја својата работна позиција и познавањето на процесите на работа во банката, првин украле 400.000 швајцарски франци и 375.000 евра, а потоа украле уште 2 милиони швајцарски франци и 270.000 евра.

Надлежниот обвинител, кој го води предметот, поднесе обвинителен предлог против други четири лица, кои како одговорни лица во банката „несовесно постапиле во вршењето на своите овластувања и должности“ и со тоа ја овозможиле кражбата на големата сума пари. Тие се товарат за несовесно работење во службата. Постапката против овие четири лица продолжува одвоено.


Четворицата обвинети го признаа грабежот во НЛБ, но не открија каде се парите


Скопје, 19 октомври, 2017 - 16:08 (META) 

Четворицата обвинети за милионскиот грабеж во НЛБ, на денешното рочиште во Основниот суд Скопје 1 го признале кривичното дело, но не откриле што сториле со украдените пари, соопшти Јавното обвинителство.

„Тие се изјаснија за виновни, односно дека со умисла и во повеќе временски поврзани дејства, искористувајќи ја својата работна позиција и познавање на процесите на работата во банката, противправно присвоиле парични средства во значителен износ од 400.000 швајцарски франци и 375.000 евра. На 10 април 2017 извршиле кражба и на 2 милиони швајцарски франци и 270.000 евра. Иако ги признале во целост наводите од обвинителниот акт, обвинетите не откриле што сториле со украдените парични средства“, стои во соопштението.

По признавањето на вината, судијата закажал рочиште на 27 октомври, на кое ќе бидат изнесени завршните зборови.

За кривичните дела, тешка кражба и затајување, за кое се товарат обвинетите, предвидена е затворска казна од три до 10 години, односно од една до 10 години.

Надлежниот обвинител, кој го води предметот, до судот доставил и обвинителен предлог против други четири лица, кои како одговорни лица во банката „несовесно постапиле во вршењето на своите овластувања и должности“ и со тоа ја овозможиле кражбата на големата сума на пари. Тие се товарат за несовесно работење во службата.

Постапката против овие четири лица продолжува одвоено.


На битолчанец му украле 500.000 денари


Битола, 8 октомври, 2017 - 12:17 (META) 

Непознат сторител синоќа во Битола украл разновиден накит и пари, стекнувајќи противправна имотна корист од 500.000 денари, соопшти МВР.

Крадецот, вчера околу полноќ, од станот 57-годишниот В.Ј., на улица Питу Гули, одзел 225.000 денари, 1.300 евра, 800 американски долари, 450 швајцарски франци и разновиден златен и сребрен накит.

Сторителот ја отклучил влезната врата, влегол во станот, извршил пребарување во спалната соба и одзел метален сеф, во кој биле парите и накитот, по што го напуштил местото.

Увид на местото на грабежот извршила екипа од Секторот за внатрешни работи – Битола и се преземаат мерки за пронаоѓање на сторителот.


Ограбена аптека во Скопје


Скопје, 7 октомври, 2017 - 13:59 (META) 

Непознато лице со закана со нож ограбило аптека синоќа во 21 часот на улица Бутелска во Скопје.

Напаѓачот со нож им се заканил на вработените и ги украл парите од дневниот промет.

Екипа на полицијата извршила увид на местото на настанот, а во моментов се преземаат мерки за расчистување на случајот, информира МВР.