!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Српски државајнин се обидел да изнесе фалсификувани евра од земјава


Куманово, 14 март, 2017 - 13:40 (META) 

Царинските службеници од граничниот премин Табановце вчера спречиле обид за изнесување од држвата на фалсификувани пари со вкупен износ од 27.700 евра. Фалсификуваните банкноти, како што информираат од Царинската управа, биле пронајдени во возило што го управувал српски државјанин, против кого е поднесена кривична пријава.

„На 13 март годинава, околу 7 часот наутро, на граничен премин Табановце за излез од Република Македонија се пријавило патничко возило со српски регистарски таблички управувано од српски државјанин. При контролата на возилото и на патникот, во потпирачот меѓу предните седишта, во врзано снопче со ластик, замотани во бела хартија, пронајдени биле девизи. Царинските службеници забележале дека има 39 банкноти во апоени од 100 евра со ист сериски број, потоа 39 банкноти во апоени од 200 евра со ист сериски број, како и 32 парчиња во апоени од 500 евра исто така со ист сериски број. При преглед со УВ-лампа, констатирано било дека девизите се со лош квалитет и се фалсификувани“, стои во соопштението на Царината.

Српскиот државјанин бил веднаш уапсен и предаден на инспекторите од одделението за истраги на Царинската управа, кои, според доказите, утврдиле дека осомничениот фалсификуваните евра ги направил сам и ги испечатил со печатач во боја на обична хартија, а истото го потврдиле од Народната банка на Република Македонија при вештачењето на парите.

„Царинската управа против осомничениот до Основното јавно обвинителство Куманово поднесе кривична пријава за фалсификување пари, а осомничениот е предаден на судија за претходна постапка во Основниот суд Куманово, кој му одреди мерка претпазливост – привремено одземање на патна исправа со обврска да се јавува во судот двапати неделно“, додаваат од Царинската управа.


Царината спречила шверц на 18 килограми марихуана, сокриена во плинска боца


Куманово, 26 јануари, 2017 - 13:49 (META) 

Царинските екипи на граничниот премин Табановце вчера спречиле обид за шверц на 18 килограми марихуана, што била сокриена во плинска боца.

Како што информираат од Царинската управа, вчера, околу 6 часот, на граничниот премин за излез од Македонија било пријавено возило, со албански регистарски таблички, а управувано од И.Ш., државјанин на Албанија. Возилото било селектирано за детална контрола и при прегледот на багажникот била пронајдена плинска боца, во која биле сокриени 15 вакумирани пакетчиња облепени со проѕирна леплива лента, наполети со марихуана со вкупна тежина од околу 18 килограми.

Во предистражната постапка, што ја спровеле инспекторите на одделението за истраги на Царинската управа, било утврдено дека осомничениот ја набавил марихуаната во Албанија и требало да ја прошверцува до Германија.

„Против сторителот, Царинската управа поднесе кривична пријава за неовластено производство и пуштање во промет на наркотични дроги, психотропни супстанции и прекурсори до надлежното јавно обвинителство, а судијата на претходна постапка му изрече мерка притвор во траење од 30 дена“, стои во соопштението на Царината.

Оттаму додаваат дека во текот на декември, царинските екипи во соработка со Министерството за внатрешни работи заплениле 70 килограми марихуана, сокриена во ПВЦ-прозорци.


Спречен шверц на 8 килограми марихуана на граничниот премин Табановце


Куманово, 4 декември, 2016 - 15:35 (META) 

Царинските екипи на граничниот премин Табановце вчера спречиле обид за шверц на осум килограми марихуана, која била сокрина во автомобил што го управувал 56-годишен државјанин на Република Албанија.

„На 3 декември 2016 година, околу 15 часот, на излез од Република Македонија, на граничниот премин Табановце, се пријавило патничко моторно возило марка „смарт“ со албански регистарски ознаки, а управувано од осомничениот Б.О. (56) од Р.Албанија. При прегледот на возилото, во задниот дел од левиот и десниот праг, во фабричка шуплина, царинските службеници пронашле вкупно 27 пакетчиња со различна големина, облепени со кафеава леплива лента, наполнети со наркотична дрога – марихуана со вкупна тежина од околу осум килограми“, стои во соопштението од Царинската управа.

Во разговор со осомничниот било утврдено дека за паричен надомест од 4.000 евра, тој се договорил со лица од Албанија да пренесе поголемо количество дрога од Албанија во Чешка.

Против албанскиот државјанин Царинската управа до надлежното јавно обвинителство поднела кривична пријава за неовластено производство и пуштање во промет на наркотични дроги, психотропни супстанции и прекурсори.


Притворен албански државјанин осомничен за шверц на 24,5 килограми марихуана


Куманово, 14 октомври, 2016 - 10:49 (META) 

Кумановското јавно обвинителство донело наредба за спроведување истражна постапка против албански државјанин, во чиј автомобил на граничниот премин Табановце, завчера биле пронајдени 24,5 килограми марихуана.

Албанскиот државајнин, како што информираат од јавното обвинителство, се товари за неовластено производство и пуштање во промет на наркотични дроги, психотропни супстанции и прекурсори, од член 215, став 1 од Кривичниот законик.

„На 12 октомври, на граничниот премин Табановце при излез од Република Македонија, при извршена контрола на патничко моторно возило, царинските службени лица пронашле 24,5 килограми наркотична дрога – марихуана. Дрогата, спакувана во пакувања со различни големини, била сместена во касета и во специјално направен бункер на подот од возилото“, стои во соопштението на обвинителство.

Вчера, јавниот обвинител што го води случајот извршил распит на осомничниот, кој, како што информираат оттаму, делумно го признал делото за кое се товари.

На барање на обвинителот, судија на претходна постапка на албанскиот државјанин му одредил притвор од 30 дена.


Затворена пругата кај „Табановце“ поради истекување на плин од вагон-цистерна


Куманово, 25 мај, 2016 - 13:10 (META) 

Железничкиот сообраќај на граничниот премин „Табановце“ од утрово е во прекин поради истекување на плин од вагон-цистерна, информираат од МВР.

Според полицијата, железничкиот сообраќај бил прекинат околу 4 часот, откако на преминот од Србија во земјава влегол воз со композиција од 16 вагони, од кои шест вагон-цистерни со плин, а од една од нив било забележано дека испушта плин, со што била загрозена безбедноста.


Полицајци спречиле шверц на осуммина мигранти кај Василево, Струмичко


Гевгелија/Куманово, 1 април, 2016 - 15:23 (META) 

Синоќа, околу 20.30 часот полициски службеници спречиле обид за криумчарење на мигранти кај селото Василево. Како што информираат од МВР, полицајците во возило, марка „мерцедес“ со велешки регистарски ознаки, пронашле осум мигранти, од кои шестмина биле со потекло од Пакистан и двајца од Ирак, односно од Либија.

Возачот успеал да побегне и полицијата презема мерки за негово пронаоѓање и расчистување на случајот.

Според МВР, шестмина од мигрантите имале документи издадени од грчките власти.

По наредба на Јавен обвинител тројца од мигрантите се пренесени во Прифатниот центар во Скопје, а останатите петмина биле сместени во Транзитниот центар во Гевгелија.

Од МВР иформираат дека синоќа на граничниот премин „Табановце“ во автомобил марка „фолксваген“ бил откриен 20-годишен државјанин на Сирија.

Тој, според полицијата, бил сокриен во импровизиран кревет покриен со душек и ќебиња, а кај себе имал грчки документ за поднесено барање за азил.

Сирискиот државјани, ноќеска бил предаден на полициски службеници од СВР Куманово за натамошна постапка.


На Табановце уапсен српски државјанин кој се барал за силување


Куманово, 9 март, 2016 - 12:39 (META) 

Педесет и четиригодишен српски државјанин, кој се барал за кривично дело силување, вчера околу пладне бил уапсен на граничниот премин Табановце, соопшти полицијата.

Како што информираат оттаму, вчера околу 12.25, при пасошка контрола, полицајците на граничниот премин констатирале дека В.К.(54) од Република Србија е евидентиран во стоп-листата и се бара за сторено кривично дело силување.

Во 13.35 часот В.К. бил предаден на полициските службеници од СВР Куманово за понатамошна постапка.


Српски државјанин баран од Интерпол поради убиство, приведен на Табановце


Куманово, 9 декември, 2015 - 14:58 (META) 

Државјанин на Србија, кого Интерпол Австрија го бара со потерница, вчераутро бил приведен на граничниот премин Табановце при влез во Македонија, соопшти полицијата.

Станува збор за С.Ќ. (37) од Белград, кого Интерпол го бара со меѓународна потерница поради основан сомнеж дека извршил убиство.

По приведувањето, српскиот државјанин бил предаден на полициските службеници од Секторот за внатрешни работи Куманово за понатамошна постапка.