Столтенберг: Вратата е отворена, но преминувањето на прагот бара работа


Скопје, 18 јануари, 2018 - 13:26 (META) 

Вратата на НАТО е отворена за нови членови, но преминувањето на прагот бара сериозна работа, порача Генералниот секретар на НАТО, Јенс Столтенберг, во обраќањето пред пратениците, државниот врв и првите луѓе на повеќе институции на седница на Собранието на Република Македонија. Во него тој посебно се осврна и ги пофали ратификацијата на Договорот за добрососедство со Бугарија и изгласувањето на Законот за јазиците.

Столтенберг порача дека членките на северноатланската алијанса може едногласно да поканат која било европска земја да стане членка, но за тоа да се случи има уште работа што треба да се заврши. Сепак, како што рече, пред седиштето на НАТО има место за уште знамиња.

– Договорот од Вашингтон нагласува дека членките може преку едногласен договор да поканат која било европска земја да се приклучи на Алијансата, доколку таа земја е во состојба да  ги следи обрските на договорот и придонесува во северноатлантската сфера. Под тие услови Црна Гора стана 29. членка на НАТО минатата година, со еднаков глас во нашите дискусии и еднакви права и одговорности како сите други земји – членки. Гледањето како црногорското знаме се издига за првпат пред седиштето на НАТО беше горд момент за мене. Но, има сè уште место за уште знамиња пред седиштето на НАТО – рече Столтенберг.

Сепак, рече тој, едно е да се биде амбициозен, а друго е реалната ситуација и мора да се реши прашањето за името на, како што рече, „вашата земја“. Тој инаку не го употреби зборот Македонија ниту еднаш во говорот што траеше дваесетина минути.

– Сакам да успеете, НАТО сака да успеете, но иако е добро да се биде амбициозен, важно е да се биде и реален. Има уште работа што треба да се сработи. Тоа значи – решавање на прашањето за името на вашата земја. Ова е прашање што му тежи на овој регион и на оваа земја предолго време. Оттука, ја поздравувам покажаната волја на оваа влада да се разреши ова прашање. Вчерашната средба на преговорачите во Њујорк беше уште еден важен чекор. Охрабрен од неодамнешниот напредок, ја користам оваа шанса да ве поттикнам да се приближите напред – порача Генералниот секретар на НАТО.

Подеднакво важно е да се подобрат односите со сите соседи, рече тој.

– Исто така добро е да покажете добри односи со соседите. Членките на НАТО се одушевени поради развојот на односите со Бугарија, и јас честитам за ратификацијата на Договорот за добрососедство со Бугарија, но мора да работите да ги подобрите односите со останатите во регионот – рече Столтенберг.

Генералниот секретар на НАТО ги спомена и насилствата од 27 април минатата година и рече дека настаните во Собранието го шокирале и него и сите членки на НАТО.

– Сепак бевме импресионирани од тоа што го видовме од тој ден понатаму, за напредокот што сите го сторивте за формирање нова отворена поинклузивна политичка култура, во калење на новиот национален дух, гледање напред и истрајност. Пред девет месеци се приближивте кон работ на една карпа. Но, од тогаш една држава од потенцијална нестабилност се претворивте во држава на реални можности – рече Столтенберг.

Тој посебно значење даде на диверзитетот и на донесувањето на законот за јазиците.

–  Како поранешен пратеник и премиер на Норвешка разбирам многу од предизвиците со кои продолжувате да се соочувате. Долгата политичка кариера ме научи колку е поинклузивно едно општество, толку е поуспешно. Диверзитетот е сила, не слабост. Таму каде што има диверзитет придружен од добро управување има успех – порача Генералниот секретар на НАТО.

Во говорот тој оддаде признание на македонската одбрана за придонесот на мисијата на НАТО во Авганистан, но рече дека и во тој сектор се потребни реформи, а како посебно важно го посочи зголемувањето на буџетот за одбраната до ниво од 2 отсто од БДП.


Папата предупредува дека нуклеарниот пожар може случајно да почне


Ватикан, 8 јануари, 2018 - 17:17 (META) 

Папата Франциск во обраќањето познато како „Состојба во светот“ апелираше до сите нации да го поддржат дијалогот со цел да се намалат тензиите на Корејскиот Полуостров и да се работи на правно обврзувачката забрана на нуклеарното оружје.

– Нуклеарното оружје мора да биде забрането – изјави поглаварот на Римокатоличката црква, цитирајќи документ објавен од папата Јован Дваесет и трети за време на Студената војна.

Папата Франциск потенцираше дека „не може да се негира дека пожарот може да почне случајно или во непредвидени услови“.

Апелот на папата до дипломатите е еден ден пред разговорите помеѓу Северна и Јужна Кореја, кои ќе бидат насочени на учеството на севернокорејските спортисти на Зимските олимписки игри во Јужна Кореја.

Папата упати повик и за зачувување на статус кво на Ерусалим, откако претседателот на САД, Доналд Трамп кон крајот на минатата година донесе одлука за признавање за главен град на Израел.

Тој се осврна и на климатските промени, повикувајќи ги државите да го почитуваат Парискиот договор за намалување на емисиите на јаглерод диоксид.


Груевски: Мандатот го завршувам со нож во грб, на новиот лидер му порачувам да остане човек


Вландово, 23 декември, 2017 - 13:50 (META) 

ВМРО-ДПМНЕ подготви закон за амнестија за настаните од 27 април и се надевам дека тој ќе биде изгласан во Собранието, затоа што е потребно национално помирување и простување, рече лидерот на ВМРО-ДПМНЕ, Никола Груевски на вонредниот Конгрес на партијата во Валандово каде што се бира нов партиски лидер.

– Само така земјата може да оди напред, и да стави крај на политичките освети и реваншизмите. Големите политичари така се однесуваат во вакви моменти. Треба и Заев и СДСМ да го научи ова, со целосно сочуство кон неговата болка и стрес од немилиот настан на 27 април. Тепањето во Собрание беше голема грешка. Тие луѓе беа поведени од емоции. Сега сме сведоци на политичка осветољубивост од невидени размери – рече тој.

Груевски им се заблагодари на најблиските соработници и на народот за кој рече дека секогаш ќе го почитува. Тој им се извини на сите во партијата и на сите граѓани за сите ненамерни грешки кои ги направил но рече дека енормно многу работел и затоа се случувале грешки.

Тој изрази жалење што Конгресот се случува кога партијата е нападната од надвор, но и од внатре од нејзините членови и додаде дека тешко му било кога го гледал однесувањето на неговите блиски соработници кое се сменило преку ноќ.

Тој раскажа дека странски експерти кои работеле на кампањата на локалните избори му соопштиле дека дел од неговите најблиски соработници биле среќни за изборниот пораз.

– Еден дел од моите соработници, и тоа луѓе кои добија многу, пред се доверба и шанси, функции и големи привилегии и почести, во последните месеци не можам да ги препознаам. Но, успеав тоа да го задржам длабоко во мене, да ја задржам присебноста и смиреноста, длабоко да се кршам во себе и да оставам сами да се заплеткаат и пропаднат во гробот кој го копаат за друг или во сплетките, дворските игри, лицемерието, дволичноста, неискреноста, алчноста, интригите и предавствата кои ги прават за друг. И така и ќе биде. Исто како низ историјата на ВМРО и Македонија – рече Груевски.

Toj во долгиот говор од час и 30 минути, се навраќаше на минатото, на како што рече, неговите тешки почетоци како лидер на ВМРО-ДПМНЕ и нагласи што се постигнала партијата додека била на власт.

– Го прифатив предизвикот да ги ставам моите најубави години од младоста во служба на партијата, народот и државата, да бидам новиот водач на ВМРО, предложен токму од мојот претходник на оваа позиција, Љубчо Георгиевски, на кого и покрај подоцнежните несогласувања, му се заблагодарувам за укажаната доверба и поддршка, и со кого успеав по еден неколку годишен прекин да ги обновам и до ден денес да ги задржам пријателските релации и повремени средби. Всушност, тие први три години како водач на ВМРО, и последните три беа најтешките во 14 и пол годишното водење на партијата. Не по број на работни саати и решавање на проблеми, туку по т.н. византиски игри, подли, валкани и нечесни игри со кои бев принуден да се справувам, поле на кое не се чувствувам на свој терен – додаде лидерот на ВМРО-ДПМНЕ.

Груевски раскажа како Мартин Протуѓер му рекол дека мандатот го започнал и завршил со нож во грб.

-Го коригирав, и му реков, дека не е во право, и дека, го завршувам не со еден, туку со повеќе, и не ножеви, туку ножиња во грб. Но, за среќа, во ВМРО-ДПМНЕ има многу силни личности, честити луѓе, луѓе со висок морал и капацитет, луѓе кои искрено ја сакаат оваа земја и нејзиниот напредок, и луѓе кои имаат чиста совест, јасна мисла, многу енергија и силни морални вредности – додаде тој.

На новиот претседател му порача да остане човек затоа што моќта и власта го прави човекот да стане полош, понервозен и помалку толерантен и додаде дека тој во следниот период ќе работи да стане подобар човек, татко, сопруг, пријател и соработник.


Груевски побара слобода за приведените и национално помирување


Скопје, 3 декември, 2017 - 18:26 (META) 

На денешниот марш на ВМРО-ДПМНЕ, партискиот лидер Никола Груевски побара слобода за Владо Јовановски, Игор Дурловски, Борис Дамовски, Митко Чавков, бидејќи, како што рече, тие не биле терористи, туку патриоти кои си ја сакаат татковината.

Во говорот пред зградата на Владата, Груевски рече дека тие се лажно обвинети, трпат неправда и страдаат поради Македонија. За пратениците на ВМРО-ДПМНЕ, за кои Собранието на пленарна седница го одобри барањето на Основен суд Скопје за одземање на имунитетот, Груевски додаде дека биле на своето работно место и никого не повредиле, ниту убиле.

– Бараме слобода за патриотите и за неправедно приведените. Потребно е национално помирување, да запре политичкиот прогон, хајките, местенките, заплашувањата и да запрат неправдите. На Македонија ѝ требаат реформи за влез во НАТО и во ЕУ, а не реваншизам кој не води никаде – рече Груевски.

Според него, судството е притиснато, уценето и контролирано. Тој потсети дека ВМРО-ДПМНЕ предложи закон за амнестија за учесниците во настаните во Собранието на 27 април и почеток на период на помирување.

За време на говорот на Груевски, партиските приврзаници извикуваа „Нема оставка“. Маршот на ВМРО-ДПМНЕ почна од Министерството за правда, од каде партиските членови тргнаа кон зградата на Владата.

Тие носеа транспаренти на кои пишуваше „За правдината, за таковината“, „Слобода за Богдан“, „Долу за хунтата“, „Долу Влада, злото мора да се победи“, „Дурловски е уметник, а не терорист“.

Утре протестот ќе се одржи пред Министерство за правда, во 18 часот.


Заев: На идните генерации треба да им дадеме причини за да го слават нашиот патриотизам


Скопје, 11 октомври, 2017 - 13:43 (META) 

Нашиот патриотизам идните генерации ќе го слават само ако им дадеме повеќе причини за тоа, истакна премиерот Зоран Заев во својот говор на централниот настан од одбележувањето на 11 Октомври – Денот на народното востание, кој се одржа пред Споменикот на ослободителите на Скопје, во дворот на Владата.

– Празнувањето на големите датуми и оддавањето чест на сите наши претходници вградени во државноста и во слободата на Македонија е само мал дел од нашата должност кон достојното минато – рече Заев, нагласувајќи дека патриотизмот не завршува тука.

Тој додаде дека патриотизмот идните генерации ќе го слават само ако им се дадат повеќе причини за тоа, како што тоа го направила генерацијата на партизаните од антифашистичката и народноослободителната борба.

– Пред 76 години нашите сограѓани во Прилеп и во Куманово се одважија и презедоа акции со кои го означија почетокот на востанието на македонскиот народ и на сите други граѓани во Македонија против фашистичкиот окупатор и почетокот на завршните процеси во впишувањето на македонската држава на мапата на народите во светот – рече Заев.

Покрај владина делегација, пред Споменикот на ослободителите на град Скопје, свежо цвеќе положија и делегација на
Собранието предводена од пратениците Јулиана Николова и Диме Велковски, на Армијата на Република Македонија, предводена од заменик-началникот на Генералштабот, генерал-мајор Мухамет Рацај, на Сојузот на борците предводена од Никола Стојановски и други делегации на државниот и на дипломатскиот кор.


Заев: Реални се шансите да добиеме чиста препорака од ЕК


Скопје, 8 септември, 2017 - 15:45 (META) 

„Иднината наша, како граѓани, иднината на Република Македонија, е во ЕУ и во НАТО. Реални се шансите наесен Македонија да добие чиста препорака од ЕК.  Реални се шансите Македонија да стане 30. земја членка на НАТО. Реалност се економските перспективи, спокој во семејствата, децата дома, нови вработувања, успешни претпријатија, европско образование, современо здравство“, порача премиерот и претседател на СДСМ, Зоран Заев, во неговиот говор по повод 8 Септември, Денот на независноста на Република Македонија, на прославата во местото Три Круши во Драчево, што ја организираше неговата партија.

– Чекорот кон слободата и кон шансите го направивме заедно. Исто како што на 8 септември пред 26 години граѓаните масовно, самостојно излегоа на референдумот и избраа независна Република Македонија, и ние во големо мнозинство, сплотени во различностите, со силна верба во вистината и во правдата, избравме слобода. Затоа што, ако нешто е темел на социјалдемокртаската идеја, тоа е нашето чувство за солидарност и за слобода. И бидете горди и на тоа. Оваа шанса да бидеме подобри е нашата иднина. Затоа подаваме рака на сите. Затоа се отворивме за сите. Затоа работиме со сите – рече, меѓу другото, Заев.

Тој на сопартијците им порача дека треба да се подготвени за различностите по која било основа и за критичката мисла.

Премиерот Заев пред прославата во Три Круши, на градските гробишта Бутел во Скопје оддаде почит и положи венци со свежо цвеќе на вечните почивалишта на претседателите на Република Македонија, Киро Глигоров и Борис Трајковски.


Анѓушев: Мора да направиме држава во која ќе владее правото


Куманово, 2 август, 2017 - 13:29 (META) 

Вицепремиерот за економски прашања, Кочо Анѓушев, денеска се обрати на свеченоста по повод првото заседание на АСНОМ, во Меморијалниот центар во Пелинце.

Тој рече дека во државотворната историја и континуитет на еден народ, декларациите, документите, усвоените одлуки и резолуции се важен момент, но она што е уште поважно се визионерските принципи.

–  Граѓаните на Македонија ги утврдија и се определија за сопствените стратешки цели – членството во НАТО и Европската Унија, соодветно на современите прифатливи безбедносни и економски концепти. Предолго бевме надвор од тие текови. Дел од причините беа објективни, но дел од проблемите се генерираа и однатре – рече Анѓушев.

Осврнувајќи се на пораката од Крушевскиот манифест, рече дека мора да направиме држава во која ќе владее правото.

– Нема да биде тоа држава во која главните виновници и криминалци ќе бидат избегани, а луѓето ќе лежат во затвор за ситни прекршоци. Тоа мора да биде држава со економски просперитет за сите граѓани и во која нема да се делиме – порача Анѓушев.


Тимоние: Франција ги поддржува изградбата на правната држава и унитарноста на Македонија


Скопје, 15 јули, 2017 - 14:45 (META) 

Четвртина век како Франција е на страната на Македонците за да се зајакне државата и нејзината унитарност и ги придружува во изградбата на правната држава, што е услов кој важи за сите идни интеграции кон кои земјата легитимно се стреми, порача амбасадорот на Франција во Македонија, Кристијан Тимоние, на вчерашниот говор на свечениот прием на Националниот ден на Франција.

На приемот во Македонско село, Тимоние ги нагласи заложбите на Франција за спроведување на неопходните реформи во Македонија и за Европа, која ќе стане целосна кога ќе се приклучат земјите од Западен Балкан.

– Оваа година, францускиот празник е во знакот на споделената надеж која уште повеќе ќе нè обедини, надежта за европска иднина за која се изјаснија нашите два народa, со која им се дава нов патоказ, оној за спроведување на неопходните реформи, за изградба на простор за мир и за просперитет, колективна амбиција за она што треба да биде Европа. Европа, која нема да биде целосна, како што напиша нашиот претседател Макрон во писмото до претседателот Иванов, сè додека не се приклучат земјите од Западен Балкан. Тоа е огромната задача која ни престои на сите и поради која сè уште сме и ќе бидеме секогаш на ваша страна. Тоа не е само Европа на автопатишта и на тендери, на помош и на субвенции, туку Европа на заеднички вредности кои посакуваме да ги имаме сите, а кои ние Французите ги славиме денес заедно со Вас. Вредностите на нашата девиза: слобода, еднаквост, братство – рече, меѓу другото, францускиот амбасадор.

На приемот беа и премиерот Зоран Заев и претседателот на Собранието, Талат Џафери, како и министри, странски амбасадори, градоначалници и верски великодостојници.


ВМРО-ДПМНЕ: Опседнатоста на СДС со нас нема да донесе полза за граѓаните


Скопје, 17 јуни, 2017 - 22:15 (META) 

ВМРО-ДПМНЕ вечерва се огласи со одговор на реакцијата на СДСМ на говорот на претседателот на опозициската партија, Никола Груевски, на вечерашната прослава на 27. роденден на партијата.

„Оваа опседнатост на СДС со ВМРО-ДПМНЕ и со Никола Груевски нема да им помогне на Ибраимовски, Шапуриќ и на Марко да донесат нови инвестиции, како тоа што го правеше тимот на ВМРО-ДПМНЕ кој донесе стотици инвеститори.Оваа опседнатост на СДС со ВМРО-ДПМНЕ и со Никола Груевски нема да помогне да падне невработеноста, како во време на ВМРО-ДПМНЕ кога таа од речиси 39 отсто падна на 22,9 отсто. Оваа опседнатост на СДС со ВМРО-ДПМНЕ и со Никола Груевски нема да отвори нови работни места, како што ВМРО-ДПМНЕ успеа да отвори околу 170.000 нови работни места“, се вели, меѓу другото, во реакцијата.


СДСМ: Годините на криминално владеење на Груевски завршија


Скопје, 17 јуни, 2017 - 21:12 (META) 

Единаесетте години власт на ВМРО-ДПМНЕ под водство на Никола Груевски ќе бидат запаметени единствено како години на криминал, корупција, сиромаштија и на масовно иселување на работоспособното население надвор од државата, порача СДСМ вечерва во реакција на говорот на претседателот на ВМРО-ДПМНЕ, Груевски, на 27. роденден на партијата.

„Катастрофата што ова криминално раководство на ВМРО-ДПМНЕ ѝ ја направи на Македонија е најголемиот антидржавнички чин во современата историја. Погубните политики во владеењето на Груевски и на неговите соработници резултираа со меѓународна изолација, партизирано судство, криминални тендери, урнисани државни институции и со огромно незаконско богатење на криминалното раководство на ВМРО-ДПМНЕ. Никола Груевски и ВМРО-ДПМНЕ за речиси 11 години владеење имаа неброени шанси да направат нешто добро за граѓаните и за државата. Но, наместо тоа, Груевски и соработниците беа единстевните кои правеа сè да ја осиромашат, да ја изолираат и да ја уназадат државата, додека во меѓувреме криминално се богатеа“, порача СДСМ.

Владејачката партија вели дека граѓаните навистина ќе ја увидат разликата помеѓу ВМРО-ДПМНЕ и СДСМ, оти СДСМ преку новата влада што ја предводи ќе ги санира штетите од владеењето на Груевски, ќе ги врати правдата, економскиот напредок и животот и ќе ги отвори евроатлантските перспективи.