Тодоров: ВМРО-ДПМНЕ создаде „трол фарми“ кои шират говор на омраза


Скопје, 4 декември, 2018 - 14:12 (META) 

Во телевизиско интервју, Никола Тодоров, поранешен висок функционер на ВМРО-ДПМНЕ, откри дека партијата создала и сé уште активно работи на онлајн „трол фарми”. Тодоров беше министер за образование и министер за здравство, но подоцна беше избркан од новото раководство на партијата, пишува „Глобал војсес“.

Во видеото, поранешниот министер, кој сега работи како адвокат, објаснува дека партијата има воспоставено систем за поттикнување на членовите на партијата и да искажуваат сериозни закани и да користат говор на омраза против луѓето онлајн. Тој имплицира дека тој систем функционира долго време.

Тодоров: …Видете сега. Тоа се оние ботови. Партиски ботови, коишто имаат задача да ги спроведат тие негативни или деструктивни идеи на раководството на ВМРО-ДПМНЕ и да шират говор на омраза и да шират невистини … Каква група … Целиот тој систем на линч на социјални мрежи којшто го има изградено ВМРО-ДПМНЕ во овој момент е многу опасен. И би рекол … Се плашам дека ќе ги заглават тие луѓе коишто работат во тој систем. Тоа се млади луѓе, на дваесетина години, коишто седат позади компјутер …

Новинарка: Сега конкретно, во оваа ситуација, тоа е нешто ново, или …?

Тодоров: Не (е ново). Тоа функционира во ВМРО-ДПМНЕ и така ВРМО-ДПМНЕ функционира. Даваат насока „расчерете го Никола Тодоров на социјална мрежа“. И знаете како функционира тоа после? Има дваесетина луѓе којшто седат пред компјутер, имаат по 10 или 15 лажни профили, секој од нив … И почнуваат со закани, навреди, измислици итн. а позади стојат лажни профили. Ако има двесетина луѓе со по, не знам, петнаесеттина лажни профили, се креира некаква перцепција дека огромен број на луѓе, не знам, триста – двеста, триста, четрсто луѓе мислат на еден начин. А тоа не е така. Ако е тој систем направен да се креира перцепција и да има политичка функција, односно да се стекнат некакви политички поени, можеби можам и да разберам. Ама ако тој систем е ставен на едно (ниво) … Деструкцијата на тој систем е ставена на максимум и се однесува и се служи со закани, со навреди итн. тогаш е тоа hate speech, тоа е ширење говор на омраза. Тоа е забрането и многу опасно.


Словенечкиот премиер ги повика државните фирми да ги повлечат рекламите од медиуми што шират говор на омраза


Скопје, 27 ноември, 2018 - 17:03 (META) 

Словенечкиот премиер Марјан Шарец ги повика сите компании во државна сопственост да размислат за повлекување на нивните реклами од медиуми што шират говор на омраза.

– Вистина е дека слободата на медиумите и слободата на говорот се столбови на демократијата, но тоа не значи дека тие се неограничени – порача Шарец во изјава на сајтот на словенечката влада.

Македонската влада пак во август минатата година соопшти дека го прекинува владиното рекламирање на приватните медиуми, но нема донесено правила за рекламирање преку социјалните медиуми и го задржува правото да се рекламира преку јавниот радиодифузен сервис МРТ.

Дополнително, Здружението на новинарите на Македонија (ЗНМ) реагираше што од Изворниот законик не се брише спорниот член со кој се овозможува и во иднина јавните пари да се трошат за политичко рекламирање на партиите во кампања.


Се подготвуваат поригорозни казни за кривичните дела извршени од омраза


Скопје, 16 ноември, 2018 - 17:07 (META) 

Се очекува Кривичниот законик на Република Македонија да претрпи измени во 31 член, со цел кривичните дела извршени од омраза да бидат повидливи, односно лицата што ќе извршат кривични дела како резултат на омраза во иднина ќе се казнуваат поригорозно, пишува „Порталб“.

Министерството за правда, по 20-дневен јавен увид, го поднесе новиот нацрт-закон за злосторства од омраза во Владата, а се очекува следната недела од таму да биде доставен до Собранието за усвојување. Со овој предлог, Министерството за правда не предвидува правни измени за говорот на омраза, што е казниво кривично дело, туку само во поглед на кривичните дела извршени како резултат на омраза.

„Овој закон се заснова на истите принципи на кои се заснова Кривичниот законик. Главна цел на овие измени е да се дополни Кривичниот законик и да се подигне видливоста на делата на омраза, преку опис на правната дефиниција на тој термин и предвидува посебни форми на кривични дела од омраза во Посебен дел, што согласно принципите на законитост ќе ги задолжи органите на редот да ги откријат, утврдат и да ги гонат таквите дела”, се вели во појаснувањето на предлог-законот.

Според извештајот на ОБСЕ/ОДИХР, Македонија нема евидентирано никакви официјални податоци за откривање, гонење и казнување на сторители на дела од омраза. Такви податоци евидентира само Хелсиншкиот комитет за човекови права.

Според податоците објавени на нивната веб-страница „Злосторства од омраза“ во периодот од февруари 2013 до 30 септември 2018 година, се регистрирани 464 инциденти.

Во сите години, најголемиот дел од овие инциденти се случиле во Скопје. Станува збор за кривични дела „нанесување тешки телесни повреди“, „насилство“, „загрозување на безбедноста“, „оштетување на туѓи објекти“ итн.

Но, официјалните бројки, како за случаи на говор на омраза, така и за кривични дела извршени како резултат на омраза, се далеку од реалноста. Имено, во 2015 година, полицијата пријавила пет случаи, а за три се подигнати обвиненија и двајца од нив се осудени, додека во 2016 година, се поднесени само две пријави од страна на полицијата, но никој не е осуден.


Мнозинството граѓани не знаат каде треба да пријават говор на омраза во медиумите


Скопје, 9 ноември, 2018 - 17:07 (META) 

Мнозинството од граѓаните немаат одговор за тоа каде треба да поднесат пријава доколку забележат дека некои од медиумите шири говор на омраза, што претставува кривично дело кое се казнува со парична глоба и казна затвор од 1 до 5 години, покажува спроведената анкета од страна на Центарот за истражувања ИПСОС Македонија“, подржана од Фондацијата Конрад Аденауер и Здружението на новинари на Македонија, пишува „Порталб.мк“.

Истражувањето било спроведен во септември годинава на 1.033 испитаници.

Според анкетата, 46,2 отсто од граѓаните не дале одговор на прашањето каде треба да го пријават доколку забележат говор на омраза во медиумите, 9,2 проценти велат дека тоа би го пријавиле во Агенцијата за аудио и аудиовизуелни услуги, 8,5 отсто во Советот на честа на ЗНМ, 8,4 проценти во Комисијата за заштита од дискриминација, 6,7 отсто во Комисијата за слободен пристап до информациите од јавен карактер, 6,2 проценти во институцијата Народен Правобранител на Македонија, 5,2 отсто во Советот за етика на медиумите на Македонија и 2,9 отсто во Јавното обвинителство.

Претходно од Хелсиншкиот комитет за „Порталб.мк“, изјавија дека граѓаните на Македонија многу малку се запознаени и препознаваат говор на омраза, бидејќи правната рамка е непрецизна. Тие бараат власта да спроведе кампања со цел јавноста да биде запознаена со говорот на омраза.

Од друга страна, Владата на Македонија преку националната стратегија за развивање на концептот „Едно општество и интеркултурализмот во Македонија“, ќе се бори против говорот на омраза, а најавуваат и нови пријави кои ќе се поднесат од МВР за лицата кои ширеле говор на омраза низ социјалните мрежи и други начини.

Стратегијата ќе се изготви во период од шест месеци во форма на документ, и според власта е важен имајќи го предвид степенот на поделба на општеството по разни основи.


СВР и ОЈО се координираат за расчистување на случајот со говорот на омраза на навивачките групи


Тетово, 7 ноември, 2018 - 13:35 (META) 

Полицијата и Обвинителството работат координирано во обелоденувањето на настаните кои се случија во саботата и неделата во Тетово во кои навивачите на групите „Војводи“ и „Балисти“ користеле говор на омраза по етничка основа, а кое според Кривичниот законик е кривично дело казниво со глоба или казна затвор од 1 до 5 години, известува „Порталб.мк“.

Во саботата, навивачката група „Војводи“ од Тетово ја славеа 30 годишнината на нивното постоење и во текот на марширањето по градските улици користеа навредливи извици кон Албанците. Еден ден потоа, односно во неделата, по завршување на натпреварот помеѓу Шкендија и Шкупи во Тетово, навивачката група „Балисти“, им возврати на „Војводите“, исто така со навредливи зборови, но упатени кон Македонците.

– Нашиот став е многу едноставен, ние не го започнавме ова, тие почнаа први и потоа ние им возвративме – вели водачот на навивачката група од Тетово „Балисти“, Исак Лума.

Од друга страна, „Војводите“ велат дека тие не предизвикале никаков инцидент, и бараат од органите на редот и прогонот да не ги изедначуваат со „Балистите“.

– Како навивачка група одговорно тврдиме дека од наша страна не е предизвикан никаков инцидент и бараме од МВР и Обвинителството да не ги ставаат „Војводите“ во ист кош со нашите варварски соседи кои како што се гледа не можат да се соочат со нас и нашиот успех и заради тоа ги напаѓаат невините граѓани и објектите – велат од навивачката група.

Министерот за внатрешни работи, Оливер Спасовски, вели дека се преземаат мерки за двете навивачки групи.

– Определивме посебна задача во делот на превенцијата и работиме со двете навивачки групи. Не смееме да дозволиме нивните судири со говор на омраза да станат секојдневие во Република Македонија – вели Спасовски.

Вчера, раководството на СВР Тетово, одржа средба со претставници на ОЈО за целосно расчистување на случаите со навивачките групи.

На средбата се договориле координативни активности за квалификување на настаните, понатамошната динамика и чекори, за комплетно расчистување на случајот и финално заокружување со подготовка на соодветни тужби против инволвираните поединци.

На прашањето на „Порталб.мк“, дали е покрената некоја соодветна тужба за сторителите, полицијата и Обвинителството со ист одговор дека се работи на идентификување на лицата и дека ќе информираат кога ќе ги поднесат соодветните пријави.


Граѓаните малку го препознаваат говорот на омраза, надлежните воопшто не го препознаваат


Скопје, 6 ноември, 2018 - 13:18 (META) 

Граѓаните на Македонија многу малку го препознаваат говорот на омраза. Врз основа на податоците и статистиките, органите на јавниот ред и мир не ги земаат предвид тужбите за ваквото кривично дело, а потребна ни е и попрецизна законска рамка и кампања од извршната власт за спречување на говорот на омраза што во земјава се шири во алармантни размери, особено во последната деценија, пишува „Порталб.мк“.

Според Хелсиншки комитет за човековите права, се проценува дека во Македонија не е регулирана законската рамка за говорот на омраза, односно не е прецизна, граѓаните не го препознаваат ова кривично дело, за што извршните власти треба да промовираат кампањи, а судската власт треба конечно да почне да ги санкционира сторителите.

„Правната рамка за препознавање и санкционирање на говорот на омраза не е прецизна и не овозможува јасна рамка за дефинирање и опфаќање на говорот на омраза, со што не создава услови за развој на судската практика. Има недостаток од јавните области за препознавање на говорот на омраза и спречување на истиот во јавните простори, со што појавата на препознавање на говорот на омраза кај граѓаните е слаба“, велат од Хелсиншкиот комитет.

Хелсиншкиот комитет врши надзор и пријавување на говорот на омраза во платформата говорнаомраза.мк. Од февруари 2014 година, до денес се регистрирани 551 случаи, од кои 341 се уважени и проверени, но никој не е казнет. Поголемиот дел од пријавите се поради етничка припадност, политичка припадност и сексуална ориентација и родов идентитет.

„Според судските статистики, можеме да заклучиме дека е особено мал бројот на судски постапки и дека за ова можеме да кажеме дека ова дело не се препознава и се занемарува, со што оневозможува судски практики како основ за унапредување на ова право. Хелсиншкиот комитет има доставено вкупно 9 кривични пријави за говор на омраза врз различни основи во периодот од 2013 година до 2018 и има поднесено 13 пријави во Одделот за Компјутерски криминал и вештачење на МБР, но за ниту едно од овие пријави не е покрената тужба во кривичните судови и за истите нема судска завршница“, велат од Хелсиншкиот комитет.

Од таму бараат извршната власт да се ангажира околу промовирањето на вредностите на еднаквост и толеранција кон разликите, како и да понуди едукативна содржина за јавноста за да може да препознаат говор на омраза.

Инаку, Владата на Македонија преку националната стратегија за развивање на концептот Едно општество и интеркултурализмот во Македонија, ќе се бори против говорот на омраза, а најавуваат и нови кривични пријави преку МВР за лицата кои ширеле говор на омраза по социјалните и другите мрежи. Стратегијата ќе се изготви во период од шест месеци во вид на документ и според важноста е значаен имајќи ја во предвид поделбата на општеството на разни основи.

Сите граѓани кои се изложени на говор на омраза, случаите можат да ги пријават во МВР, Обвинителство, Комисијата за Заштита од дискриминација, Агенцијата за Аудио и Аудиовизуелни Медиумски Услуги, Здружението на Новинари на Македонија – Совет на честа, во Советот за Етика на Медиумите во Македонија (КЕММ), исто така и во онлајн на платформата www.govornaomraza.mk.

Од февруари 2014 година во Република Македонија, во сила стапиле новите законски одредби со кои се забранува и казнува говорот на омраза и ширењето на материјали преку интернет, со кои се промовира или поттикнува омраза, дискриминација или насилство, против било кој поединец или група, врз било кој основ на дискриминација. Со измените во Кривичниот Законик кои ги усвои Собранието по итна постапка на почетокот од 2014 година и стапија во сила во средината на февруари (осум дена по нивното објавување во Службен весник на Р. Македонија, бр. 27 од 05.02.2014), за сторителите се предвидуваат парични казни и казна затвор од 1 до 5 години.


Хелсиншки комитет го осуди говорот на омраза и насилството на навивачката група „Балисти“


Скопје, 5 ноември, 2018 - 14:26 (META) 

Хелсиншкиот комитет за човекови права на Република Македонија најостро го осудува вчерашниот инцидент во Тетово предизвикан од припадници на навивачката група „Балисти“.

Од објавените видеа од случувањата на тетовските улици, се слушаат песни и извици  каде е забележан говор на омраза  и повикување на насилство, по што следело и “извршување на дело од омраза”, односно фрлање со камења и шишиња врз кафуле полно со гости, посочуваат од организација.

Хелсиншкиот комитет нагласува дека со посебно внимание ќе го следи разрешувањето на овој инцидент и ќе бара најстроги казни зa дела од омраза и говор на омраза, чија цел е предизвикување меѓуетнички тензии и насилство.


Со концептот „Едно општество” и со кривични пријави владата ќе се бори против говорот на омраза


Скопје, 31 октомври, 2018 - 17:02 (META) 

Владата преку националната стратегија за развој на концептот „Едно општество” и на интеркултурализмот во Македонија, ќе се бори против говорот на омраза, појава што достигнува загрижувачки размери и со тужби за прекршителите. Досега се поднесени пет такви тужби, а најавена е нова тужба од страна на Министерството за внатрешни работи за лица кои ширеле и шират говор на омраза на социјалните мрежи и на други места, јави Порталб.мк.

„Владата нема да го толерира развојот и порастот на говорот на омраза и ќе работи посветено на уништувањето на оваа појава. Министерството за внатрешни работи во изминатите две недели поднесе пет кривични пријави до Основното јавно обвинителство, а следат и пријави од Министерството за внатрешни работи во Основното јавно обвинителство за говор на омраза што се шири во медиумите и социјалните мрежи. По долго време институциите во Република Македонија дејствуваат за да го спречат говорот на омраза“, велат од Владата.

Се планира да се подобри правната рамка за превенција и санкционирање на говорот на омраза, преземање мерки за да се намали нивото на омраза меѓу младите луѓе од различни заедници, работа со навивачките групи за да искорени меѓуетничката омраза и манифестации на расизам, за градење на политики и организирање на голем број настани и манифестации, со чии содржини актерите и пораките ќе имаат за цел да ја зголемат интеркултурната толеранција. Стратегијата ќе се изготвува за период од шест месеци во седум работни групи.


Во Македонија „врие“ од говор на омраза, но случаите ретко имаат судска завршница


Скопје, 29 октомври, 2018 - 11:16 (META) 

Од стапувањето на сила на новите законски измени на Кривичниот законик за говор на омраза во февруари 2014 година, Кривичниот суд Скопје има осудено само две лица со парична глоба поради говор на омраза.

Бројот на казни е многу мал, споредено со пријавите на дигиталната платформа „Пријави и спротивстави се на говорот на омраза” каде за истиот период се евидентирани 341 случаи, додека полицијата има поднесено кривични пријави за 24 случаи, пишува „Порталб.мк“.

Полицијата го истражува говорот на омраза со бавно темпо, додека судството не го казнува, со оглед на големиот број пријави кои се поднесени во граѓанската дигитална платформа за пријавување на говор на омраза. Освен тоа, во Македонија, особено за време на владеењето на ВМРО-ДПМНЕ, според анализата на „Порталб.мк“, говорот на омраза бил многу нагласен, а имало и еклатантни случаи кога некои лица и групи јавно го користеле, но истовремено не бил санкциониран од органите за редот.

Според податоците кои ги обезбедил порталот, во текот на периодот 2014-2018, Кривичниот суд има осудено само две лица со парична глоба, и тоа во 2017 година.

За истиот период, Министерството за внатрешни работи има евидентирано уште 22 други случаи на говор на омраза, но ниту еден од нив нема судски епилог во Кривичниот суд.

Судот ги осудил двете лица според член 181 од Кривичниот законик, кој предвидува парична глоба или затвор до три години за лице кое се потсмева со странска држава или со нејзините највисоки државни претставници.

Дополнителни податоци за говор на омраза може да се најдат и преку интернет платформата „Пријави и спречи говор на омраза”. Граѓаните во оваа веб-платформа пријавиле десет пати повеќе случаи на користење на говор на омраза во споредба со кривичните пријави кои се покренати од страна на полицијата.

Според статистичките податоци кои се објавуваат преку оваа веб-платформа, од 2014 до 2018 година, граѓаните пријавиле 341 случаи на користење на говор на омраза, а во повеќето од нив ваков вид говор се користел врз основа на етничка, политичка и сексуална припадност.

Инаку, овој месец, МВР има поднесено кривични пријави против лица кои користеле говор на омраза и им се заканувале на пратениците кои гласаа за уставните измени, како и против новинарот Миленко Неделковски и актерот Тони Михајловски, и двајцата блиски со поранешната влада на ВМРО-ДПМНЕ. Неделковски е обвинет за „Загрозување на безбедноста” и „Дистрибуција на расистички и ксенофобични материјали”, додека Михајловски е обвинет заради упатена закана кон новинарот Бранко Тричковски.

Сите граѓани кои се изложени на говор на омраза, случаите може да ги пријават во полиција односно МВР, во Обвинителство, Комисијата за заштита од дискриминација, Агенцијата за аудио и аудиовизуелни медиумски услуги, Здружението на новинари на Македонија – Совет на Честа, во Советот за етика во медиумите во Македонија (KЕММ), но и во онлајн платформа “www.govornaomraza.mk”.


ОЈО: Кривична пријава за две лица од Битола за говорот на омраза во Крушево


Скопје, 6 август, 2018 - 12:35 (META) 

Основното јавно обвинителство Прилеп презема дејствија за утврдување на факти и прибирање докази во врска со нападите и говорот на омраза кои беа изречени за време на одбележувањето на државниот празник на Мечкин камен, информираат од ОЈО.

„Во обвинителството е пристигната кривична пријава поднесена од МВР – СВР Битола, против две лица и други непознати лица а за сторено кривично дело – Предизвикување омраза, раздор или нетрпеливост врз национална, расна, верска и друга дискриминаторска основа од член 319 од Кривичниот законик“, велат од ОЈО.

Со кривичната пријава на двајцата осомничени, жители на Битола, заедно со засега се уште непознати лица, им се става на товар дека за време на прославата употребувале говор на омраза кој бил забележан на видео запис и емитуван на една од националните телевизии.

Од ОЈО додаваат дека надлежен обвинител од Основното јавно обвинителство Прилеп во континуитет презема дејствија за да го расчисти кривично правниот настан.