Руско МНР: На референдумот беа бојкотирани решенија наметнати од надвор


Москва, 2 октомври, 2018 - 11:14 (META) 

Резултатот од референдумот во Македонија покажува дека гласачите одлучија да бојкотираат решенија наметнати од надвор, соопшти руското Министерство за надворешни работи.

„Водечките политичари од НАТО и Европската Унија директно се вклучија во пропагандната кампања, не воздржувајќи се од мешање во внатрешните работи на земјата. И покрај фактот што две третини од граѓаните на Македонија не го поддржаа Преспанскиот договор, резултатите од референдумот веднаш беа поздравени од лидерите на ЕУ и НАТО, како и од Вашингтон. Тие се решени да го вклучат Скопје во НАТО и покрај спротивниот став на македонските граѓани“, наведуваат од МНР на Русија.

Официјална Москва, како што се посочува, и натаму ја застапува принципиелна позиција дека долгорочно решение може да се најде само меѓу двете земји, без мешање однадвор, и исклучиво во рамките на правниот систем и со широка јавна поддршка.

„Јасно е дека Преспанскиот договор не ги исполнува овие критериуми. Тој е контрадикторен со меѓународното право и македонскиот Устав, што беше постојано нагласувано од претседателот на државата Ѓорге Иванов, вклучувајќи го и неговото обраќање пред Генералното собрание на ОН. Русија како постојана членка на Советот за безбедност на ОН внимателно ја следи ситуацијата. Сметаме дека согласно став 3 од Резолуцијата 845 на СБ на ОН, резултатите од преговорите меѓу Скопје и Атина треба да бидат разгледани во Советот за безбедност“, се вели во соопштението од руското МНР.

Рускиот амбасадор Сергеј Александрович Баздникин, во интервју за „Спутник“ изјави дека она што е факт, е дека резултатите од гласањето потврдија дека референдумот е неважечки, имајќи предвид дека на референдумот излегоа само 36,9 отсто од гласачите со право на глас, а требаше да излезат 50 отсто плус еден гласач.


Иванов: Реалност е дека референдумот не успеа, Македонија остана непоразена


Скопје, 1 октомври, 2018 - 17:46 (META) 

На вчерашниот референдум народот го отфрли Преспанскиот договор. Со негласање, народот јасно се изјасни против избрзани, наметнати и штетни решенија донесени без претходно постигнат национален консензус. Бојкотот е гласот на оние кои се потценети и не се слушнати, рече претседателот на државата Ѓорге Иванов во обраќањето да македонскиот народ и граѓаните на Република Македонија.

– Пораката од народот е испратена до оние кои мора да ја слушнат. Реалноста е дека референдумот не успеа. Не се обидувајте да ја измените оваа реалност. Не ја потценувајте суверената волја на македонскиот народ. Не може да се зборува за волја на мнозинството во услови кога не е исполнет законскиот цензус за референдум. 36,9% излезност не е волја на народот, туку 63,1% кои не излегоа – рече Иванов.

Тој упати порака и до како што вели, оние кои се мешаат во внатрешните работи на Република Македонија и непринципиелно заземаат страна.

– Им порачувам да ги почитуваат меѓународните конвенции за дипломатски односи. Не може оние кои имаат демократски дефицит да наметнуваат решенија спротивни на суверената волја на македонскиот народ – рече Иванов и додаде дека референдумот не е анкета, односно дека одлуката на граѓаните обврзува и дека Собранието таа одлука мора да ја почитува.

Според него, нема дилеми дека местото на Република Македонија е во ЕУ и НАТО, но додава дека таму треба да влеземе без уцени, притисоци и двојни стандарди.

-Речиси во сите одлучувачки моменти од историјата на Македонија, народот носел мудра одлука. Наше е да ја почитуваме таа одлука. Ова треба да биде поука за сите политички партии да внимаваат што и кому ветуваат. А како граѓанин, пак, очекувам од владејачкото мнозинство да понесе одговорност за неуспешниот референдум. Сите во животот се соочуваме со порази. Некој повеќе, некој помалку. Големината на човекот е да го препознае и признае поразот – рече Иванов и додаде дека вчера, Република Македонија остана непоразена.


Сите бегства на Ѓорге Иванов (инфографик)


Скопје, 25 септември, 2018 - 14:59 (META) 

Претседателот Ѓорге Иванов во клучните моменти за Македонија аболицирал или поништувал или непотпишувал или не бил тука, па се враќал или требало да оди, па не одел ама немало да гласа.

Иванов на 9 мај 2015 година кога изби вооружената престрелка во Куманово беше во Москва на прославата за 9 Мај – Денот на победата над фашизмот. Следниот ден, кога работите станаа поизвесни, се врати во земјата.

Таа година на парадата во Москва не дојдоа претставници на земјите членки на НАТО, како и на други земји кандидати, во знак на протест поради агресијата врз Украина.

Во полициската акција за разбивање на вооружена терористичка група во кумановската населба „Диво насеље“ загинаа 8 полицајци. Настаните во Куманово се случија во период на сериозна политичка криза во Македонија и во период кога, од 5 мај, започнаа антивладини протести.

На 12 април 2016 година Иванов објави дека донел одлука да потпише аболиција за сите политичари против кои се води истрага во рамките на СЈО. Во екот на отворањето на најголемите скандали и криминали во македонската историја со случаите на СЈО, Иванов прогласи амнестија за 57 лица и со тоа го закочи, закомплицира и го доведе во прашање целиот обид за нивно расветлување и за кривично и судско гонење на актерите.

На 6 јуни 2016 година Иванов, по серија убедувања натегања и средби ја укина амнестијата.
Според него „за разлика од 12 април, денеска имаме нова реалност во Македонија и во услови на надворешни закани и безбедносни ризици, имаме функционални институции, кои можат да се справат со предизвиците“

На 1 март 2017 Иванов не му го даде мандатот за формирање влада на лидерот на СДСМ Зоран Заев. И покрај освоените гласови и подготвената коалиција Иванов соопшти дека одбива да му го даде мандатот за формирање влада на лидерот на СДСМ, Зоран Заев. За Иванов беа спорни роковите и преговорите за „туѓи платформи“. Овој негов потег беше вовед во настаните од 27 април 2017 кога во насилен упад во Собранието беа повредени пратеници и новинари и целата земја беше на работ на меѓунационален и меѓуетнички судир.

На 17 мај 2017 Иванов, сепак, му го даде мандатот на Заев. Иванов прво на 1 мај, по средбата со заменик-помошникот на државниот секретар за европски и евроазиски прашања на САД, Хојт Брајан Ји, побара гаранции „за зајакнување на унитарноста на државата и дека сè ќе биде во согласност со Уставот на Република Македонија”, па му го додели мандатот на Заев за формирање влада.

На 17 јануари 2018 Иванов не го потпиша законот за употреба на јазиците. Иванов вели дека законот е „неправеден и репресивен и го фаворизира само албанскиот јазик.“ Според Иванов, „со овој закон се воведува многу скап паралелизам во сите органи на државната власт што води кон нивна целосна блокада и нефункционалност“.

На 26 јуни, 2018 година Иванов не го потпиша законот за ратификација на спогодбата со Грција. Иванов смета дека „ нема мандат да го потпише Указот за прогласување на законот за ратификација бидејќи еден од столбовите на неговата политика во изборната програма од 2014 година е дека не прифаќа промена на Уставот со цел промена на уставното име.“

На 22 септември 2018 година пред пред дијаспората во САД изјави дека на 30 септември нема да излезе да гласа, и нема да пополни референдумско ливче. „На 30 септември нема да излезам да гласам. Кога ја преземав функцијата претседател на Република Македонија, положив свечена изјава дека ќе ги почитувам Уставот и законите. Не отстапувам од таа моја заклетва. Затоа, на 30 септември нема да излезам да гласам“, рече Иванов.


СДСМ: Иванов останува сам, заробен во сопствената идеја за изолација


Скопје, 24 септември, 2018 - 11:28 (META) 

Во клучната недела за иднината на државата и нејзините граѓани, Ѓорге Иванов одлучи да не ја напушта својата идеја за изолација на Македонија, се вели во реакцијата на СДСМ на изјавата на претседателот Ѓорге Иванов.

Во неа се додава дека „очигледно е дека Иванов е навикнат да им предизвикува проблеми на сопствените граѓани, дури и на оние кои го гласаа.“

„Последниот остаток од криминалниот режим на ВМРО-ДПМНЕ, Ѓорге Иванов е противник на демократијата, бидејќи ја спори најважната демократска алатка – гласањето.  А, токму преку гласање и избори, Иванов стана претседател. Ставот на Иванов е срамно бегство од одговорност. За среќа на граѓаните, Иванов не е тој кој одлучува за иднината. Иванов е премал и премалку важен, граѓаните и нивната волја се тие кои се големината на Македонија, тие ќе ја донесат одлуката. Иванов, за жал, останува да биде лице кое сее омраза и кое ги дели граѓаните, претседател кој оди спротивно на волјата на граѓаните, претседател кој избран преку гласање, а денес има проблем со гласањето“, се додава во соопштението на СДСМ.


Иванов: Нема да излезам да гласам на референдумот на 30 септември


Детроит, 24 септември, 2018 - 10:15 (META) 

Претседателот Ѓорге Иванов нема да гласа на референдумот за промена на името. Тој пред Обединетата Македонска Дијаспора во Детроит рече дека пред 27 години гласал за независна држава со достоинство и дека нема да отстапи од ветувањето кое го дал пред граѓаните.

– Што се однесува до мене, јас веќе гласав. Гласав пред 27 години, на 8 септември 1991 година. Јас бев еден од оние кои го дадоа својот глас за Република Македонија да се конституира како суверена и независна држава, со свое име и свое достоинство. Не отстапувам од таа моја одлука. Затоа, на 30 септември нема да излезам да гласам. Два пати ја добив довербата на граѓаните за да не дозволам промена на уставот со цел промена на уставното име, да не прифаќам идеи и предлози што би ги загрозиле македонскиот национален идентитет, посебноста на македонската нација, македонскиот јазик и македонскиот модел на соживот. Не отстапувам од тоа мое ветување. Затоа, на 30 септември нема да излезам да гласам – рече Иванов.

Претседателот во моментот е во посета на САД. На 27 септември ќе има обраќање на генералната дебата на 73. сесија на Генералното собрание на Обединетите Нации. Предвидено е да оствари средба со генералниот секретар на ОН, Антонио Гутереш, како и повеќе билатерални средби со шефови на држави и влади, учесници на Генералното собрание.


Иванов во посета на САД, ќе се обрати на 73. сесија на Генералното собрание на ОН


Њујорк, 20 септември, 2018 - 12:38 (META) 

Претседателот на Република Македонија, Ѓорге Иванов, од денеска ќе престојува во работна посета на Соединетите Американски Држави, по повод учеството на 73. сесија на Генералното собрание на Обединетите Нации во Њујорк, информираат од кабинетот на претседателот.

Иванов на 27 септември ќе има обраќање на генералната дебата на 73. сесија на Генералното собрание на Обединетите Нации на тема: „Да ги направиме Обединетите нации релевантни за сите луѓе: Глобално лидерство и заедничка одговорност за мирни, рамноправни и одржливи општества“.

Во рамки на учеството на Генералното собрание на ОН Иванов ќе се сретне Генералниот секретар на ОН, Антонио Гутереш и ќе има повеќе билатерални средби со шефови на држави и влади, учесници на Генералното собрание.

Предвидено е Иванов да присуствува на настанот на високо ниво – Глобален повик за акција за светскиот проблем со дрогата, со кој ќе претседаваат Претседателот на САД, Доналд Трамп и Генералниот секретар на ОН, Гутереш. Македонскиот претседател ќе присуствува и на Мировниот самит Нелсон Мандела 2018, пленарен состанок на високо ниво посветен на глобалниот мир, а по повод 100-годишнината од раѓањето на поранешниот јужноафрикански лидер.

Претседателот Иванов во Њу Џерси ќе оствари средба со претставници на македонската заедница.

Во рамки на работната посета на САД, на Иванов во Детроит ќе му биде врачена наградата Глобален државник, највисоко признание што го доделува Обединетата Македонска Дијаспора. Во Детроит претседателот Иванов ќе одржи предавање на Државниот универзитет Вејн, во чии рамки е Мајк Илич Школата за бизнис, и ќе оствари средба со македонската црковна заедница во Детроит.

Сопругата на претседателот, Маја Иванова ќе присуствува на настанот со првите дами учеснички на 73. Генерално Собрание на Обединетите Нации во организација на Првата дама на САД, Меланија Трамп, како и на настан кој го приредува Првата дама на Република Турција, Емине Ердоган.


Иванов до Матис: Членството во НАТО и ЕУ остануваат стратешки цели и приоритети


Скопје, 17 септември, 2018 - 13:55 (META) 

Претседателот Ѓорге Иванов, денеска се сретна со секретарот за одбрана на САД, Џејмс Матис со кого разменил мислења за тековните политички случувања во Република Македонија, за евроатлантските перспективи на земјата и за билатералната соработка меѓу двете земји во областа на одбраната и безбедноста, соопшти кабинетот на Иванов.

Македонскиот претседател истакнал дека пристапувањето во НАТО и ЕУ остануваат стратешки цели и највисоки приоритети на Република Македонија, што ќе придонесе за напредок и просперитет на целиот регион.

Тој, како што соопштија од кабинетот, потенцирал дека Република Македонија останува стабилен стратешки партнер на САД и дека и натаму ќе се залага за безбедноста, слободата и демократскиот напредок на регионот и активно ќе придонесува во заедничките активности во борбата против тероризмот и останатите закани на глобално ниво.

Претседателот Иванов се заблагодарил за поддршката што САД ја дава на Република Македонија со цел унапредување на реформите во одбраната и безбедноста, како од аспект на финансиска, така и практична и техничка поддршка преку учество во заеднички обуки, вежби и мисии.

-Иако не сме во НАТО, нашата армија е НАТО компатибилна, и за тоа сме благодарни на САД. Тоа е влог во иднината. Мораме да бидеме подготвени за новите закани и новите предизвици – порача претседателот Иванов на средбата со секретарот за одбрана на САД.

Интензивирањето и унапредувањето на севкупните билатерални односи со САД, додаде претседателот Иванов, се од долгорочен интерес за Република Македонија.


Могерини: На 30 септември нема да гласате на избори туку за вашата иднина


Скопје, 14 септември, 2018 - 9:45 (META) 

Со политичко лидерство и водство, храброст и одговорност можете да одите напред, порача Федерика Могерини, високата претставничка на Европската Унија за надворешни работи и безбедносна политика и заменик-претседател на Европската комисија во скопската чаршија и додаде дека решавањето на отворените прашања и спроведување на европските вредности ја носи Македонија кон ЕУ.

Могерини истакна дека Македонија има огромни резултати кои биле незамисливи пред една и пол година, па поради тоа, отворен е патот во следниот јуни да се отворат претпристапни преговори со ЕУ.

– Мојата порака до граѓаните на вашата земја, запаметете дека на 30 септември кога ќе гласате, вие сте клучот за ЕУ. Не молчете пред вашата иднина. Не можете да ја пропуштите оваа можност. Вие сте вашата иднина. Ова не се избори, ниту нешто поврзано со политика. Мора да бидете сигурни дека на 1 октомври сте направиле избор за вашата иднина, односно сте одлучиле за иднината на вашите деца – рече Могерини.

Таа се сретна и со претседателот на државата Ѓорге Иванов кој и го повторил својот став дека ги поддржува евроатланските интеграции на Македонија, но дека „ЕУ и НАТО не смеат да бидат алиби за лош договор со кој се отвораат многу повеќе прашања, одошто се затвораат“.

Иванов, како што соопшти неговиот Кабинет, порачал дека „стратешките цели не смеат да се злоупотребуваат на сметка на националните интереси и интересите на македонскиот народ“.


Трамп му честиташе на Иванов: Договорот од Преспа го поплочува патот до НАТО и ЕУ


Скопје, 6 септември, 2018 - 16:11 (META) 

Договорот од Преспа го поплочува патот на Македонија до членството во НАТО и Европската Унија, му порачува американскиот претседател Доналд Трамп на својот македонски колега Ѓорге Иванов во честитката за Денот на независноста – 8 Септември. Трамп упати честитки и до граѓаните на Македонија.

„Македонија има многу причини да биде горда за годинава. Историскиот Договор од Преспа го решава долгогодишниот спор за името со Грција и го поплочува патот на Македонија до членство во НАТО и во ЕУ. Договорот и членството на Македонија во НАТО ќе ги зајакнат безбедноста, стабилноста и просперитетот во целиот регион. САД се подготвени да ја поддржат Македонија, особено во претстојните разговори за зашето членство во НАТО“, се вели во честитката на Трамп до Иванов, која денеска беше објавена на веб-сајтот на амбасадата на САД.


Иванов до Столтенберг: Заслужуваме членство во НАТО без дополнителни услови


Скопје, 6 септември, 2018 - 10:58 (META) 

Претседателот Ѓорге Иванов и генералниот секретар на НАТО, Јенс Столтенберг разговарале за актуелната политичка состојба во Македонија, за евроатлантските интеграции на земјата и за напредокот на реформите во одбраната и безбедноста во согласност со НАТО стандардите, информираат од кабинетот на претседателот.

Иванов истакнал дека Македонија е силно посветена на промовирањето на мирот и стабилноста и придонесува за безбедноста во и надвор од нашиот регион.

„Претседателот Иванов потенцираше дека Македонија во континуитет покажува дека е доверлив и стратешки партнер и сојузник на НАТО,  додавајќи дека уште во 2008 година Македонија ги исполни условите за членство во НАТО и сиве овие години активно придонесувајќи во меѓународните мировни мисии, го заслужува членството во НАТО без дополнителни услови“, се вели во соопштението.

Столтенберг изјавил дека вистинското место на Македонија е во Европската Унија и НАТО Алијансата.

„Ќе продолжам да ги поддржувам нашите стратешки цели. Ho, Европската Унија и НАТО во никој случај не смеат да бидат алиби за лош договор“, му порачал претседателот Иванов на Столтенберг.

Иванов истакнал дека сите негови обврски како Врховен командант на вооружените сили во однос на одбраната се завршени и дека АРМ ги исполни поставените задачи и успеа да се покаже како рамноправен партнер со армиите на земјите-членки на НАТО како на обуките, вежбите и проверките, така и во пракса во изведувањето на операциите.

„Во таа насока, претседателот Иванов посочи дека го поддржа процесот на донесувањето на стратегискиот одбранбен преглед согласно препораките на НАТО советодавните тимови и дека новата стратегија, што е исклучиво ориентирана кон зачленувањето во НАТО, е изготовена. Имајки ги предвид новите реални предизвици со коишто се соочуваат регионот и Европа, додаде претседателот Иванов, одржувањето на безбедноста, стабилноста и просперитетот на нашиот регион треба да претставува колективен интерес на сите“, се додава во соопштението.