Иванов изрази сочувство до семејствата на загинатите во сообраќајката кај Ласкарци


Скопје, 13 февруари, 2019 - 23:49 (META) 

Претседателот на државата Ѓорге Иванов изрази сочувство по сообраќајната несреќа кај селото Ласкарци во која загинаа 14 лица.

-Со длабоко жалење и тага ја примив веста за трагичната сообраќајна несреќа на автопатот Скопје – Тетово, што се случи попладнево. Во овие тажни мигови дозволете да изразам најдлабоко сочувство до семејствата на загинатите патници. Моите мисли се со нив. На повредените им посакувам што побрзо закрепнување – вели Иванов.

Длабоко жалење за несреќата изрази и бугарскиот премиер Бојко Борисов и упати сочувство до семејствата на загинатите патници и желби за побрзо оздравување на повредените.


Влада: Иванов ја злоупотреби функцијата за да ја блокира демократијата


Скопје, 15 јануари, 2019 - 15:03 (META) 

Владата порача дека ја поддржува одлуката Законот за јазиците и Законот за ратификацијата на Преспанскиот договор да бидат објавени во Службен весник со потпис на претседателот на Собранието, Талат Џафери, имајќи го, како што се вели, „предвид прекршувањето на Уставот од страна на претседателот Ѓорге Иванов“.

„Донесувањето на Законот за употреба на јазиците и Законот за ратификација е во целосна надлежност на Собранието на Република Македонија. Иванов беше должен да го потпише указот за прогласување на двата закони, а кога тој одлучува да го крши Уставот, неопходно е да се преземат мерки кои се во согласност со Уставот за да продолжи да функционира парламентарната демократија“, порача Владата.

Во соопштението се вели дека според член 51, став 2 од Уставот, секој е должен да ги почитува Уставот и законите, па и претседателот на државата.

„Претседателот на државата е должен да го потпише указот за прогласување на законите што ги носи Собранието, доколку тие по втор пат се донесат со потребното мнозинство во законодавниот дом, односно Собранието. И двата закона, Законот за употребата на јазиците во Република Македонија и Законот за ратификација на Договорот од Преспа, се усвоени по втор пат со потребното мнозинство во Собранието на Република Македонија. Законот за употреба на јазиците во март оваа година, а Законот за ратификација на Договорот од Преспа на 5 јули, исто така оваа година. Согласно уставните одредби, а поради неизвршување на обврските на претседателот на државата, на претседателот на Собранието на Република Македонија единствено што му преостана е да ја исполни должноста што произлегува од Членот 52 од Уставот, согласно кој  законите што по втор пат се донесени со потребното мнозинство во законодавниот дом треба да бидат објавени во „Службен весник на РМ“, 7 дена по нивото донесување“, се вели во соопштението.

Проблемот го направил Иванов со тоа што ја злоупотребил положбата и се заканувал да го блокира функционирањето на демократијата, обвинува владата.

„Владата смета дека со оваа постапка претседателот на Собранието ј запре тенденцијата една церемонијална постапка на Претседателот на државата да се претвори во преседан кој се закануваше да го блокира функционирањето на системот и тоа со кршење на Уставот“, се вели во владиното соопштение, во кое се порачува дека претседателот на државата, не е законодавно тело.


Џафери: Не чувствувам никаква одговорност, Иванов ги помешал лончињата


Скопје, 15 јануари, 2019 - 14:40 (META) 

Претседателот на Собранието, Талат Џафери, на денешната прес-конференција рече дека не чувствува никаква одговорност затоа што тој, а не претседателот на државата, Ѓорге Иванов, ги потпиша указите за Законот за јазици и Законот за ратификација на договорот од Преспа и ги испрати на објавување во Службен весник.

– Јас не чувствувам никаква одговорност затоа што сум презел сѐ во рамки на мојата надлежност. Прво и основно претседателот е тој кој не го испочитува Уставот, од негова страна се прекршени обврските и е злоупотребена службената должност. Според член 8 од Уставот темелни уставни вредности се и уредувањето во Република Македонија преку поделба на власта. Истиот не може да се меша во надлежноста на Законодавната власт. Се чини дека претседателот Ѓорге Иванов на крајот на мандатот ги помешал лончињата. Не е тој оној што треба да покрене постапка против законодавната власт туку законодавната е таа која треба има можност да покренува постапки за одговорност за претседателот на државата – рече Џафери.

Како одговор на новинарско прашање за промената на таблите и називите во институции во двојазични, претседателот на Собранието кажа дека во Законот е јасно потенцирано дека тие имаат рок од шест месеци да го имплементираат.


Груби: ВМРО-ДПМНЕ први да постават двојазична табла на своето седиште


Скопје, 15 јануари, 2019 - 12:53 (META) 

Пратеникот на ДУИ и претседател на собраниската Комисија за европски прашања, Артан Груби, на прес-конференција во Собранието порача дека Законот за јазиците денеска стапува на сила и дека ВМРО-ДПМНЕ треба да се надмине себеси и да биде првиот фактор што ќе постави двојазична табла.

Тој рече дека институциите веднаш треба да се придружуваат до законските одредби и да ги применат. Нагласи дека, за разлика од претходното законско решение, новото предвидува формирање на Инспекторат што ќе ја контролира примената на Законот.

-Сите институции во земјава мора да го почитуваат Законот. Нелегитимниот претседател во заминување има уште два месеци во неговата канцеларија. Прочитајте ги законите, Уставот и Деловникот. Објавата на Законот за јазиците во „Службен весник“ е според законот. Да појаснам тој има законска обврска да го потпише само прогласот на законот, додека самиот закон се потпишува од претседателот на Собранието. Објавата на законот заедно со законот за ратификација на договор со Грција е целосно согласно законите. Сметаме дека Иванов и ВМРО-ДПМНЕ треба да се надминат и да бидат први кои ќе напишат ВМРО-ДПМНЕ пред нивното седиште и на албански јазик – рече Груби.

Претседателот Иванов пак во писмена изјава денеска порача дека постапката да се објават двата закона е основа за кривично гонење.

„Со доставувањето на овие два закона во Службен весник е прекршен член 75 од Уставот на Република Македонија, додека објавувањето на законите е направено незаконски и претставува основа за кривично гонење“, стои во обраќањето.

Шефот на државата вели дека сега на потег се Уставниот суд, Обвинителството и судот.


Иванов: Законот за јазиците и ратификацијата се објавени противуставно


Скопје, 15 јануари, 2019 - 12:38 (META) 

Објавувањето на Законот за употреба на јазиците и на Законот за ратификација на спогодбата од Преспа во Службен весник без потпис на указ од Претседателот на Република Македонија се противуставни, порача претседателот на државата, Ѓорге Иванов во писмено обраќање.

Тој вели дека постапката да се објават двата закона е основа за кривично гонење.

„Со доставувањето на овие два закона во Службен весник е прекршен член 75 од Уставот на Република Македонија, додека објавувањето на законите е направено незаконски и претставува основа за кривично гонење“, стои во обраќањето.

Претседателот Иванов вели дека сега на потег се Уставниот суд, Обвинителството и судот.

„Ова е момент кој ќе покаже дали во Република Македонија постои Уставен суд, дали функционира обвинителството, дали има независно судство и дали постои владеење на правото“, вели Иванов.

Шефот на државата, исто така, во завиена форма се обраќа и до претставниците на меѓународната заедница, порачувајќи дека поддржувањето на ваков преседан би нанело штета на правото и правната држава.

„Се прашувам, дали високите претставници на меѓународната заедница, кои ја поддржуваат оваа владина коалиција, ќе се јават и ќе го поддржат овој начин на донесување на закони? Дали ќе ги поддржат овие преседани, што носат несогледливи последици и штета по правото и правната држава и дали вакви преседани применуваат во сопствените држави?“, стои во дописот до медиумите.


Службен весник: Законот за јазиците е објавен согласно Уставот


Скопје, 15 јануари, 2019 - 12:17 (META) 

Од „Службен весник на Република Македонија“ со соопштение објавено на веб-страницата денеска порачаа дека согласно Уставот, биле задолжени да ги објават Законот за ратификација на Преспанскиот договор и Законот за јазиците, кои не беа потпишани од претседателот на државата Ѓорге Иванов.

„Двете објави се во согласност со член 52, став 2 од Уставот на Република Македонија (Законите и другите прописи се објавуваат во Службен весник на Република Македонија најдоцна во рок од 8 (осум) дена од денот на нивното донесување). Согласно со тоа, а во врска со член 51, став 2 од Уставот на Република Македонија, во кој се вели дека „Секој е должен да го почитува Уставот и законите“ и оваа институција, која е со закон овластена да ги објавува прописите во РМ, своето работење секогаш го остварува во рамките на Уставот и законите и само ја исполнува уставната обврска“, се вели во соопштението.

Претходно имаше бурни реакции во јавноста и од опозициската партија ВМРО-ДПМНЕ дека законите се објавени спротивно на правото и Уставот. Од Службен весник велат дека сите обиди да се наруши угледот на оваа институција ќе бидат проследени со тужби.

„ЈП Службен весник на Република Македонија е професионално јавно претпријатие и нема да дозволи мешање на политиката во неговото работење и нарушување на неговиот углед. За секој обид за нарушување на угледот на Јавното претпријатие Службен весник на Република Македонија ќе биде поведена соодветна судска постапка“, порачуваат од ова јавно претпријатие.

Инаку, законите се објавени без потписот на претседателот Иванов, а на местото каде треба да стои неговиот своерачен потпис е само неговото име, со фуснота дека  дека претседателот на државата е должен да го потпише законот, бидејќи на 14 март 2018 година и вторпат бил усвоен со мнозинство гласови од пратениците, според член 75, став 3 од Уставот.

Вториот дел од фуснотата објаснува дека „поради неизвршување на горенаведените обврски од страна на Претседателот на Републиката“, а поради обврската од член 52 од Уставот, претседателот на Собранието е должен да го достави Законот за јазиците во Службен весник за негово објавување.


Претседателот Ѓорге Иванов стана фуснота на објавениот Закон за јазици


Скопје, 15 јануари, 2019 - 10:54 (META) 

По долгогодишната практика на некои држави и меѓународни организации при користење на името Република Македонија да додаваат и фуснота во која се објаснува дека Македонија има спор со Грција, која не го признава нејзиното име, и дека во Обединетите Нации земјава се води како Поранешна Југословенска Република Македонија, сега и претседателот на државата Ѓорге Иванов стана – фуснота.

Имено, по објавата на Законот за јазиците во вчерашниот број на Службен весник на Република Македонија, веднаш подолу е објавен и Указот за прогласување на тој закон, но само со потпис од претседателот на Собранието, Талат Џафери. На местото предвидено за потпис од претседателот на државата, стои само напишано неговото име и „1“ како ознака за фуснота.

Претседателот Иванов одбива да го потпише овој закон, а пак Џафери, кој всушност го испрати за објава текстот на законот, и Заменикот на Генералниот секретар на Собранието, Неџбедин Ибраими, објаснуваат дека претседателот на државата е должен да го потпише законот, бидејќи на 14 март 2018 година и вторпат бил усвоен со мнозинство гласови од пратениците, според член 75, став 3 од Уставот. Интересно е и тоа што е потпишан Заменикот  на Генералниот секретар, наместо Генералниот секретар, Цветанка Иванов.

Вториот дел од фуснотата објаснува дека „поради неизвршување на горенаведените обврски од страна на Претседателот на Републиката“, а поради обврската од член 52 од Уставот, претседателот на Собранието е должен да го достави Законот за јазиците во Службен весник за негово објавување.


Иванов: Пандорината кутија е отворена и сега секој си зема право да го негира она што е наше


Скопје, 28 декември, 2018 - 13:50 (META) 

Македонскиот јазол не може да се пресече туку треба внимателно да се разврзува. Работев на разврзување на тој јазол. Бев свесен дека има црвени линии преку кои не се преминува. На власт дојде некој кој мислеше дека може да го пресече јазолот и да го реши македонското прашање по секоја цена. Пандорината кутија е отворена и сега секој си зема право да го негира она што е наше.

Вака претседателот на државата Ѓорге Иванов го започна неговото последно годишно обраќање во Собранието, како носител на оваа функција.

За Договорот од Преспа рече дека и става крај на Република Македонија каква што ја знаеме и дека е изготвен без национален консензус и без негово знаење и согласност.

– Оваа влада побара од народот сам да се согласи на таа промена за да може правното укинување на македонскиот народ да се протолкува како негова сопствена волја. На референдумот народот се соочи со лажна алтернатива. Избор меѓу просперитет и идентитет. Референдумот беше неуспешен, народот се изјасни против избрзани и штетни решенија. На 30 септември тивкото мнозинство донесе гласна одлука дека никој нема право да го менува Уставот. Народот препозна дека е уценет и ја отфрли уцената. Мнозинството не само што не ја почитува одлуката на народот туку оди и спротивно од волјата на народот. Македонија е нашиот заеднички дом, вие сакате да ги разнишате носечките столбови и да ги раскопате темелите – рече тој.

Со слободното толкување на Договорот со Бугарија, вели тој, Македонија е втурната во лавиринт од кој тешко се излегува и дека Бугарија сега најавува анекс на Договорот.

Иванов рече дека иако некои ја негираат т.н. тиранска платформа, делата гласно зборуваат и смета дека Законот за јазиците ќе предизвика целосно блокада на институциите бидејќи секој негов член го прекршува Уставот.

Тој потенцираше дека долго време инсистира на попис, но дека тој е бесцелен без графата етничка припадност и вели дека без таков попис нема Охридски рамковен договор.

Иванов рече дека на 27 април минатата година, политичкото насилство довело до физичко насилство и праша која е разликата помеѓу неговите помилувања и амнестијата на власта.

– Вашата цел е обезбедување уставна поддршка преку уценувања. Јас ги дадов помилување за да се спречи хаос. Овој закон го потпишав за да ги разоткријам вашите вистински цели и намери. Овој закон за амнестија нека биде сведоштво за двојните стандарди. Го девалвирате и простувањето и помирувањето. Тоа ќе настане кога сите ќе побараме прочка од оние на кои што сме им згрешиле и ќе побараме прошка, а тоа оди рака под рака со одговорноста. Мене никој не може да ме уцени, не ми најдовте криминал, затоа го уништувате мојот углед со лаги и манипулации, а имав и закани по животот. Ме навредуваа и омаловажуваа – вели Иванов.

На 27 април, Иванов рече дека немало сценарио за воена и вонредна состојба, освен ако некој не го злоупотребил неговото име за свои цели.

– Постојано ми стигнуваат информации дека врз основа на усна наредба се врши следење, снимање и прислушување на мене, мојот кабинет и членовите на моето семејство. Се менуваат системи, називи, влади, директори а по се изгледа УДБА си останала УДБА – заклучи претседателот.

Тој вели дека не гледа друга перспектива освен членството во ЕУ и НАТО за кое смета дека ќе го сплоти целото општество, но вели дека тоа нема да се случи само со реализирање на Договорот со Грција.

– Мора да дадеме решение за клучните структурни проблеми наместо да чекаме да се решат кога ќе влеземе во ЕУ и НАТО. Не уверуваат дека Спогодбата од Преспа ќе ни ја отвори вратата. Премолчуваат дека дури и да се отвори вратата останува железната решетка на реформи – рече тој.

Иванов неколку пати го прекина говорот поради дофрлањето од страна на пратениците на владејачкото мнозинство, кои ги искара да слушаат кога им се обраќа претседателот.

– Потиснете ги вашите лични фрустрации, јас ве слушам цела година, слушнете ме вие сега. Ве молам слушајте, претседател на држава ви се обраќа – повтори Иванов во повеќе наврати.

Пратениците од ДУИ не беа присутни на седницата, а пратениците од ВМРО-ДПМНЕ го поздравија обраќањето на Иванов со стоечки аплауз.


Годишно обраќање на Иванов на пладне во Собранието


Скопје, 28 декември, 2018 - 9:46 (META) 

Претседателот на Република Македонија, Ѓорге Иванов, денеска во 12 часот, ќе има годишно обраќање во Собранието на Република Македонија.

Ова ќе биде последно годишно обраќање на Иванов како претседател на државата.

Неговиот мандат истекува на 2 мај наредната година, а претседателските избори ќе бидат распишани најверојатно на почетокот на февруари.

Иванов 10 години е претседател на државата. Тој прв пат стапи на функцијата откако победи на претседателските избори во 2009, како кандидат на ВМРО-ДПМНЕ, а за втор мандат беше избран во 2014 година.


Последни пратенички прашања годинава, утре обраќање на Иванов


Скопје, 27 декември, 2018 - 9:54 (META) 

Собранието на Република Македонија денеска ќе ја одржи 72 седница на која пратениците ќе поставуваат прашања.

Собранието вчера по скратена постапка ги донесе Законот за задолжително капитално финансирано пензиско осигурување, Законот за пензиско и инвалидско осигурување и Законот за лековите и медицинските средства.

Претседателот на Собранието Талат Џафери потоа ја прекина 77. седница, а продолжението го најави за в петок.

Во петок на 73 седница свое обраќање ќе има претседателот на државата Ѓорге Иванов.