Екс министерката Гордана Јанкулоска стана мајка


Скопје, 28 јуни, 2018 - 13:39 (META) 

Поранешната министерка за внатрешни работи денеска се породила во една од скопските болници, пишуваат дел од медиумите.

Таа на свет донела здраво машко дете кое ќе го носи името Петар.

Тоа е првото дете во семејство на екс министерката Јанкулоска и нејзиниот сопруг Влатко со кого е во брак од 2010 година.


Јанкулоска не дојде во суд поради ризична бременост – „Титаник“ одложен за 3 јули


Скопје, 31 мај, 2018 - 11:31 (META) 

Поради неприсуство на обвинетата Гордана Јанкулоска заради влошена здравствена состојба односно ризичната бременост, рочиштето за предметот на СЈО „Титаник“ денеска се одложи за 3 јули.

Како што информираше адвокатката на Гордана Јанкулоска, Сања Алексиќ, поранешната министерка за внатрешни работи била спречена да дојде на рочиштето поради состојбата во која се наоѓа, при што достави лекарска потврда.

Јавната обвинителка Лиле Стефановска истакна дека во лекарската потврда не е наведена болеста за што е издадено тоа боледување и нагласи дека не е оправдано отсуството.

Судијата Осман Шабани поради неисполнување на условите за одржување на рочиштето ја прекина расправата, што денеска требаше да почне со изнесување на доказите.

Во предметот обвинети се поранешниот премиер Никола Груевски и поранешните функционери Мартин Протуѓер, Кирил Божиновски, Миле Јанакиески, Гордана Јанкулоска, Билјана Бришкоска Бошковски, како и Илија Димовски, Мунир Пепиќ и Едмонд Темелко.


Јанкулоска и Димовски во „Титаник“ се повикуваат на помилувањето од Иванов


Скопје, 28 мај, 2018 - 12:28 (META) 

Адвокатот на одбраната во случајот на СЈО „Титаник“, Петар Василев денеска одби да даде воведни зборови повикувајќи се на одлуката на Врховниот суд во Грција да не ги екстрадира Горан Грујевски и Никола Бошкоски, поради помилувањето од претседателот Ѓорге Иванов.

Според Василев, кој е адвокат на поранешната министерка за внатрешни работи, Гордана Јанкулоска и пратеникот Илија Димовски, поради помилувањето истрагата за случајот „Титаник“ морала да запре, а не да започне судска постапка.

Тој потенцираше дека аболицијата од Иванов е во правна сила.

– Никој тука не го зеде предвид помилувањето од страна на претседателот. Ваквиот правно-политички чин предизвикува неотстранливи последици и кон лицата за кои е дадено – рече адвокатот Василев.

Тој образложи дека Врховниот суд во Грција побарал мислење од Институтот за меѓународно право, од каде посочиле дека еднаш даденото помилување не може да се повлече, па затоа амнестијата е во правна сила.

Василев истакна дека поради оваа правна несигурност, тој денеска нема да даде воведни говори се додека судот не одлучи по ова прашањето околу амнестијата.


Завршни зборови во судењето за луксузниот „мерцедес“, рочишта и за „Трезор“ и за „Шпион“


Скопје, 17 мај, 2018 - 10:30 (META) 

Во Основен суд Скопје 1, денеска повторно судиите и обвинителите се со пополнет распоред, бидејќи ќе се одржат три рочишта од најзначајните судски процеси.

Во случајот „Тенк“, во кој, за набавката на блиндираниот „мерцедес“ вреден близу 600.000 евра, им се суди на поранешниот премиер Никола Груевски и поранешниот помошник министер во МВР Ѓоко Поповски, треба да бидат изнесени завршните зборови на одбраната. Во овој случај обвинета е и поранешната министерката за внатрешни работи Гордана Јанкулоска, но постапката за неа беше издвоена поради „ризична бременост“.

Во Кривичниот суд за денеска се закажани рочишта и за предметите на Специјалното јавно обвинителство „Шпион“ и „Трезор“.

Во случајот „Шпион“ кој е од 2013 година, осудени се 18 лица за злосторничко здружување, шпионажа, уцена, измама и недозволено поседување оружје. Апелацискиот суд лани ги ублажи казните на обвинетите и ја преиначи првостепената одлука на Кривичниот суд. Предметот „Шпион“ сега го застапува Специјалното јавно обвинителство, откако го презеде од редовното обвинителство.

На претходното рочиште судот одлучи на Зоран Божиновски да му се суди заедно со обвинетите во случајот „Шпион“, чија постапка беше раздвоена поради тоа што им беше недостапен на органите на прогон, а во април 2016 година беше уапсен во Нови Сад и беше екстрадиран во Македонија.

Во „Трезор“ првообвинет е поранешниот директор на УБК Сашо Мијалков, поранешниот шеф на неговиот кабинет Тони Јакимовски, поранешниот помошник-министер во МВР, Небојша Стајковиќ и поранашениот началник на Петтата управа во МВР Горан Грујевски, кој веќе со месеци се наоѓа во екстрадициски притвор во Грција.

Тие се товарат за злоупотреба на службената положба и овластувања и предизвикување штета на Буџетот во висина од 862.045 евра за набавката на електронско-комуникациска опрема за потребите на Петтата управа при УБК и обука за нејзино користење од фирма од Велика Британија.


Во судница денеска Јанкулоска, Мијалков и Ѓорчев


Скопје, 15 мај, 2018 - 10:51 (META) 

Во Основен суд Скопје 1 денеска треба да се одржат две судења – за случајот „Таргет-Тврдина“ на Специјалното јавно обвинителство (СЈО), како и за обидот за убиство на Зијадин Села во нередите во Собранието на 27 април минатата година.

Во „Таргет – Тврдина“ обвинети се поранешниот началник на Петтата управа во МВР, Горан Грујевски и вработениот во УБК Никола Бошкоски, кои се во притвор во Грција, поранешната министерка за внатрешни работи Гордана Јанкулоска и поранешниот директор на УБК Сашо Мијалков, како и поранешниот шеф на неговиот кабинет, Тони Јакимовски.

Претходното рочиште беше одложено поради незавршената екстрадициска постапка што се води пред Врховниот суд во Грција за двајцата обвинети Горан Грујевски и Никола Бошковски. Врховниот суд на Грција во Атина одлуката треба да ја соопшти в петок.

Според обвинителниот акт, преку три системи за следење на комуникациите во УБК, во периодот од 2008 до 2015 година незаконски биле следени 4.286 телефонски броеви за кои воопшто не биле издадени судски наредби.

Во истиот суд ќе се одржи и судење за случајот за обид за убиство на Зијадин Села на 27 април минатата година, а на денешното рочиште треба да сведочи и пратеникот од ВМРО-ДПМНЕ, Влатко Ѓорчев. Тој беше поканет да сведочи на минатото рочиште, но не се појави бидејќи поканата не му била доставена уредно. Тој е сведок на одбраната.

Како сведок во овој случај беше поканет и премиерот Зоран Заев, но тој не дојде на минатото рочиште бидејќи беше зафатен, па сведочеа следните од листата сведоци, а потоа адвокатите се откажа од тоа тој да сведочи, бидејќи им го нарушил концептот за редослед на сведочењата преку кои го разработуваат својот концепт на одбраната.


СЈО со нови докази за блиндираниот „мерцедес“


Скопје, 14 мај, 2018 - 13:55 (META) 

Специјалното јавно обвинителство (СЈО) денеска поднесе нови докази за случајот „Тенк“. Одбраната се спротивстави на разгледување на  доставените нови докази. По дебатата во судницата и инсистирањето на СЈО дека станува збор за битни докази кои треба да бидат прифатени од судот, беше дадена пауза за да се произнесе судечкиот совет, а по неа приговорот на одбраната беше отфрлен.

СЈО како нов доказ ја предложи електронската комуникација меѓу „Мак Аутостар“ од каде е набавен спорниот „мерцедес“ и компанијата „Дајмлер“ од Германија.

– Од меил комуникацијата произлегуваат многу битни елементи и од нив може да се разјаснат прашањата кои беа спорни за одбраната. Не се работи за вообичаена, туку за прецизна и специфична комуникација за набавката што е предмет на обвинение – истакна обвинителот Стевчо Донев.

Со ова, комуникацијата меѓу „Мак Аутостар“ и „Дајмлер“ ќе биде еден од доказите со кои СЈО ќе го докажува обвинението со кое се спори набавката на „мерцедесот“ од 600 000 евра.

Судскиот совет, инаку, го прифати барањето на обвинетиот Никола Груевски да побара информација од „Ауто Македонија“ АД Скопје дали може секој да увезе возило од секаква марка. Груевски преку своите адвокати побара и Судот да обезбеди известување од Општина Новаци во врска со јавна набавка на патничко моторно возило, но судијката Кацарска нагласи дека во овој предмет тоа е сосема ирелевантно, бидејќи набавката на возило од страна на Општина Новаци не е поврзана со предметот на обвинението.

Меѓу поднесоците на одбраната, имаше барање Судот да обезбеди информации за тоа колку пати од јули 2006 до февруари 2016 имало потреба од сервисирање на возилото што се користело пред луксузниот мерцедес, но и ова барање не беше прифатено.


Завршни зборови за „Тенк“, продолжуваат судењата за „Тендери“ и „Тотал“


Скопје, 14 мај, 2018 - 10:18 (META) 

Во Основниот суд Скопје 1 денеска ќе се одржат три судски рочишта за случаите на Специјалното јавно обвинителство, од кои за еден ќе се изнесуваат завршните зборови.

Во судењето за случајот „Тенк“, во кој, за набавката на прескапиот блиндиран „мерцедес“ вреден близу 600.000 евра, на поранешниот премиер Никола Груевски и поранешниот помошник министер во МВР Ѓоко Поповски, треба да бидат изнесени завршните зборови на одбраната. Во овој случај обвинета е и поранешната министерката за внатрешни работи Гордана Јанкулоска, но постапката за неа беше издвоена поради „ризична бременост“.

Во Кривичниот суд покрај овој процес, денеска ќе има рочишта и за  случаите „Тендери“ и „Тотал“. Во првиот случај и се суди на поранешната министерка за култура Елизабета Канческа – Милевска, за тендерот за завршни работи во Музејот на македонската борба за државност и самостојност од проектот „Скопје 2014“. Во овој случај обвинети се уште двајца членови на Комисијата за јавни набавки.

Во случајот „Тотал“, му се суди на новинарот Драган Павловиќ-Латас, кој не присуствуваше на претходните три рочишта поради здравствени, односно семејни причини. Латас се товари дека давал лажни податоци во завршните сметки и даночните пријави при што преку неговите фирми затаил данок во износ од 7.466.981 денар или 121.414 евра, а лично тој затаил 3.876.471 денар или 63.032 евра.


СЈО побара да се конфискува имот на Груевски, Протоѓер и Димовски, вреден 2,26 милиони евра


Скопје, 9 мај, 2018 - 16:39 (META) 

Специјалното јавно обвинителство (СЈО) денеска побара на дел од обвинетите во процесот „Титаник“, вклучувајќи го и поранешниот премиер Никола Груевски, да им биде конфискуван имот.

Обвинителката Лиле Стефанова, во воведниот говор покрај осудителна пресуда, побара за надоместување на незаконски обезбедените средства за финансирање на изборната кампања во 2011 година конфискација на имот на Никола Груевски и Мартин Протoѓер во вредност од 34.908.777 денари (567.620 евра) што одговара на вредноста на парите прибрани за изборната кампања во таа година.

За изборите во 2013 година, Стефанова побара конфискација на имот во вредност од 41.435.100 денари (673.740 евра) од Никола Груевски, Илија Димовски и Леко Ристовски. Имот во вредност од 62.732.874 денари (1,02 милиони евра) треба да се конфискува од истите тројца поради незаконски прибраните средства за изборната кампања во 2014 година, посочи Стефанова.

Вкупниот имот што СЈО сака да се конфискува од обвинетите ако бидат прогласени за виновни е со вредност од 2,26 милиони евра.

Во обвинителниот акт за предметот „Титаник“, во кој се опфатени 21 обвинет, пишува дека Никола Груевски и Мартин Протоѓер од мај до јуни 2011 година како организатори на изборната кампања користеле недозволени средства за изборна кампања, кои потекнуваат од неидентификувани извори. Спротивно на Изборниот законик, не го пријавиле изворот на финансирање, со што го злоупотребиле законското овластување како организатори на изборната кампања.

Истото во 2013 година го правеле Илија Димовски и Леко Ристовски, поттикнати од Никола Груевски како соизвршители во кривичното дело.


Адвокатите во „Тенк“ побараа изземање на обвинителите, Јанева ги одби


Скопје, 8 мај, 2018 - 16:14 (META) 

Обвинителот од Специјалното јавно обвинителство (СЈО) Стевчо Донев на попладневното продолжение на рочиштето за предметот „Тенк“ до Кривичниот суд достави известување од специјалната обвинителка Катица Јанева дека нема законска основа за барањето на одбраната за изземање за него и за обвинителката Ленче Ристоска.

Обвинителот ваквото барање го оквалификува како чекор на адвокатите да се одложува јавната расправа и предложи судењето да продолжи. Судијката по неговото излагање сепак даде пауза, за да може одбраната да ги разгледа поднесоците од СЈО.

Одбраната го побара изземањето на Донев и на Ристоска во претпладневното продолжение на судењето, откако адвокатката Сања Алексиќ, која го брани Никола Груевски, ги прочита писмените докази на одбраната. Веднаш по барањето за нивно изземање, обвинителите Ристоска и Донев побараа пауза, а одбраната реагираше дека обвинителите немаат право да бараат пауза до донесување на одлуката за инивно изземање.

Судијката Добрила Кацарска сепак даде пауза до 14 часот, со што заврши претпладневниот дел од денешното рочиште.

На судењето присуствуваат обвинетите Никола Груевски и поранешниот помошник министер во МВР Ѓоко Поповски. Во „Тенк“ е обвинета и поранешната министерката за внатрешни работи Гордана Јанкулоска, но постапката за неа е издвоена поради „ризична бременост“.

Тројцата се обвинети за набавката на луксузниот мерцедес од речиси 600.000 евра.


Судења за „Титаник 3“, „Тенк“ и „Труст“


Скопје, 8 мај, 2018 - 10:13 (META) 

Во Основен суд Скопје 1, денеска треба да се одржат судења за предметите на Специјалното јавно обвинителство „Титаник 3“, „Тенк“ и „Труст“.

Претходното рочиште за „Титаник 3“ на 27 април не се одржа, поради неприсуството на Еленко Миланов. Во овој случај на СЈО, покрај првообвинетиот Ејуп Аљими, координатор на пратеничката група на ДУИ, обвинет и Исмет Гури, член на Општинската изборна комисија за Општина Чаир. Обвинети се за уништување изборен материјал.

Во случајот „Тенк“ обвинети се поранешниот премиер Никола Груевски, поранешната министерка за внатрешни работи Гордана Јанкулоска и поранешниот помошник министер во МВР, Ѓоко Поповски.

Пред две рочишта Судот донесе одлука да ја раздвои постапката за Јанкулоска поради „ризична бременост“. На претходното рочиште, на 25 април, сведочеше Дејан Митровски – Урко, поранешен шеф на обезбедувањето на Никола Груевски, кој се жалеше дека „мерцедесот“ во кој се возел Груевски често се расипувал, а Урко имал главоболки оти седел напред и гледал низ блиндираниот ветробран.

Во предметот на СЈО наречен „Труст”, обвинети се бизнисменот Сеад Кочан и уште две физички и три правни лица за договарање учество на тендер на ЕЛЕМ. Според обвинителите на СЈО, обвинетите Сеад Кочан, Василије Авировиќ и Сафет Ватиќ, како и фирмите „Трансмет”, „Силекс неметали” и „Вато” злоупотребиле приближно 1,06 милијарди енари, односно 17 милиони евра, пари на граѓаните.