Свилановиќ: Кибернетичкиот простор, безбедносно жариште на Западен Балкан


Истанбул, 6 декември, 2018 - 13:48 (META) 

Новото безбедносно жариште и сериозен предизвик на глобално, регионално и локално ниво е кибернетичката сигурност, изјави денеска генералниот секретар на Регионалниот совет за соработка (РСС) Горан Свилановиќ на Третата регионална конференција за координација во борбата против тероризмот и насилниот екстремизам во Истанбул.

Тој додаде дека показател за тоа е и податокот дека само во 2017 година во шесте земји од Западен Балкан биле реализирани преку 400 кибернетички напади на институции.

Свилановиќ додаде дека Интернетот истовремено станал една од главните алатки на современите терористички организации за пронаoѓање, регрутирање и обука на новите членови, соопшти РСС

На конференцијата е претставена и Студијата „Ново виртуелно бојно поле – како да се спречи радикализацијата во рамките на кибернетичката безбедност на Западен Балкан“.

Студијата ја порача РСС, а ја финансираше Европската унија и таа е всушност сеопфатен пресек и анализа на кибернетичката безбедност и радикализација на интернетот во Албанија, БиХ, Косово, Македонија, Србија и Црна Гора.

Покрај Студијата е претставена и брошура и на македонски јазик, во која е направено визуелизирано резиме на наодите и препораките за унапредување на безбедноста во областа на кибернетичкиот простор.

На Конференцијата што ја организира РСС во соработка со домаќинот Турција, се зборува и за спречување на насилниот екстремизам и контрола на малокалибарското оружје.

РСС е меѓувладино извршно тело на земјите членки на Процесот за соработка во Југоисточна Европа, чиј основач и полноправен член е и Македонија.


Свилановиќ: Ромките се најранлива група во регионот


Белград, 31 октомври, 2018 - 14:01 (META) 

Најранилва група во регионот на Западен Балкан се Ромките, беше истакнато на регионалната конференција што започна денеска во Белград, Србија, во организација на Регионалниот совет за соработка (РСС), а под покровителство на Владата на Србија и CARE Интеренешнл Балканс.

„Девет од десет млади Ромки на возраст од 18 до 24 години во целиот регион не се школуваат, не проаѓаат никакви обуки, ниту се вработени“, изјави Горан Свилановиќ, генералниот секретар на РСС, повикувајќи се на истражување за положбата на Ромите.

Тој додаде дека поради тоа постои голема потреба да се вложува во нивното образовние, вработување, економска самостојност и зацврстување.

„Интеграцијата на Ромите не само што е еден од важните приоритети за регионот во врска со проширувањето кон ЕУ, туку тоа е и потреба на нашите општества“, изјави Свилановиќ.

Потпретседателката на Владата на Србија, Зорана Михајловиќ го потенцираше регионалниот пристап кон решавање на ова прашање за полесно надминување на положбата во која се наоѓа ромската заедница и посебно Ромките.

На Конференцијата под име „Економската (не)зависност на Ромските жени, предизвици и рани причинители“ учествуваат преку 130 владини службеници, претставници на цивилното општество и на меѓународни организации од регионот.

Еден од говорниците е и Аксел Ахмедовски, министер во Владата задолжен за спроведување на Стратегијата за подобрување на позицијата на Ромите во државата.


РСС: Во Македонија во последните осум години отворени 103.000 нови работни места


Брисел, 5 јули, 2018 - 15:42 (META) 

Западен Балкан се враќа на патеките на порастот, бидејќи во земјите во регионот од 2010 досега се создадени 600.000 работни места,  (од кои дури 103.000 во Македонија!), а во работната сила во регионот се влезени дополнителни половина милион високообразувани луѓе, велат од Регионалниот совет за соработка (РСС).

Во Македонија во последните осум години се отворени 103.000 нови работни места, односно тоа е вториот најдобар резултат во Западен Балкан во оваа категорија.

EBU

Од РСС велат дека во земјава е забележан и импресивен раст на трговијата, односно македонската економија во последните осум години  речиси двојно го зголемила обемот на трговијата – од 6,9 милијарди евра на 12,5 милијарди евра.

Македонија е во врвот на статистиките и по тоа што во истиот период биле нововработени 71.062 висококвалификувани луѓе.

Во истиот период во Западен Балкан трговијата пораснала за дополнителни 33 милијарди евра, а трговскиот дефицит се намалил од 23,1 на 19,7 проценти од БДП. Тоа се должи на одличниот обем на извозот, што сигнализира за зголемена конкурентност на производите и услугите од регионот на меѓународните пазари.

Тоа беше соопштено на денешниот состанок на Управниот одбор на „Стратегијата за Југоисточна Европа 2020“ на РСС.

– Среќен сум што Западен Балкан се врати на патеките на растежот и постигнува добри резултати – вели Горан Свилановиќ, генерален секретар на РСС.


Свилановиќ: ЕУ и НАТО треба да бидат решителни како што беа Заев и Ципрас


Сараево, 13 јуни, 2018 - 9:34 (META) 

Генералниот секретар на Регионалниот совет за соработка, Горан Свилановиќ изрази надеж дека ЕУ и НАТО ќе бидат подеднакво решителни како што беа решителни премиерите на Македонија и Грција, Зоран Заев и Алексис Ципрас.

„Овој историски договор дава нов ветар во грб не само на меѓусебната соработка туку и на натамошниот економски развој и процесот на европската интеграција на регионот. Искрено се надевам дека овој храбар чин на лидерство ќе биде дочекан со иста доза на решителност од страна на нивните партнери во Европската унија и НАТО“, изјави Свилановиќ.

Честитајќи им на Заев и на Ципрас, Свилановиќ оцени дека „договорот претставува вистинско охрабрување за целиот регион на Југоисточна Европа, а посебно за Западен Балкан, бидејќи покажува дека и најтешките прашања може да се решат ако за тоа постои решителност и визија за подобра иднина.“


Свилановиќ: РСС ја продлабочи регионалната соработка во сите сектори


Софија, 17 мај, 2018 - 15:22 (META) 

Регионалниот совет за соработка  (РСС) успеа со своите активности и со напорите на земјите од Западен Балкан да ја продлабочи регионалната соработка во речиси сите сектори, изјави денеска генералниот секретар на РСС, Горан Свилановиќ во Софија.

Говорејќи на Самитот на Европската унија и Западен Балкан во име на Советот, која што е единствена меѓувладина организација на земјите членки на Процесот за соработка во ЈиЕ (ПСЈИЕ), Свилановиќ подвлече дека резултатите се особено видливи во соработката за движењето на работната сила и економската и дигиталната поврзаност на регионот, како делови од Повеќегодишниот акциски план (ПАП), усвоен лани во Трст.

Резимирајќи ги извештаите добиени од шесте земји од регионот Свилановиќ, како што соопшти РСС, ги претстави главните резултати содржани во нацрт извештајот за спроведување на планот за заеднички економски простор (ПАП – ЗЕП).

Во однос на Инвестиционата агенда се вели дека сите шест економии од Западен Балкан ја поддржаа Регионалната агенда за реформи во областа на инвестициите со соодветна група на политики и го усогласија политичкиот документ за координација на финансиските пазари и диверсификацијата на пристапот кон пазарите на капиталот.

За Дигитална интеграција се вели дека регионот покрена политички дијалог на високо ниво за дигитализацијата на шесте земји од Западен Балкан, по пат на годишни дигитални самити, а првиот беше одржан во Скопје на 18 и 19 април 2018 година.

Советот ги повика тимовите за одговор на компјутерските безбедносни инциденти од шесте економии и нивните претставници ги вклучи во активности за изградба на капацитети, со што се засилуваат капацитетите за кибернетичка сигурност и се унапредува соработката меѓу тимовите од регионот. Освен тоа, РСС постигна спогодба постоечката Регионална спогодба за роамингот да се продолжи и да се воведе принципот во шесте земји „во роаминг, исто како дома“.

Во рамките на Агендата за мобилност, шесте економии од Западен Балкан ја поддржаа препораката за отпочнување преговори за спогодба за заемно признавање на стручните квалификации. РСС посредуваше и при усогласување на клучните принципи на заедничкиот модел за автоматско признавање на академските квалификации на Западен Балкан.

Свилановиќ го поздрави барањето на лидерите на шесте земји од Балканот да се зголемат уште повеќе напорите за спроведување на ПАП, за кој рече во заклучокот дека е одлично интерно усогласен со обврските во сите нивоа и во фаза на реализација, но и дека се потребни уште повеќе проекти и активности за неговото натамошно што поуспешно спроведување.

Регионалниот совет за соработка е меѓувладинот тело на ПСЈИЕ, чиј основач и полноправен челне е Македонија, а од минатиот самит во Трст му е дадена клучна улога да ја координира соработката во регионот.


Владите од региoнот ќе работат на дигитална трансформација за квалитетен живот


Скопје, 18 април, 2018 - 15:03 (META) 

Во рамките на  Дигиталниот самит за Западен Балкан имаше и работен ручек на премиерот Зоран Заев, еврокомесарите Јоханес Хан и Марија Габриел, претседавачот на министерскиот совет на Босна и Херцеговина, Денис Звиздиќ премиерот на Косово, Рамуш Харадинај, заменик-претседателката во Владата на Албанија, Сенида Меси, државниот секретар во министерството за економија и енергетика во Владата на Германија, Томас Берејс, претставници на Европската инвестициона банка и претставници на Советот за регионална соработка на земјите од Западен Балкан.

На работниот ручек централна тема била важноста од интеграцијата на земјите од Западен Балкан во единствениот дигитален пазар на Европската унија.

На средбата се разговарало и за иницијативата за институционализација на Платформата за бизнис пријателска средина (Business Friendly Environment, BFE) како мултилатерална организација која што ќе биде поддржана од владите во регионот.

Претходно, на прес-конференцијата на министерот за информатичко општество и технологија и администрација, Дамјан Манчевски, еврокомесарката Марија Габриел и генералниот секретар на Советот за регионална соработка, Горан Свилановиќ беше истакнато дека Дигиталниот самит е потврда дека сите држави работат во иста насока.

„Дигиталната трансформација е неопходна за зголемување на квалитетот на животот на граѓаните. Ова е шанса да Западен Балкан да биде дел од ЕУ, независно од политичката агенда. Овој настан е ретка можност за да се дефинираат заедничките цели“, рече Свилановиќ.

Тој додаде дека придобивките од дигитализацијата се во сите аспекти на живеењето, вклучително и намалувањето на корупцијата.


Фестивалот „Егзит“ прогласен за шампион на регионалната соработка


Сараево, 15 март, 2018 - 10:42 (META) 

Светски познатиот музички фестивал „Егзит“ (EXIT) е прогласен за шампион на регионалната соработка на Западен Балкан за 2017 година. Признанието вчеравечер во Сараево му го врачи Регионалниот совет за соработка (РСС).

Генералниот секретар на РСС, Горан Свилановиќ, врачувајќи ја наградата на основачот на „Егзит“, Душан Ковачевиќ, истакна дека „фестивалот со универзални музички содржини ги надминува културолошките, политичките и сите други разлики и ни нуди ново време и прозор кон светот на иднината во духот на толеранцијата, разбирањето и просперитетот, на што сите треба да се угледаме“.

РСС е меѓувладино оперативно тело на земјите членки од Процесот за соработка во Југоисточна Европа (SEECP), чиј основач и полноправен учесник е и Република Македонија. Ова тело со седиште во Сараево е формирано во 2008 во Софија и е наследник на поранешниот Пакт за стабилност. РСС годинава одбележува десетгодишен јубилеј.

Од минатата година со усвојувањето на Повеќегодишниот акционен план за земјите од Западен Балкан на самитот во Трст,  Советот е одговорен заедно со Европската комисија за унапредување на соработката со владите од регионот и изградба на единствен економски простор, како дел од претпристапниот процес за зачленување во Европската унија.


Донаторите и земјите од Западен Балкан се координираат во Брисел


Брисел, 13 март, 2018 - 14:07 (META) 

Координација на донаторите за Западен Балкан се одржува денеска во Брисел под покривителство на Регионалниот совет за соработка (РСС), на која се собрани сите поважни учесници во економскиот развој на регионот, вклучувајќи ги и претставниците на земјите, меѓу кои и Македонија.

„Состанокот претставува одлична можност земјите приматели на помош и донаторите да разменат информации за актуелните потреби, за недостатоците и можностите за финансирање, се со цел да се завршат преземените обврски и задачи“, изјави на отворањето генералниот секретар на РСС, Горан Свилановиќ.

Тој додаде дека земјите од Западен Балкан се целосно посветени на спроведување на Стратегијата Југоисточна Европа 2020 и Повеќегодишниот акционен план за остварување на Регионалниот економски простор.

Колин Волф, шефот на одделот за регионална соработка и програми за Западен Балкан при Генералната дирекција за политиката на добрососедство и проширување на Европската комисија, ја подвлече важноста од регионалната соработка која се одвива и под покровителство на РСС.

„Треба да се искористи моментот што е создаден за Западен Балкан со најновата стратегија на ЕУ за перспективите за проширување. Регионот треба да покаже дека може да работи заеднички за остварување на значителни резултати“, изјави Волф.

Министерот за информатичко општество и администрација Дамјан Манчевски, исто така присуствува на овој состанок и зборуваше за приоритетите на Македонија, за интеграција во дигиталниот пазар на Европската Унија.

„МИОА во моментов работи во повеќе различни сфери со цел целосна дигитализација на земјата. За првпат во Македонија подготвуваме национален оперативен план за широкопојасен интернет. Конечно, Македонија ќе има стратегија за сајбер-безбедност, на што активно работиме периодов. Исто така, работиме на зголемување на бројот на е-услуги кои ќе бидат дел од првиот национален портал, со цел да се подобри и олесни животот на граѓаните“, информираше Манчевски.

Тој додаде дека за реализација на овие проекти од особено значење е поддршката на меѓународната заедница и донаторите.

На состанокот министерот информираше и за Дигиталниот самит за земјите од Западен Балкан, што ќе се одржи во Скопје на 18 и 19 април.


Свилановиќ: Западен Балкан веднаш да го искористи поттикот од ЕУ


Сараево, 7 февруари, 2018 - 15:33 (META) 

Стратегијата на Европската Унија за Западен Балкан уште еднаш ја подвлече важноста на регионалната соработка и добрососедските односи како главен елемент за напредокот на земјите кон нивниот европски пат и мора да се направат клучни промени и да се искористи моментот, порача денеска генералниот секретар на Регионалниот совет за соработка (РСС), Горан Свилановиќ.

– Клучните промени мораат да дојдат од нас, од регионот, бидејќи ние сме творци на нашата сопствена иднина. Нашата задача е веднаш да го искористиме овој позитивен потстрек, настојувајќи да ги решиме билатералните и мултилатералните спорови и уште поинтензивно да работиме на развојот на нашиот регион – вели Свилановиќ.

Со Стратегијата на ЕУ се предвидува постојните спогодби и обврски на земјите од Западен Балкан да станат оперативни, пред се преку примената на Повеќегодишниот акциски план за развој на економскиот простор што го подготви РСС, а кој беше усогласен и прифатени од лидерите на земјите на самитот во Трст во јули 2017 година.

Свилановиќ додава дека РСС ќе продолжи да ги подржува земјите од регионот во нивните настојувања и дека ќе настојува активностите што се договорени со владите од регионот да се спроведуваат.

РСС е оперативно тело на Процесот за соработка во Југоисточна Европа, чиј основач и полноправен член е и Република Македонија. РСС на самитот во Трст меѓу ЕУ и Западен Балкан доби значителна улога во координацијата и спроведувањето на регионалната интеграција и поттикнување на економиите.


Свилановиќ: За пет години 1.000 борци од Западен Балкан заминале во Сирија и во Ирак


Крањ, 30 ноември, 2017 - 14:24 (META) 

Околу 1.000 лица од земјите од Западен Балкан заминале да се борат во Сирија и во Ирак од 2012 до 2017 година, од кои 300 се вратени, околу 200 се убиени, а околу 400 сè уште се на боиштата, изјави денеска генералниот секретар на Регионалниот совет за соработка (РСС), Горан Свилановиќ.

Тој, како што соопшти РСС, изјави дека темпото на заминување на граѓаните од регионот се намалило во 2015 година, а речиси во целост е запрено во средината на 2016 година.

Study Infographics

Инфографик за движењето на странските борци од Западен Балкан кои заминале на боиштата во Сирија и во Ирак во периодот од 2012 до 2017 година

– Истовремено, од цела Европска Унија околу 5.000 граѓани заминале да се борат во Сирија и во Ирак – рече Свилановиќ во обраќањето на Втората меѓународна конференција за борба против тероризмот и насилниот екстремизам во Југоисточна Европа, што се одржува денеска во Брдо кај Крањ во Словенија.

Свилановиќ додаде дека овие податоци, кои поттекнуваат од студија што наменски ја порача РСС, „нè доведуваат чекор поблиску да осмислиме што треба да се направи од училиштата до затворите за да се победат насилните идеологии кои доведуваат до ужасите на тероризмот“.

Учесниците на Конференцијата, на која има претставници на влади од Западен Балкан и на повеќе меѓународни и регионални организации и инцијативи што се занимаваат со овој проблем, ќе разговараат за моменталните трендови и предизвици во активностите на европско, регионално и на национално ниво, како и за начините на спроведување на порано договорениот принцип – „цела влада, цело општество“, во сузбивање на насилниот екстремизам.

Конференцијата ја организира Регионалниот совет за соработка заедно со Министерството за внатрешни работи на Словенија, како и со Иницијативата на Западен Балкан за борба против тероризмот и Конвенцијата за полициска соработка во Југоисточна Европа.

Првата конференција за овој проблем е одржана во ноември во Тирана. Република Македонија, како основач и активен член на Процесот за соработка во Југоисточна Европа, активно партиципира на овие собири.