Сугарески: Патот Ранковце – Крива Паланка е од регионално значење за економијата


Крива Паланка, 25 септември, 2018 - 14:56 (META) 

Експресниот пат Ранковце – Крива Паланка кој е со вкупна должина од 25 километри почна да се гради јуни годинава и треба да биде завршен за три години, информираше министерот за транспорт и врски Горан Сугарески, кој денеска изврши увид во градежните работи.

– Експресниот пат Ранковце – Крива Паланка како дел од доизградбата на Коридор 8 е од особена економска важност за Македонија. Со него овозможуваме брза врска на пан-европскиот Коридор 8 кој нè поврзува со Бугарија, а со тоа отвораме можност за подобрување на економските врски со Европската Унија. Покрај регионално поврзување, со комплетирање на Коридор 8 и создавање на модерна патна мрежа ќе придонесеме за брз и безбеден транспорт на стоки и услуги и ќе им овозможиме на домашните компании полесно да се пробијат на нови пазари. Во таа насока го потпишавме и договорот со ЕБОР за реконструкција и проширување на патот од Крива Паланка до граничниот премин Деве Баир, со што создаваме комплетно нова патна делница на овој Коридор од значење не само за нашата земја, туку и за целиот регион – изјави Сугарески.

Вкупната вредност на инвестицијата изнесува 58,5 милиони евра.


Сугарески: 800 милиони евра за подобрување на патната инфраструктура


Кавадарци, 24 септември, 2018 - 12:40 (META) 

Во моментов низ целата територија на Македонија се работи на реализација на проекти во висина од преку 800 милиони евра, што е историски највисока инвестициска програма за подобрување на квалитетот на патната мрежа во државата, изјави министерот за транспорт и врски Горан Сугарески кој денеска изврши увид во изградбата на нов мост на реката Луда Мара во село Ваташа, Општина Кавадарци.

Сугарески додаде дека набрзо ќе започне да се реконструира регионалниот пат Кавадарци – Росоман.

– Исто така во тек е изградба на експресниот пат од Градско до Прилеп, а до ноември оваа година очекуваме да биде завршена рехабилитацијата на автопатска делница Неготино – Демир Капија. Сето ова е дел од големиот инвестициски циклус во патната инфраструктура што го најавивме – додаде тој.


Автопатот Скопје – Блаце ќе почне да се гради догодина и ќе чини околу 100 милиони евра


Скопје, 10 септември, 2018 - 13:57 (META) 

Изградбата на автопатот Скопје – Блаце ќе стартува на пролет, следната година и ќе се одвива во две фази, информираше министерот за транспорт и врски Горан Сугарески при работната посета на Општина Арачиново.

Во првата фаза ќе се градат 1,6 километри, а потоа ќе се допроектира останатиот дел од десетина километри, по што ќе се работи паралелно.

Вицепремиерот за европски прашања Бујар Османи неодамна изјави дека изградбата на автопатот ќе чини 100 милиони евра, но ресорниот министер истакнува дека не сака да шпекулира и оти точната сума ќе се знае кога ќе се заврши проектирањето.

Првиот дел од автопатот ќе се финансира од Јавнотот претпријатие за државни патишта, а останатиот дел со помош на Европската банка за обнова и равзој. На трасата се превдидени четири тунели и девет мостови.


Владата со нови критериуми за субвенции за авиопревозници


Скопје, 22 август, 2018 - 13:47 (META) 

Владата на денешната седница почна нова постапка за доделување финансиска поддршка, односно субвенции, на домашни и странски авиокомпании за евтини летови.

Пред две седмици беше поништен повикот за субвенции на кој се пријави само унгарската компанија „Визер“.

Новата мерка за субвенционирање ќе важи за периодот 2019-2021 година.

– Владата ги донесе уредбата за начинот и за критериумите за доделување финансиска поддршка на авиокомпании, како и програмата за определување средства потребни за поттикнување и развој на воздушниот сообраќај за периодот 2019-2021 година. Ќе се формира комисија за спроведување постапка за доделување финансиска поддршка, која ќе го објави новиот јавен повик за доставување барања за финансиска поддршка. Повикот ќе биде објавен во домашни и во странски гласила – рече министерот за транспорт и врски, Горан Сугарески.

Тој појасни дека новата уредба содржи и неколку значајни измени. Така, авиокомпаниите ќе имаат обврска до 10 јануари следната година да воспостават база од најмалку еден авион на скопскиот или на охридскиот аеродром за периодот за кој се доделува финансиската поддршка.

Со претходниот јавен повик, што минатиот месец беше поништен поради административни пречки во единствената понуда од авиокомпанијата „Визер“, беше предвидено задолжително воспоставување на една база на скопскиот и една база на охридскиот аеродром.

Новите правила предвидуваат најдоцна до 10 јануари следната година авиопревозникот да започне со оперирање на најмалку две нови дестинации од аеродромот во Скопје и да ги опслужува за периодот за кој се доделува финансиската поддршка. Од охридскиот аеродром треба да има нови четири дестинации, од кои првите две да ги воспостави до 10 јануари следната година, а останатите две во рок од една година по склучувањето на договорот.

Потенцијалниот корисник на субвенциите е обврзан и доколку има постојни дестинации да ги опслужува и нив најмалку двапати неделно по која било од ИАТА-сезоните по однапред определен лет на летање за периодот за кој се доделува финансиската поддршка, а доколку ги зголеми фреквенциите, и за новите летови ќе добива субвенции.


Сугарески најави нов тендер за субвенционирање на нискобуџетни авиокомпании


Велес, 13 август, 2018 - 15:54 (META) 

Новиот јавен повик за субвенционирање на нискобуџетски авиокомпании ќе биде објавен деновиве, најави денеска министерот за транспорт и врски Горан Сугарески, одговарајќи во Велес на новинарско прашање поврзано со укинувањето на неколку авиолинии од страна на унгарската „Визер“, која беше единствено пријавена компанија на тендерот што Владата го поништи минатата седмица.

– Минатата недела беше поништена постапката во делот на нискобуџетните компании, бидејќи имаше пристигнато една понуда и комисијата, врз база на пропусти, понуди решение со кое постапката е поништена. Наредните денови со информација на Влада и сите активности коишто треба да ги преземе Министерството за транспорт и врски ќе биде распишан нов јавен повик. Државата има предвидено пари за нискобуџетни компании, така што стојам зад она што го кажав, дека согласно владината програма оваа мерка продолжува и државата ќе субвенционира нискобуџетни компании – рече Сугарески при увидот во изградбата на водоводната линија на населените места Превалец и Оризари.

На официјалната веб страница на авиокомпанија „Визер“ повеќе не може да се резервираат билети за летови од октомври од Скопје до Барселона и од Охрид до Лондон. Билети не можат да се купат и за летовите од скопскиот аеродром до Ваксјо во Шведска за летови по 16 септември.


Сугарески: Реализацијата на капиталните инвестиции е во висина од 55 проценти


Скопје, 27 јули, 2018 - 15:39 (META) 

Mинистерот за транспорт и врски Горан Сугарески, директорот на Дирекцијата на технолошко индустриски развојни зони, Александар Младеновски и градоначалникот на општина Прилеп Илија Јованоски, извршија увид во изградба на пристапните патишта и водовод што се гради за потребите на ТИРЗ- Прилеп.

Со проектот предвидено е изградба на клучка на две нивоа која ќе овозможи едноставно и безбедносно вклучување и исклучување на магистралниот пат Прилеп – Битола. Вкупната должина на пристапните патишта до зоната е околу 2,8 километри или вкупната инвестиција е од околу четири милиони евра.

„Овој проект е од огромно значење за ТИРЗ-Прилеп заради обезбедување на соодветни услови за сегашните и идни инвеститори во зоната, се со цел да им се овозможи брз и навремен траспорт на нивните производи“, рече Сугарески.

На новинарски прашања во однос на капиталните инвестиции, министерот Сугарески истакна дека реализацијата на капиталните инвестиции на министерството за транспорт и врски се во висина од 55 проценти, додека значително зголемување се очекува во третиот и четвртиот квартал годинава.


Објавени условите за распределба на станови за социјално ранливи категории на граѓани


Скопје, 6 јули, 2018 - 11:17 (META) 

Министерот за транспорт и врски, Горан Сугарески ги објави условите за распределба на станови за социјално ранливи категории на граѓани во Кочани и Македонски Брод. Електронска распределба ќе се изврши на 43 станбени едници во Кочани и 10 станбени едници во Македонски Брод.

Јавниот оглас е објавен денеска во печатените медиуми како и на веб-страницата на Министерството за транспорт и врски и ќе трае до 6 август.

– Сакам да напоменам дека подносителот на барањето за добивање на социјален стан може да поднесе документација и да аплицира само за една од седумте категории корисници на социјални станови. Доколку лицето или некој од членовите на неговото заедничко домаќинство аплицира во повеќе од една од категориите на корисници, сите поднесени обрасци ќе бидат отфрлени.
Социјалните станови ќе се распределуваат во транспаретна постапка преку електронска распределба согласно Методологијата за бодирање на кандидати за добивање на социјален стан под закуп – изјави Сугарески.

Тој додаде дека предност при добивањето на стан ќе имаат децата без родители или родителска грижа –лица над 18 години кои до својата осумнаесетта година биле згрижени во институции и други облици за згрижување за деца без родители.

– Заинтересирани лица ќе можат да се обратат во Меѓуопштинските центри за социјална работа во Кочани и во Македонски Брод како и во Министерството за транспорт и врски за подетални информации – додаде Сугарески.


Во август нов договор за субвенционирани летови од македонските аеродроми


Скопје, 28 јуни, 2018 - 13:56 (META) 

Нов договор за доделување финансиска поддршка од државата за воведување нови дестинации од македонските аеродроми треба да биде потпишан во август годинава со авиокомпанија што ќе биде избрана на повикот што за таа намена го објави денеска Министерството за транспорт и врски.

Со тендерот на кој понуди ќе може да се доставуваат до 27 следниот месец, кога ќе има нивно јавно отворање, ќе биде избрана авиокомпанија која во наредните три години ќе добие финансиска поддршка од пет милиони евра.

За секоја нова дестинација од аеродромите во Скопје и Охрид ќе се исплаќа еднократен надомест од по 40.000 евра. За секој патник во заминување во првите три години за дестинации од Скопскиот аеродром авиокомпанијата ќе добива по девет односно осум и седум евра, а од Охридскиот аеродром финансиската поддршка по патник за првата година ќе изнесува 13 евра, односно 12 и 11 евра во втората и третата година.

Компаниите што ќе аплицираат меѓу другото треба да имаат превезено најмалку 10 милиони патници и остварено профит од 25 милиони евра минатата година.

– Финансиската поддршка ќе се додели на авиокомпанијата која ќе понуди најголем број нови дестинации на кои ќе оперира од и до меѓународниот аеродром Скопје и аеродромот „Св. Апостол Павле“ Охрид, а кои не биле опслужувани со редовен воздушен превоз во последните две ИАТА сезони – рече на прес-конференција ресорниот министер Горан Сугарески.

Според него, целата постапка ќе се одвива на јавен и транспарентен начин, а крајната цел е пораст на авиосообраќајот и обезбедување атрактивни дестинации за граѓаните согласно нивните потреби по прифатливи цени на билетите.

Како што појасни Сугарески, на повикот може да се пријават сите домашни и странски авиопревозници, вклучително и нискобуџетната авиокомпанија „Виз ер“ која во изминатите шест години со два договора доби 9,5 милиони евра субвенции од државата.

Обврските на државата кон „Виз ер“, посочи Сугарески, се исполнети. Според условите на тендерот, компанијата што ќе биде избрана најдоцна до 1 декември треба да воспостави или одржи база од најмалку еден воздухоплов на охридскиот аеродром, а најдоцна до 1 ноември годинава да стартува со оперирање на најмалку две дестинации од меѓународниот аеродром Скопје, а од охридскиот аеродром со најмалку четири нови дестинации од кои првите две до крај на годинава, а останатите во рок од една година од склучување на договорот.


Сугарески: 320 милиони евра во изградба и реконструкција на патната мрежа на Истокот


Штип, 21 јуни, 2018 - 14:22 (META) 

Градот Штип е важна раскрсница на Истокот и затоа ние максимално сме посветени на подобрување на патната инфраструктура во овој регион, изјави денеска министерот за транспорт и врски, Горан Сугарески при работната посета на Штип.

Тој додаде дека очекува изградбата на автопатот Миладиновци– Штип да биде завршен до септември оваа година.

– Работиме на изградба на експресен пат од Штип до Кочани кон бугарската граница. Создаваме брза патна врска и кон југ, преку изградба на нов експресен пат Штип – Радовиш.
Исто така, се рехабилитираат и други помали патни правци во овој регион. Сакам да истакнам дека генерално во регионов ќе инвестираме преку 320 милиони евра во изградба и реконструкција на патната мрежа – рече Сугарески.

Тој додаде дека посетата на Штип ја искористил и заедно со градоначалникот Благој Бочварски да доделат решенија за легализација на бесправно изградени објекти.

– Бидејќи рокот за достава на барањата истекува до крај на овој мeсец, сакам да апелирам до сите граѓани кои се уште ја немаат поднесено потребната документација, да го направат тоа што побрзо, бидејќи после тоа не размислуваме за продолжување на роковите. Исто така сите граѓани пак, кои претходно немаат доставено никакво барање за легализација, имаат рок до крајот на оваа година да ја достават потребната документација – додаде Сугарески.


Сугарески: За автопатот Кичево – Охрид не се проектирале клучки


Кичево, 19 јуни, 2018 - 16:36 (META) 

За еден месец ќе се знае колку ќе чини автопатот Кичево – Охрид, вели директорот на Јавното претпријатие за државни патишта, Зоран Китанов.

Од 374 милиони евра од банката ЕКСИМ наменети за овој автопат, 220 милиони се неискористени, и главната цел на Министерството за транспорт и врски ќе биде во Собранието да се пренаменат овие пари.

„Овие пари би се користеле за други позиции кои можат да се градат, а не за предвидените кои се во застој“, информираше министерот за транспорт и врски Горан Сугарески.

Сугарески и Китанов информираа дека поради грешки во проектирање на тунелот од минатото раководство сега цената за негова изведба ќе биде двојно поголема.

„Се трудиме да одиме со цените од подизведувачите, а не со цените од „Синохидро“ кои што биле досега. Но, дополнителните работи се доста на број“, изјави Китанов.

Геотехничките испитувања на земјиштето се правеле на едно место, а трасата за тунелот е на друго место на кое категоријата на земјата е сосема различна. Поради овие проблеми на помош изминатиот период дошол експерт од Австрија, а совети ќе се бараат и од стручни лица од САД.

„Нигде го нема ова да се проектира автопат, а да не се проектираат клучки. Со сегашната состојба не е предвидено нигде исклучување, што значи дека од Кичево до Охрид на ниту едно место граѓаните нема да можат да се исклучат од автопатот или пак да возат по сервисни патишта. Осумте клучки кои се во фаза на проектирање ќе чинат околу 30 милиони евра, но до крајот на месецов ќе имаме конечна сума за сите дополнителни работи“, вели министерот Сугарески.

Рокот за изградба на автопатот е продолжен до 2021 година.