Ако не се екстрадираат Грујевски и Бошкоски, одвоено ќе им се суди на Мијaлков и Јанкулоска


Скопјњ, 27 март, 2018 - 11:44 (META) 

Доколку до 15 мај обвинетите Горан Грујевски и Никола Бошкоски во предметот на СЈО „Тврдина – Таргет“ за масовното прислушување не бидат екстрадирани од Грција, Основниот суд Скопје 1 ќе одлучува за раздвојување на постапката по однос на овие двајца обвинети. Судското рочиште денеска беше одложено за 15 мај бидејќи обвинетите Грујевски, екс-началник на Петтата управа во МВР, и Бошкоски, вработен во УБК, сè уште не се екстрадирани.

Судијката Џенета Бектовиќ го праша адвокатот Петар Василев, кој е дел од одбраната на обвинетите, дали има информации до каде е судската постапката во Грција и дали може да каже кога ќе бидат екстрадирани.

– Не би сакал да шпекулирам со датуми. Но, очекувам дека во брзо време ќе биде завршена постапката. На 26 април е закажано рочиште во Врховниот суд на Грција по однос на нашата жалба за екстрадиција – рече Василев.

Судијката Бектовиќ му кажа на Василев во рок од 15 дена да обезбеди полномошно дека ги застапува обвинетите Грујевски и Бошкоски, во спротивно судот ќе им одреди адвокат по службена должност. На рочиштето денеска беа присутни другите обвинетите: поранешниот директор на УБК Сашо Мијалков, бившата министерка за внатрешни работи Гордана Јанкулоска и поранешниот шеф на кабинетот на Мијалков, Тони Јакимовски.

По бегството од Македонија, Грујевски и Бошкоски беа фатени со фалсификувани бугарски пасоши на аеродромот во Солун на 18 октомври при обид да заминат за Унгарија. Апелацискиот суд во Солун го прифати барањето на македонските власти за нивна екстрадиција, по што двајцата поднесоа жалба до Врховниот суд во Атина.


Одложено рочиштето во Атина за екстрадицијата на Грујевски и Бошковски


Атина, 2 март, 2018 - 10:43 (META) 

Врховниот суд во Атина за 9 март го одложи рочиштето на кое требаше да биде разгледана жалбата на одлуката за екстрадиција на Судот во Солун за поранешниот началник во УБК Горан Грујевски и неговиот колега Никола Бошковски поради отсуство на еден од адвокатите.

Минатото рочиште што беше одржано на 16 февруари, беше одложено поради краткиот период што го имале адвокатите за разгледување на предметот и затоа што не бил обезбеден преведувач на македонски јазик.

Во меѓувреме, Грујевски и Бошковски остануваат во атинскиот затвор „Коридалос“.

За Грујевски и Бошковски во Грција се водат три различни и меѓусебно неповрзани процеси.
Едниот е за фалсификуваните пасоши, со кои беа фатени на солунскиот аеродром, a судењето по три одложувања, ќе се одржи на 17 мај годинава.

Другиот случај е по поднесеното барање за азил на 29 ноември минатата година.

Третиот е по македонското барање за екстрадицијата, за кој Советот на судии во Солун, на 5 јануари одлучи, Бошковски и Грујевски да бидат екстрадирани во Македонија, а веднаш потоа нивните адвокати поднесоа жалбата против одлуката на судот, за случајот да го разгледа Врховниот суд во Атина.


Судот во Солун следната среда треба да ја соопшти одлуката за Грујовски и Бошковски


Солун, 13 декември, 2017 - 17:40 (META) 

Судот во Солун се очекува во среда следната недела да ја соопшти одлуката дали ќе го прифати барањето на македонските власти за екстрадиција на поранешните началници во Управата за безбедност и контраразузнавање (УБК), Горан Грујовски и Никола Бошковски, обвинети од Специјалното јавно обвинителство во случаите „Таргет“ и „Тврдина“, пренесува „Алсат М“.

Денешното рочиште траело речиси четири часа и се одвивало зад затворени врати, односно била исклучена јавноста на барање на грчките адвокати на Грујовски и на Бошковски кои во судот биле донесени со лисици на рацете.

Грујовски носел кеса со македонски весници, кои одбраната ги приложила во судот.

Како сведок во солунскиот суд денеска исказ дал адвокатот Петар Василев, кој објаснувал каква постапка се води против Грујовски и Бошковски во земјава. На следното рочиште, пред да биде донесена одлуката околу барањето за екстрадиција, судот треба да ја сослуша и сопругата на Грујовски, која е предложена како сведок на неговата одбрана.

Грујовски и Бошковски се во притвор во затвор во близина на Солун. Инаку, на двајцата им се суди во солунскиот суд и за фалсификуваните пасоши со кои беа фатени на 18 октомври, на аеродромот во Солун како се обидуваат да заминат за Будимпешта. Ова судење, кое се води одвоено од постапката за нивна екстрадиција, е одложено за 17 мај 2018 година.


Почна рочиштето за екстрадицијата на Грујовски и Бошковски во судот во Солун


Солун, 13 декември, 2017 - 13:36 (META) 

Во судот во Солун денеска почна рочиштето по барањето на македонските власти за екстрадиција на поранешните началници во Управата за безбедност и контраразузнавање (УБК), Горан Грујовски и Никола Бошковски, обвинети од Специјалното јавно обвинителство во случаите „Таргет“ и „Тврдина“.

Адвокатот Петар Василев за државната новинска агенција МИА изјавил дека судењето почнало, но дека рочиштето е затворено во јавност. Во меѓувреме, како што изјавил Василев, дадена е пауза „за да ги разгледаат документите што ги достави Министерството за правда, по што постапката ќе продолжи“.

Грујовски и Бошковски се во притвор во затвор во близина на Солун. Инаку, на двајцата им се суди во солунскиот суд и за фалсификуваните пасоши со кои беа фатени на 18 октомври, на аеродромот во Солун како се обидуваат да заминат за Будимпешта. Ова судење, кое се води одвоено од постапката за нивна екстрадиција, е одложено за 17 мај 2018 година.


Грујовски и Бошковски побарале азил во Грција, судењето одложено за 17 мај


Солун, 1 декември, 2017 - 13:11 (META) 

Поранешните разузнавачи Горан Грујoвски и Никола Бошкоски во средата побарале азил во Грција, потврдиле адвокатите што ги застапуваат, јавува „Макфакс“.

Судот за прекршоци во Солун го одложил денешното судење за двајцата бегалци од правдата за 17 мај, а ним треба да им се суди за поседување лажни патни исправи. Судењето е одложено бидејќи не бил присутен еден од групата што била со нив, а немале регулиран престој во Грција.

Ексразузнавачите во тренирки и капути, со лисици на рацете, биле донесени во придружба на полиција, во комби со мигранти. На денешното судење имало овластен судски преведувач, кој ги преведувал прашањата на судијката, а биле присутни и грчки адвокат и адвокатот Петар Василев.

На 13 декември истиот суд треба да расправа за барањето за екстрадиција кое го поднесе Министерството за правда.

Судењето на Грујoвски и на Бошкоски претходно двапати беше одложувано поради немање овластен судски преведувач. Тие на 18 октомври беа уапсени со лажни пасоши на аеродромот во Солун, во обид да заминат за Будимпешта.

Грујoвски и Бошковски се обвинети од СЈО за нелегално прислушување и за уништување на системите за прислушување во случаите „Тврдина“, „Таргет“ и „Тврдина 2“. Македонските власти на 6 ноември ја доставија документацијата за нивна екстрадиција од Грција.


Рочиштето за екстрадицијата на Грујовски и на Бошковски одложено за 13 декември


Солун, 29 ноември, 2017 - 16:49 (META) 

Судот во Солун за 13 декември го одложи рочиштето за одговор на барањето на Министерството за правда на Македонија за екстрадиција на поранешните функционери во Управата за безбедност и контраразузнавање (УБК), Горан Грујовски и Никола Бошковски, обвинети во случаите „Таргет“, „Тврдина“ и „Тврдина 2“ на СЈО.

Рочиштето, кое беше закажано за денеска, е одложено бидејќи била отсутна адвоката од адвокатскиот тим на Грујовски и на Бошковски. Друга причина за одложувањето бил некомплетниот превод на документацијата за екстрадиција испратена од македонското Министерство за правда.

Грујовски и Бошковски остануваат во притвор во затвор во близина на Солун. Тие в петок повторно треба да се појават пред судот во Солун, на рочиштето за фалсификуваните пасоши со кои беа фатени на 18 октомври на аеродромот во Солун, кога се обидоа да заминат за Будимпешта.

Ова судење е одвоено од постапката за екстрадиција. Тоа досега беше двапати одложувано бидејќи солунскиот суд не можеше да обезбеди преведувач од македонски на грчки јазик и обратно.


На 22 декември ќе почне судењето за „Тврдина-Таргет“


Скопје, 23 ноември, 2017 - 10:58 (META) 

На 22 декември во Основниот суд Скопје 1 е закажано судењето за предметот на СЈО „Тврдина-Таргет“, за нелегалното масовно прислушување на граѓани од 2009 до 2015 година од страна на УБК.

Предметот ќе го суди судијката Ленка Давиткова, а рочиштето почнува во 10 часот.

Во случаите „Таргет“ и „Тврдина“, кои се споени во еден обвинителен акт, првообвинети се поранешниот директор на Управата за безбедност и контраразузнвање (УБК), Сашо Мијалков, ексминистерката за внатрешни работи Гордана Јанкулоска, поранешниот шеф на кабинетот на Мијалков, Тони Јакимовски, и уште десетина лица. Тие се товарат за незаконското прислушување, што пред две години го разоткри тогаш опозициската, а сега владејачка партија – СДСМ, и за уништување на опремата од прислушувањето.

Дел од обвинетите во случајот се началниците Горан Грујовски и Никола Бошковски, кои избегаа во Грција и се наоѓаат во екстрадиционен притвор во Солун, откако на 18 октомври беа уапсени на солунскиот аеродром додека со лажни бугарски пасоши се обидувале да заминат за Будимпешта.


Шврговски најави жалба на пресудата за Грујовски за „Тврдина 2“


Скопје, 8 ноември, 2017 - 15:50 (META) 

Адвокатите на поранешниот началник на петтата управа, Горан Грујовски, најавија жалба на пресудата за една и пол година затворска казна, по завршувањето на денешното рочиште на кое судијката Лидија Петровска ги соопшти пресудите и казните за обвинетите во случајот „Тврдина 2“ на Специјалното јавно обвинителство.

– Ние очекувавме ослободителна пресуда бидејќи сме на став дека не постои како објект на заштита службена исправа која може да биде предмет на ова кривично дело. Очигледно, со судот имаме различна диоптрија на гледање на работите и од тие причини ние ќе поднесеме жалба на овие околности и на околностите околу надлежноста што ја оспоривме во текот на завршните зборови – изјави адвокатот Љупчо Шврговски.

Претходно, обвинителката на СЈО, Ленче Ристоска, во изјава за медиумите рече оти се задоволни од пресудата за Грујoвски и за шесте службенички во УБК, осудени за уништување илјадници списи во случајот „Тврдина 2“.

– Ваквата пресуда беше според нашите очекувања. Ние сме задоволни, но ќе ја почекаме пресудата и ќе ги разгледаме аргументите на судот, па ќе одлучиме дали ќе се жалиме – рече Ристоска.


Горан Грујовски доби година и пол затворска казна во случајот „Тврдина 2“


Скопје, 8 ноември, 2017 - 12:11 (META) 

Поранешниот началник на петтата управа во МВР, Горан Грујовски, кој беше во бегство, доби една и пол година затворска казна за незаконското палење на илјадници списи во случајот „Тврдина 2“ на СЈО. Другите шест обвинети, вработени во УБК, добија условни казни за фалсификување службена исправа, пет од нив се осудени на условна казна од 9 месеци, а една од нив на 2 години.

На Грујевски, кој се наоѓа во екстрадициски притвор во Солун, му се судеше во отсуство.

Обвинителката на Специјалното јавно обвинителство, Ленче Ристоска, пред два дена, на завршните зборови на судењето, побара од судот максимална казна за Грујовски, за случајот „Тврдина 2“, додека за другите шест службенички од УБК, обвинети во случајот, таа му предложи на судот да им одреди алтернативни, односно условни казни.

Ристоска тогаш истакна дека мотивот на Грујовски, како наредбодавец за уништувањето на документацијата од УБК, бил да се сокријат трагите за тоа кој и како прислушувал стотици граѓани во Македонија и да се отежни истрагата за масовното кршење на човековите слободи и права од страна на Управата за безбедност и контраразузнавање. Таа рече дека уништувањето на документите во полициската база Брест во Петровец, се случувало истовремено со уништувањето на системите од незаконското следење на комуникациите во МВР, за што Грујовски, исто така, е обвинет во случајот „Тврдина“.


Ристоска побара од судот максимална казна за Грујовски за „Тврдина 2“


Скопје, 6 ноември, 2017 - 11:55 (META) 

Обвинителката на Специјалното јавно обвинителство, Ленче Ристоска, денеска побара од судот максимална казна за поранешниот началник на петтата управа, Горан Грујовски, за случајот „Тврдина 2“, додека за другите шест службенички од УБК, обвинети во случајот, таа му предложи на судот да им одреди алтернативни, односно условни казни.

Инаку, Грујовски и службеничките во УБК беа обвинети за уништување на документацијата од незаконското прислушување. СЈО ги гонеше за фалсификување службена исправа, според членот 361, став 2, за што е предвидена затворска казна од три месеци до пет години.

По денешните завршни зборови, судот в среда ќе ја изрече пресудата.

Ристоска, во завршните зборови пред Кривичниот суд во Скопје за случајот „Тврдина 2“, истакна дека мотивот на Грујовски, како наредбодавец за уништувањето на докуемнтацијата од УБК, бил да се сокријат трагите за тоа кој и како прислушувал стотици граѓани во Македонија и да се отежни истрагата за масовното кршење на човековоте слободи и права од страна на Управата за безбедност и контраразузнавање. Таа рече дека уништувањето на документите во Петровец, во близина на Скопје, се случувало истовремно со уништувањето на системите од незаконското следење на комуникациите во МВР, за што Грујовски исто така е обвинет во случајот „Тврдина“.

Обвинителката на СЈО, побара од судот при определувањето на казната да не го зема како олеснителна околност тоа што Грујовски е татко на две деца, туку фактот дека е во бегство, со што децата и семејството ги оставил на цедило, без извор на егзистенција.

За шесте службенички од УБК, кои наместо да ја одбијат наредбата на Грујовски, учествувале во постапката за уништување на документите, Ристоска побара условни казни. Како отежнителна околности таа побара од судот да го оцени тоа што ниту една не се покајала за стореното, но нагласи дека секоја од нив, наведувајќи ги по име, имала беспрекорно однесување во УБК и дека немале дамка во работењето и оти дел од нив се самохрани мајки.

Адвокатот на Грујовски, Љупчо Шврговски, пред судот рече дека во случајот нема основи за кривично, туку за евентуално прекршочно дело. Одбраната наведе дека СЈО нема мандат да гони дела сторени во 2015 години и дека ова проширување на надлежноста на СЈО ќе доведе до правна конфузија.

Инаку, на Грујовски му се судеше во отсуство, бидејќи тој заедно со својот колега од УБК, Никола Бошковски, се наоѓаат во екстрадициски притвор во Солун, откако беа уапсени на солунскиот аеродром, во обид со лажни бугарски пасоши да заминат за Будимпешта.