Ахмети: Концептот на поделби е штетен за Албанците


Приштина, 14 јуни, 2018 - 9:37 (META) 

Лидерот на Демократската унија за интеграција (ДУИ), Али Ахмети порача дека нема да има национално обединување на Албанците во една држава, туку дека тие треба да ги јакнат државите во кои живеат и заедно да се интегрираат во Европската унија, јавува дописникот на МИА од Приштина.

Ахмети синоќа во емисијата „Пресинг“ на приштинската телевизија „Т7“ рече дека „нема Албанец кој не ја сака Албанија и кој не сака национално обединување“, но дека работите се многу сменети од 90-тите години на минатиот век.

– Албанците сега треба да тежнеат да се обединат во Европа, со интегрирањето на Албанија, Косово, Македонија и Црна Гора во Европската унија. Друга алтернатива нема. Ниту за Албанците, ниту за нашите соседи – рече Ахмети.

Говорејќи за идеите за територијални поделби, лидерот на ДУИ рече дека „концептот на поделби е штетен за Албанците“.

– Во прв ред, немаш како да делиш. Не можеш да ги делиш границите ниту со конец, ниту се лењир – рече Ахмети.

За таканаречената „Голема Албанија“, лидерот на ДУИ вели дека тој концепт на Албанците им го импутираат другите, пренесува МИА.


Лавров: ЕУ е пасивна околу тиранската платформа и кршењето на Охридскиот договор


Белград, 22 февруари, 2018 - 13:13 (META) 

Министерот за надворешни работи на Русија, Сергеј Лавров на заедничка прес-конференција со српскиот претседател, Александар Вучиќ во Белград вчера повторно ја спомена Македонија, истакнувајќи дека Москва не може „а да не биде загрижена за пасивноста на Европската Унија во врска со иницијативата што се појави од Тирана за т.н. тиранска платформа“, која, како што кажа, е „нескриен повик за создавање на ‘Голема Албанија’“.

– Примерите за тоа се доста вознемирувачки. Неодамна, кога беа одржани парламентарните избори во Македонија, претседателот на Парламентот, откако беше избран на функцијата, влезе во својот кабинет и на работната маса постави албанско знаме. Ова е во Македонија. Деновиве албанскиот премиер, Еди Рама, гордо кажа дека тој од Албанија го иницирал законот во Македонија со кој на албанскиот јазик му се дава статус на државен јазик во земјата – изјави Лавров одговарајќи на новинарско прашање на прес-конференцијата со Вучиќ, за време на неговата официјална посета на Србија.

На тој начин, рече шефот на руската дипломатија, се прекршува Охридскиот рамковен договор „кој сите ние го примивме како олеснување, бидејќи создаде основи за надминување на кризата во Македонија пред повеќе години“.

– Доколу овие постигнувања и договори сега се уништат, се што било сработено и договорено со големи напори, било да е тоа во Македонија, Босна и Херцеговина и на друго место во Западен Балкан, ќе биде изгубено. Ми се чини дека има доволно причини да побараме од Европската Унија да каже како ги исполнува своите сопствени одлуки и колку тоа кореспондира со довербата што и беше дадена од меѓународната заедница – изјави Лавров.


Вучиќ и Иванов размениле „тешки и остри зборови“ со Тачи и со Нишани во Брдо кај Крањ


Крањ, 3 јуни, 2017 - 21:30 (META) 

Претседателот на Србија, Александар Вучиќ, во Брдо кај Крањ изјави дека заедно со македонскиот претседател Ѓорге Иванов размениле „тешки и остри зборов со албанските претставници“ на состанокот, додавајќи дека е така подобро отколку работите да се пренесат на улица, пренесува „Б92“.

Вучиќ рекол дека не памети толку остра и тешка дискусија со косовскиот претседател Хашим Тачи, но дека заедно со Иванов недвосмилено покажале што е вистина во однесувањето на луѓето од Приштина и во заговарањето на голема Албанија.

„Се обидоа да кажат дека тоа се измислици на Белград и морам да кажам дека македонскиот претседател Ѓорге Иванов во целост ги поддржа сите аргументи што ги изнесов и беше многу остар, така што на некои им изгледаше дека правиме блок Србија и Македонија против двајцата албански претставници, што не беше случај“, рекол Вучиќ.

Инаку, Вучиќ и Иванов денеска учествуваа на состанокот на лидерите на Процесот Брдо – Бриони, што се одржа во Брдо кај Крањ.

На средбата, чии домаќини беа претседателите на Словенија и на Хрватска, Борут Пахор и Колинда Грабар-Китаровиќ, учествуваа и претседателот на Сојузна Република Германија, Франк Валтер Штајнмаер, кој беше специјален гостин, претседателот на Црна Гора, Филип Вујановиќ, претседателот на Косово, Хашим Тачи, претседателот Албанија, Бујар Нишани, и членот на претседателството на Босна и Херцеговина, Драган Човиќ.


Дачиќ: Кризата во Македонија ескалира поради проектот „Голема Албанија“


Белград, 30 мај, 2017 - 14:57 (META) 

Шефот на српската дипломатија, Ивица Дачиќ, денеска оцени дека бебедносно-политичката ситуација во светот, но и во регионот е влошена. Тој наведе дека во многу земји од регионот се зајакнал национализмот, а политичката сцена се радикализирала.

– Тоа особено беше видливо во Хрватска и во БИХ во текот на 2016 година. На почетокот од 2017 година дојде до ескалација на кризата во Македонија, во чија основа е сè помалку скриениот и сè поагресивно актуализираниот проект „Голема Албанија“, што имплицира измена на постојните граници во регионот, односно присоединување кон Албанија на поголеми или помали делови од териториите на соседните земји – рече Дачиќ.

Денеска за состојбата во регионот говореше и српскиот премиер во заминување, Александар Вучиќ, кој на својата последна прес-конференција како претседател на српската влада рече дека постојат тензии во регионот, но дека сега проблемите не се „туркаат под тепих“.

Тој вети дека како претседател на Србија ќе работи на унапредувањето на односите со соседите.


Нимиц чека формирање влада за да се реактивираат преговорите за името


Њујорк, 28 мај, 2017 - 14:25 (META) 

Медијаторот Метју Нимиц чека да се формира нова влада во Скопје за да започне со нови сериозни разговори за решавање на спорот за името. Нимиц во интервју за грчкиот весник „Реал њуз“ вели дека решавањето на спорот за името треба да биде високо на агендата на новата македонска влада и потенцира дека решавањето на овој проблем може да помогне да се решат и други проблеми во регионот.

-Мандатот кој го имам за решавање на спорот за името е клучот кој ќе ја отвори вратата за да се решат и други спорни проблеми во регионот. Спорот може да се реши ако и двете земји и нивните лидери добијат поддршка од нивните народи, ако разгледаат нешто што е логично, што ќе го задржува достоинството на двете земји, идентитетот на двете земји, историската смисла на двете земји. Мислам дека постојат решенија- вели Нимиц.

Нимиц остро се противи на идејата за било каков разговор за менување на границите на Балканот. На новинарско прашање околу споменувањата на идејата за Голема Албанија, тој вели дека секој разговор за промена на граници, особено на Балканот е опасен.

– Секој разговор за промена на границите, посебно на Балканот е секогаш опасен, Разговор за се што е поголемо, вклучувајќи и една поголема Албанија е погрешен. Границите треба да останат таму каде што се и мислам дека тоа што го нарекуваме ФИРОМ е една држава членка на Обединетите нации, признатa како држава од сите нејзини соседи – коментира Нимиц.

Тој ги повика Албаниците во Македонија да придонесат за функционирање на државата и да работат за решавање на проблемите на демократски начин.


Србија ќе се обрати во ОН поради изјавите на Вокер за Голема Албанија


Белград, 10 мај, 2017 - 13:26 (META) 

Србија ќе се обрати во Обединети нации поради изјавите на поранешниот шеф на верификационата комисија на ОБСЕ на Косово, Вилијам Вокер, дека работи на проектот за создавање на „голема Албанија“.

Ставовите на Србија ќе ги пренесе министерката за правда, Нела Кубуровиќ, која на 16 мај ќе учествува на седница на Советот за безбедност на ОН, на која ќе биде разгледан редовниот тримесечен извештај за работата на Мисијата на ОН на Косово.

Влијам Вокер пред три дена, во Приштина, на прославата на годишнината на Алијансата, за иднина на Косово рече дека има проект за обединување на Албанците на Косово, Албанија и во дијаспората.

На изјавата остро реагираше и српскиот премиер во заминување, Александар Вучиќ. Тој рече дека таа изјава е доказ дека Вокер е големоалбански лобист и дека од почетокот се залагал за остварување на тој проект и додаде дека ќе инсистира за таа изјава да се разговара на „сите нивоа во Европа и во светот“.

И министерката задолжена за европска интеграција, Јадранка Јоксимовиќ, денеска изјави дека Србија ќе се обрати во ОН поради изјавата на Вокер затоа што „проблемот на „голема Албанија“ не е само проблем на Србија туку вклучува територии на неколку земји на Балканот“.


Белград инсистира кај ЕУ за мирно решение на кризата во Македонија


Белград, 5 мај, 2017 - 11:23 (META) 

Јавниот дискурс кој повикува на насилство, во отсуство на суштински дијалог меѓу Белград и Приштина, и нестабилноста во Македонија претставуваат сериозна и отворена закана за мирот во Југоисточна Европа, е главната порака на неофицијалниот документ што српската министерка за европски интеграции, Јадранка Јоксимовиќ, и директорот на Канцеларијата за Косово, Марко Ѓуриќ, им го предале на амбасадорите на земјите-членки на ЕУ во Белград.

Во документот кој бил врачен на состанокот на владата на Србија, Белград инсистира на барање избалансирано и мирно политичко решение за кризата во Македонија, како и на безусловно почитување на меѓународните норми во поглед на почитувањето на територијалниот интегритет и суверенитетот на меѓународно признатите држави и „отфрлање на насилството како средство за остварување на политичките цели“.

Србија, исто така, апелира сите релевантни меѓународни актери „да ја осудат агресивната реторика која несомнено го турка регионот на Западен Балкан во нови судири и поделби“ и повикува „на итно продолжување на дијалогот меѓу Белград и Приштина за нормализација на односите“ под покровителство на ЕУ.

Во документот се наведуваат новите примери на „неодговорни и провокативни изјави и агресивната реторика“ на албанските политички лидери во Албанија, Косово, на југот на Србија, со оценка дека станува збор за координирани потези за промовирање на идејата за „голема Албанија“.


Вучиќ: Во приказните за „голема Албанија“ е вмешана странска служба


Лесковац, 25 април, 2017 - 20:07 (META) 

Премиерот на Србија, Александар Вучиќ, денеска изјави дека секојдневните изјави на албанските политичари за создавање на „голема Албанија“ е последица на добро координирана акција и дека српските служби за безбедност „нашле траги“ на заедничко дејствување на најмалку една странска служба со разузнавачките служби од Тирана и од Приштина.

Вучиќ во Лесковац изјави дека само се поставува прашањето дали Албанците дејствуваат сами или во координација со некој од „нашиот или од некој друг континент“ и која е нивната крајна цел.

Тој рече дека постои можност Албанците секојдневно да ја спомнуваат „голема Албанија“ бидејќи сакаат таа идеја да се легитимизира, сите да се навикнат на тоа и да стане нормално да се зборува за тоа, а никој да не реагира.

Вучиќ изрази благодарност до еврокомесарот за проширување и за добрососедска политика Јоханес Хан, за неговата реакција на овие изјави, бидејќи, како што рече, тоа беше многу важно.


ВМРО-ДПМНЕ: Летањето дронови со мапа на „голема Албанија“ е дел од платформата


Скопје, 24 април, 2017 - 10:04 (META) 

Летањето дронови со знамиња од мапата на голема Албанија е дел од тиранската платформа, чии творци се надеваат дека на тој начин ќе му порачаат на македонскиот народ што го очекува, стои во редовното утринско соопштение на ВМРО-ДПМНЕ.

Оттаму повторно го обвинија лидерот на СДСМ, Зоран Заев, дека е „еден од реализаторите на тиранската платформа“, кој нема „храброст да ги осуди инцидентите насочени против македонскиот идентитет и суверенитет“.

„По симнувањето на македонското знаме од јарболот во центарот на Куманово, вчера на фудбалски натпревар помеѓу „Вардар“ и „Шкупи“ во скопски Чаир се развиори знамето на голема Албанија. Аболираниот криминалец Зоран Заев упорно продолжува да ги брани антимакедонските изјави на Зијадин Села, Еди Рама, Хашим Тачи, Дитмир Бушати и на Месила Дода. Заев со своите помошници од криминогениот СДС на коцка ги ставија националните и државните интереси на Република Македонија само да си ја спасат кожата“, стои во соопштението на ВМРО-ДПМНЕ.


ВМРО-ДПМНЕ го обвинува Заев за плакатот со „голема Албанија“ во Чаир


Скопје, 23 април, 2017 - 20:21 (META) 

Откако медиумите пренесоа дека на мечот помеѓу фудбалските клубови „Шкупи“ и „Вардар“ на стадионот во Чаир со дрон беше развејуван плакат со карта на „голема Албанија“, ВМРО-ДПМНЕ вината за тоа, како поттикнувач, ја префрли на претседателот на СДСМ, Зоран Заев.

„Изјавите и дејствата на Заев со кои ги храни големоалбанските апетити, од ден на ден го зголемуваат албанскиот иредентизам во регионот. По симнувањето на македонското знаме од јарболот во центарот на Куманово, денеска на фудбалски натпревар помеѓу „Вардар“ и „Шкупи“ во скопски Чаир се развиори знамето на голема Албанија. Аболираниот криминалец Заев е директен виновник за ваквите изливи на шовинизам и на иридентизам, кои ја поткопуваат македонската државност“, порача ВМРО-ДПМНЕ.