МПЦ ја покани БПЦ на 1.000 годишнината на Охридската архиепископија, СПЦ ќе слави посебно


Скопје, 11 мај, 2018 - 10:09 (META) 

Македонската православна црква – Охридска архиепископија (МПЦ-ОА) ја поканила Бугарската православна црква (БПЦ) на одбележувањето на 1.000 годишнината на Охридската архиепископија.

Поглаварот г.г. Стефан за бугарската агенција БГНЕС потврдува дека поканата е испратена до бугарскиот патријарх Неофит и до државниот врв на Бугарија за заедничко одбележување на 1000-годишнината од основањето на Охридската архиепископија.

Според најавите од МПЦ-ОА, 1000-годишниот јубилеј ќе биде одбележан со црковно-државни свечености во Охрид на 27 и 28 мај.

Српската православна црква (СПЦ), исто така ќе ја одбележи илјадагодишнината од основањето на Охридската архиепископија, се наведува во соопштението издадено по годишното заседание на Светиот архиерејски собор на СПЦ, што заврши вчера.

Во соопштението се вели дека одбележувањето ќе биде „во текот на оваа година, молитвено и достоинствено“.

Исто така, на соборот е поздравена правосилната одлука на Големиот совет на Европскиот суд за човекови права „со која се констатира дека власта на Поранешна југословенска Република Македонија ја прекршиле меѓународната конвенција за човечки права и за слободата на вероиспосвеста и совеста одбивајќи да ја регистрираат канонската Охридска архиепископија.


Заев: 27 април беше срам за државата, покажавме дека не сме такви


Скопје, 25 април, 2018 - 15:01 (META) 

По повод годишнината од инцидентите во Собранието на 27 април, премиерот Зоран Заев вели дека од тој настан, кој бил срамен за граѓаните и државата, треба да извлечеме поука за никогаш да не се повтори.

Прашан дали верува во правна разрешница за овој случај, тој додаде дека лицата кои се огрешиле пред закон, ќе бидат извадени пред системот на правдата, согласно доказите.

„Јавноста беше сведок на целиот настан и убеден сум дека правниот систем нема да затаи и дека ќе донесе правична и правилна одлука. Овој датум треба да го одбележиме поради помладите генерации со кои што ќе испратиме порака да не се повтори“, одговори Заев на денешната прес-конференција во Влада, на која беше потпишан договорот со УНДП, за годишната програма за вработување.

Тој додаде дека, како држава, од овој настан излеговме посериозни и потрезвени, и денес, како што потенцираше, на светот му испраќаме порака дека се срамиме од тој ден, и дека како народ не сме такви, туку сме пријателска земја.


Одбележани 146 години од раѓањето на Гоце Делчев


Скопје, 4 февруари, 2018 - 14:00 (META) 

Во рамки на одбележување на 146-годишнината од раѓањето на националниот херој и револуционер, Гоце Делчев, владина делегација положи свежо цвеќе на вечното почивалиште на Делчев во црквата „Св. Спас“ во Скопје.

„Идеалите и заложбите на големиот визионер Гоце Делчев се наша заедничка обврска да продолжиме да ја градиме државата во правец на остварување на тој вековен сон за слободна, демократска и економски напредна земја. Во духот на единство и сплотеност потребна е вклученост и искрен пристап во политичките предизвици пред кои е исправена земјата од сите општествени чинители и граѓани, без разлика на нивната верска, етничка или политичка припадност“, се вели во соопштението на Владата.

Годишнината од раѓањето на Делчев, беше одбележана во повеќе градови во државата и од различни партии.


Владата и СДСМ ја одбележаа годишнината од смртта на Киро Глигоров


Скопје, 1 јануари, 2018 - 18:11 (META) 

Со положување цвеќе на гробот на Киро Глигоров, првиот претседател на независна Македонија, Владата и СДСМ денеска ја одбележаа шестгодишнината од неговата смрт.

Во владината делегација на гробиштата Бутел беа министерот за култура Роберт Алаѓозовски, министерката задолжена за странски инвестиции Зорица Апостолска и заменик-министерот за локална самоуправа Дејан Павлески. Делегацијата на СДСМ ја сочинуваа Миле Зечевиќ, организационен секретар на СДСМ, Цветанка Ласкова, координаторка на Форумот на жени на СДСМ и Љубица Јанчева, претседателка на Советот на Град Скопје.

Киро Глигоров почина на денешен ден во 2012 година. Беше избран за претседател на Република Македонија на 27 јануари 1991 година и функцијата ја вршеше во два мандати, до 19 ноември 1999 година.


Одбележана годишнината од нападите во Њујорк и во Вашингтон


Вашингтон, 11 септември, 2017 - 16:48 (META) 

САД ја одбележаа 16-годишнината од терористичкиот напад на Ал каеда во Њујорк и во Вашингтон, во кој на 11 септември 2001 година загинаа околу 3.000 лица.

Во Њујорк, на местото на кое беа кулите близначки, односно Светскиот трговски центар, роднините на загинатите носеа нивни фотографии и ги чита нивните имиња.

Церемонијата, на која учествуваа околу 1.000 лица, почна со едноминутно молчење и со биење на камбани, по што традиционално беа прочитани имињата на загинатите.

Американскиот претседател Доналд Трамп го предводеше оддавањето почит на жртвите во Вашингтон. Тој и првата дама Меланија пред Белата куќа со едноминутно молчење им одадоа почит на околу 3.000 лица кои загинаа откако терористите на Ал каеда киднапираа авиони и ги насочија во кулите близначки во Њујорк и во Пентагон во Вашингтон, додека еден авион падна во Пенсилванија.

Одавањето почит во Белата куќа беше одржано во 8.46 часот по локално време, кога првиот авион удри во кулите близначки во Њујорк.

Трамп и правата дама исто така учествуваа на церемонијата во Пентагон, која ја предводеше министерот за одбрана, Џим Матис.

Потпретседателот на САД, Мајк Пенс, ја претставуваше администрацијата во Шанксвил, Пенсилванија, каде се урна авионот во кој патниците ги оневозможија терористите да извршат напад на Конгресот и на Белата куќа во Вашингтон.


Поради годишнината од Рамковниот, Џафери ја презакажа седницата за в понеделник


Скопје, 12 август, 2017 - 23:12 (META) 

Претседателот на Собранието, Талат Џафери се премисли и расправата за разрешувањето на државниот јавен обвинител, Марко Зврлевски, која требаше да продолжи утре, ја презакажа за в понеделник.

На официјалната интернет-страница на Собранието стои дека за утре не се предвидени никакви активности во законодавниот дом, а продолжението на седницата е закажано за в понеделник во 11 часот.

Пратениците, како што објави „Телевизија 24“, веќе добиле смс-пораки дека седницата планирана за утре е презакажана.

Според неофицијални информации, седницата се одложува поради активностите на дел од политичарите и пратениците околу одбележувањето на 16-годишнината од потпишувањето на Охридскиот рамковен договор.

Од кабинетот на Џафери вечерва соопштија дека утре во 19 часот тој ќе има обраќање по повод одбележувањето на годишнината од потпишувањето на Охридскиот договор, што ќе се одржи во хотелот „Александар Палас“ во Скопје. Во најавата за обраќањето на Џафери, нема информација за одложувањето на собраниската седница.

Инаку, собранискиот спикер на денешното продолжение не го прифати барањето на кооридинаторот на една од 10-те пратенички групи на ВМРО-ДПМНЕ, Илија Димовски, седницата за разрешувањето на државниот јавен обвинител, Марко Зврлевски да продолжи в понеделник. Џафери изјави дека пратениците на опозициската партија ја поставиле динамиката во која тече дебата и дека додека имаат работа ќе мора да работат.


Со „Скопје го слави животот“ ќе се одбележат 54 години од катастрофалниот земјотрес


Скопје, 25 јули, 2017 - 11:18 (META) 

Со настани организирани од Младинскиот културен центар (МКЦ) – Скопје, Музејот на Град Скопје и од Град Скопје, утре ќе се одбележат 54 години од катастрофалниот земјотрес што го погоди Скопје на 26 јули 1963 година.

Мултимедијалниот културен настан што под мотото „МКЦ за Скопје“ го организира Младинскиот културен центар, кој традиционално се одржува на 26 јули, годинава се одржува два дена, односно почнува денеска, 25 јули, а ќе заврши утре.

Вечерва во 20 часот почнува книжевна вечер посветена на поетесата Даница Ручигај, а ќе има и проекција на документарните филмови „Поетот живее по смртта“ и „Соновите не заспиваат“.

Утре во 20 часот во галеријата на МКЦ ќе биде отворена изложба на Димитар Аврамовски-Пандилов, а во 22.30 ќе почне концерт на повеќе музички изведувачи од САД. Истовремено, ќе се одржи и фотографска изложба на Вацлав Шваб, како и готографски инсталации „Јас, ти и градината, фотографии на отворено“ од Ан Д’Гела, Максим Делво, Герт Д’Теје, Алан Брејер.

Во Музеј на Град Скопје утре во 20 часот ќе биде отворена изложба на фотографии од Матијас Шуман од Дрезден, Германија, а со почеток во 21 часот ќе настапи ревискиот оркестар на „Македонска радио-телевизија“.

 


Турците вчера пред да телефонираат мораа да го слушаат Ердоган


Анкара, 16 јули, 2017 - 13:55 (META) 

Обидот да се повика мобилен број во Турција вчера доведуваше до неочекуван соговорник – гласот на турскиот претседател Реџеп Таип Ердоган. По вртењето на бројот, пред да почне воспоставувањето на врската, повикувачот првин ја слушаше снимената аудиопорака од претседателот, а дури по нејзиниот крај почнуваше вртењето на бројот, јавуваат турските медиуми.

Во пораката, Ердоган им го честитал на повикувачите „националниот празник на демократијата и на единството“, со кој се одбележа првата годишнина од неуспешниот пуч.

„Како претседател, испраќам честитки за 15 јули – Денот на демократијата и националното единство и посакувам милост за мачениците, а на хероите (кои се бореа против пучистите) здравје и благосостојба“, гласи пораката која траеше 16 секунди.

Дека нарачката за оваа „услуга“ ја направила државата, на својот твитер-профил потврди Омер Фатих Сајан, директор на Комисијата за информации и комуникациски технологии (БТК).

Овој потег предизвика гнев кај многумина корисници, а многумина критикуваа и објавија видеоснимки на кои се гледа како мора да почекаат да заврши пораката пред да може да разговараат.


Шест години по убиството на Нешковски, обидот за прикривање уште актуелен


Скопје, 6 јуни, 2017 - 12:50 (META) 

Денеска е шестгодишнината од протестите против полициската бруталност што избувнаа по убиството на Мартин Нешковски вечерта на 5 јуни 2011 година, за време на прославата на изборната победа на ВМРО-ДПМНЕ.

Специјалното јавно обвинителство на почетокот на минатата година го презеде во своја надлежност случајот за убиството на Нешковски, кој, како што информираат оттаму, сè уште е во предистражна постапка.

Инаку, полицаецот Игор Спасов, кој беше осуден на 14 години затвор за убиството на Нешковски, е првиот кој беше на распит во Специјалното јавно обвинителство во февруари минатата година.

Овој случај стана предмет на работа на СЈО бидејќи убиството на Мартин Нешковски беше дел од прислушуваните разговори што лидерот на СДСМ, сега премиер, Зоран Заев, ги објави во текот на 2015 година.

Од „29. бомба“ што Заев ја објави на 5 мај пред две години, се појавија индиции и сомневања дека тогашното раководство на Министерството за внатрешни работи и вработени во МВР, меѓу кои и Дејан Митровски-Урко, поранешниот личен телохранител на тогашниот премиер Никола Груевски, се обиделе да го сокријат убиството на Нешковски од јавноста.

– Еве уште една вистина дека ни загубен живот нема никаква цена за власта (на ВМРО-ДПМНЕ) и како некој сакаше да ја скрие вистината за Мартин Нешковски – рече Заев при објавувањето на „бомбата“, по што илјадници граѓани излегоа на протест пред Владата и дојдоа во судир со полицијата, која подоцна, до доцна вечерта приведуваше демонстранти по уличките во центарот на Скопје, а упадна и во Градската библиотека „Браќа Миладиновци“.

Денеска е шестгодишнина и од апсењето на лидерот на Обединети за Македонија, Љубе Бошкоски, во акцијата „Кампања“, уште еден случај за кој СЈО отвори истрага под името „Тортура“. Во овој случај осомничени се седум лица, припадници на полициската едница „Алфа“, меѓу кои и командантот на единицата, Ивица Анчевски-Пуки. Тие се товарат за мачење и друго сурово, нечовечко или понижувачко постапување и казнување. Според СЈО, нечовечкото апсење тие го сториле за да му удоволат на поранешниот директор на УБК, Сашо Мијалков.

Овој случај СЈО го презеде од Основното јавно обвинителство Скопје. Останува неизвесно дали случајот „Тортура“ ќе се најде пред суд, откако вчера истече рокот од 18 месеци, во кој СЈО требаше да поднесе обвиненија за случаите што ги презеде од основните јавни обвинителства.

Инаку, Бошковски за случајот „Кампања“, односно за нелегално финансирање изборна кампања, беше осуден на пет години затвор. Тој ја отслужи казната и излезе од затвор на средината од минатата година.


Местенка, тероризам или криминал: Две години без одговори за акцијата во Диво Насеље


Скопје, 9 мај, 2017 - 8:01 (META) 

И по точно две години  прашањата што се наметнаа уште додека Диво Насеље во Куманово сè уште мирисаше на барут и на чад од дводневната борба помеѓу специјалните полициски сили и вооружената група, остануваат неодговорени. Одговори на клучните дилеми нема ниту по една и пол година судски процеси:

  • Кои биле вистинските мотиви и цели на кумановската група?;
  • Дали станува збор за чисто криминална или за терористичка организација?;
  • Доколку се терористи, зошто не излегоа со коминике и со некакви политички барања?;
  • Ако безбедносните служби подолго време ја следеле групата и навреме известиле за неа, како што тврди Агенцијата за разузнавање, зошто не бил превениран судирот во Куманово и претходно нападот на караулата Гошинце (на 21 април 2015)?;
  • Кое е (и дали имала) кодното име на полициската акција во Куманово?;
  • Дали во настаните биле вмешани странски служби?

Судскиот процес за настаните во Диво Насеље од 9 и 10 мај 2015 година почна на 9 февруари минатата година. Обвинителството за гонење организиран криминал и корупција поднесе обвиненија против 37 лица (29 уапсени непосредно по борбите со полицијата и 8 кои подоцна беа обвинети како логистика на групата), за кои тврди дека има доволно докази дека се виновни за тероризам и за терористичка организација, и толку.

Обвинетите ги отфрлија тврдењата на обвинителството и сите се изјаснија дека не се чувствуваат виновни за кривичните дела што им се ставаат на товар, а дел од нив рекоа не биле дојдени во Куманово да војуваат и дека биле искористени за политички цели.

„Дури и малите деца знаат дека не сме терористи и дека не дојдовме во Куманово да војуваме. Бевме искористени за политички цели и не сме ниту први, ниту последни што сме искористени за тоа“, изјави Насуф Бекири, еден од обвинитите во случајот „Диво Насеље“, на 11 февруари 2016 година.

Адвокатот на дел од обвинетите, Насер Рауфи, во изјава за медиумите, по првото рочиште во февруари минатата година, рече дека се убедени дека со нападот на караулата Гошинце (кон крајот на април 2015) и со настаните од Диво Насеље, се сакаше да се дефокусира јавноста од прислушуваните разговори, кои истата година почна да ги објавува СДСМ.

Првообвинетиот во случајот, Сами Укшини, алијас командант Соколи, на 17 февруари оваа година, во својот исказ пред судот изјави дека политичките проблеми на Албанците и неимплементирањето на Охридскиот рамковен договор биле причината поради која кумановската вооружена група дошла во Македонија и во Диво Насеље и дека намерата била да ги повикаат новинарите, односно да свикаат прес-конференција, на која јавно ќе кажат дека ако не се реализира Рамковниот договор, работите во Македонија ќе се вратат во 2001 година.

Речиси половина од судскиот процес за настаните во Диво Насеље се одвиваше зад затворени врати, односно јавноста беше исклучена од рочиштата на кои се сослушуваа заштитени сведоци, меѓу кои и припадници на полициските сили. Не е познато дали пред судот искази дале тогашните први луѓе на Министерството за внатрешни работи (Гордана Јанкулоска), на Управата за безбедност и контраразузнавање (Сашо Мијалков), на Бирото за јавна безбедност (Митко Чавков) и на Агенцијата за разузнавање (Наќе Чулев).

Мијалков и Јанкулоска си поднесоа оставки два дена по настаните во Диво Насеље, изнудени или не – остана мистерија.

Пратеникот во Собранието, Оливер Спасовски, вчера одговарајќи на новинарско прашање изјави дека новата влада ќе спроведе нова истрага за расчистување на сите дилеми околу настаните во Диво Насеље:

„…Ако добро ја гледате програмата на идната влада на Социјалдемократскиот сојуз, таму стои и тоа дека мора да има нова детална истрага што ќе укаже на сите апекти од настаните во Куманово. Тоа мора да биде на еден транспарентен начин, да се расчистат сите можни дилеми“.

Во настаните во Диво Насеље загинаа осум припадници на специјалните полициски единици, а 37 беа повредени. Терористичката група броела четириесетина членови, од кои во борбите со полицијата убиени беа 10 членови. По борбите, на полицијата ѝсе предадоа 28 терористи. Како водачи на групата се идентификувани Мирсад Ндрецај (убиен) , Бег Ризај (убиен), Мухамед Красниќи, Сами Укшини и Деме Шеху.