Комисиите ќе ги прегледуваат одбиените апликации од конкурсот на Министерството за култура


Скопје, 11 февруари, 2019 - 11:18 (META) 

По бранот критики изминатата седмица за одлуките по годишните конкурси на Министерството за култура врвни институции, фестивали, уметници да не добијат воопшто пари или да добијат многу помалку од потребните, денеска треба да почнат со работа комисии во министерството што ќе ги разгледаат сите одбиени апликации.

Како што соопшти Министерството за култура, во 10 часот денеска во просториите на министерството почнале со работа сите стручни комисии кои ќе ги разгледаат сите апликации кои беа одбиени на Годишните конкурси на Министерството за култура за 2019 година.

„Одлуките за сите одбиени апликации ќе бидат поништени, и по нивното повторно разгледување, доколку се утврдат недоследности, листата на поддржани проекти од национален интерес ќе биде дополнета“, се вели во соопштението.

Покрај критиките дека се одбиени или добиле многу помалку пари и такви познати имиња како Скопскиот џез фестивал, а за возврат на тоа се даваат големи износи за релативно непознати културни настани или за слични настани во средините каде бројот на Албанците е доминантен, сепак Министерството за култура не ги поништи конкурсите, туку донесе одлука евентуално да  ја дополни листата на поддржани проекти доколку се утврди дека некој од одбиените бил неоправдано лишен од државни пари.


Распишани годишните конкурси за културни проекти од национален интерес


Скопје, 30 септември, 2017 - 14:48 (META) 

Министерството за култура денеска ги распиша годишните конкурси за финансирање на проекти од национален интерес во културата за 2018 година. Тие се отворени до 15 ноември, резултатите ќе бидат објавени околу Нова година, а за поддршка и за помош на заинтересираните корисници ќе бидат организирани и инфосесии во наредните 45 дена.

Министерот Роберт Алаѓозовски на прес-конференција рече дека ја исполниле целта конкурсот да го објават во септември, кога е законскиот рок, но во исто време успеале значајно да ги редизајнираат конкурсните документи. Тие се во согласност со критериумите и приоритетите на новата стратегија за култура, која е се уште во јавна расправа.

– Бидејќи овој повик за годишна програма се објавува сега, а треба да опфати проекти дури до крајот на годината, веројатнио ќе го дополниме со уште еден отворен повик кој ќе трае во текот на целата година со т.н. ад хок повици за сите кои имаат поитни проекти да може да изреагираат – рече тој.

Конкурсите се наменети за физички лица кои се државјани на Република Македонија и за правни лица од областа на културата. На нив не може да се пријавуваат националните установи, кои се финансирани преку нивните годишни програми за кои постои посебен повик.