!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Во јавниот сектор работат 129.653 лица


Скопје, 16 март, 2017 - 14:07 (META) 

Во јавниот сектор во Македонија се вработени вкупно 129.653 лица, покажува најновиот годишен извештај за 2016 година на Министерството за информатичко општество и администрација, кој произлегува од регистарот на вработени во јавниот сектор.

При презентацијата на извештајот, министерката за информатичко општество и администрација во заминување, Марта Арсовска-Томовска, изјави дека тој нуди сериозна анализа на обемот и на структурата на вработените според пол, возраст, образование и етничка структура во јавниот сектор, како и анализа на организацијата на државата со класификација на институциите основани од државата.

– Целта ни е со подготовка на ваков извештај, кој произлегува од регистарот на вработени, да обезбедиме на едно место податоци и за институциите и за државата кои понатаму ќе ни послужат за планирање на човечките ресурси, за подготовка на следната стратегија за реформата на јавната администрација за периодот 2017-2022 година, а на стручната и на научната јавност ќе ѝ овозможат да врши истражувања и анализи во однос на јавното управување. Извештајот ќе обезбеди и транспарентен и отчетен начин на кој Министерството сака да ги сподели овие податоци со јавноста и со тоа да престанат сите шпекулации во иднина кои се однесуваат на бројот и на структурата во јавниот сектор – рече Арсовска-Томовска.

Извештајот нуди анализа на структурата на податоците за 110.311 вработени во јавниот сектор, од кои жени се 59.111, а мажи 51.200, а просечната возраст изнесува 45,4 години. Извештајот не содржи податоци за структурата на 19.342 лица кои се вработени во АРМ, МВР и во Агенцијата за разузнавање поради чувствителноста на податоците.


Коцијанчич: Следните недели се клучни за Македонија


Брисел, 21 јуни, 2016 - 16:57 (META) 

Брисел денеска повторно ги повика македонските политички лидери да седнат на преговарачката маса и да создадат услови за веродостојни избори и истакна дека следните недели се клучни за европската иднина на Македонија.

– Советот за надворешни работи вчера разговараше за ситуацијата во поранешната југословенска Република Македонија. Како што истакна високата претставничка за надворешна политика на ЕУ, Федерика Могерини, постои многу јасна согласност меѓу земјите членки за потребата политичките лидери во земјата да се вклучат во отворен дијалог, да се имплементира Договорот од Пржино и да се создадат услови за веродостојни избори, да се развие владеењето на правото, да се поддржи работата на Специјалното јавно обвинителство и да се имплементираат реформските приоритети – соопшти за „Мета“ Маја Коцијанчич, портпаролката на шефицата на европската дипломатија.

Портпаролката, сепак, не прецизираше дали на вчерашниот состанок било разговарано за воведување санкции кон Македонија, иако шефот на грчката дипломатија, Никос Коѕиас, соопшти дека на состанокот се спротиставил на воведувањето санкции за Македонија со образложение дека тоа би било контрапродуктивно за нашата земја.

– Политичката криза почна да има негативни последици за земјата и за нејзината евроатлантска иднина. Ова не е вообичаено и секое недејствување ќе има последици. Конкретните резултати и робустните реформи во следните недели ќе бидат клучни дали Европската комисија ќе ги повтори своите препораки во следниот годишен извештај – рече Коцијанчич.


АИ за Македонија: Докази за корупција во власта, таен надзор и напади врз новинари


Лондон, 24 февруари, 2016 - 20:38 (META) 

Објавувањето на аудиоснимките не само што откри докази за корупција на владата, туку покажа дека постои широко распространет таен надзор, стои во годишниот извештај 2015/2016 на „Амнести интернешенал“ (АИ) за Македонија.

Според извештајот, аудиоснимките објавени од опозицијата откриваат владина корупција, злоупотреба на службената положба, изборна измама и недостиг од почитување на човековите права и на владеењето на правото, како и мешање во независноста на судството.

„Политичка криза следуваше по објавувањето на аудиоснимки од разговорите меѓу министрите, членовите на владејачката партија и јавните службеници. Во мај, со масовни демонстрации, премиерот беше повикан да поднесе оставка по наводното соучество во прикривање одговорност за убиството на еден млад човек (Мартин Нешковски н.з.) во 2011 година. Министрите за внатрешни работи и директорот за безбедност и контраразузнавање, поднесоа оставки во мај“, се вели во извештајот.

Во него се потсетува дека меѓу прислушуваните лица од власта имало и голем број новинари и дека во изминатата година продолжиле нападите кон критичките новинари.

„Се проценува дека повеќе од 2.000 новинари биле следени од владата. Објавените разговори укажуваат на индиректно финансирање на провладини медиуми и на политичко влијание преку назначување новинари и преку новинарската содржина“, стои во извештајот на АИ.

Во него се нотирани и настаните во кумановско Диво Насеље од 9 и од 10 мај минатата година.

„На 9 мај, специјалните полициски единици спроведоа вооружена операција во Куманово, со, како што се наведува, наводна цел да се спречат напади врз државни и цивилни цели. Во жестоките престрелки, 14 етнички Албанци и осум припадници на полицијата беа убиени. Триесет Албанци, вклучувајќи и поранешни членови на Ослободителата војска на Косово (ОВК) беа уапсени, кои според одредени наводи, биле тепани при притворот. Министерството за внатрешни работи ги игнорираше повиците за независна истрага за операцијата“, стои во извештајот.

Според наводите во него, а кои се однесуваат на Македонија, властите во земјата не успеале да ги почитуваат правата на бегалците и на мигрантите, вклучувајќи ја и употребата на незаконско приведување и на прекумерна употреба на сила.

Од „Амнести интеренешенал“ наведуваат дека низ Македонија лани поминале најмалку 600.000 мигранти и бегалци и дека имало случаи на нивно малтретирање, како и изложеност на експлоатација и напади од шверцерски, односно вооружени банди.

Во извештајот се забележани и нападите врз ЛГБТИ-заедницата, како и тоа дека повеќе од 10.000 лица, претежно Роми, побарале азил во земјите од Европската Унија, а малкумина во тоа и успеале.


Царинската управа лани наплатила 63.064 милиони денари


Законски измени за олеснување и за забрзување на царинските постапки, наплата на финансиски приходи на државата, олеснување на трговијата, одржување на лојалната конкуренција, заштита на здравјето на граѓаните и безбедноста на државата се дел од активностите на Царинската управа за изминатата година.

Директорката Наташа Радеска-Крстевска истакна дека посветено работеле на реализација на економските политики, одржување и на унапредување на конкурентниот економски амбиент, преку постојано предлагање и спроведување мерки за олеснување на трговијата и на транспортот.

– Една од основните функции на Царинска управа е и зачувување на финансиските интереси на државата. Оваа функција продолжи успешно да се реализира и во 2014 година, кога Царинската управа по сите основи наплати вкупно 63.064 милиони денари. Овој износ е за 1,9 отсто повисок од наплатените вкупни приходи во истиот период во 2013 година, кога се наплатени вкупно 61.883 милиони денари – истакна Радеска-Крстевска при презентацијата на годишниот извештај за работата на Царинската управа, по повод денот на управата, 14 април.

Наплатените приходи врз основа на царина во 2014 година изнесуваат 4.222 милиони денари. Овој износ е за 0,8 отсто помал во однос на наплатените приходи врз основа на царина во истиот период во 2013 година, кога се наплатени вкупно 4.255 милиони денари.

Наплатените приходи врз основа на ДДВ при увоз во 2014 година изнесуваат 38.513 милиони денари, што е за 2 проценти повеќе од наплатените приходи врз основа на ДДВ во истиот период во 2013 година, кога се наплатени вкупно 37.741 милиони денари.

На 1 јули, со пристапувањето кон Конвенцијата за заедничка транзитна постапка, односно кон НКТ-системот за заеднички транзит, ќе се забрза протекот на стоки преку границите, значително ќе се намалат трошоците и ќе се зголеми конкурентноста на македонските економски оператори.

Царинската управа ќе има помалку документи, со што значително ќе се намали обемот на формалностите што се извршуваат на границите.