!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Вторпат во половина година искршено седиштето на здружението „Гласно“ од Штип


Штип, 29 март, 2017 - 11:53 (META) 

Вторпат во период од половина година, оштетени се просториите на здружението на текстилни и на кожарски работници „Гласно“ од Штип. Камења биле фрлани по прозорците и по таблите на покривот на бараката каде работи здружението, кое се прокламира како заштитник на работничките права.

Пред само една недела, на прес-конференција, членовите на здружението објавија за случаи на кршење на законот со исплата на плата на рака на работниците во една штипска конфекција.

Горан Трајков од „Гласно“ вели дека засега напознати лица вандализмот го сториле изминатата ноќ. Случајот ќе биде пријавен во полиција, која иако имаше месеци на располагање, сè уште го нема расветлено претходниот случај на вандализам.

– Ова веќе преминува во континуирано насилство. Сепак, нема да има влијание врз нашата работа и сакам да им порачам дека „Гласно“ не е просторот по кој удираат, „Гласно“ е идеја, „Гласно“ се сите работници – изјави Трајков.

Инаку, тој денеска е во Крива Паланка за да им даде помош на работници во штрајк од фабрика за чевли, која е странска инвестиција.

 


Итрите газди на шивачките во Штип месечно им плаќаат 100 евра на сметка, 50 на рака


Штип, 20 март, 2017 - 15:59 (META) 

Текстилните работнички од штипските конфекции дел од плата добиле на рака. Покрај регуларната плата од 6.000 до 7.000 денари, што им стигнува на сметка, дел од конфекциите во Штип на работниците им исплаќале од 1.500 до 3.000 денари во плик, на рака.

Ова го тврдат од Здружението „Гласно“, чии членови денеска објавија документ што до нив го доставила текстилна работничка. Горан Трајков од „Гласно“ вели дека работодавците со ова го прекршуваат законот и директно го оштетуваат државниот буџет, избегнувајќи да плаќаат данок.

– Работодавците со ова директно го кршат законот и работничките права. Платата е 7.000 денари, некаде 6.000 денари, а 3.000 или 2.500 денари се даваат на рака. Тука, во конкретниот случај со работничката со која разговаравме, се 1.800 денари. На прашањето зошто пари на рака, ѝ било одговорено: „Така земаат сите и ти така ќе земеш“ – изјави Трајков.

Иако исплатата на минималната плата од 10.080 денари е законски задолжителна, сопствениците на конфекциите, според Трајков, го користат недоречениот дел од законот за минимална плата, во делот за нормиран учинок. Практично, тоа значи дека сопствениците ја зголемуваат нормата, која станува нереална за остварување и тоа е оправдување за пониските плати, бидејќи работниците изработуваат многу помалку од предвидените 100 отсто.

– Синдикатот, Текстилниот кластер и Сојузот на работодавци имаат потпишано да се дозволи нормиран учинок. Нормираниот учинок не е разјаснет до крај, а тоа работодавците го злоупотребуваат. Секојдневно им ја менуваат нормата на работниците. Оттука, недостига класификација на работните места по операции и затоа работниците во текстилната индустрија не можат да достигнат 100 отсто успешност – објаснува Трајков од „Гласно“.

За ваквиот начин на исплата, Трајков ги повика на дебата Текстилниот кластер и Сојузот на работодавци. „Гласно“ упати апел до институциите да го проверат работењето на конфекциите во делот на исплата на плата, а заедно со Хелсиншкиот комитет за човекови права, најави реакција до инспекциите. Како што рекоа од здружението, ова е практика во Штип, но не е исклучено да се случува и во другите градови.