ДИК го утврдува изгледот на гласачкото ливче за референдумот


Скопје, 14 септември, 2018 - 15:26 (META) 

Државната изборна комисија го утврдува изгледот на гласачкото ливче за референдумот закажан за 30 септември. Печатницата „Киро Дандаро“ е избрана да ги печати ливчињата, а за таа намена ќе бидат потрошени 13 милиони денари.

Претседателот на ДИК Оливер Дерковски информираше дека од безбедносни причини изгледот на гласачкото ливче Комисијата ќе го утврдува на затворена седница за јавноста, дека за печатење на избирачките ливчиња се пријавиле три печатници, но дека Комисијата одлучила тоа да го прави печатницата „Киро Дандаро“. Се водело сметка заштитата на гласачките ливчиња да биде на највисоко можно ниво за да се избегнат сите евентуални шпекулации.

За сумата што ќе се потроши од 13 милиони денари за печатење на гласачките ливчиња рече дека е намалување во споредба со парите потрошени за гласачки ливчиња на изборните циклуси во 2016 (околу 49 милиони денари) и во 2012 година (28 милиони денари).

Членовите на Комисијата го усвоија Упатството за важечки и неважечки ливчиња на референдумот. За важечко ливче ќе се смета она ливче на кое, ќе се заокружи „за“ или „против“ со сино пенкало. Со штиклирање и ставање „х“ ливчето ќе биде неважечко.

Борис Кондарко читајќи дел од Упатството за важечки и неважечки гласачки ливчиња кажа дека гласачкото ливче е неважечко ако не е пополнето на начин предвиден со Изборниот законик, Законот за референдум и ова Упатство, ако е прецртано делумно или целосно, ако се заокружени двата или не е заокружен ниеден од понудените одговори на поставеното прашање, ако бројот на гласачкото ливче не е соодветен на бројот гласачкото место каде се гласа или, ако гласачкото ливче нема печат на предната страна.

Според податоците на ДИК, помалку од 10 гласачи има во 81 избирачко место во 27 општински изборни комисии. Во овие избирачки места нема да се спроведе гласањето за референдумот, но овие граѓани ќе бидат упатени да се изјаснат во најблиското избирачко место не помалку од три километри од неговото населено место. Гласањето на референдумот на 30 септември ќе се одвива во 3.480 избирачки места, а според заклучениот Избирачки список, право на глас имаат 1.806.336 граѓани.


„Цивил“: Неколку нерегуларности и мирен почеток на гласањето


Скопје, 29 октомври, 2017 - 11:15 (META) 

Набљудувачите на невладината организација „Цивил“ утринава бележат мирен и навремен почеток на изборниот ден во 35-те општини каде што се спроведува вториот круг од локалните избори.

Исклучок прави избирачкото место 2433, во ОУ „Витуриа“, во општина Сарај, кое било заклучено до 8.30 часот. Времето на гласање на ова гласачко место, според законот, мора да се продолжи за толку време колку што траело доцнењето.

„Од набљудувачите во општина Шуто Оризари доаѓаат три извештаи. Првиот се однесува на организиран превоз, кој го врши поранешен заменик-министер од претходната власт. Превозот се врши со автомобили и со едно комби, чии регистарски таблички се забележани. Во Штип, полицаец побарал од акредитиран набљудувач на „Цивил“ да се оддалечи од местото кое се наоѓало надвор од избирачкото место. Иако уредно се претставил и ги покажал сите потребни документи, нему му било кажано да замине од таа локација“, се вели во соопштението на „Цивил“.

Во него се додава дека нивните набљудувачи исто така забележале и агитирање од изборен штаб на политичка партија, семејно гласање, фотографирање на гласачко ливче.


МВР: Вчера забележано сликање на гласачко ливче и гласање спротивно на волја на гласач


Скопје, 29 октомври, 2017 - 10:48 (META) 

Сликање на гласачко ливче во дом на изнемоштено лице, како и гласање спротивно на волјата на гласач е регистрирано во билтенот од вчера на Министерството за внатрешни работи.

Вчера, во 12.17 часот, во полициска станица Кисела Вода се јавил претседателот на Општинската изборна комисија Кисела Вода и пријавил дека истиот ден, околу 11 часот, на улица Јабланица, кај лице кое е старо и изнемоштено и затоа гласало во својот дом во присуство на Избирачка комисија во состав од претседател и тројца членови, откако лицето гласало, еден член на комисијата го сликал неговото гласачко ливче.

Вчера, околу 9 часот, пријавено е дека во село Градец, во семејната куќа на Ј.Ш., дошло до злоупотреба на избирачко право на тој начин што откако два члена од Општинска изборна комисија Врапчиште дошле во наведената куќа за изнемоштеното лице Ѓ.Ш. да оствари право на глас, и двајцата ѝ зеле отпечатоци од прстот во регистарот на гласачи, а едниот од нив заокружил реден број на една политичка партија спротивно на волјата на гласачот.

Се преземаат мерки и активности за целосно расчистување на случајот.


СДСМ на 19. место, ВМРО-ДПМНЕ седма на гласачкото ливче за локалните избори


Скопје, 19 септември, 2017 - 15:17 (META) 

Денеска, со жрепка, во Државната изборна комисија (ДИК) беше утврден редоследот на кандидатите за градочалници и за советници на гласачките ливчиња за претстојните локални избори закажани за 15 октомври.

Листи со кандидати за градоначалници и за советници имаат поднесено 19 партии и коалиции.

Како што одреди жрепката, прва на гласачкото ливче ќе биде СДПМ, втора – Коалицијата Алијанса на Албанците и НДП, трета – ДУИ, четврта – Коалицијата за Битола (ДУИ, Беса и Алијанса на Албанците), петта – Коалиција „Заедно за Гази Баба“ предводена од Беса, шеста – НДМ, седма – ВМРО-ДПМНЕ, осма – Народно движење на Турците, деветта – Алијанса на Албанците, под број 10 е ТМРО, на 11. место е Демократската партија на Турците, под број 12 е ГРОМ, Коалицијата предводена од ВМРО-ДПМНЕ е на 13. позиција, Беса е под број 14, ДПА е 15, Левица е под број 16, ПДП е на 17. позиција, Сојузот на Ромите е на 18. место и СДСМ е под бројот 19.

Листите на кандидати од ист подносител ќе имаат ист реден број во сите општини.

Во општините каде што некоја партија или коалиција нема свој претставник, нејзиниот број ќе биде изоставен и на негово место ќе биде напишан редниот број на наредниот носител, без да се остава празно место.

Според роковите за локалните избори, општинските изборни комисии најдоцна до 21 септември треба да ги објават листите на кандидати за членови на совет и за градоначалници.

Денеска завршува и рокот од пет дена во кој политичките партии ќе можат да достават барање за запишување, дополнување или бришење на податоци од избирачкиот список, кој ДИК треба да го заклучи најдоцна до 24 септември. ДИК го потпишува избирачкиот список и изводите од него најдоцна до 29 септември.


ДИК денеска најави заклучување на избирачкиот список


Скопје, 28 ноември, 2016 - 15:16 (META) 

Државната изборна комисија денеска закажа седница на која треба да го заклучи избирачкиот список и да го усвои изгледот на избирачкото ливче.

Покрај овие точки, според дневниот ред, на седницата на ДИК ќе се одлучува и за тоа како ќе гласаат лицата кои се во куќен притвор и лицата кои се членови на избирачките одбори што го спроведуваат гласањето во дипломатско-конзуларните претставништва, односно во конзуларните канцеларии.

Исто така, ДИК на денешната седница треба да донесе заклучок за начинот на постапување на полицијата за време на спроведувањето на изборите.


ВМРО-ДПМНЕ ќе биде единствена партија на гласачкото ливче


Скопје, 15 мај, 2016 - 15:15 (META) 

Без жрепка, Државната изборна комисија на денешната седница формално утврди дека ВМРО-ДПМНЕ ќе биде единствената партија на гласачкото ливче на предвремените парламентарни избори закажани на 5 јуни.

Листите на НДМ и официјално се отфрлени, бидејќи не се отстранети неправилностите.

На денешната седница, ДИК потврди дека СДПМ ги повлече своите кандидатски листи.

По гласањето, реагираа членовите на ДУИ, Субхи Јакупи, и на СДСМ, Виолета Дума и Игор Милев.

Според Јакупи, досега во македонскиот плурализам не се случило на избори да биде поднесена само една листа поради што ДИК, на работен состанок, треба да поразговара, дали има уставна поткрепа за вакво нешто.

И Дума нагласи дека ДИК треба да размисли каква ќе биде ситуацијата со оглед дека е утврдена само една листа, додека за Милев, во ваков случај, граѓаните на Македонија практично ќе немаат избор.

На ова, Силвана Бонева од ВМРО-ДПМНЕ рече дека на потврдената листа не се наоѓа само една партија, туку се вкупно 21, а секоја партија и секој граѓанин, како што нагласи таа, во согласност со Уставот, има право самостојно да одлучи дали ќе учествува.

Бонева забележа и дека ова не е првпат во Македонија да има избори со само една листа.

Во петокот ДИК испрати писмо до претседателот на Собранието, Трајко Вељаноски, со кое го информираше дека во одредени изборни единици има отстапување за повеќе од 5 отсто според бројот на гласачи.

Лидерот на ДУИ, Али Ахмети, во петокот поднесе иницијатива до Уставниот суд за оценување на уставноста на одлуката за распуштање на Собранието.

Од ДУИ побараа Уставниот суд да ја оцени одлуката за распуштање на Собранието како неуставна, за да може тоа повторно да заседава.