!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Битолски средношколци со неписмени соопштенија се повикуваат на протести


Битола, 20 март, 2017 - 13:56 (META) 

„Бојкотираме за да учиме на македонски јазик, не бојкотираме за партија!“ Вака гласи повикот на социјалните мрежи со кои средношколци од повеќе училишта во Битола ги организираат своите соученици да ја прекинат наставата и да излезат на протести.

Притоа, се повикуваат претседателите на класовите да прават списоци и да бележат кој сè излегол на протестите. Протестот кој беше најавен за денеска во 11.30 часот, ги вознемири дел од родителите на ученици во гимназијата „Јосип Броз Тито“, особено зашто ученици од други училишта дошле да ги повикаат на протест гимназијалците, со зурли и со тапани, скандирајќи „Македонија“ и читајќи соопштение „како треба да се сака татковината“.

– Децата ни јавуваат дека други ученици со зурли и со тапани се во училишниот двор и ги повикуваат на протести. Само оваа гимназија досега не ја има прекинато наставата и не го има поддржано бојкот, освен поединци – вели еден од родителите.

Во техничкото училиште, пак, ученик од втора година читал соопштение по училниците зошто треба да се излезе на протестите. Ученикот пред професорите што не го дозволувале ваквиот чин, се правдал дека за сè знае директорот. Директорот, меѓутоа, не одговара на нашите телефонски повици и пораки.

Ученици од повеќе средни училишта денеска, сепак, излегоа на протест.


Гимназијата во Охрид се огради од летоците со кои учениците се повикуваа на протести


Охрид, 9 март, 2017 - 11:30 (META) 

Откако информацијата за летоците со повик до учениците да учествуваат во протестите на иницијативата „За заедничка Макеоднија“, беше објавена во медиумите и предизвика реакции на политичките партии и особена осуда од јавноста, со соопштение се огласи и средното училишта „Св. Климент Охридски“.

Во него се наведува дека училиштето е исклучително професионална институција, која е целосно посветена на заштита на учениците од какви било злоупотреби, а особено од партиски, и се залага за вредности за заедничкото живеење, почитување на разликите во културата и на традицијата.

– Гимназијата ги штити учениците од секаков облик на манипулација и нивна злоупотреба од секој облик, а особено во партиски цели. Оттука, општинското средно училиште го осудува обидот на изолирана група, во соработка со надворешни лица кои се креатори на таканареченото соопштение. Напоменуваме дека во општинското средно училиште вчера немаше никаков прекин на наставата или каков било друг облик на пречки во наставно-воспитниот процес – се наведува во соопштението, потпишано од директорт на охридската гимназија, Звонко Трпески.


Тетовските гимназијалци ќе следат настава во старото медицинско училиште


Тетово, 7 октомври, 2016 - 15:31 (META) 

Наставата на македонски наставен јазик за тетовските гимназијалци ќе продолжи привремено да се одвива во двете згради на старото медицинско училиште. Децата во овие објекти ќе почнат да учат откако, најверојатно месецов, ќе заврши нивната реконструкција. Засега средношколците следат предавања во големата сала на Општина Тетово.

– Па, тука е лошо за следење настава. Ги нема потребните услови. Нема табла, има само една сала, па поради тоа цела настава ни трае час и половина, што е недоволно – изјави ученичка од гимназијата „Кирил Пејчиновиќ“ во Тетово.

Од секторот за образование на Општина Тетово велат дека интензивно се работи на реконструкција на зградите, кои подолг период беа во рунирана состојба. Се работи и на трајно решение за просторниот проблем на тетовските гимназијалци.

– Работиме на добивање дозвола за изградба на објект во рамките на централниот објект на гимназијата, што би било трајно решение за просторниот проблем на гимназијалците што следат настава на македонски јазик. По добивањето дозвола, се надеваме дека централната власт ќе одвои пари за изградба на овој објект, изјави Ахмед Ќазими, раководител на секторот за образование при Општина Тетово.

Инаку, предлогот тетовските гимназијалци привремено да следат настава во двата објекти на старото медицинско училиште, го понуди градоначалничката на Тетово, Теута Арифи. Но, тој беше одбиен од советот на родители и професори при тетовската гимназија. По десетина дена, советот се премисли и го прифати предлогот, со образложение дека најважно е учениците да не губат настава.


Не се постигна решение за тетовските гимназијалци


Тетово, 28 септември, 2016 - 16:23 (META) 

За тетовските гимназијалци кои следат настава на македонски јазик сè уште не се најде решение. И учениците и советот на родители и на професори од гимназијата „Кирил Пејчиновиќ“ од Тетово, не прифаќаат да се следи настава во објектите на старото медицинско училиште, предлог кој денеска на состанок им го понуди градоначалничката на Тетово, Теута Арифи.

– И советот на родители и на професори при гимназијата „Кирил Пејчиновиќ“ во Тетово и учениците не го прифаќаат овој предлог. Овие простории кои ни се нудат се руинирани. Остануваме на нашиот став да учиме во објектот на централната гимназија – изјави Катерина Наумовска од советот на родители и на професори.

И покрај неприфаќањето на предлогот, од секторот за образование при Општина Тетово велат дека се работи на реконструкција на двата објекти од старото медицинско училиште и се подготвуваат таму да се почне со настава.

– Јас се надевам дека учениците што следат настава на македонски јазик ќе почнат со настава во овие два објекти. Наставата тука ќе се одвива сè додека не се најде трајно просторно решение за овие ученици, односно не се изгради објект во состав на постоечката гимназија, на што се работи интензивно. Се очекува да се добие дозвола, па потоа да се почне со изградба на овој објект – изјави Ахмед Ќазими, раководител на секторот за образование при Општина Тетово.

И денеска гимназијалците од „Кирил Пејчиновиќ“ кои следат настава на македонски јазик, со протест пред Општина Тетово го искажаа незадоволството од нерешавањето на просторниот проблем, со кој се соочуваат повеќе од 10 години.

Вакви протести најавија и за наредниот период, сè додека надлежните не ги прифатат нивните барања, да учат привремено во зградата на гимназијата, а во меѓувреме да се работи на изградба на нов објект.


Учениците Македонци од тетовската гимназија почнаа да учат под ведро небо


Тетово, 26 септември, 2016 - 13:11 (META) 

По речиси еден месец бојкот, учениците Македонци од тетовската гимназија почнаа да следат настава. Но, наместо на училишните клупи, тие учеа стоечки, на отворено, на градскиот плоштад во Тетово.

– Свесни дека бојкотот на наставата најмногу им штети на учениците, а немајќи соодветен простор во кој би ја следеле наставата во нормални и достоинствени услови, принудени сме наставата да ја организираме под ведро небо, пред просториите на Секторот за образование на градскиот плоштад. Се надеваме дека надлежните конечно ќе нè видат и ќе нè слушнат и заеднички ќе го решат проблемот – изјави професор Дејан Ѓурчиновски од советот на професори при гимназијата „Кирил Пејчиновиќ“.

Учениците Македонци од тетовската гимназија изминативе неколку години следеа настава во несоодветни услови во зградата на Работничкот универзитет и во основното училиште „Гоце Делчев“ во Тетово.

Револтирани поради ваквата состојба, оваа учебна година тие ја почнаа со протестен марш низ тетовските улици. По протестот беше донесена одлука децата привремено да учат во централниот објект на гимназијата.

Оваа одлука за неколку дена беше промената, со образложение дека е незаконска и дека раководството на гимназијата не може сите ученици да ги распореди да учат во еден објект.

Наставата на градскиот плоштад во Тетово ќе продолжи сè додека, како што велат од советот на професори, не се најде решение за просторниот проблем.


Средношколците од Тетово и денеска протестираа поради проблемот со превозот


Тетово, 23 септември, 2016 - 13:37 (META) 

Втор ден тетовските средношколци од руралните општини протестираа пред општинската зграда, барајќи да им се обезбеди бесплатен превоз.

– Немаме пари да го платиме превозот. Според законот за децентрализација, општината е одговорна да обезбеди бесплатен превоз, затоа одговорноста за овој проблем ја бараме кај локалната самоуправа – изјави ученик од гимназијата „Кирил Пејчиновиќ“ во Тетово.

Од Општина Тетово велат дека проблемот ќе се реши, откако Комисијата за јавни набавки ќе одговори на жалбата за поништениот тендер за превоз, кој минатиот месец го поднеле до тетовските превозници.

– За оваа учебна година како блок-дотација за превоз на ученици од Тетовскиот Регион предвидени се 68 милиони денари. Превозниците бараа поголема сума, ние не се согласивме со тоа и го поништивме тендерот за превоз. На оваа одлука тетовските превозници поднесоа жалба до Комисијата за јавни набавки. Сега решавањето на проблемот ќе зависи од одлуката на комисијата – изјави Ахмед Ќазими, раководител на секторот за образование при Општина Тетово.

Средношколците најавија дека секојдневно ќе протестираат пред општинската зграда, сè додека надлежните не го решат проблемот со превозот.


Наставата не почна за гимназијалците Македонци од Тетово


Тетово, 7 септември, 2016 - 15:34 (META) 

Учениците што посетуваат настава на македонски јазик не почнаа со настава во централниот објект на гимназијата „Кирил Пејчиновиќ“ во Тетово, иако таква одлука беше донесена на почетокот од оваа учебна година. Од раководството на училиштето велат дека не можат сите ученици, Македонци и Албанци, да ги распоредат да учат во еден објект.

– Беше донесена одлука да се учи во три смени, но наидовме на технички проблеми и ова решение не можеме да го спроведеме. Бараме друго решение за просторниот проблем на учениците – изјави Намикќемал Мустафа, директор на гимназијата „Кирил Пејчиновиќ“ 0 Тетово.

Од советот на родители и професори од тетовската гимназија велат дека претпоставувале дека раководството на училиштето ќе се соочи со просторен проблем при распоредувањето на учениците, кои ги има во голем број во ова средно училиште. Апелираат што поскоро да се најде решение.

Одлуката да се продолжи со настава во централната гимназија ја соопшти градоначалничката на Тетово, Теута Арифи, по завршувањето на протесниот марш, кој на 1 септември го организираа учениците Македонци, револтирани што подолг период следат настава во несоодветни услови, во зградата на Работничкиот универзитет и во основното училиште „Гоце Делчев“ во Тетово.

Во овие објекти почнаа да учат откако 14 години учеа во познатите стари медицински бараки, каде немаше никакви услови за водење на настава, а честопати се случуваа и меѓуетнички инциденти.


По денешниот бојкот и протестен марш, тетовските гимназијалци од утре на настава


Тетово, 1 септември, 2016 - 15:49 (META) 

Тетовските гимназијалци од утре ќе почнат со настава во централниот објект на гимназијата „Кирил Пејчиновиќ“ во Тетово, откако денеска ја бојкотираа наставата и со протестен марш го изразија револтот од просторниот проблем, со кој се соочуваат повеќе од 15 години.

Одлуката да се продолжи со настава во централната гимназија ја соопшти градоначалничката на Тетово, Теута Арифи, која по завршувањето на протестниот марш, оствари средба со советот на родители и на професори од гимназијата.

– Од утре сите ученици, и Македонци и Албанци, ќе учат во централната гимназија. Наложивме на управата на ова средно училиште да најде начин децата да ги организира и да учат во повеќе смени. Јас наскоро ќе организирам средба со министрите за образование и за транспорт и врски да се најде решени за доградба или надрадба на објект наменет за учениците Македонци во рамките на постоечката гимназија и со тоа конечно да се реши просторниот проблем со овие ученици – изјави градоначалничката Арифи.

Од советот на родители и на професори при тетовската гимназија изминативе неколку дена бараа од надлежните писмена изјава со временска рамка за изградба на ветениот објект за учениците Македонци во рамките на постоечкиот објект на гимназијата „Кирил Пејчиновиќ“. Во спротивно, како што беше наведено во барањата на советот, ќе следува целосен бојкот на наставата.

Ученците од гимназијата „Кирил Пејчиновиќ“ кои следат настава на македонски јазик, од декември 2014 година учат во несоодветни услови, во објектите на Работничкиот универзитет и основното училиште „Гоце Делчев“ во Тетово. Во овие згради нема кабинет по информатика, нема доволно простор, а инвентарот и тоалетите се во лоша состојба.

Во овие објекти почнаа да учат откако 14 години учеа во познатите стари медицински бараки, каде немаше никакви услови за водење настава, а честопати се случуваа и меѓуетнички инциденти.


Тетовските гимназијалци на 1 септември на протестен марш


Тетово, 30 август, 2016 - 16:13 (META) 

Првиот ден од новата учебна година учениците Македонци од тетовската гимназија „Кирил Пејчиновиќ“ ќе го почнат со протестен марш. На протестот кој го организираат учениците заедно со нивните родители и професори, ќе упатат повеќе барања за надминување на просторниот проблем со кој се соочуваат повеќе од една деценија. Ако не се прифатат барањата, учениците најавуваат бојкот на наставата.

„Бараме од надлежните писмена изјава со временска рамка за изградба на ветениот објект за учениците Македонци во рамките на постоечкиот објект на гимназијата „Кирил Пејчиновиќ“. Привремено решение со нормални услови за одвивање на наставата во тетовската гимназија, но никако како алтернатива не ги прифаќаме просториите на Работничкиот универзитет. Ако на овие барања не наидеме на позитивен одговор, најавуваме целосен бојкот на наставата“, стои во заедничкото писмо на родителите и на професорите на учениците.

Ученците од гимназијата „Кирил Пејчиновиќ“ од Тетово кои следат настава на македонски јазик, од декември 2014 година учат во несоодветни услови, во објектите на Работничкиот универзитет и на Основното училиште „Гоце Делчев“. Во овие згради нема кабинет по информатика, нема доволно простор, а инвентарот и тоалетите се во лоша состојба. Учениците учат во овие објекти откако 14 години учеа во познатите стари медицински бараки, каде немаше никакви услови за водење настава, а честопати се случуваа и меѓуетнички инциденти.


Решение за просторниот проблем со тетовските гимназијалци сè уште нема


Тетово, 20 март, 2016 - 14:41 (META) 

Од советот на родители при гимназијата „Кирил Пејчиновиќ“ од Тетово, реагираат што сè уште не е решен просторниот проблем со учениците Македонци.

Децата следат настава во два различни објекти, каде, како што велат родителите, нема соодветно затоплување и тоалетите се во катастрофална состојба.

– Во објектот, на пример, на Работничкиот универзитет, каде учат дел од учениците, има високи тавани, зградата е стара и не може да се затопли, па честопати децата носат од дома ќебиња да се загреат – изјави Томислав Стојановски, член на советот на родители при тетовската гимназија.

Освен во Работничкиот универзитет, гимназијалците следат настава и во основното училиште „Гоце Делчев“.

Во овие две згради се префрлени во декември 2015 година, поради лошите услови во познатите стари медицински бараки, каде ученициите подолг период следеа настава, а каде честопати се случуваа и меѓуетнички инциденти.

Од советот на родители велат дека неколкупати било ветувано и од централните и од локалните власти дека за учениците Македонци ќе се најде решение.

– Многупати ветуваа дека ќе се најде решение, но од ветувањето ништо не е реализирано. Рекоа дека ќе се изгради или догради нов објект во состав на големиот објект на гимназијата „Кирил Пејчиновиќ“, но од ветувањето нема ништо – рече Стојановски.

Министерот за образование, Абдилаќим Адеми, при посетата на Општина Тетово минатиот месец, рече дека решението на просторниот проблем со тетовските гимназијалци се одолговлекувал поради урбанистички пречки на локацијата во дворот на постојната тетовска гимназија, каде треба да се изгради објект наменет за учениците Македонци.

Дали се надминати овие пречки и кога конечно ќе се почне со изградба на овој долгоочекуван објект, не успеавме да добиеме одговор. Општина Тетово неколку дена одбиваше да се произнесе со свој став во врска со ова прашање.