Столтенеберг: Македонија може да добие покана за НАТО на самитот на 11 и 12 јули


Брисел, 20 јуни, 2018 - 11:51 (META) 

Генералниот секретар на НАТО Јенс Столтенберг се надева дека ќе може да биде испратена покана за членство на Македонија во Алијансата на самитот што на 11 и 12 јули ќе се одржи во Брисел, откако Скопје и Атина постигнаа договор за спорот за името, јави МИА.

– Се надевам дека ќе има напредок со поранешната југословенска Република Македонија бидејќи тие постигнаа договор со Грција за проблемот со името. Ако тој договор биде финализиран и целосно применет, новото име ќе биде Република Северна Македонија и тогаш можеме да тргнеме кон членство на поранешната југословенска Република Македонија во НАТО. Искрено се надевам дека тоа ќе можеме да го направиме ако се се одвива според планираното околу ратификацијата и референдумот кој ќе се одржи подоцна оваа година – изјави Столтенберг во интервју за француската телевизија „Франс 24“.


Гутереш ги повика граѓаните на двете земји заедно да го придвижат процесот напред


Њујорк, 13 јуни, 2018 - 10:30 (META) 

Генералниот секретар на Обединетите нации, Антонио Гутереш во писмена изјава го поздрави договорот кој што го постигнаа Македонија и Грција за решение на спорот за името. Тој ги поздрави сите засегнати страни за нивната решеност да му стават крај на долготрајниот спор и за покажаното лидерство.

Гутереш им честиташе на сите кои што конструктивно учествуваа во напорите што доведоа до договор. Тој му оддаде почит на својот личен пратеник, медијаторот, Метју Нимиц, за кој вели дека ги отелотворил вредностите на упорност, трпеливост и мирна дипломатија во олеснувањето на овој историски договор во текот на многу години.

Генералниот секретар ги повика сите граѓани во двете земји заедно да го придвижат процесот напред. Тој ја потврди посветеноста на Обединетите нации да ја обезбедат сета потребна поддршка, како преку неговиот личен пратеник, така и преку релевантни агенции, фондови и програми на ОН.

Гутереш е убеден дека решавањето на овој долготраен спор ќе има позитивни реперкусии во Европа и пошироко и се надева дека засегнатите страни на други долготрајни конфликти може да бидат инспирирани од овој развој и да работат без натамошно одложување кон преговарачките процеси.


Нема план Б за влез во НАТО, името мора да се реши, порача Столтенберг


Скопје, 18 јануари, 2018 - 16:57 (META) 

Мора да бидам искрен со вас и не е добро да ве лажам – нема план Б и нема влез во НАТО сè додека не се реши проблемот со името, порача Генералниот секретар на НАТО, Јенс Столтенберг во три наврати, одговарајќи на новинарски прашања дали е можен прием со привремената референца на денешната прес-конференција по средбата со премиерот Зоран Заев во Владата.

Столтенберг исто така неколкупати потенцираше дека НАТО е политички сојуз кој дефинирал одлуките да го носи со консензус.

Тој порача дека е многу важно да се забрзаат и завршат почнатите реформи.

– Не е лесно, но може да се направи. Ги повикувам сите страни конструктивно да работат во полза на сите. Ја повикувам Владата да соработува со опозицијата и обратно. Ве поттикнувам да продолжите на патот на реформите, сакаме да успеете. Сакаме да ја видиме вашата земја како срцето на еден демократски и просперитетен регион. Премиере, сакаме да ве поддржиме – рече Столтенберг.

Прашан од новинарите дали експанзионистичката политика на Москва не ги замислува земјите-членки за промена на принципот на одлучување и за прием на Македонија во Алијансата за да се спречат руските тежнеења, Столтенберг повтори дека не сака да дава лажни надежи и дека без взаемно прифатено решение за спорот со името со Грција, нема никакви шанси за влез во Северноатлантската алијанса.

Прашан зошто НАТО ја игнорира пресудата од Хаг во полза на Македонија, Столтенберг рече дека станува збор за правна пресуда, а дека НАТО е политички сојуз.

– Тоа е судска пресуда, а ова е политичка одлука. НАТО како политички сојуз се базира на консензус. Промената на одлука и донесување нова бара консензус од сите. Не би бил чесен кон вас ако ви кажам дека има услови за промена на одлуката – рече Столтенберг.


Столтенберг: Вратата е отворена, но преминувањето на прагот бара работа


Скопје, 18 јануари, 2018 - 13:26 (META) 

Вратата на НАТО е отворена за нови членови, но преминувањето на прагот бара сериозна работа, порача Генералниот секретар на НАТО, Јенс Столтенберг, во обраќањето пред пратениците, државниот врв и првите луѓе на повеќе институции на седница на Собранието на Република Македонија. Во него тој посебно се осврна и ги пофали ратификацијата на Договорот за добрососедство со Бугарија и изгласувањето на Законот за јазиците.

Столтенберг порача дека членките на северноатланската алијанса може едногласно да поканат која било европска земја да стане членка, но за тоа да се случи има уште работа што треба да се заврши. Сепак, како што рече, пред седиштето на НАТО има место за уште знамиња.

– Договорот од Вашингтон нагласува дека членките може преку едногласен договор да поканат која било европска земја да се приклучи на Алијансата, доколку таа земја е во состојба да  ги следи обрските на договорот и придонесува во северноатлантската сфера. Под тие услови Црна Гора стана 29. членка на НАТО минатата година, со еднаков глас во нашите дискусии и еднакви права и одговорности како сите други земји – членки. Гледањето како црногорското знаме се издига за првпат пред седиштето на НАТО беше горд момент за мене. Но, има сè уште место за уште знамиња пред седиштето на НАТО – рече Столтенберг.

Сепак, рече тој, едно е да се биде амбициозен, а друго е реалната ситуација и мора да се реши прашањето за името на, како што рече, „вашата земја“. Тој инаку не го употреби зборот Македонија ниту еднаш во говорот што траеше дваесетина минути.

– Сакам да успеете, НАТО сака да успеете, но иако е добро да се биде амбициозен, важно е да се биде и реален. Има уште работа што треба да се сработи. Тоа значи – решавање на прашањето за името на вашата земја. Ова е прашање што му тежи на овој регион и на оваа земја предолго време. Оттука, ја поздравувам покажаната волја на оваа влада да се разреши ова прашање. Вчерашната средба на преговорачите во Њујорк беше уште еден важен чекор. Охрабрен од неодамнешниот напредок, ја користам оваа шанса да ве поттикнам да се приближите напред – порача Генералниот секретар на НАТО.

Подеднакво важно е да се подобрат односите со сите соседи, рече тој.

– Исто така добро е да покажете добри односи со соседите. Членките на НАТО се одушевени поради развојот на односите со Бугарија, и јас честитам за ратификацијата на Договорот за добрососедство со Бугарија, но мора да работите да ги подобрите односите со останатите во регионот – рече Столтенберг.

Генералниот секретар на НАТО ги спомена и насилствата од 27 април минатата година и рече дека настаните во Собранието го шокирале и него и сите членки на НАТО.

– Сепак бевме импресионирани од тоа што го видовме од тој ден понатаму, за напредокот што сите го сторивте за формирање нова отворена поинклузивна политичка култура, во калење на новиот национален дух, гледање напред и истрајност. Пред девет месеци се приближивте кон работ на една карпа. Но, од тогаш една држава од потенцијална нестабилност се претворивте во држава на реални можности – рече Столтенберг.

Тој посебно значење даде на диверзитетот и на донесувањето на законот за јазиците.

–  Како поранешен пратеник и премиер на Норвешка разбирам многу од предизвиците со кои продолжувате да се соочувате. Долгата политичка кариера ме научи колку е поинклузивно едно општество, толку е поуспешно. Диверзитетот е сила, не слабост. Таму каде што има диверзитет придружен од добро управување има успех – порача Генералниот секретар на НАТО.

Во говорот тој оддаде признание на македонската одбрана за придонесот на мисијата на НАТО во Авганистан, но рече дека и во тој сектор се потребни реформи, а како посебно важно го посочи зголемувањето на буџетот за одбраната до ниво од 2 отсто од БДП.


Пред Собранието протести против НАТО и бандера кутната од ветрот


Скопје, 18 јануари, 2018 - 12:12 (META) 

Припадниците на Левица и поранешната пратеничка Солза Грчева одржаа протест пред Собранието на Република Македонија пред пристигнувањето на Генералниот секретар на НАТО, Јенс Столтенбер, кој треба да се обрати пред пратениците.

Покрај демонстрантите, кои извикуваат анти-НАТО пароли, се наоѓа падната бандера, која била кутната од ветрот.


Генералниот секретар на НАТО денеска и утре на средби со државниот врв во Скопје


Скопје, 17 јануари, 2018 - 10:11 (META) 

Генералниот секретар на НАТО Јенс Столтенберг денеска и утре ќе престојува во официјална посета на Македонија. Се очекува да се сретне со претседателот Ѓорге Иванов, со премиерот Зоран Заев, со министрите за надворешни работи и за одбрана Никола Димитров и Радмила Шекеринска, како и со претседателот на ВМРО-ДПМНЕ, Христијан Мицкоски.

Столтенберг утре напладне ќе се обрати и пред пратениците во Собранието. Во салата ќе бидат и пратениците на ВМРО-ДПМНЕ, кои веќе речиси еден месец ја бојкотираат работата на законодавниот дом. Одлуката била донесена завчера на седницата на Извршниот комитет на ВМРО-ДПМНЕ, за партијата да покаже дека е определена за членство на Македонија во НАТО и ЕУ.

Националниот кординатор на Македонија во НАТО Стево Пендаровски, вчеравечер во емисија на ТВ 24 рече изјави дека генералниот секретар на НАТО во земјава доаѓа во момент кога Македонија се наоѓа на важна крстосница и со тоа сака да даде поттик.

– Генералниот секретар на НАТО доаѓа да ни даде поттик, во период кога Македонија како држава се наоѓа на раскрсница и политички и безбедносно, во момент кога ги интензивираме преговорите за името со Грција, но и бидејќи Македонија е најстара земја-кандидат за влез во Алијансата – изјави Пендаровски.

Прашан дали е Македонија ќе влезе во НАТО на Самитот во јули годинава, Пендаровски рече дека Македонија ќе направи се што е во нејзина моќ да го оствари тоа, но и дека сепак сè е во рацете на Грција.


Кирацовски за бојкотот: Пратениците да работат за граѓаните и за државата, а не за партијата


Скопје, 6 декември, 2017 - 16:41 (META) 

Најавите од ВМРО-ДПМНЕ за бојкот на работата на Собранието на Република Македонија воопшто не се во интерес на граѓаните и на државата и пратениците од таа партија треба да се вклучат во битните реформи што претстојат пред нас, кои се од суштинска важност за државата, смета Александар Кирацовски, генерален секретар на СДСМ и пратеник.

– Треба да ги надминат теснопартиските интереси, да не штитат нешто за што самите тие не се виновни, туку да се посветат на суштинските реформи, клучни за евроинтеграцискиот процес. Треба да се реализира планот „3-6-9“, кој ќе донесе придобивки за граѓаните и за државата и тие треба да работат за граѓаните и за државата, а не за партијата. Се надевам ќе имаат доблест да излезат од однесувањето на штитење нешто за што самите не се виновни, а партијата да направи смени, да го истисне криминогеното ткиво од себе, односно високото партиско раководство кое завлегло во криминал – вели Кирацовски во изјава за „Мета“.

Претходно портпаролот на Владата, Миле Бошњаковски, исто така апелираше ВМРО-ДПМНЕ да има разбирање за состојбите и за потребата од забрзување на евроинтеграциите.


Сите да работат за враќање на довербата во институциите, вели генералниот секретар на ОБСЕ


Скопје, 18 ноември, 2017 - 10:35 (META) 

Успешното надминување на политичката криза и тековните напори за спроведување на владината реформска агенда нудат единствена можност за напредок, рече генералниот секретар на ОБСЕ, Томас Гремингер, по завршувањето на неговата дводневна посета на Скопје.

– Сите чинители треба да ги здружат силите во зајакнувањето на демократските процеси и во враќањето на довербата во институциите во земјата, воспоставувајќи ефективни механизми за контрола – рече Гремингер.

Тој ја истакна потребата да се работи на долгорочните структурни реформи во областите како што се владеењето на правото, слободата на медиумите, демократското владеење, полицијата и безбедносниот сектор.

Гремингер ги охрабри понатамошните чекори за градење кохезивно општество и продолжување на спроведувањето на Охридскиот рамковен договор. Тој, исто така, ги поздрави напорите за зацврстување на добрососедските односи, вклучително и потпишувањето на Договорот за пријателство со Бугарија.


Замениците на Џафери и интерпелациите за Николовски и за Царовска, денеска пред Собранието


Скопје, 17 ноември, 2017 - 9:49 (META) 

Собранието денеска ќе ја продолжи работата по точките од дневниот ред на осмата, дванаесеттата и на тринаесеттата седница, кои останаа незавршени поради паузата на законодавниот дом за локалните избори.

На дневен ред на осмата седница е предлогот за именување на заменици на генералниот секретар на Собранието и неколку закони предложени од пратеничките групи на ВМРО-ДПМНЕ.

Предлог-одлука за утврдување на бројот на потпретседатели на Собранието е на дневен ред на 12. седница. Пред оваа точка пратениците треба да расправаат за измените на законите за извршување, за исплата на плати и за издавање вредносни бонови за студенти, предложени од пратениците на ВМРО – Илија Димовски, Драган Данев и Невенка Стаменковска.

Собранието треба да продолжи со расправата по интерпелациите за министрите за земјоделство, шумарство и водостопанство и за труд и социјална политика, Љупчо Николовски и Мила Царовска, поднесени од пратеници на ВМРО-ДПМНЕ.


Шекеринска во Брисел разговарала со помошниците на генералниот секретар на НАТО


Брисел, 10 ноември, 2017 - 14:18 (META) 

Македонската министерка за одбрана, Радмила Шекеринска, при посетата на Брисел на состанокот на министрите за одбрана на земјите-членки на НАТО и земјите-учесници во мисијата „Одлучна поддршка“, во НАТО штабот во Брисел имала средби со помошник-генералниот секретар на НАТО за политички прашања и безбедносна политика, Алехандро Алваргонзалез и помошник-генералниот секретар на НАТО за одбранбена политика и планирање, Хајнрих Браус.

Како што соопшти македонското министерство за одбрана, на средбите се разговарало за спроведувањето на планот 3-6-9 на Владата на Република Македонија како и за реформите во судството, во разузнавачките и безбедносните служби, слободата на медиумите и транспарентноста и за реформските процеси во одбраната.

На состанокот на министрите вчера во Брисел, Шекеринска ги нагласила стратешките цели на Македонија за членство во НАТО и најавила засилено темпо и реформи кон исполнување на критериумите и стандардите на Алијансата.