Вучиќ сепак беше на Газиводе, но го спречија да влезе во српско село


Белград, 10 септември, 2018 - 9:54 (META) 

По напнатоста која се создаде во петокот во Брисел, кога претседателот на Србија, Александар Вучиќ, не се сретна со претседателот на Косово, Хашим Тачи, српскиот претседател сепак не се откажа од посетата на српските заедници на Косово.

И покрај противењето на Приштина, Вучиќ во саботата беше на акумулационото езеро и браната Газиводе, околу кои спорат Србите и Албанците. Но, во неделата сепак не успеа да го посети селото Бање, со мнозинско српско население, бидејќи неколку стотини Албанци ги блокираа сите патишта до тоа село, поради што косовската полиција ја откажа посетата и ја запре колоната возила на Вучиќ.

Дводневната посета на Србите на Косово, Вучиќ ја заврши во Косовска Митровица, каде од градскиот плоштад на граѓаните им порача дека и Србите и Албанците „сакаат подобар живот“, дека „мораат да живеат едни покрај други заедно“ и дека затоа тој е подготвен да преговата „до изнемоштеност, ако е потребно“.

При дводневната посета, претседателот на Србија повеќе пати нагласи дека постигнувањето на спогодба со Приштина ќе биде тешко и апелираше српските политичари да се држат заедно. На бизнис-форум во Лепосавиќ вети државни субвенции за стопанствениците од Србија што сакаат да инвестираат во Косово и ги повика да вложуваат не само во српските, туку и во албанските средини.


Вучиќ нема да се состане со Тачи во Брисел


Брисел, 7 септември, 2018 - 13:17 (META) 

Претседателот на Србија, Александар Вучиќ, денеска во Брисел нема да се состане со својот косовски колега Хашим Тачи, односно дијалогот со посредување на ЕУ за нормализирање на односите меѓу Белград и Приштина засега е застанат.

Одлуката на новинарите во Брисел, по средбата на Вучиќ со еврокомесарката Федерика Могерини, им ја пренесе Марко Ѓуриќ, директор на Канцеларијата за Косово при српската влада.

– Поради сите лаги и измами од косовска страна, нема ни најмали услови да продолжи дијалогот и големо прашање е како ќе се разговара во иднина – рече Ѓуриќ.

Одлуката дали сепак Вучиќ утре и задутре ќе ги посети српските заедници на Косово се очекува за вечерва. Утрово беше соопштено дека тој наложил прекин на секаква комуникација со полицијата на Косово и КФОР, во врска со организацијата на таа посета.

Проблемот се случи откако Кадри Весељи, претседателот на косовскиот парламент, вчера рече дека нема причини Вучиќ да оди на Газиводе и дека може да се случи да му биде забрането влегувањето во Косово.

Езерото и хидроцентралата Газиводе според официјален Белград имаат стратегиско значење за опстанокот на Србите на северот на Косово, додека официјална Приштина одбива секаков разговор на таа тема.


Неизвесна средбата со Тачи, Вучиќ ги прекина контактите со КФОР и косовската полиција


Белград, 7 септември, 2018 - 9:50 (META) 

И претпладнево е неизвесно дали средбата на претседателите на Србија и Косово, Александар Вучиќ и Хашим Тачи, под посредништво на ЕУ, ќе се одржи во Брисел. Непознато е и дали српскиот претседател ќе отпатува во посета на српските енклави на Косово викендов.

Министерот за внатрешни работи на Србија, Небојша Стефановиќ утрово соопшти дека Вучиќ решил да прекинат комуникациите со косовската полиција и КФОР во врска со неговата посета на Косово и дека конечната одлука дали Вучиќ ќе отпатува ќе биде соопштена вечерва.

Претседателот на Србија денеска отпатува во Брисел, но според Радио телевизија Србија (РТС), ќе има средби само со функционери на ЕУ.

Министерот за надворешни работи на Србија, Ивица Дачиќ, претпладнево не сакаше ниту да ја потврди ниту да ја демантира таа информација, велејќи дека е важно што Вучиќ патува во Брисел и што Србија не го прекинува дијалогот.

Посетата на претседателот на Србија на српските заедници на Косово, во рамките на која беше најавено и негово „важно обраќање“ беше доведена во прашање вчера, откако Кадри Весељи, претседателот на косовскиот парламент, рече дека нема причини Вучиќ да оди на Газиводе и дека може да се случи да му биде забрането влегувањето во Косово.

Езерото и хидроцентралата Газиводе според официјален Белград имаат стратегиско значење за опстанокот на Србите на северот на Косово, додека официјална Приштина одбива секаков разговор на таа тема.


Сè уште неизвесна посетата на Вучиќ на српските енклави во Косово


Белград, 7 септември, 2018 - 9:27 (META) 

Српскиот претседател Александар Вучиќ и вчеравечер не одговори дали е можно да биде откажана неговата посета на српските енклави на Косово, која беше најавена за викендов.

– Утре ќе зборуваме за тоа – им одговори Вучиќ на новинарите во Белград по заедничката прес-конференција со американскиот министер за трговија Вилбур Рос, по повод потпишувањето на Меморандумот за разбирање на владите на Србија и САД во областа на инфраструктурата.

РТС и провладиниот весник „Вечерње новости“ претходно вчера објавија дека посетата на Вучиќ на српските средини во Косово може да биде откажана доколку официјална Приштина му забрани да го посети езерото Газиводе на северот на Косово. Беше наведено дека ако се случи тоа, Вучиќ ќе ги прекине сите контакти со Приштина, како и дека би можело да се откаже денешното продолжение на официјалниот дијалог во Брисел.

Претседателот на косовскиот парламент, Кадри Весељи, вчера рече дека нема причини Вучиќ да оди на Газиводе и дека може да се случи да му биде забрането влегувањето во Косово поради „деструкција на стабилноста на Косово“, иако претходно доби дозвола.

Езерото и хидроцентралата Газиводе според официјален Белград имаат стратегиско значење за опстанокот на Србите на северот на Косово, додека официјална Приштина одбива секаков разговор на таа тема.