Невена Георгиевска од „О2“: Шилегов повеќе се фали одошто има резултати


Скопје, 27 декември, 2018 - 10:19 (META) 

Активистите на „О2 Иницијативата“ во 2018 година беа активен монитор на постапките на локалната и на централната власт поврзани со животната средина, аерозагадувањето, уништувањето на Водно. За тоа што е сработено и дали се квалитетни мерките против загадувањето зборувавме со Невена Георгиевска, претставник на „О2 Иницијативата“.

Бевме сведоци дека Владата калкулираше со алармирање на јавноста за надминат праг на аерозагадување со ПМ10 честички и покрај тоа што имаше обврска.

– Не алармираше, бидејќи се смени временската состојба бидејќи беа најавени временски промени, ветер, и кога задува, се спуштија вредностите. Податоците за ветерот исто така стојат кај другите параметри кои се добиваат од мерните станици, но тие не се прикажуваат, а токму ветерот и температурата се исто така фактори кои влијаат на количеството на штетни материи во воздухот .Сакаме тие податоци за последниве две години да ги споредиме со вредностите на аерозагадувањето и да видиме, дали она за што се фалат дека е помало загадување поради превземените мерки е всушност резултат на природни фактори.

Дали ги имаме вистинските мерки против загадување?

– Потребно е да се стави акцент на субвенционирање на еколошки решенија за загревање, а печките на пелети да се овозможат таму каде што нема можност граѓаните да се приклучат на топловодна мрежа или на гас. Вака, откако ќе купат печки или инвертори, тешко дека за две години ќе сакаат да инвестираат во инсталации за гас. Не се размислува долгорочно. Исто така, два-три дена бесплатен јавен превоз не можат да донесат никакви резултати ако не се врзани со забрана за користење на возила во централното градско подрачје.

Сè уште не знаеме кој точно загадува. Имаше финска студија поради која власта вели – граѓаните загадуваат. Дали можеби и мерките против загадувањето не се вистинските штом не ги знаеме вистинските причини?

– Финската студија на која се повикуваат е резултат на само една и тоа позадинска мерна станица, лоцирана среде зеленило во Карпош и таа треба да го мери квалитетот на воздухот подалеку од автомобили и индустрија. Тие податоци требало да се споредат со оние од некоја локација на која влијаат и тие фактори и верувам дека било планирано да се направат и други такви студии, но се прекинало и во недостаток на други податоци, се потпираме само на овие.

Кој сè загадува?

– Сите загадуваме. Толку е големо загадувањето што не можеме да исклучиме ништо. Затоа и се потребни драстични мерки кои нема да се однесуваат само на домаќинствата, треба исто така и драстично намалување на сообраќајот во деновите на загадување, запирање на одредени технолошки процеси во индустријата, запирање на градежните активности, па да се види тогаш какви се вредностите на аерозагадувањето. Потребно е државата да размисли за комплетно селење на некои гранки на индустријата од Скопје, како и урбанистички развој преку дисперзирани урбани центри подалеку од сегашното градско јадро.

Место такви мерки – да се запрат градилиштата додека е алармантно загадувањето, само препораки: не излегувајте од дома!

– Градежниците се жалат дека тоа ќе им донесе загуби, годинава ја прогласија за „црна година“ поради стопирани ДУП-ови, а всушност не се во загуба, само планираниот профит, кој очекувале да биде голем, сега е намален. Ние бараме и ревизија на ГУП-от на Град Скопје, бидејќи тој поаѓа од многу застарени податоци поради немањето попис и сега им служи на властите и на градежниот бизнис да ја стимулираат прекумерната урбанизација на секоја педа зеленило со тоа дека „ГУП-от така предвидува“. Општините живеат од придонесите од градежништвото и не сакаат да ги стопираат. А, кога сегашните локални власти дојдоа, прво што ветија е дека имаат менаџерски способности да најдат доволно пари за да не мора општините така да се финансираат.

Макрадули и Шилегов не пропуштаат можност да изјават дека граѓаните загадуваат во Скопје, а не индустријата, која има еколошки дозволи и е под контрола. Од друга страна, неформално, од повеќе извори во институциите дознаваме дека сè би било поинаку кога контролите на инспекциите за животна средина би се извршувале како што треба.

– Индустријата има А и Б интегрирани еколошки дозволи. Оние со А ги контролира државата, но за нив побаравме да се испита загадувањето не само на непосредниот извор на емисии туку и во околината на објектот, бидејќи често и таму има прашина која загадува. Додека оние со Б дозволи треба да бидат контролирани од општините, а самите општини признаваат дека немаат капацитет да обавуваат контроли, катастари на загадувачи повеќето немаат изготвено иако им е обврска. Летово имаше бројни пријави на граѓани за загадување кое доаѓа од кругот на некогашна Железарница, каде покрај „Макстил“ има многу други помали производни капацитети за кои не знаеме ни дали имаат воопшто дозволи, станицата покажуваше алармантни вредности и веднаш потоа престана да работи, но немаше никаков резултат од тие пријави, барем не се објавени никаде. При таква нетранспарентност и такво работење, ние сме со право недоверливи во работењето на општините во врска со контролата на индустриското загадување.

А што е тогаш улогата на Градот?

– Ингеренциите се поделени, но морам да кажам дека имаме добра соработка со сегашниот директор на градскиот инспекторат кој веднаш реагира на наши пријави и праќа екипи на терен. Сепак, тоа не е доволно, треба построги законски ограничувања на загадувањето и построги казни. За поздравување беше и акцијата со запленување на гуми за горење што ја спроведе општина Гази Баба, но, што е со дивите населби под Кале каде се гори токсичен отпад? Шест месеци властите се фалат дека ќе го решат проблемот, а тие луѓе сè уште се таму.

Шилегов кога дојде на функција навистина делуваше дека е заинтересиран да ги решава еколошките проблеми на градот, Негов предлог беше луѓето кои живеат на дивите депонии и го селектираат отпадот да бидат ставени во системот, каде дел од нив ќе бидат вработени, со решен социјален статус и така тие сиви зони ќе бидат под контрола на државата.

Како е О2 задоволна од исполнувањето на 39те барања за решавање на еколошки проблеми во Скопје од страна на Шилегов?

– Премногу има фалење со сработеното, премалку резултати. ПР-от на градоначалникот е супер, но ние сме построги во оценките и фокусирани на резултатите. Има 19 барања кои се обележени дека се во тек на реализација и мислам дека активностите на градот се делумно резултат и на тоа што постојано ги подбуцнуваме. Некои од обврските од листата се лесни за исполнување и не бараат ресурси, само добра воља, какво што е барањето за вклучување на граѓаните во донесувањето на одлуките на градот кои се однесуваат на загадувањето или објавување на Катастарот на загадувачи, но не се реализираат. Или затрупувањето на троската на Железарница и нејзино пошумување. Има и многу ургентни како уредувањето на Вардариште кое не е почнато бидејќи го кочи донесувањето на ДУП во Гази Баба, како ни покривањето на депониите на линданот што би требало да биде во содејство со Министерство за животна средина општина Кисела Вода. Садењето на по неколку дрвца или хортикултурно уреден тревник не можат да компензираат за тоа што не се зачувува или подига зеленило во форма на паркови, како овие што ги вети Шилегов, покрај Вардар или крај Серава и Лепенец.

Има ли некаква надеж програмата на Владата да ги донесе најавените резултати, од 30 до 50 процентно намалување на загадувањето?

– Тоа би можело да се каже само доколку на секои 3-4 месеци се прави ретроспектива на сработеното за да се види дали мерките се добри и нивната реализација се одвива според планот. Ако нема механизам за контрола на програмата, а ние чекаме две години за нешто да се случи, тогаш, доколку потфрли овој план, кого ќе повикаме на одговорност? Влогот е голем – здравјето на нацијата!


Не може да се активираат итните мерки за загадувањето без мерните станици во Лисиче и Гази Баба


Скопје, 3 декември, 2018 - 12:57 (META) 

Нефункционалните мерни станици за загадување со ПМ10 честички во Лисиче и Гази Баба ја оневозможуваат Влада на Република Македонија да ги активира интервентните мерки против аерозагадувањето, велат од „Скопје смог аларм“.

„Согласно уредбата, доколку среднодневната концентрација на ПМ10 честички е над 200 микрограми на кубен метар во два последователни денови во најмалку две мерни станици во Скопје, тогаш стапуваат на сила мерки како ослободување од работни обврски на бремени жени, постари лица, лица со хронични заболувања, потоа воведување на бесплатен јавен превоз, дневно чистење на улиците, зачестени инспекции, посебен сообраќаен режим итн. Фактот што мерните станици за ПМ честички во Лисиче и Гази Баба се нефункционални во екот на загадувањето, укажува на несериозен пристап кон проблемот од страна на надлежните“, стои во соопштението од „Скопје смог аларм“.

„Мета“ во неколку наврти пишуваше дека граѓаните со месеци не можат реално да се информираат за нивото на загадување на воздухот во дел од најзагадените подрачја во земјава. Во скопските населби Гази Баба и Лисиче мерните станици работат селективно, па така, инструментот за мерење на ПМ10 честички во Гази Баба е исклучен од 14 август оваа година односно, а во Лисиче од 5 октомври односно два месеци.

Нефункционирањето на инструментите за ПМ10 честички на мерните станици нема да биде прикажано како намалување на загадувањето на воздухот во годишните извештаи, изјави заменик-министерот за животна средина, Јани Макрадули како одговор на новинарско прашање на „Мета“.

– Не, нема да бидат прикажани како намалување на загадувањето бидејќи не работат. Сакам да го потенцирам уште еднаш Планот за чист воздух кој се справува со загадувачите. Дали мерната станица покажува 100 или 150 микрограми на кубен метар е важно, но најбитно е да го спречиме тој што предизвикал 150. Планот се базира токму на тоа, како да го решиме загадувањето – вели Макрадули.

Тој информираше дека со Планот се предвидува во 2019 година да се набават комплетно нови инструменти за веќе постоечките 18 мерни станици. Во мониторингот ќе има предвидување во реално време, односно тридневна проекција на загадувањето.

Последното мерење на станицата во Лисиче за ПМ10 честички било на 5 октомври во 8 часот утрото кога мерната станица покажа 137 микрограми на кубен метар. Три часа претходно во 5 часот утрината покажала 629 микрограми, во 3 часот после полноќ 382 микрограми, а во 1 часот 259.


Догодина ќе се набават нови инструменти за сите 18 мерни станици за загадувањето


Скопје, 16 ноември, 2018 - 10:36 (META) 

Нефункционирањето на инструментите за ПМ10 честички на мерните станици нема да биде прикажано како намалување на загадувањето на воздухот во годишните извештаи, изјави заменик-министерот за животна средина, Јани Макрадули како одговор на новинарско прашање на „Мета“.

– Не, нема да бидат прикажани како намалување на загадувањето бидејќи не работат. Сакам да го потенцирам уште еднаш Планот за чист воздух кој се справува со загадувачите. Дали мерната станица покажува 100 или 150 микрограми на кубен метар е важно, но најбитно е да го спречиме тој што предизвикал 150. Планот се базира токму на тоа, како да го решиме загадувањето – вели Макрадули.

Тој информираше дека со Планот се предвидува во 2019 година да се набават комплетно нови инструменти за веќе постоечките 18 мерни станици. Во мониторингот ќе има предвидување во реално време, односно тридневна проекција на загадувањето.

– Во 2019 година со буџетските алокации и со помошта што ќе ја добиеме од европските партнери, дел набавката на комплетно нови инструменти ќе биде направена брзо на почетокот на 2019 година. Не сакаме ради нецелосниот квалитет на инструментот да направиме проблем. Сакам да кажам дека во една мерна станица има пет или шест различни инструменти, се мерат ПМ2,5 честички, ПМ10, озон, сулфур диоксид и јаглерод. Останува наша обврска до тогаш, можеби со соседните земји, преку нашите колеги од другите министерства, да најдеме можеби времено решение, а новата набавка ќе се случи на почетокот на 2019 година – вели Макрадули.

Инструментите за канцерогените ПМ10 честички на мерните станици во Гази Баба и Лисиче, кои што се едни од најзагадените населби во Скопје, не работат подолго време. Во Гази Баба инструментот е надвор од функција од 14 август односно три месеци, во Лисиче од 5 октомври односно 43 дена.

Последното мерење на станицата во Лисиче за ПМ10 честички било на 5 октомври во 8 часот утрото кога мерната станица покажа 137 микрограми на кубен метар. Три часа претходно во 5 часот утрината покажала 629 микрограми, во 3 часот после полноќ 382 микрограми, а во 1 часот 259.

Освен што граѓаните не можат соодветно да се информираат колку е загаден воздухот што го дишат, нефункционирањето на инструментите во Лисиче и Гази Баба е проблематично затоа што според резултатите од овие мерења се воведуваат предвидените итни мерки.

За воведување на итни мерки потребно е бар две мерни станици во Скопје да покажат среднодневна концентрација на ПМ10 честички над 200 микрограми на кубен метар во последните два дена.

Ова значи дека дури и да има вакво надминување на мерните станици во Лисиче и Гази Баба, кои притоа секогаш се едни од најзагадените населби, тоа не е евидентирано и не може да се преземат мерки.

Пишува: Симона Атанасова


Шесте нови приватни станици мерењата ги почнаа со високо ниво на загадување на воздухот


Скопје, 13 ноември, 2018 - 12:05 (META) 

Шесте нови мерни станици, кои го мерат загадувањето на воздухот во Скопје, поставени од страна на проектот „Скопје пулс“ утринава и синоќа измерија високо ниво на загадување.

Тоа се мерните станици кај Металски Завод Тито во општина Гази Баба, кај полициската станица во Ѓорче Петров, населба Козле во општина Карпош, како и три мерни станици во Центар- кај кафулето „Излет“, кај фонтаната во Градски парк и кај Клинички Центар. Претходно беа инсталирани 10 вакви станици – во Црниче, Драчево, Сопиште, Железара, две во Аеродром, во Кисела Вода, Илинден, Бардовци, две во Ѓорче и во Гази Баба.

На Водно синоќа беа измерени 108 микрограми на кубен метар, во Козле 241, МЗТ-Гази Баба 260, во Парк 102, кај „Излет“ 145 и во Ѓорче Петров 158 микрограми на кубен метар.

Овие мерни станици на „Скопје пулс“, проект на компанијата „Нетцетера“, се независни од мрежата мерни станици на Министерството за животна средина независни и мерат концентрации на ПМ10 и ПМ 2,5 честички, како и квалитет на воздухот (AQI) по што информациите кои тие ги испраќаат веќе можат да се следат на апликацијата „Мој воздух“.

На апликацијата „Мој воздух“, станиците што се дел од волонтерската „Скопје пулс“ мрежа, во името содржат “(Pulse)”.

Сега во Скопје, има вкупно 22 мерни станици во Скопје од кои 16 се независни. Во моментов постојат вкупно 35 мерни станици во државата чиишто податоци можат да се следат на апликацијата „Мој Воздух“, со тоа што мерните станици на Министерството во некои од најзагадените делови на Скопје – Гази Баба и Лисиче не работат од 14 август односно 5 октомври.


МВР за „Вистиномер“: Ќе се гради нов објект на Прифатниот центар, а не нов бегалски камп


Скопје, 4 јули, 2018 - 10:42 (META) 

По шпекулациите во јавноста дека се планира целосно нов центар за азиланти во Визбегово, од Министерството за внатрешни работи (МВР) за „Вистиномер“ ги негираат гласините, велејќи дека е планирано само да се изгради нов објект за постоечкиот Прифатен центар за странци, кој сега се наоѓа во поранешната детска градинка на Гази Баба и е во катастрофална состојба и не ги задоволува ниту елементарните услови.

Објектите на детската градинка се користат како азилантски центар уште од 2005 година, а јавноста со условите во нив се запозна повеќе во 2015 година, кога мигрантската криза го стави во центарот на вниманието.

Како што пренесува „Вистиномер“, новиот објект во кој ќе се пресели Центарот, нема да биде во Визбегово, туку во Бардовци, на парцела од 4.483 квадратни метри што Владата ја доделила на МВР во декември минатата година и повеќе ниски објекти со различна квадратура.

Во текстот се вели и дека помешувањето на Бардовци со Визбегово е поради тоа што Министерството за труд и социјална политика во Визбегово сака да гради центар за бездомни лица, при што ќе им се обезбеди дом на 80 лица кои живеат на улица.

Целиот текст прочитајте го на веб-страницата на „Вистиномер“.


Ќе се гради нов мост кој ќе ги поврзува Аеродром и Гази Баба


Скопје, 23 март, 2018 - 14:24 (META) 

Град Скопје за 24 месеци ќе изгради има нов мост во должина од 120 метри на булеварот „АСНОМ“, кај хотелот „Русија“ кој ќе ги поврзува општините Аеродром и Гази Баба.

– За проектот е предвидено пробивање и продолжување на нов булевар во должина од 2.107 метри, од хотелот „Русија“, преку Вардар и населбата Керамидница се до Скопски саем. Ќе има 5 вкрстувања, 6 коловозни ленти, велосипедски патеки во двете насоки, пешачки патеки и дрвореди. Новиот коридор во градот задолжително ќе биде проследен и со нови автобуски линии на јавниот градски превоз – рече на денешната прес-конференција скопскиот градоначалник Петре Шилегов.

Проектот е вреден од 7,5 до 8 милиони евра. Градбата на овој коридор со мост предвидено е да биде завршена во рок не подолг од 24 месеци од почетокот на градежните работи.

На денешната прес-конференција присуствуваа и градоначалниците на Аеродром и на Гази Баба Златко Марин и Борис Георгиевски.


Малолетници пронашле рачна бомба на улица во Гази Баба


Скопје, 22 октомври, 2017 - 15:03 (META) 

Малолетници вчера попладне пронашле рачна бомба на улицата Ордан Чопела во скопската населба Гази Баба, информира МВР. Случајот бил пријавен околу 14 часот, во Едницата за информации и команда Скопје од страна на граѓанин.

На местото излегла екипа на Одделот за антитероризам на МВР, која ја подигнала рачната бомба.

Од полицијата велат дека се преземаат мерки за расчистување на случајот.


Трајковски: Четири месеци се на власт, а не реализираа ниту еден проект во Гази Баба


Скопје, 10 октомври, 2017 - 20:14 (META) 

Кандидатот за градоначалник на ВМРО-ДПМНЕ за Гази Баба, Тони Трајковски, на денешниот митинг порача дека новата влада во изминатите четири месеци не само што не реализирала ниту еден проект во општина Гази Баба, туку ги намалила буџетските средства наменети за инвестиции во општината.

– Нашите противкандидати не за изминатите четири години, туку за изминатите 17 години не реализирале ниту еден проект во нашата општина. Велат не биле на власт, но каде се во изминативе четири месеци? Имаат власт и пари, а немаат ниту еден проект реализирано во нашата општина. Освен што немаат реализирано ниту еден проект, тие со ребалансот на буџетот ги кратат средствата за новата градинка во Стајковци, за новото училиште во Ченто, за новиот дом за стари лица во Маџари, за санација и за реконструкција на градинките и на училиштата, а последниве неколку месеци ни ги намалија и блок-дотациите за училиштата – рече Трајковски.

Тој се осврна на реализираните проекти, наведувајќи дека е изградено училиштето „Глигор Прличев“, детската градинка „Морковче“, пешачки и велосипедски патеки, спортски игралишта, детски забавни игралишта, спортска сала во населбата Ченто, асфалтирани се повеќе од 90 улици, а поставена е фекална и атмосферска канализација, како и водоводна мрежа.

Лидерот на ВМРО-ДПМНЕ, Никола Груевски, ги повика жителите на Гази Баба да им одржат лекција на Зоран Заев и на СДСМ на изборите на 15 октомври поради лошото раководење со државата. Тој истакна дека Владата не само што не ги исполнила ветувањата, туку работи на уништување на сработеното од владата на ВМРО-ДПМНЕ.

– Овие луѓе од власта се неспособни. Тие се практиканти без искуство и без капацитет. Тие не знаат економија, не знаат инвестиции, работа во локална самоуправа. Тие се толку вознемирени и немаат конкретна идеја и план што да направат во врска со тоа. Тие оставија сè друго настрана и само фрлаат кал врз мене. Тие велат: „Ние самите не можеме да сториме ништо, барем да го деградираме Груевски и да ја обесхрабриме ВМРО“. Не трошете го вашето време. Ова нема никаква смисла. Ние сме горд глас на оваа нација, ние сме независен глас на Македонија. Ние сме Македонија – рече лидерот на ВМРО-ДПМНЕ.

Груевски рече дека не бараат само победа за претстојните избори, туку дека размислуваат и имаат проекти за следните две децении. Во контекст на тоа ги повтори проектите кои ги планираат за општините во кои ќе победат, односно бесплатен здрав оброк за учениците, отпишување на долговите за вода и за комуналии на социјално загрозените семејства и стекнување дом за младите брачни парови.


Заев: Трајковски и Трајановски се виновни за поплавите во Гази Баба


Скопје, 9 октомври, 2017 - 23:08 (META) 

Победуваме во Гази Баба, во Скопје и во цела Македонија затоа што сме единствени и сплотени и затоа што дојде време да падне режимот, изјави вечерва лидерот на СДСМ, Зоран Заев, од митингот во скопската општина Гази Баба.

Заев истакна дека премногу се важни локалните самоуправи за да бодат оставеби да гинат во мртвилото, да минуваат годините и децениите. Тој рече дека Гази Баба е една од најслабо комунално-инфраструктурно организираните општини и дека е недозволиво да нема канализација и питка вода.

– Не е дозволиво една Гази Баба да биде срам за Скопје. Тоа мора да се промени. Не грижете се за Тони, сегашниот градоначалник, има тој што да работи. Тој ќе биде многу, многу зафатен, пред судови со кривични пријави. Дајте да ги направиме промените. Гази Баба има огромни приходи и од земјиште и од комуналии. Не може да се правда на невреме, да се правда дека е од Господ. Луѓе изгубија животи, изгубија се што имаа. Не може никој да не биде виновен за тоа. Виновни се Тони Трајковски и Коце Трајановски и казна на овие избори мора да има – рече Заев.

Тој најави дека централната власт ќе ја поддржи гасификацијата на општината, изградбата на ново училиште и амбуланти, како и капитални инвестиции во водоводната и канализационата мрежа и асфалтирање на патишта.

Кандидатот на СДСМ за градоначалник на Гази Баба, Борче Георѓиевски, рече дека заедничка желба и мисија е Гази Баба да стане модерно и современо место за живеење, општина која ќе биде отворена за сите граѓани.

– Заедно со вас ќе изградиме граѓанско општество и општинска администрација, која ќе работи во интерес на граѓаните. Отворена и услужна, таква ја гледам и таква ќе биде администрацијата на Гази Баба – рече Георѓиевски, додавајќи дека трeба да се стави крај на 20-годишното лошо работење.

Георѓиевски вети гасификација на општината, доизградба на училиштето „Вера Јоциќ“, градинки, пешачка и велосипедска патика долж реката Вардар, мост за поврзување на Гази Баба со општина Аеродром, чиста вода за околните села и поставување на канализации во сите делови на општината. Тој рече дека ја знае секоја педа од својата општина и дека има решение за сите проблеми.

– На 15 октомври сите ние, гордо и достоинствено, да излеземе на гласање, најмасовно, да го урнеме режимот и во Гази Баба, да го закружиме бројот 19 и да ја донесеме првата и историска победа на СДСМ – рече Георѓиевски.


Центар, Гази Баба и Карпош би можеле да добијат градоначалник во првиот круг


Скопје, 9 октомври, 2017 - 20:32 (META) 

Три скопски општини би можеле да добијат градоначалник уште во првиот круг на гласање, покажа анкетата што ја спроведе „М-проспект“ на барање на „Телма“ и на МЦМС, на примерок од 1.560 испитаници.

Општините Центар, Гази Баба и Карпош по гласањето на 15 октомври би можеле да добијат градоначалник. Според анкетата, кандидатот на СДСМ за Центар, Саша Богдановиќ, ќе го победи Дејан Јовановски од ВМРО-ДПМНЕ, а актуелниот градоначалник и кандидат на ВМРО-ДПМНЕ за Гази Баба, Тони Трајковски, ќе го порази Борче Георѓиевски. Стефан Богоев од СДСМ, според анкетата, ќе го победи Стевчо Јакимовски и ќе стане градоначалник на Карпош.

Сепак, поради премалиот примерок и големата маргина на грешка, која изнесува околу 6 отсто, не беа соопштени процентите, туку беа дадени само прогнози.

Според анкетата, тесна борба ќе се води во Аеродром, Чаир, Ѓорче Петров и во Кисела Вода.