Европските компании кои инвестирале во руски гасовод ќе се соочат со санкции од САД


Вашингтон, 12 јули, 2018 - 10:32 (META) 

Санкции за европските компании кои инвестирале во рускиот гасовод „Северен поток 2“ кон Германија, најави администрацијата на американскиот претседател Доналд Трамп.

– Бевме јасни дека постои ризик од воведување санкции за компаниите кои работат во секторот на рускиот енергетски извоз –  изјави претставник на американскиот Стејт департмент.

Тој додаде дека Вашингтон смета дека „гасоводот ќе ја поткопа целата енергетска безбедност и стабилност на Европа, давајќи и на Русија уште еден инструмент за вршење политички притисок врз европските земји, особено врз Украина“.

Доколку САД ги спроведе санкциите, засегнати ќе бидат компаниите „Унипер“ (Uniper), „Винтершел“ (Wintershall), „О-ем-ве“ (OMV), „Анжи“ (Engie) и „Шел“ (Shell).


Анѓушев: Гасоводот мора да поминува низ Водно, но ќе има нова траса


Скопје, 10 јули, 2018 - 12:49 (META) 

Вицепремиерот за економски прашања Кочо Анѓушев и директорот на Македонски енергетски ресурси (МЕР), Бајрам Реџепи, заедно со претставници од иницијативата „Го сакам Водно“ денеска ја поминаа трасата по која треба да поминува гасоводот, за лично да се уверат каква шума и зеленило ќе бидат уништени.

Анѓушев вели дека слушал различни спротивставени ставови за тоа колку шума треба да се исече и низ кои предели поминува проектот за гасоводот, и затоа сакал да ја види ситуацијата на терен.

– Jа поздравувам иницијативата на невладините организации, тие се коректор на политиките на секоја влада и како такви и денеска се уверивме дека делумно или во најголем дел биле во право во своите барања. Службите во МЕР напорно работеа заедно со невладините организации и мислам дека во најголем дел таа траса се искорегира. Можете да го видите проектот каде што таа претходно била замислена и како сега сите делници каде што може да биде уништена шума се избегнати. Но, и покрај тоа што е направено максимално избегнување каде што може, во еден дел мора да се помине низ шума. Таму ќе се користат шумските патеки кои се веќе постојни, за да се направат минимални оштетувања кои може да настанат. Се надевам дека ќе дојдеме до заеднички јазик како оваа делница да се изгради – рече Анѓушев.

Тој уште еднаш повтори дека, ако се пролонгира градењето на гасоводот тоа ќе значи дека многу домаќинства ќе продолжат да се греат на дрва и во наредните пет години.

– Во тој случај несразмерно многу шума ќе се исече за греење од тоа што тука би се оштетила, а тоа сега ќе биде минимално. Ги охрабрив во МЕР и како Влада им наложивме да направат максимални напори, секое дрво кое може да се избегне за да биде исечено, тоа да биде така направено. Мислам дека веќе се постигна оптимална траса низ која што ќе има минимални оштетувања. Се работи за 70 отсто помалку оштетувања од тоа што беше првобитно замислено. Доколку и понатаму имаме желба да направиме еколошки потфат, како што е градењето на гасоводот, треба да бидеме согласни да продолжиме – додаде Анѓушев.

Тој вели дека ќе инсистира невладините организации и еколошките здруженија до крај да бидат вклучени во проектот, односно да бидат надзор.

– Покрај градежниот надзор, кој ќе постои согласно закон, и ќе биде ангажиран од страна на МЕР, ќе барам здруженијата да бидат дополнителен надзор на градењето на оваа траса. Се што може да се измени и прилагоди, за да има што е можно помал импакт на животната средина – додаде тој.

Андреа Јанков од иницијативата „Го сакам Водно“ вели дека ова се некои начелни, прелиминарни проекти кои се прават од изведувачите на основниот проект.

– Останува да продискутираме за овие дадени предлози со кои навистина се намалува импактот врз Водно. Од претходните четири километри шумски појас уништување, сега се намалува на два, се јавува теснење односно користење на постоечки патеки. Но, останува да продолжиме со разговорите, за да добиеме адекватно решение со кое сите би биле задоволни – вели Јанков и додава дека нивната работа допрва започнува со будење на граѓанската свест, за да ги натераат граѓаните да учествуваат во овие случувања, за да ги освестат, за тоа што значи Водно за нив.

Во однос на користење на друга траса за изградба на гасоводот и комплетно избегнување на Водно, директорот на МЕР, Реџепи вели дека „ги разгледале опциите и направиле длабока анализа, но биле врзани со рокови.“

– Имаме договори спрема банки и други субјекти, поднесовме анализа до Влада, но ќе имаше одложување на проектот три до четири години минимум. Заради другите обврски што ги имаме Владата одлучи да одиме по постоечката траса – додаде Реџепи.

Тој потсети дека идејниот проект за овој гасовод бил изготвен во 2010 година и дека во 2016 година било дадено одобрението за градба.


„Го сакам Водно“: Заев да престане поедноставено да гледа на уништувањето на Водно


Скопје, 20 јуни, 2018 - 14:01 (META) 

Граѓанската иницијатива „Го сакам Водно“ реагираше на вчерашните изјави на премиерот Зоран Заев во емисијата на Канал 5 „Само вистина“, порачувајќи му дека не смее поедноставено да се гледа на животната средина и дека многу работи што ги кажал за изградбата на гасоводот на Водно се неточни.

Од иницијативата велат оти е неточно дека со гасоводот ќе се реши комплетно делот на гасификацијата за Скопје, бидејќи станува збор за магистрален гасовод кој само минува на Водно и од Скопје ќе го „носи“ гасот до Косово, Тетово, Гостивар, а потоа и Кичево.

Во врска со изјавата на Заев дека „секое дрво 10 пати повеќе ќе се обнови, делот каде поминува гасоводот низ парк-шума Водно е нискостеблеста шума, само тој дел од изградбата на гасоводот е закочен”, од „Го сакам Водно“ велат дека не садењето дрвја на уништениот потег е никакво решение, бидејќи самиот процес на изградбата нанесува огромна штета на природата и на многу животински и растителни видови.

„Заштитено подрачје како што е парк-шума Водно, каде живеат ретки, ендемски и загрозени видови, не смее да се избанализира и не може да се сведе на ниво “за секое исечено дрво, 10 ќе насадиме”. Вакви изјави укажуваат на големо непознавање за функционирањето на еден екосистем и навистина мора да се стави крај на вакво несоодветно и крајно симплифицирано гледање на природата со целиот жив свет во неа и нејзиното значење. Гасоводот поминува низ 4 км шума, високостеблеста, а делот што се смета за нискостеблеста шума е густа шума на дрвја, високи околу 2 метра“, велат од иницијативата.

Од таму го оспоруваат тврдењето на Заев за повторно пошумување, велејќи дека над гасоводот нема да смее да се садат дрвја. Екологистите го повикаа Заев заедно со нив да се искачи на Водно за да види со какво уништување се согласил.


Анѓушев: Промената на трасата на гасоводот од Водно ќе ја одложи изградбата за пет години


Скопје, 29 мај, 2018 - 16:46 (META) 

Вицепремиерот за економски прашања, Кочо Анѓушев смета дека, ако се промени трасата на гасоводот од Водно, изградбата ќе се одложи до пет години. Затоа, како што одговори на новинарско прашање, треба да се вложат сите средства уништувањето на зеленилото да се сведе на минимум, а потоа сè што ќе биде уништено да се санира и да се надомести со ново зеленило.

– Со интервенции во самата траса на градење е направено да се минимизира уништувањето на шумата Водно и ќе биде минимизирано оштетувањето, а Владата ќе биде ригорозна во компензација на се што ќе биде уништено. Јас лично ќе бидам поборник на тоа, за секое исечено дрво, да се засадат најмалку десет, и мислам дека решението треба да го бараме во тој правец. При секој инфраструктурен проект се што ќе биде уништено во животната средина треба биде многукратно надополнето од инвеститорите во тој процес – рече Анѓушев.

Тој додаде дека и да се промени трасата на гасоводот, повторно ќе има ситуација во која ќе треба да се уништи дел од некоја природна убавина, бидејќи нема градење на каков било инфраструктурен проект, кој нема да влијае на животната средина.

Вчера, граѓанските иницијативи за спас на Водно соопштија дека постои алтернативно решение за изградба на гасоводот кое поминува од северната страна на Скопје и затоа сметаат дека штетите нанесени на парк-шумата Водно се неоправдани.


Граѓанските иницијативи велат дека има алтернативна траса за гасоводот на Водно


Скопје, 28 мај, 2018 - 10:58 (META) 

По средбата со надлежните институции, граѓанските иницијативи остануваат на ставот дека се против изградбата на гасовод низ парк-шумата Водно.

Една од причините како што велат, е што парк-шума Водно е заштитено подрачје, дом на загрозени, ретки и ендемични видови.

„Парк-шума Водно има заштитен статус кој Собранието на Град Скопје го има донесено во 1976, а потврдено во 1991. Претставува регистрирано природно наследство кое според Меѓународниот сојуз за заштита на природата и природните богатства (IUCN) има меѓународен статус. Режимот на заштита забранува сеча, поткастрување, кршење, насилно оштетување на дрвја, стебла, корења, гранки; менување на растителни услови, како отстранување на земја; градење на поголеми постојани објекти или градби на подрачјето на непосредниот растителен реон“, се вели во соопштението.

Во него се додава дека трасата на гасоводот, 11 км по Водно, би поминала низ над 4 километри високостеблеста шума, дел низ т.н. нискостеблеста шума, би ги уништила живеалиштата на зачајни видови.

„Гасоводот на териоторијата на парк-шума Водно започнува од јужната страна од село Сопиште, при што преку срт оди кон врвот на Водно, па паралелно со пешачката патека кон бункерите, цело време низ шума, по што повторно преку шума оди до Бел Камен, од каде се спушта према с. Шишево. Ова претставува една од поомилените рекреативни зони на скопјани, особено по изградбата на жичарата, а посебно популарна од отпочнување на градежните работи на кулата на АЕК, поради која постителите веќе го избегнуваат врвот Крстовар. Со изведба на трасата, наместо шума тука би се појавил соголен срт“, се додава во соопштението.

Од граѓанските иницијативи велат дека имајќи предвид дека постои алтернативно решение кое поминува од северната страна на Скопје и кое било разгледувано во 4 од можните 5 варијанти на оваа траса, штетите нанесени на парк-шума Водно се неоправдани.

„Доколку се продолжи со работење на трасата низ парк-шума Водно, даваме до знаење дека ние граѓаните ќе се бориме со сите расположиви средства против. Се надеваме дека МЕР, Владата, ќе одобри алтернативна траса, со што парк-шума Водно ќе остане заштитена, а магистралинот гасовод Скопје-Тетово-Гостивар ќе се изгради“, додаваат од таму.


Сугарески: Годинава ќе се изградат нови 80 километри госовод


Скопје, 16 јануари, 2018 - 14:37 (META) 

Годинава ќе се изградат нови 80 километри гасовод, за што обезбедивме околу 40 милиони евра. Приоритет за владата е да се обезбеди дотур на гас до секоја општина, објави министерот за транспорт и врски, Горан Сугарески, по средбата со директорот на Македонски енергетски ресурси (МЕР) Благојче Котески.

На средбата директорот го информирал министерот за динамиката на изградба на делниците Неготино – Битола и Скопје – Гостивар, како и за можностите за интерконекција со Грција и Бугарија.

– Гасификацијата е врвен приоритет на Владата и ќе продолжиме интензивно да работиме да обезбедиме цевки со гас до секоја општина. На одредени траси имаме проблеми со експропријацијата, но се работи на терен и верувам дека во следниот период ќе ги надминеме сите вакви ситуации за да можеме ефикасно да продолжиме со изградбата. Интензивно работиме на разрешување на имотно правните работи за експропријацијата и на двете делници и тоа делницата Неготино – Битола која очекуваме да биде завршена во 2020 година, како и на делницата Скопје-Тетово-Гостивар која очекуваме да биде готова крајот на 2019 година – вели Сугарески.


Бејли: Нема твитер-војна, но уште еден руски цевковод нема да донесе чист воздух


Скопје, 15 декември, 2017 - 20:48 (META) 

Откако претседателот на Обединета македонска дијаспора, Мето Колоски денеска на својот Твитер профил ги предизвика Амбасадата на САД во Македонија и Амбасадорот Џес Бејли, наведувајќи дека се случува „Твитер војна меѓу амбасадите на САД и Русија поради загадувањето на воздухот во Македонија, набргу доби одговор од Бејли.

Амбасадорот на САД одговори опширно. „Не е Твитер војна. Ние им поставивме на македонските граѓани прашање за краткорочни мерки за чист воздух. Уште еден руски цевковод тоа нема да го направи. САД ја поддржуваат желбата на Македонија да донесе гас во македонските градови и разноликоста во снабдувањето со гас за Македонија и Европа“, напиша амбасадорот на САД во одговор на Колоски.   

Препирката почна завчера, кога амбасадата на САД во Македонија во објава на социјалните мрежи „Фејсбук“ и „Твитер“ праша „кои се вашите идеи за почист воздух во Македонија“.

„Загадувањето на воздухот во Скопје денеска беше толку големо што едвај можеше да се види амбасадата! Кои се вашите идеи за почист воздух во Македонија?“ напишаа од Амбасадата на САД на „Фејсбук“ и на „Твитер“.

Набргу стаса одговор од амбасадата на Руската федерација во Македонија: „Бидејќи нашите пријатели од амбасадата на САД бараат идеи за аерозагадувањето во Македонија, ние сакаме да помогнеме со решение. #Турски тек“, порачаа од руската амбасада на „Твитер“.


Владата го усвои дополнетиот ребаланс на буџетот, донесе одлука за струшката депонија


Скопје, 28 јули, 2017 - 19:33 (META) 

Владата на Република Македонија на денешната седница го усвоила предлогот за изменување и за дополнување на буџетот на Република Македонија за 2017 година, по завршената амандманска расправа во собраниските комисии. Со оваа верзија на ребалансот, дополнета со амандмани од пратениците, се определуваат дополнителни 25 милиони денари по одредени ставки и се пренаменуваат пари во согласност со потребите на буџетските корисници, се вели во владиното соопштение.

На седницата што почна попладнево, донесена е и одлука за итно решавање на проблемот со депонијата во Струга. Министерството за финансии и Генералниот секретаријат на Владата добиле задолжение да обезбедат пари за безбедно и економично да се транспортира сметот од струшката депонија до други безбедни депонии во земјава. Исто така, се ангажираат чувари кои ќе ја надгледуваат целата локација, за да превенираат можни идни проблеми.

Истовремено, владиниот кабинет ја усвоил информацијата за проектот за поедноставување на процедурите за известување и за плаќање на персонален данок на доход, кој е финансиран од ИПА-фондовите.

На денешната владина седница, е разгледан и усвоен меморандумот за соработка во полето на природниот гас помеѓу Министерството за економија на Македонија и Министерството за енергетика на Бугарија и министерот за економија бил овластен да го потпише документот. Според Владата, соработка ќе овозможи можност за нова директна врска помеѓу двата системи за природен гас на двете земји.

На седумнаесеттата владина седница биле донесени и заклучоци повразни со организацијата на институционалната прослава на националниот и државен празник 2 Август – Ден на Републиката. Владата определила и членови на организациониот одбор за прослава на државниот празник.


Русија има резерви на нафта и на гас за 50 години


Санкт Петербург, 4 октомври, 2016 - 12:35 (META) 

Русија има резерви на нафта и на природен гас најмалку за 40 до 50 години, изјави денеска министерот за енергетика Кирил Молодсов, на маргините на форумот за гас што се одржува во Санкт Петербург.

„Имаме гас за уште најмалку 40 до 50 години“, изјави министерот, коментирајќи ја изјавата на директорто на „Сбербанка“, Герман Греф, за тоа дали резервите на енергентите би можеле да бидат потрошени од 2028 до 2030 година.

Првиот човек на оваа компанија изјави дека целосната зависност од нафта и од гас е болна за економијата и дека се надева дека е поставена основа за промена на кавлитетот на економски пораст на Русија.

 


Беџети: Владата треба да функционира технички, а не да носи стратешки одлуки


Скопје, 19 септември, 2016 - 12:11 (META) 

Владата донесе одлука за нов проект за изградба на дистрибутивна мрежа на природен гас за која информираше викендов, а од СДСМ сметаат дека на помалку од три месеци до изборите, власта се обидува да споведе еден од најскандалозните корупциски тендери и во предизборие да дава концесија на 30 години.

Во овој момент, владата нема никакви законски пречки да спроведува големи стратегиски одлуки како што е концесијата за гасовод или, пак, донесување буџет.

Во пакетот закони што Собранието ги донесе на крајот на минатата година, по Договорот од Пржино, во ниту еден од нив, не е предвидено владата пред избори да не може да распишува тендери и јавни повици за големи проекти, наспроти периодот кога изборите веќе ќе бидат распишани, а Собранието распуштено. Тогаш владата ќе може единствено да ги извршува своите редовни обврски, како што се исплата на плати, пензии, редовни субвенции и социјална помош.

Но и покрај законските можности, професорот и аналитичар Абдулменаф Беџети вели дека не е во ред ниту препорачливо „техничка“, односно влада во ваков состав, да расправа за стратешки прашања кои не се од техничка природа.

– Влегуваат во процес за кој и самите се свесни дека нема да стигнат да го завршат и сè ќе заврши со циркус. Исто така, невозможно е и не е во ред парламентот во овој состав да го донесе најважниот документ за државата, односно буџетот за 2017 година. Имаат несериозен пристап кон сериозни капитални проекти. Но, сметам дека ова е еден дефокус на вниманието за вие, како новинари, и ние, како аналитичари, да се занимаваме со овие прашања. Интенцијата им е исто како пред две години, кога сакаа уставни промени – вели Беџети за „Мета“.

Експертот за енергетика, професорот Константин Димитров, вели дека тоа што сега е одлучено да се спроведува тендер за изградба на дистрибутивна мрежа на природен гас не значи ништо, бидејќи процесот на одлучување е долг, односно ќе поминат најмалку шест месеци и сигурно нема да заврши до избори.

– Ќе има дефинирање на техничките услови, ќе следуваат компаниски предлози, ќе има тендерски конкурентен дијалог меѓу компаниите и тој процес може да фати и подолго од шест месеци. Распишувањето тендер е од пред две години, но пропадна бидејќи многу работи се сменија, како цената на енергијата, како и условите на терен. Добро е ако техничкиот процес заврши и за шест месеци – вели Димитров за „Мета“.