„Го сакам Водно“ и власта не се договорија околу гасоводот


Скопје, 18 септември, 2018 - 17:22 (META) 

Претставниците на граѓанската иницијатива „Го сакам Водно и на власта – заменик-министерот за животна средина Јани Макрадули, градоначалникот на Скопје Петре Шилегов и директорот на МЕР, Бајрам Реџепи, не успеаја да најдат заеднички јазик околу спорната траса на гасоводната делница 5, Скопје-Тетово-Гостивар, преку Водно. Тие ги вкрстија аргументите на јавната дебата  на тема „Гасовод преку Водно“ што, поради симболика, се одржа денес во хотелот Средно Водно.

– Во овој момент не постои механизам кој може да ги отповика градежните дозволи дадени за проектот на гасоводната траса 5. Процесот е отиден предалеку за да го вратиме на почеток и да бараме траса која нема да оди преку Водно. Мораме да се носиме со фактите онакви какви што се – беше дециден скопскиот градоначалник Петре Шилегов, кој состојбата во која сега се наоѓа проблемот со гасоводот преку Водно го поистовети со поодмината бременост на жена во која абортирањето е опасно и за мајката и за детето.

Одговарајќи на обвинувањата на еко-активистите дека не држат оправдувањата дека не може да ја стопира изградбата на сегашната траса на гасоводот, Шилегов истакна дека сегашната владеачка гарнитура не ги носи своите одлуки според принципот „Миле ми текна“ туку дека, поради затекнатите состојби, морала на крајот да се определи да ја реализира оваа траса сосе делницата преку Водно, но дека сериозно е заангажирана да ги реализира еколошките подобрувања во градот како што се зелените коридори, зазеленувањето на булеварите, законското уредување на статусот на Водно и на Матка, а пред се завршувањето на секундарната гасификација на главниот град, за која најави дека работите, по повеќегодишната блокада, ќе стартуваат уште оваа есен.

– Да ја погледнеме пошироката слика – повика Бајрам Реџепи, директорот на државната компанија за гасификација, МЕР, кој ги повтори и претходно дадените аргументи дека евентуалната измена на трасата, во оваа фаза, со напуштање на веќе изградените објекти и со новото проектирање би значела конкретна загуба од 20 милиони евра од буџетот, но и дека и доколку гасоводот оди по друга траса, повторно би имало дури многу поголеми штети врз животната средина и сечење на многу повеќе шума.

– Тешко е да се биде еко-активист во еколошки девастирана држава каква што е Македонија – се пожали долгогодишниот еколошки активист Игор Смилев од „Го сакам Водно“. Тој посочува дека, поучен од сопственото дводецениско искуство во борбата против штетните еколошки проекти во земјава, ревитализацијата на веќе уништените подрачја, кои државата ги прави дури откако нивното уништување ќе достигне критично ниво, секогаш било премногу задоцнето, исклучително скапо и без никаков ефект.

Со тоа алудираше на ветувањата дадени од заменик-министерот за животна средина, Јани Макрадули, дека, паралелно со конечната законска заштита на Водно која тие ќе ја спровеле откако ќе биде завршена изградбата на гасоводот, ќе се случи обемен зафат за ревитализација на подрачјето опфатено со градењето на гасоводот и повеќекратен надомест на исечените дрва.

Еко-активистите потсетија и на недоследностите во постапките на власта околу гасоводната траса преку Водно, како што е сечењето на вегетацијата без дозвола, што де факто се случувало пред еколозите да ја предупредат јавноста што се случува на Водно и изразија отворено сомневање дека властите ќе покажеа макар и најмала грижа за Водно доколку тие не го кренаа својот глас во заштита.

Не беше разјаснета ниту дилемата дали е Водно сепак заштитено подрачје, како што тврдат тие или допрва треба да се заштитува, како што се изјаснија Макрадули и Шилегов. Директорот на МЕР, Реџепи самиот призна дека кај нив се уште постои дилема дали Водно навистина ужива некаков статус на заштита или не, но истакна дека тие уште од почеток имаат дозвола за сечење на вегетацијата за потребите на гасоводот, по утврдената траса, дека неа ја добиле од Македонски шуми и дека, поради ова, сечењето не се врши бесправно или со игнорирање на законските процедури.

„Го сакам Водно“ на крајот ги повикаа своите соговорници од власта да земат учество на јавна расправа која, овојпат, за разлика од досега, ќе ја организираат тие, под нивни услови.

foto brit emb foto uk gov Овој текст е подготвен во рамките  на проектот „Поддршка на демократските вредности и промени во општеството преку новинарството“ финансистан од Владата на Обединетото Кралство, со поддршка на Британската амбасада во Скопје. Мислењата и ставовите наведени во оваа содржина не ги одразуваат секогаш мислењата и ставовите на Британската амбасада/Британската Влада.


Реџепи: Северната траса на гасоводот би уништила многу повеќе зеленило


Скопје, 18 септември, 2018 - 8:03 (META) 

Македонски енергетски ресурси (МЕР) е државна компанија која стои зад изградбата на гасоводот од Скопје кон Тетово и Гостивар, што поминува преку заштитеното подрачје на парк-шумата Водно. Граѓанската иницијатива „Го сакам Водно“ го артикулираше граѓанското незадоволство од уште еден проект што ќе значи натамошна деградација на ионака сериозно уништеното зеленило и живиот свет на „белите дробови на Скопје“, а застанаа и пред багерите кои пред еден месец почнаа со копање за гасоводот на сртот на Водно. Власта реагираше со времено запирање на механизацијата и со преговори со екологистите, но не отстапува од проектот. За овие прашања, разговаравме со директорот на МЕР, Бајрам Реџепи.

Кога ќе продолжите со градежните работи на гасоводната делница преку Водно? Што доколку има физичка блокада од еко-активистите?

– Според студијата за влијанието врз животната средина, сечењето на дрвата не е препорачливо да биде во период од 1 март до 1 октомври, и ние ги запазуваме сите тие мерки предвидени во таа студија. Што се однесува до физичките блокади, ние се обидуваме да ги убедиме активистите на сите состаноци и јавни дебати, што ќе значи за државата ако проектот престане да се реализира во оваа фаза и очекувам дека тоа ќе биде сфатено рационално.

Најавивте стеснување на трасата на 10 метри широчина. Како тоа ќе влијае на безбедноста на гасоводот, кога таа е стандардно е широка не помалку од 25 метри токму од безбедносни причини. Што во случај на пожар? Како ќе се интервенира на таков терен?

– Стеснувањето е само на работниот појас и нема да има никакво влијание за безбедноста на гасоводот. Пристап ќе има до целата траса и тоа е дефинирано по основен проект и со стандарди за градење на преносен систем на гас.

Му ги плативте веќе исечените дрва на град Скопје. Колку ве чинеа исечените дрва на Водно? Колку дрва ќе исече МЕР вкупно на трасата 5, ќе се надоместат ли и на кој начин?

– Досега на Водно немало сечење на дрва. Тоа ќе биде според препораките на студијата за влијанието врз животната средина. Ние на Водно ќе сечеме помалку од 2 хектари шума, или околу 1.400 метри кубни дрва. Тоа ќе биде надоместено неколкукратно со програмата за рекултивација која ќе го изготви Град Скопје во соработка со стручни лица. На пет метри од оската на гасоводот нема да може да се сади високостеблеста шума, но тоа не значи дека покрај оска нема да може да се садат нискостеблесни растенија  како што се шумски капини и друго шумско овошје, кои ќе може да ги користат планинарите што ќе ја користат таа патека за пешачење.

Зошто воопшто е избрана трасата на гасоводот да поминува преку Водно, кога најприродно, според географската поставеност, ќе беше таа да оди од Арачиново, кон Тетово покрај обиколницата, достапно, по рамно и со малку вегетација и градби? Знам дека одлуката е донесена пред вие да застанете на чело на МЕР, но би требало да сте информиран – дали е вистина дека одлуката паднала заради изградбата на Сончев град и планираната урбанизација на Водно?

– Нема такви индикации дека поради Сончев град била избрана трасата да оди низ Водно. А дали низ северната страна на Скопје би била подобра варијанта, тоа во оваа фаза на реализација на проектот е нерационално да се дискутира, заради причините што неколку пати ги повторуваме. Пред се, интервенциите врз зеленилото на таа траса би имале далеку поголемо влијание врз амбиенталниот воздух во Скопје. Исто така, досегашната инвестиција од околу 10 милиони евра ќе пропадне целосно и ќе има дополнителни трошоци од 10 милиони евра, и секако ќе треба проектот да се одложи во најдобар случај за пет години. Треба да земете предвид и дека во тој период ќе биде сечено такво количество на дрво за огрев или повеќе и тоа дневно, за потребите на домаќинствата во Скопје, Тетово и Гостивар.

Беше изнесен аргументот дека на тој потег гасоводната траса ќе се вкрстела со главниот довод на вода од Рашче за Скопје. Дали е вистина дека гасоводот сепак ќе го сече водоводот од Рашче со кракот кој ќе оди кон Косово?

– Тоа е целосна шпекулација. За интерконективниот вод за Косово не постои ниту физибилити студија, ни идеен проект, ниту е дефинирана траса кај треба даде помине.

Постојано се тврди дека застојот поради протестите на екологистите ја одложува гасификацијата, но знаеме дека таа не зависи само од Водно. Кој ќе ја гради секундарната гасоводна мрежа, кој ќе стопанисува со неа? Ќе им соопштите ли на граѓаните колку ќе ги чини да се приклучат на гасоводната мрежа, со инсталирање на сите потребни апарати, бојлери, цевки и слично?

– А.Д. МЕР е оператор за пренос. Со новиот Закон за енергетика јасно се дефинирани дејностите. Но, Владата има формирано работна група, која интензивно работи на изнаоѓање модел за изградба на дистрибутивните мрежи низ градовите и со задоволство можам да ве информирам дека во скоро време ќе се обезбедат и средства и модел за изградба.


Екологистите до Макрадули: Водно е заштитено, ќе ви подариме примерок од Законот


Скопје, 6 септември, 2018 - 15:21 (META) 

Не е точно дека Водно не е заштитено подрачје. Водно е заштитено со закон, категорични се екологистите кои застанаа во одбрана на планината, откако пролетва беше најавено започнување на изградбата на делницата 5 од гасоводот Скопје – Тетово – Гостивар.

Одговарајќи на изјавата од понеделникот на заменик-министерот за животна средина и просторно планирање Јани Макрадули, еколошките здруженија велат дека на Водно не можела туку-така да му исчезне заштитата која ја имало уште од неговото прогласување за парк-шума, само затоа што не е направен план за менаџирање со ова природно подрачје, во склад со Законот за заштита на природата од 2004 година.

На јавната дебата во понеделникот во салата на Советот на Град Скопје, во која учествуваа министерот за транспорт и врски Горан Сугарески, директорот на МЕР, Бајрам Реџепи и претставниците на еколошките здруженија кои се обединија во иницијативата „Го сакам Водно“, Макрадули и порача на јавноста дека Водно во моментов не е заштитено подрачје и допрва треба да се заштитува.

Екологистите ги оспоруваат неговите тврдења, тврдејќи дека според еден член од законот, нема потреба од такви процедури.

– Парк-шума Водно е прогласена за заштитено подрачје согласно Законот за заштита на природните реткости од 1973 година. Што значи, продолжува да ја ужива заштитата на заштитено подрачје. Според тоа не стои воопшто аргументацијата на господинот Макрадули дека Водно не е заштитено – вели Андреа Јанков од „Го сакам Водно“.

На заменик-министерот Макрадули со речиси идентична порака му одговараат и од „Фронт 21/42“, велејќи дека се подготвени да му подарат примерок од тој закон.

– На господинот заменик-министер на првата наредна средба ќе му подариме примерок од Законот за заштита на природата, за да се увери и самиот дека според важечките закони на Република Македонија, Водно веќе ужива заштита!  Друга е работата што со години државата свесно толерира градење и уништување на Водно и на други заштитени подрачја со истиот изговор – дека не била завршена нивна ревалоризација и се се врти во истиот маѓепсан круг – вели Александра Бујароска од ова здружение.

Ана Чоловиќ – Лешоска од еколошкото здружение „Еко-свест“ порачува дека во моментот кога ќе се направи таква ревалоризација, ќе мора да престане секоја градежна активност од вакви размери и сите натамошни интервенции од кој било вид ќе мора да бидат во склад со законот за заштита на природата.

foto brit emb foto uk gov Овој текст е подготвен во рамките на проектот „Поддршка на демократските вредности и промени во општеството преку новинарството“ финансистан од Владата на Обединетото Кралство, со поддршка на Британската амбасада во Скопје. Мислењата и ставовите наведени во оваа содржина не ги одразуваат секогаш мислењата и ставовите на Британската амбасада/Британската Влада.

Јавна дебата: Власта за бенефитите, екологистите за штетите од гасоводот на Водно


Скопје, 3 септември, 2018 - 17:20 (META) 

Веројатно не е најдобрата можна траса за изведување на гасоводот, но сепак сметаме дека кога ќе се земат предвид сите околности, сите мерки кои се преземаат за да бидат минимизирани штетите по шумскиот фонд на Водно, како и огромната материјална штета која би била предизвикана од промената на трасата, таа е далеку подобар избор од сите алтернативни траси на гасоводот кон Тетово и Гостивар.

Ова беше дел од заклучокот кој го изнесе директорот на Македонски енергетски ресурси (МЕР), Бајрам Реџепи, на денешната јавна дебата за гасоводот преку Водно што ја организираше скопскиот градоначалник Петре Шилегов и на која, освен Реџепи од името на Владата присуствуваа и министрите за транспорт и врски и за економија, Ѓорѓи Сугарески и Крешник Бектеши и заменик министерот за животна средина Јани Макрадули, како една од засегнатите страни во случајот, како и претставниците на граѓанската иницијатива „Го сакам Водно“, кои протестираат против изградбата на трасата на гасоводот низ парк-шумата Водно, како втора засегната страна.

Владините претставници изнесоа бројни аргументи за тоа дека штетата од изведбата на гасоводот преку сртот на Водно е далеку помала од бенефитите кои ќе ги донесе гасификацијата на полошкиот регион, за кој е наменет гасоводот од овој дел од гасоводната мрежа.

Реџепи истакна дека е прифатено и реализирано барањето на екологистите за корекција на трасата со цел да се намали делот кој оди низ шумски појас и дека е предвидено десеткратно надоместување на исечената шума, која, според зборовите на Реџепи, ќе опфати само 0,07 проценти од сегашната дрвна маса на парк-шумата Водно, но и дека, во случај да дојде до промена на сегашната траса би се нанела штета од 9,7 милиони евра и пролонгирање на изградбата на гасоводот за најмалку 5 години.

Реџепи најави и дека со ЕБРД се веќе договорени условите под кои ќе се финансира гасоводната дистрибутивна мрежа, која сега недостасува за да се користи гасот како енергенс во земјава, што беше и еден од главните контра-аргументи на екологистите откако власта ги критикуваше дека со блокадата на изградбата на гасоводот преку Водно ја попречуваат гасификацијата во Тетово и Гостивар.

Јани Макрадули обелодени дека Водно всушност во моментов воопшто не е заштитено подрачје.

– За жал со промена на Законот за заштита на природата некој што имал обврска да направи ревалоризација за заштитата на Водно тоа не го направил па Министерството за екологија не ја прогласил парк шумата Водно за заштитено подрачје – рече Макрадули, истакнувајќи дека допрва треба да се донесе Законот за заштита на Водно и потоа ќе се донесе одлука кој ќе управува со тоа заштитено подрачје и ќе се дефинираат правила за постапување на тоа заштитено подрачје.

Претставниците на „Го сакам Водно“ повеќепати истакнаа дека се апсолутно за гасификација на земјата, но дека сметаат дека имаат силни аргументи трасата на гасоводот да не оди преку Водно. Според нив, има премногу неправилности во изборот на трасата како и во реализацијата на проектот и затоа граѓаните не треба да остамат рамнодушни пред уништувањето на Водно чиешто зеленило го пречистува воздухот на Скопје и на скопјани.

– Ние бараме ревизија на проектот и предлагаме трасата да оди од Арачиново до Жеден, да се направи од северната страна на Скопје. Или од Скопска Црна Гора да се спушти по земјоделско земјиште или патишта каде заштитеното подрачје е потесно, помало. Нам ни фалат девет метри квадратни повеќе зеленило по жител во Скопје. Според пописот од 2002 година кога Скопје броел 550.000 жители Водно задоволувало 46 отсто од потребите. Сега бројот на жители расте а Водно се намалува – рече Андреја Јанков од „Го сакам Водно“.

Татјана Стојановска од истата иницијатива праша зошто власта дозволува после толку време Водно да нема заштитен статус и зошто сега дозволува изградба на објекти кои утре, откако ќе биде заштитено, нема да биде дозволено да се градат.

– Штетата врз Водно ќе беше далеку поголема доколку не го креневме гласот против и не го донесовме вицепремиерот Анѓушев на лице место. Кој гарантира дека отсега ќе се запазуваат сите стандарди кога на терен видовме дека тие не се почитуваат – прашаа од „Спас за Водно“.

На дебатата присуствуваа и претставници на тетовски еколошки друштва, чиишто изнесени аргументи беа во полза на изградбата на гасоводната траса преку Водно.

– Штетата која сега ја трпи полошкиот регион од загадувањето со еколошки штетни енергенси, како и од дивата сеча на шумите на Шар планина и на Сува гора за огревно дрво, повеќекратно ја надминува штетата која ќе им биде нанесена на шумите на Водно – рече Хисен Џемаили од тетовското еколошко здружение „Скардус“.

Скопскиот градоначалник Шилегов најави продолжение на дијалогот со граѓанските здруженија во рамките на Министерството за животна средина.

foto brit emb foto uk gov Овој текст е подготвен во рамките на проектот „Поддршка на демократските вредности и промени во општеството преку новинарството“ финансистан од Владата на Обединетото Кралство, со поддршка на Британската амбасада во Скопје. Мислењата и ставовите наведени во оваа содржина не ги одразуваат секогаш мислењата и ставовите на Британската амбасада/Британската Влада.

Прекината изградбата на гасоводот на Водно, Шилегов повика на дебата в понеделник


Скопје, 31 август, 2018 - 13:42 (META) 

Градоначалникот на Скопје,Петре Шилегов, денеска информираше дека се прекинати сите градежни активности за изградба на гасоводот на Водно сè до завршување на процесот на дијалог и дебата. Тој ги повика претставниците на надлежните државни органи, како и претставниците на граѓанските здруженија на дебата в понеделник во 13 часот во просториите на Советот на Град Скопје.

– Изградбата на гасоводот на Водно предизвикува загриженост и реакции во јавноста. Сакам да потенцирам дека пред почетокот на градежните активности претходеа интензивни разговори со активистите и со загрижените граѓани и се бараа заеднички алтернативни компромисни решенија. Токму како резултат на овие разговори успеавме да се избориме за намалување на ширината на трасата на гасоводот од 25 на 10 метри и измени на трасата во еден дел од четири километри. Но, и покрај тоа, очигледно е дека во јавноста сè уште постои загриженост за ваквата траса и за изградбата на гасоводот. Јас како градоначалник не можам мирно и немо да го набљудувам овој процес – рече Шилегов.


Трет ден жив ѕид од еко-активисти пред механизацијата на Водно


Скопје, 31 август, 2018 - 11:46 (META) 

Трет ден по ред, под мотото „Не низ Водно“ активистите од екологистичката иницијатива „Го сакам Водно“ и денеска продолжува со одржување на живиот ѕид пред механизацијата на фирмите кои треба да го градат гасоводот на Водно.

Преку Фејсбук-страницата, активистки утринава објавија фотографии од кампот, повикувајќи ги граѓаните да им се придружат.

„Го сакам Водно“ вчера преку соопштение ги образложи причините зошто продолжува да се спротивставува на изградбата на гасоводот и побара мерки против работникот што во средата даде наредби багерите да ги прегазат активистите што протестираа.

 


„Го сакам Водно“ побара дисциплинска постапка против насилникот и јавна дебата


Скопје, 30 август, 2018 - 14:36 (META) 

Иницијативата „Го сакам Водно“ по вчерашниот инцидент на Водно, кога еден од луѓето што работеа на изградбата на гасоводот даде наредба на багерите да ги прегазат активистите, побара виновникот да биде отстранет и веднаш да се почне дисциплинска постапка против него. Истовремено, екологистите побараа дебата со директорот на МЕР, градоначалникот на Скопје и заменик министерот на Министерство за животна средина и просторно планирање (МЖСПП).

„Бараме ревизија на проектот, бараме постапување на институциите по доставените претставки, нивна меѓусебна соработка, а не изземање од надлежности и неделување,
бараме одговорноста за сите наведени пропусти и прекршени законски обврски, казнивост. Нулта толеранција за изигрување на законот и нерегуларно спроведување на целата постапка“ се вели во соопштението.

Екологистите обвинуваат дека на изградбата на гасоводот на Водно се работи речиси „на диво“.

„Се работи без почитување на цела листа на прописи, законски обврски – нема ознаки, нема обележан заштитен појас околу градежните работи, нема знак за предупредување дека работи тешка машинерија, нема документација на терен, работниците се без адекватна униформа и заштитна облека, нема мобилни тоалети, нема соодветен надзор, нема полнење бензин на строго определени места кои се водонепропусни, а се отстрануваат грмушки во период кога не смеат, пред 30 септември“, се вели во дописот од „Го сакам Водно“.

Активистите велат дека не се врши строго и прецизно набљудување од страна на МЖСПП.

„Сите неправилности кои ние ги предочивме, се игнорираат како да не постојат. Ниту еден
механизам кој институциите, државата, ги има на располагање,  не е покренат. Проектот наместо да претрпи сериозна ревизија, се тера на сила, на диво. Кога институциите остануваат глуви, што преостанува освен жив штит?“, велат активистите.


МЕР: Работникот што почнал расправија со активистите ја пречекорил границата


Скопје, 29 август, 2018 - 15:41 (META) 

Државното претпријатие Македонски енергетски ресурси се огласи со реакција на денешниот инцидент на Водно, порачувајќи дека работникот што почнал расправија со активистите не постапил согласно политиката на фирмата и може да биде ставен на дисциплинска постапка.

„Денеска продолжија градежните активности за гасификација на Република Македонија, на трасата преку Водно. Активностите се на потег на кој не е предвидена измена на траса, потегот за кој е добиено одобрението за градба и на кој нема дрвна маса. Се работи во согласост со новите мерки и мерките дефинирани во студијата за животна средина. Откако беа почнати активностите, се појавиле неколку граѓани кои на мирен начин застанале во близина на механизацијата. Градежните машини веднаш ги запреле активностите, после што еден од работниците започнал вербална расправа со активистите. Напоменуваме дека вербалниот инцидент кој го предизвикал работникот не е политика на однесување на МЕР и се коси со протоколите за работа. Варбалниот инцидент силно го осудуваме, а однесувањето на работникот ќе биде предмет на проверка и потенцијална дисциплинска постапка“, се вели во соопштението.


„Го сакам Водно“: Загадувањето во Скопје нема да се намали со изградба на гасовод низ Водно


Скопје, 23 август, 2018 - 15:08 (META) 

На Водно и со сменетата траса ќе се исече шума со површина колку целиот булевар Партизански Одреди, а широчината на трасата и сега на места е и по 46 метри, не 10 метри. Исто така, наспроти тврдењата на Владата, трасата потоа не ќе може да се пошуми. Ние сме за гасовод, ама не на Водно, порачаа од иницијативата „Го сакам Водно“ денеска на прес-конференцијата, реагирајќи на вчера изнесените тврдења на Владата за сменетата траса на гасоводот.

– Загадувањето во Скопје нема да се намали со изградба на овој гасовод низ Водно. Ни ПМ честици, ни азот диоксид, ни сулфур диоксид! Ширење на невистина, крајна и безобѕирна манипулација со јавноста е ваквото тврдење. Овој гасовод не е наменет за Скопје, всушност Скопје има гасовод веќе 20 години – но нема развиена дистрибутивна мрежа – порачаа екологистите.

Тие велат дека трасата не смее да се пошумува, мора да остане гола за пристап на возила и да не се оштети гасоводот од корењата на дрвјата.

Според „Го сакам Водно“, не е точно и дека Скопје не сака да овозможи гасификација на Тетово, Гостивар и Кичево – затоа што овој проект е далеку од реализација.

– Доведување на јавноста во заблуда е да се каже дека уште оваа есен граѓаните на Скопје или кој било во земјава ќе ги почувствува придобивките на гасификацијата од изградбата на овој проект! Доведување на гас до секое семејство ќе почека долги години, сигурно повеќе од пет. До тогаш дрва ќе се горат и во Скопје и во Тетово и во Гостивар и во Кичево! Дистрибутивна мрежа нема во ниту еден од градовите долж трасата. Срамно е да се каже дека Скопје стои на патот на гасификација на другите градови – рекоа екологистите.

За пофалбите од власта дека ќе се дадат 700.000 евра за пошумување на Водно, велат дека станува збор за законска обврска, а сумата е речиси еднаква на таа што се дава за хортикултурно одржување и уредување на речиси двојно помала површина отколку просторот на којшто ќе се работи на Водно.

– Немојте да кажете дека грмушки, ружи и темјаншки чинат повеќе од 40-65 години стари дрвја – беше пораката до власта.

„Го сакам Водно“ го нападна и Министерството за животна средина и просторно планирање, велејќи дека оди против своите претходни одлуки.

– МЖСПП во минатото не го прифатиле решението трасата да оди по сртот на Водно, сега го бранат истото. Зборуваме за стручност или политички одлуки? Не е вистина дека строго и прецизно ја мониторира имплементацијата на изградбата на гасоводот – голем дел од мерките за намалување на негативните влијанија врз животната средина не се спровеле до сега, а градењето низ Водно започна уште во март, а останатиот дел на трасата минатата година. Нема обезбедена супервизија од експерт еколог или биолог – велат екологистите.

Тие обвинуваат и дека е вршено сечење и корнење на  грмушки и дрвја во периодот кога не смеело, односно додека се гнездат птиците (од 1 март до 30 септември) и дека не е извршен мониторинг на клучни природни живеалишта и биодиверзитетот по трасата на движење на гасоводот.


ВМРО-ДПМНЕ: СДСМ, Владата и Шилегов лажат-сушат


Скопје, 22 август, 2018 - 12:34 (META) 

Никаде во светот прво не се сече шума, а дури потоа да се бара решение. СДСМ, Шилегов и владата не само што лажат туку и сушат, реагираше ВМРО-ДПМНЕ на денешната прес-конференција во Владата на која скопскиот градоначалник Петре Шилегов, министерот за транспорт и врски Горан Сугарески, заменик-министерот за животна средина Јани Макрадули и директорот на АД Македонски енергетски ресурси (МЕР), Бајрам Реџепи, објавија дека продолжува изградбата на гасоводот на Водно по нова и стеснета траса.

Опозициската партија вели дека напразно се фалбите за заштита на шумата, кога таа е веќе исечена.

„Откако ја исекоа шумата на Водно за поставување на трасата на гасоводот се решија дека треба да ја спасуваат. СДСМ ветуваше живот и воздух за сите, а сега гледаме како се сечат повеќедецениските дрва. Штетата е направена. Ништо и никој нема да може да ги врати дрвата што ги исекоа. Ако се неспособни и ако не знаат како треба да работи и да се справат со проблемите треба да си поднесат оставка“, се вели во реакцијата од ВМРО-ДПМНЕ.