Реџепи: До 2025 година поголемиот дел од градовите и општините ќе бидат гасифицирани


Скопје, 31 декември, 2018 - 8:00 (META) 

Владата најавува засилени градежни активности за изградбата на гасоводот во 2019 година и за оваа намена во буџетот се предвидени 1 милијарда и 557 милиони денари. Директорот на Македонски енерегетски ресурси (МЕР), Бајрам Реџепи во интервју за „Мета“ вели дека нивниот преносен систем ќе биде оперативен за брзо време. Мерно- регулационата станица (ГМРС) Штип ќе може да опслужува во текот на вториот квартал од 2019. ГМРС Неготино во текот на третиот квартал следната година, кога се планира приклучување на ТИР-зоните во Штип, во тој период. Сите други станици, во Пелагониски и Полошки регион ќе бидат оперативни до средината на 2020 година.

Владата го задолжи Министерството за економија да формира работна група која ќе одлучува за најефикасниот модел за развој на системи за дистрибуција на природниот гас во Македонија. Од какво значење е формирањето на овие дистрибутивни центри за забрзување на гасификацијата?

– Проектот за гасификација е приоритет во работата на оваа влада.Оваа работна група ќе треба да предложи до владата модел за развојот на дистрибутивната мрежа на природен гас во државата, со јасно дефинирани цели и очекувања.Односно, да овозможи приклучок до секој краен корисник во целата територија на државата и да се реализира брза и ефикасна гасификација, посебно во регионите каде што нивото на загаденост на воздухот е загрижувачко. За да се постигнат овие цели, ќе треба да обезбедиме евтин приклучок до секое семејство и секој краен корисник, евтина цена по метар кубен гас и да им помогнеме на домаќинствата во прилагодување на внатрешните инсталации преку субвенции или евтини заеми.

Kолку вакви дистрибутивни центри се потребни, за секоја општина или би функционирале на ниво на региони?

– Сегашниот Закон за енергетика, овозможува либерален пазар за дистрибутивните оператори на природен гас. Според физибилити студијата, вкупната инвестиција е проценета да биде околу 250 милиони евра. Гледајќи ја финансиската моќ на нашите општини, расположливиот стручен кадар и фактот дека секоја општина посебно ќе треба да гради диспечерски центар, скада систем за надзор, билинг систем, одржување и ред други фиксни трошоци, јас лично апсолутно сум убеден дека тоа нема да функционира и нема да се постигнат очекуваните цели. Гледајќи ги најдобрите европски пракси и причините зошто бил неуспешен повикот во 2013 за воспоставување на јавно-приватно партнерство (тогаш биле поделени три концесиски подрачја: Источен, Западен и Скопски регион), мислам дека треба да се воспостави јавно-приватно партнерство со сериозен приватен партнер. Тој треба да има големо искуство, да биде со голема финансиска моќ, кој ќе има обврска да ја развие мрежата во целата територија на државата и да има обврска во рок од 3-4 години да овозможи евтин приклучок на секој заинтересиран краен корисник, како во најзагадените региони, така и во сите други градови во државата. Во исто време, не нарушувајќи го либералниот пазар, секој друг оператор кој ќе сака да гради и да оперира со дистрибутивна мрежа во одредени региони или градови, тоа да му биде овозможено во рамките на законот.

Изградбата на кракот Скопје – Гостивар е важен и за Интерконекцискиот вод со Грција и за него веќе имате аплицирано за грант заедно со Грција, односно грчкиот оператор. Кои ќе бидат придобивките за државата и што конкретно овој вод значи за нас?

– Изградбата на интерконекцискиот вод со Грција е наш врвен приоритет, заради диверсификација и конкурентност на нашите извори на снабдување со природен гас, тоа е наша надлежност. Да појасниме дека со новиот Закон за енергетика и обврската за раздвојување на дејностите, оперирањето со дистрибутивните мрежи не е во наша надлежност. Но, за нас е многу битно за да не дојдеме во ситуација после вложување на големи средства, да нема кој да ги користи нашите услуги и нашата инфраструктура за пренос на природен гас. Јас сум оптимист дека до крајот на наредна година ние ќе завршиме со проектирање на Интерконекцискиот вод, потребните студии итн, и да стигнеме до одобрение за градење. Секако ќе се затвори финансиската контрукција за да може да се објави повик за да се ангажираат оператори за градба и реално е да се очекува до крајот на 2022 овој интерконектор да биде оперативен.

За трасата Скопје – Гостивар најавивте дека треба да биде завршена кон крајот на следната или почетокот на 2020 година, бидејќи се појавила потреба од голем број на измени при градбата. На какви измени конкретно мислите?

– Точно е дека на овој лот се појави потреба од неколку нужни измени на трасата, од различна природа. Една од нив е измената на Водно, заради барањето на граѓанските здруженија. Другите се заради тоа што откако е дефинирана трасата се додека се почнало со реализација на терен повеќе општини носеле детални урбанистички планови, дале одобренија за градба, легализации, концесии на самата траса итн.

Кога се очекуваат конкретни резултати од сите овие активности со гасификацијата кои ги најавувате дека ќе завршат следната и кон средината на 2020 година? Односно кога домаќинствата и компаниите ќе бидат гасифицирани?

– Нашиот преносен систем ќе биде оперативен брзо. ГМРС Штип (мерно-регулациона станица) ќе може да опслужува во текот на вториот квартал 2019 година. ГМРС Неготино во текот на третиот квартал 2019 година. Планираме да го приклучиме ТИРЗ Штип, во тој период. Сите други станици, во Пелагониски и Полошки регион ќе бидат оперативни до средината на 2020 година. Многу е важно, да имаме сериозни оператори за дистрибуција, за дотогаш да завршат со проектирање и да обезбедат одобренија за градба, за да можат да почнат со градежни активности. Јас сум оптимист дека во текот на 2020 година, ќе почнат градежните активности во поголемиот дел од градовите и општините, и до 2025 да бидат целосно покриени. Освен огромните економските бенефити, целосно ќе биде решен и проблемот со загадувањето на воздухот.

Цената за приклучување на гас во Општина Куманово изнесуваше 800 евра, но со субвенции од општината, цената за приклучок по домаќинство е намалена на 650 евра. Тоа за просечно семејство е скапо, како ќе се изнајдат начини, гасот да е лесно достапен до граѓаните?

Тарифата за пренос кај дистрибутивните оператори ја одредува Регулаторната комисија, а тарифата за приклучок ќе зависи од пазарните услови. Само за споредба, просечната цена за приклучок во земјите од регионот е десет пати поевтина отколку во Струмица и Куманово. Според методологијата за пресметување на оваа цена, зголемувањето на количините или бројот на корисници, ќе влијае за драстично намалување на цената.

Во буџетот се предвидени средства за експропријација, дали тоа значи дека се надминати сите проблеми од овој вид и кои би биле главните пречки поради кои роковите би биле пробиени?

-Голема грешка била направена, кога во 2017 не биле издвоени средства за експропријација. Затоа во 2018 имавме и во 2019 имаме предвидени средства за оваа намена. Јас затекнав ситуација со ниту еден решен предмет за експропријација, а имаме неколку илјади такви. Јас сум задоволен од текот на решавањето во изминативе шест-седум месеци. Во Лот 2 ( Неготино – Битола) е решена над 80 проценти од експоријацијата и очекувам дека брзо ќе биде решена целосно. Во Лот 5 (Скопје -Гостивар) заради поголемиот број на предмети, поради измените и застојот во неколку други институции, имаме побавно темпо на решавање. Поголемиот дел од пречките се веќе надминати и очекувам дека и во овој лот брзо ќе ја завршиме целата експропријација.

Според активистите за заштита на Водно, таму се работи без правосилно решение за измени во тек на градба, затоа што новопроектираната траса се уште е одобрена. По која траса работите, по новата или по старата?

– Го повторувавме ова неколку пати. Одобрение за градба има за целиот проект. Измената на Водно е од 20 до 24 километар. Ние таму не работиме се додека нема да имаме ново одобрение за таа измена, а тоа ќе биде брзо. На Водно ја отворивме трасата од 24 до 27 километар, и планот беше да се отвори и од 17 до 19 километар, но за да стигнат градежните машини до 19 километар на терен се јави потреба од порамнување на неколку места. Машините се движеле по новата траса каде што чекаме одобрение, а не по старата каде што имаме одобрение по основен проект. Тоа го планиравме од многу практична причина, за да нема порамнување на старата траса која што нема да се користи. Тука беше недоразбирањето со активистите, што за мене е ирационално, но сепак одлучивме да го чекаме одобрението за измената. Само да повторам, Водно не само што нема да изгуби од овој проект туку ќе има големи придобивки.

Кој контролира како се работи, има ли надзор врз работата на Водно?

-Секако дека има. Надзорот е присутен во целиот тек на градбата и во секое градилиште.


Гасоводот на Водно и натаму се гради надвор од прописите


Скопје, 3 декември, 2018 - 16:32 (META) 

Досега не е пристигнато барање од Јавното претпријатие „Македонски eнергетски ресурси“ (МЕР) до Министерството за транспорт и врски за измена во тек на градба за делот од гасоводот преку парк-шумата Водно, изјави за „Мета“ Кире Коцевски, портпаролот на ова министерство во одговор на прашањето дали МЕР, како инвеститор, има добиено дозвола за работа на изменетата траса на гасоводот, на делницата ЛОТ5.

Спред тоа, во моментов багерите кои деновиве работат во густо пошумениот дел на Водно, поблиску до Милениумскиот крст,  извршуваат градежни активности без правосилно решение за измени на дел од трасата.

Новопроектираната траса, која во преговорите со активистите на „Го сакам Водно“, ја ветија МЕР и Градот Скопје, со цел намалување на штетите што ќе ги претрпи шумата на Водно од градењето на гасоводот, се уште ги нема потребните одобренија за да стане легална.

„Се работи на диво, без дозвола, без надзор, без обележаност, целосно нестручно, за што како резултат имаме и неколку бутнати борови кои не се ниту блиску до трасата“, реагираат од „Го сакам Водно“ на нивната фејсбук – страница.

Тие прашуваат каде е „строгиот надзор“ кој беше ветен од градоначалникот на Скопје, Петре Шилегов и од МЕР како предуслов изградбата на гасоводот да продолжи.

Тие прашуваат и каде се инспекциите да излезат на терен за да утврдат дали гасоводот на Водно се гради според важечките законски прописи или тие отворено се забошотуваат.

„До кога граѓаните треба да бидат единствен коректор на самоволието?“, прашуваат екологистите.


МЕР: Изградбата на гасоводот е според сите стандарди на квалитет и безбедност


Скопје, 29 октомври, 2018 - 16:20 (META) 

Претпријатието „Македонски енергетски ресурси“ реагира на соопштението на граѓанската иницијатива „Го сакам Водно” и информира дека изградбата на гасоводот е според сите стандарди на квалитет и на безбедност.

Од таму додаваат дека, изградбата на гасоводот продолжува според основниот проект кој што има правосилно одобрение за градба и сите други потребни дозволи дефинирани со позитивните законски прописи.

„Ако има сомнеж или индикации за каква било повреда на некои законски постапки и прописи, ги повикуваме сите што евентуално поседуваат такви информации да се обратат до надлежните институции во рамки на правниот систем на државата“, се вели во соопштението.

Од МЕР потсетуваат дека Владата, тие како претпријатие и Град Скопје прифатиле најголем дел од барањата и сугестиите на активистите како што се намалување и стеснување на работниот појас, измена на трасата од 20 километри до 24 километри со цел избегнување на сечење на дел од шумата.

„Направен е проект за дополнителни мерки за ерозија, програма за рекултивација на која што веќе работи работната група, носење на закони за Водно, Матка и Гази Баба, за кои веќе се работи во надлежните институции, финансирање на неколку еколошки проекти, за кои има одлука на влада – и ред други технички барања и сугестии. Но, мора да се напомене дека барањето за изнаоѓање алтернативна траса во оваа фаза на реализација на проектот не е возможна, од причини што неколку пати беа образложени“, додаваат од МЕР.


Екологистите бараат итно прекинување на изградбата на гасоводот низ Водно


Скопје, 29 октомври, 2018 - 12:30 (META) 

Багерите кои го градат гасоводот преку парк-шумата Водно се стигнати до терен кој е толку стрмен и непрооден, што натамошните градежни активности таму стануваат апсурден градежен потфат и претставуваат загрозување на животот на работниците на терен, велат од еколошките граѓански здруженија собрани околу иницијативата „Го сакам Водно“.

„После месечна борба на претставки и жалби, стигнавме до амбис. Буквален и фигуративен“, се вели во соопштението до јавноста.

Тие предупредуваат дека на спустот кон селото Шишево багерите се на ивица од провалија, дека се работи на исклучително тежок терен на кој некои делници се со наклони од 63 до71 проценти искосеност на теренот и прашуваат дали работниците треба да ги носат багерите во амбис, зошто така оди трасата на гасоводот.

„Потребни ли се жртви да паднат за да запре ова лудило – по секоја цена гасовод низ Водно. Дури тогаш ли Владата, институциите, инспекторатите ќе се повикуваат на цела низа недоследности, пропусти и го стопираат градењето?“, прашуваат од „Го сакам Водно“.

Тие потсетуваат дека досега имаат испратено околу 30 претставки, жалби во кои има укажано за пропусти и недозволени состојби до надлежните институции, но дека ниту една досега не реагирала на бројните недоследности и незаконски постапки при изградбата на гасоводот во заштитената зона на парк-шумата Водно.

Активистите од „Го сакам Водно“ тврдат дека инвеститорот, јавното претпријатие „Македонски енергетски ресурси“ и изведувачот на градежните работи комплетно ги игнорирааат мерките за заштита од ерозија при градењето на гасоводот преку Водно од Планот за заштита од ерозија, неопходни во случај на наклони на трасата поголеми од 20 проценти, за кои, на барање токму на еколошките активисти било препорачано да се применуваат низ целата делница преку парк-шумата Водно.

Директорот на МЕР, Бајрам Реџепи за „Мета“ изјави дека се работи според основниот проект, кој поминал ревизија и има одобрение за градба.

„Мерките за заштита од ерозија предвидени со Планот за заштита од ерозија, ќе бидат превземени во склад со Планот тогаш кога ќе биде завршена изградбата на гасоводната делница преку Водно“, додаде Реџепи.

Екологистите изразуваат отворено сомневање дека надлежните инспекции воопшто ќе реагираат на ваквото драстично кршење на прописите и стандардите на градење.

Од „Го сакам Водно“ повикуваат итно да се прекине со сите понатамошни дејствија и да се изврши ревизија на проектот и прашуваат што е со ветениот закон за заштита на Водно, за чие изготвување Владата му даде рок на Министерството за животна средина до крајот на септември, кога ќе се остварат ветувањата на премиерот Зоран Заев и на вицепремиерот за економски прашања Кочо Анѓушев за десеткратно пошумување за сметка на вегетацијата која се уништува со изградбата на гасоводната делница преку Водно, како и што е со ветувањето на скопскиот градоначалник Петре Шилегов за изработка на проект за зелени појаси на Лепенец и Серава.


Релизацијата на изградбата на гасоводот е минимална, потрошено само 8,6 отсто од планираното


Скопје, 19 октомври, 2018 - 11:52 (META) 

Реализацијата на изградбата на гасоводот досега е минимална и изнесува едвај 8,6 проценти од планираните 2 милијарди денари за годинава. Поради слабата искористеност на средствата, се поставува прашањето дали ќе се реализираат најавените проекти, како што е интерконекциската врска со Грција и Бугарија, но и поврзувањето на ТЕЦ Неготино со магистралниот гасовод.

Директорот на Македонски енергетски ресурси Бајрам Реџепи за „Мета“ вели дека интерконекцијата со Грција е врвен приоритет, заради диверсификација на снабдувањето и заради стабилност на пазарот на гас.

„Интензивно работевме на завршување на физибилити студијата кое што го правиме заедно со Операторот на националниот систем за пренос на природен гас на Грција (ДЕСФА), и тоа е при крај. Имавме неколку взаемни посети состаноци и секојдневна комуникација. Заедно со Министерство за финансии правиме финансиска конструкција и многу сум задоволен од заинтересираноста на финансиските институции за реализација на овој проект. Со Бугарија освен постоечкиот интерконекциски вод во Крива Паланка е планирано и втора интерконекција во Струмица, но тоа е во средорочен план да се изгради“, вели Реџепи за „Мета“.

Во однос на поврзувањето на ТЕЦ Неготино со гасоводот, Реџепи вели дека во нивниот преносен систем е планирано да се изгради вод до ТЕЦ Неготино и посебна мерна станица.

„Но, моментално ТЕЦ Неготино нема котел што работи на гас. Ако оние ќе се одлучат да изградат когенеративен котел, а заради нивото на искористеност, тоа зависи од цената на струјата, ние секако дека ќе обезбедиме приклучок“, додава Реџепи.


Се гради гасоводот преку Водно, екологистите немоќни да ги спречат багерите


Скопје, 15 октомври, 2018 - 20:04 (META) 

Багерите ангажирани од Македонски енергетски ресурси (МЕР) денеска интензивно работеа на пробивање на трасата на гасоводот преку Водно на потегот над селото Шишево, информираат активистите на „Го сакам Водно“, кои беа присутни на лице место.

– Соочени сме со очигледно самоволно донесена одлука на власта да ја продолжи изградбата на гасоводот преку Водно по секоја цена – велат од „Го сакам Водно“.

И покрај нивните напори, тие велат дека се малубројни и немоќни да ја спречат работата на багерите, кои, според нивни информации, се уште работат без да бидат обезбедени потребните дозволи за работа во заштитеното подрачје на Водно, во услови на истечена дозвола за сеча на дрвјата, како и без видливо обезбедено и обележено градилиште, што се задолжителни за сите локации на градежни зафати.

Денес на лице место биле и претставници на „Паркови и зеленило“, но тие само ја мониторирале состојбата на терен и не презеле ништо.

Од „Го сакам Водно“, исто така велат дека нивните обиди да дознаат како надлежните инспекции во овој случај си ги извршуваат своите обврски, завршиле со префрлање на одговорноста од една на друга инспекција и без конкретен одговор.

Повеќе од еден месец откако градоначалникот на град Скопје, Петре Шилегов издаде времена забрана за работите околу изградбата на гасоводната делница 5 Скопје – Тетово – Гостивар преку падините на Водно, со цел да се преиспита оправданоста на гасоводната траса преку заштитеното подрачје на парк шумата Водно, МЕР продолжија со изградба на гасоводот на 11 Октомври, на празник и во неработен ден. Притоа ја известија јавноста дека бил постигнат договор со екологистите околу трасата, нешто што од групацијата „Го сакам Водно“ решително го демантираа.


За гасоводот до Штип, Ставрески и Јанакиески ја честеле Русија, а Македонија ја платила сметката


Скопје, 15 октомври, 2018 - 12:58 (META) 

Со договорот со Русија за покривање на нејзиниот дел од долгот на поранешниот СССР преку изградба на гасоводот од Клечовце до Штип, поранешниот министер за финансии Зоран Ставрески и поранешниот министер за транспорт и врски Миле Јанакиески, фактички на руската страна и го простиле целиот долг, а Македонија сама си го платила гасоводот.

Таков е заклучокот на Специјалното јавно обвинителство (СЈО) во образложението за новата истрага „Подарок“, што заедно со пет други, ја отвори минатата седмица.

Според тоа, Ставрески, Јанакиески, заедно со Крсте Миладинов, директор на Македонски енергетски ресурси (МЕР) АД Скопје во периодот јануари 2012 – јули 2014 година, за руската компанија ОАД Стројтрансгас од Москва прибавиле противправна имотна корист во износ две милијарди и девет милиони денари, односно близу 33 милиони евра. За толку пари е оштетен државниот буџет, велат од СЈО.

Ставрески и Јанакиески, како претставници на тогашната македонска влада на 19 јуни 2010 година склучиле договор за враќање на рускиот долг кон Македонија во износ од 60,56 милиони американски долари преку испорака на стоки, услуги и извршување работи. Тогаш се договориле целиот долг да се вклучи во изградба на магистралниот гасовод „Клечовце – Блок станица 5“ за вкупна сума од 75,7 милиони американски долари, или 55,64 милиони евра, при што Русија во изградбата да учествува со 80 отсто, а Македонија со 20 отсто.

Според СЈО, екс-министрите и тоа го направиле иако од претходно знаеле за физибилити студија со која изградба на гасоводот Клечовце – Штип, кој е 36 километри подолг од погоренаведениот би чинела 30 до 35 милиони евра.

Знаејќи го тоа, сепак го склучиле договорот за рускиот долг, со што руската компанија поради неповолниот договор профитирала за 32, 66 милиони евра, а фактички Македонија сама го платила гасоводот, велат од СЈО.


Реџепи: Гасоводот преку Водно ќе се гради, се чекаат потребните дозволи


Скопје, 9 октомври, 2018 - 17:05 (META) 

Ќе продолжи ли изградбата на гасоводната траса преку Водно или ќе запре поради прекројувањето на државната каса со кое ќе има кратење на значителен дел од средствата наменети за инфраструктурни проекти, како што е гасификацијата?

Според Македонски енергетски ресурси (МЕР), претпријатие кое го реализира проектот на гасификација и кој ја гради и трасата на гасоводната делница 5, Скопје – Тетово – Гостивар, работите околу изградбата на другите делови од трасата се одвиваат непречено.

– Очекуваме да заврши процедурата во Министерството за транспорт и врски околу дозволата за изменетата траса преку Водно и кога ќе ја добиеме, работите на изградбата на гасоводот на тој потег треба да продолжат“, вели директорот на МЕР, Бајрам Реџепи.

Според него, изградбата на оваа гасоводна делница не е засегната од ребалансот на буџетот бидејќи парите за овој проект се одамна обезбедени.

Вчера, министерот за транспорт и врски, Горан Сугарески  рече дека, наспроти оптимизмот дека изградбата на гасоводот на Водно ќе се деблокира и дека парите ќе се искористат до крајот на годинава, тоа немало да се случи.


Се доцни со законот за Водно, УНДП ќе помага со експертиза


Скопје, 8 октомври, 2018 - 17:26 (META) 

УНДП – Агенцијата за развој на Обединетитие нации – ќе учествува со своја експертиза во изготвувањето на закон за заштита на парк-шумата Водно, со што треба да се заокружи заштитата на ова подрачје од витално значење за град Скопје.

Тие, исто така, на своја иницијатива, ќе учествуваат во подготвувањето на закон за заштита на пределот на Матка.

– Ангажманот на УНДП е во рамките на проектот “Подобрување на управувањето со заштитените подрачја” кој има за цел да ја подобри заштитата на природата и да промовира одржливо користење на природните ресурси – вели Методија Саздов, проектен менаџер во канцеларијата на УНДП во одделот за енергија, животна средина и менаџирање на ризици од природни катастрофи.

Проектот за град Скопје се однесува на подобрување на управувањето со заштитените подрачја Матка и Водно како и одржливо користење на природните ресурси. Со оглед на важноста и ранливоста на заштитените подрачја Матка и Водно за градот Скопје, УНДП го иницираше донесувањето на Законот за прогласување на Матка за споменик на природата. Во поглед на тоа каков режим и степен на заштита се предвидува да добијат Водно и Матка, според Саздов, УНДП нема да одлучува, која категорија на заштита ќе биде избрана и кои ќе бидат границите на заштитеното подрачје, туку тоа треба да произлезе од студиите. Поради ова, Законот за Водно, најавен од Владата уште кон крајот на август, и ветен од страна на скопскиот градоначалник Петре Шилегов, нема да може да биде изготвен во предвидениот рок, кој измина уште минатиот месец.

И, додека за Матка веќе постои изготвен предлог-закон, кој треба да се доработи, за Водно процедурата ќе трае подолго.

– Ревизијата и подготовката на Студијата за валоризација на Матка и Водно како заштитено подрачје, нема да биде завршена за еден месец туку еден разумен рок во кој ќе може да се направи мониторинг на живеалиштата на флората и на фауната на Матка и Водно. Студијата за валоризација предвидува дополнување на инвентарот на природни живеалишта од национално и ЕУ значење, изработка на карти за дистрибуција на живеалишта, утврдување на предлог граници на зоните на заштита, социо-економска анализа, како и анализа на планирани проекти и усогласување на границите на парк шума Водно со планската документација. Дополнително УНДП ќе го поддржи самиот процес на донесување на Законот за Водно и ќе поддржи воспоставување на тело за управување на заштитеното подрачје – вели Саздов.

Донесувањето на законот за заштита на Водно беше една од мерките предложени од Владата откако се крена прашина околу изградбата на гасовод преку планината Водно, а еколошките здруженија организираа жив штит за да ги запрат багерите на инвеститорот на проектот – Македонски енергетски ресурси (МЕР). Иако привремено стопиран, овој контроверзен проект веќе доби зелено светло од скопскиот градоначалник Шилегов и извесно е дека, откако формално ќе бидат издадени потребните дозволи, багерите ќе продолжат со изградба на трасата.


Сугарески: Средствата за гасоводот што нема да се искористат, ќе се пренаменат


Скопје, 8 октомври, 2018 - 15:03 (META) 

Средствата планирани за изградба на гасоводот, што нема да бидат искористени до крајот на годината, ќе се пренаменат за реализација на други проекти, најави министерот за транспорт и врски Горан Сугарески на денешното одбележување на  69-годишнината од основањето на Градежниот факултет.

Планираните средства во буџетот за оваа намена изнесуваа две милијарди денари.

– Се што сметаме дека може да се потроши до крајот на годината ќе остане во буџетот и ќе се трошат тие пари во реализација на капиталните инвестиции. Се останато, ако се процени дека  дел од тие средства може да се потрошат во други ставки, ќе може да се префрлат, изјави Сугарески, одговарајќи на новинарско прашање дали парите наменети за гасоводот ќе се пренаменат бидејќи има застој во изградбата.