Европската комисија во март ќе одлучува за земјите-членки со загаден воздух


Брисел, 13 февруари, 2018 - 10:43 (META) 

Европската комисија соопшти дека, од средината на март ќе се разгледува случајот со девет земји во кои состојбата со загадениот воздух се смета за најлоша во Европска Унија, и на кои, им се заканува судска постапка, пренесуваат светските медиуми.

Комисијата која е задолжена да обезбеди докази дека земјите-членки ги почитуваат заедничките правила за емисија на штетните гасови, им даде последна шанса на Германија, Шанија, Франција, Унгарија, Италија, Чешка, Романија, Велика Британија и Словачка на кои во петокот им истече рокот за доставување на дополнителни информации.

Тие земји, според извештаите на Европска комисија, редовно ја надминуваат границата на емисија на гасови, кои биле поставени со цел да се заштити здравјето на Европјаните од ПМ-10 честичките и азот диоксид.

И покрај постојаните предупредувања од Комисијата, наведените земји не ги ограничиле емисиите во согласност со прописите.

Комисијата одлучила против нив да покрене последна фаза постапка пред Европскиот суд на правдата, освен ако земјите не достават дополнителни ефикасни мерки.

Загадениот воздух се смета за причинител на повеќе од 400.000 предвремено починати во ЕУ. Во оваа статистика не влегуваат Европјаните кои добиле респираторни и кардиоваскуларни болести.


Запалена фабрика за сулфур во близина на Мосул, стотици лица затруени


Мосул, 22 октомври, 2016 - 18:34 (META) 

Стотици луѓе побарале медицинска помош поради проблеми со дишењето од отровните испарувања што почнале да се шират од фабрика за сулфур во близина на Мосул, која најверојанто била запалена од милитантите на Исламска држава, јавуваат светските медиуми.

Засега нема пријавено смртни случаи поврзани со инцидентот, соопштиле од болницата во местото Каијари, близу Мосул.

Според војската на САД, фабриката за сулфур била намерно запалена неделава од милитантите на ИД, кои биле потиснати од областа од страна на ирачките сили. На американските војници веднаш им биле поделени гас-маски и друга заштитна опрема.

Пожар во оваа фабрика имало и во 2003 година, кој траел три недели. Загадувањето на воздухот во Мосул тогаш било огромно, а целата вегетација што била на отворено изумрела од отровните гасови.


Бан Ки-мун ги повика светските лидери да го потпишат договорот за климата на 22 април


Њујорк, 18 февруари, 2016 - 10:01 (META) 

Генералниот секретар на Обединетите нации (ОН), Бан Ки-мун, ги повика светските лидери да го потпишат договорот за климатски промени, постигнат во Париз во декември, на церемонија во седиштето на ОН на 22 април.

Ки-мун изјави дека таа церемонија ќе биде клучен чекор кон ратификација на договорот.

Договорот за климата, за да стапи на сила, треба да го ратификуваат 55 земји кои сочинуваат најмалку 55 отсто од светската емисија на гасови со ефект на стаклена градина.

Тој нагласи дека присуството на сите лидери ќе го задржи вниманието на светот на прашањата повзрани со климатските промени.

Во Париз беше постигнат договор кој предвидува зголемувањето на температурата во светот до крајот на векот да не надмине два Целзиусови степени, со можност за ограничување на порастот и на еден и пол степен.


„Фолксваген“ издвојува 6,5 милијарди евра за сервис на возила


Берлин, 22 септември, 2015 - 15:30 (META) 

Германскиот произведувач на автомобили „Фолксваген“ денеска соопшти дека ќе одвои 6,5 милијарди евра за сервис и за други трошоци поврзани со скандалот за мерење на издувните гасови во САД.

„Фолксваген“ вчера изгуби околу 15 милијарди долари од пазарната вредност откако акциите паднаа за 17 отсто по признавањето дека ги лажирале мерењата на емисиите на гас во САД за околу 500.000 дизел-возила. Денеска акциите паднаа за уште 18 отсто, на 108,45 евра, што е нивна најниска цена во последните четири години.

Бидејќи најавени се истраги и во други земји, „Фолксваген“ денеска соопшти дека околу 11 милиони возила во светот го имале спорниот софтвер од чие вградување произлезе скандалот во САД.


За 20 отсто падна вредноста на акциите на „Фолксваген“


Волфсбург, 21 септември, 2015 - 17:05 (META) 

Акциите на „Фолксваген“ утринава изгубија повеќе од 20 отсто од вредноста, што е најголем еднодневен пад во нивната историја, откако американската Агенција за заштита на средината (ЕПА) ја обвини компанијата за маскирање и за лажирање на податоците за емисија на штетни гасови.

Германија најави истрага за да се утврди дали практиката е користена и во ЕУ.

ЕПА во петокот соопшти дека најголемиот европски произведувач на автомобили користел софтвер во дизел-моделите на марките „Волксваген“ и „Ауди“ за да го „маскира“ количеството штетни гасови на тестирањата и така ги лажел регулаторите. На компанијата ѝ се заканува казна од 18 милијади долари.