!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Пожарот во Пржино изгаснат, едено девојче пренесено на клиника


Скопје, 2 декември, 2017 - 12:31 (META) 

Вчера, околу 16.50 часот, во Скопје на улица Баница во Пржино, избувнал пожар во зграда, при што биле опожарени осум подрумски простории, кои една аптека ги користела како магацински простор, се вели во билтенот на МВР.

Во пожарот 10- годишно девојче вдишало чад и било однесено на Клиниката за токсикологија.

Од Противпожарната бригада информираат дека пожарот бил локализиран и во неговото гаснење интервенирале 30 пожарникари со седум возила.


Три пожари активни во Маврово, повторно гори и кај манастирот Трескавец


Маврово, 28 август, 2017 - 17:01 (META) 

Три шумски пожари се активни во националниот парк „Маврово“.Најголем и со фронт на ширење од над седум километри е пожарот во реонот на Аџина Река на Шар Планина, а пожар има и во близина на караулата „Победа“ и месноста Стрезимир.

Во овој пожар досега се изгореле околу 300 хектари високо планински пасишта и стебла на смрека, ела и молика. Во гаснење на пожарите ангажирани се речиси сите вработени во паркот, но ветрот го отежнува локализирањето.

Вчера, на територијата на паркот беа регистрирани два шумски пожари, во близина на селото Скудриње и Рибница. Овие пожари се локализирани.

Пожар има и во близина на манастирот Трескавец кој е локализиран и манастирот е безбеден за верниците кој го посетуваат за време на празникот. Заради крајно непристапниот терен, но, и заради силината на огнот, синоќа, како и утринава интервенирале и неколку хеликоптери и канадери од АРМ, па пожарите се ставени под контрола.

Надлежните апелираат за максимално внимание, бидејќи, како што посочуваат, се поизвесно е дека пожарите намерно се предизвикуваат.

– Пожарот кај Дабница кој беше намерно запален го ставивме под контрола, но повторно беше запален и зеде огромен замав, па денеска попладне опожари и неколку викендички, овошни и лозови насади во населбата Заград. Во овој момент имаме три активни пожари, во пределот на Трескавец од западната страна, кај Горно село, каде се соочуваме со непристапен терен за гаснење, во Гостиражни, Небрегово и во делот на Сивец. Помош побаравме од ТППЕ – Битола кои ни пристигнаа со неколку пожарникари и возила. Одговорно тврдам дека овие пожари се намерно подметнати, бидејќи се видени лица како палат и бегаат – вели командирот на ТППЕ Прилеп, Станко Колески.


Изгаснат пожарот кај Рибница, но се уште гори кај Аџина Река


Скопје, 27 август, 2017 - 14:48 (META) 

Изгаснат е еден од двата пожара во националниот парк „Маврово“, соопштија од Дирекцијата за заштита и спасување, додавајќи дека другиот пожар се уште е активен.

Вработени во паркот се на терен, но засега нема информации како оди справувањето со вториот пожар.

Од Дирекцијата соопштија дека вчера околу 13 часот бил забележан чад и оган во атарот на Рибница и на две локации во месноста „попова ливада“ и „рибничка скала“. Пожарот зафатил нискостеблеста шума, смреки и папрати, како и букова шума.

Петнаесет вработени во паркот го гаснеле пожарот што зафатил површина од над 200 хектари, а на помош бил повикан и авион од ДСЗ. По неколкучасовната борба, пожарот синоќа бил изгаснат, а дежурни лица ја следат ситуацијата на терен. Во моментов, се уште е активен пожарот во регион на Аџина Река.

Засега не се знае што ги предизвикало пожарите, а властите потсетуваат дека предизвикувањето пожар во национален парк подлежи на кривичен прогон.


Тетовската депонија гори, ветрот ги отежнува условите за гаснење на пожарот


Тетово, 19 август, 2017 - 17:03 (META) 

Дивата депонија во Тетово која се наоѓа на влезот на градот гори, а пожарникарите се обидуваат да го локализираат пожарот.

Огнот се шири кон силосите за жито на „Жито Полог“, а според градоначалничката на Тетово, Теута Арифи за неколку часа ќе се знае дали екипите на територијалната противпожарна единица ќе успеат да го изгаснат пожарот или ќе биде потребна помош.

Во гаснењето на пожарот биле ангажирани четири цистерни, а ветерот ги усложнувал условите за негово локализирање.


Беснее пожар на планината Ловќен, во опасност е мавзолејот на Његош


Подгорица, 16 август, 2017 - 14:09 (META) 

На планината Ловќен во Црна Гора, неколку дена беснее пожар, а од утринава ситуацијата е критична бидејќи огнената стихија се приближува кон мавзолејот на Петар Петровиќ- Његош, кој се наоѓа на врвот на планината, јавуваат црногорските медиуми.

Во гаснењето на пожарот пристигнала и војската, како и хеликоптери и авиони на Министерството за внатрешни работи.

Огнот е проширен на целата планина, а активни пожари има и во Подгорица.


Пожарот кај манастирот „Трескавец“ повторно активен, соопшти ЦУК


Прилеп, 12 август, 2017 - 13:17 (META) 

Пожарот во близина на манастирот „Трескавец“ и населените места Мажучиште, Мараморани и Горно Село, повторно е активен, а на терен се екипи на прилепската територијална противпожарна единица и месното население кои се обидуваат да го локализираат огнот, информира Центарот за управување со кризи (ЦУК).

Од ЦУК соопштуваат дека активен е и пожарот кај местото Фрлогоец на Бистра Планина, каде гори сува трева и смрека и ниско стеблеста деградирана дабова шума. На терен се наоѓа екипа на Шумското стопанство „Лопушник“ кое презема мерки за локализирање на пожарот.

Активни се и пожарите кај селата Растеш, Заград и Волче, во општина Македонски Брод.

„Пожарот во атарот на село Грешница во моментов е под контрола и е обиколен со заштитен појас. Во средината гори деградирана нискостеблеста шума. На пожарот во атарот на село Грешница ангажирани се лица од Шумското стопанство Македонски Брод. Појавен е шумски пожар во планинскиот дел близу село Богојци во правецот кон селото Татеши. Пожарот е активен и зафатена е нискостеблеста и дабова шума. На негово гаснење дејствуваат екипи на ТППЕ-Струга и ЈСШП ‘Јабланица’ – Струга“, соопшти ЦУК.


Доброволците уште 24 часа ќе се борат со пожарот кај Трескавец


Прилеп, 11 август, 2017 - 18:56 (META) 

Пожарот кој пред два дена започна да гори околу манастирот Трескавец сè уште е активен и се уште постои опасност да го зафати манастирскиот комплекс. Во борбата со огнот се вклучени прилепските пожарникари, но и голем број доброволци од Прилеп и од околината, од кои дел се вработени во неколку прилепски компании и јавни претпријатија, информира Општина Прилеп.

Според противпожарната едница пожарот е многу непредвидлив поради непристапниот терен и ветерот и на моменти се гасне, но потоа одново се појавува на различни локации.

Доброволците велат дека се труделе со сите сили да го одбранат манастирот, но гаснењето оделoе тешко поради непристапниот предел и ветерот. Се очекува на помош да им дојдат уште околу 50 доброволци од Охрид и се планира да останат кај Трескавец и во наредните 24 часа. На територијата на општина Прилеп има уште два активни пожари, кај селото Крушевица и селото Никодим.


Активни пожарите во Чашка, Македонски Брод и во Маврово – Ростуше


Скопје, 6 август, 2017 - 12:54 (META) 

Дирекцијата за заштита и спасување соопшти дека во 12 часот се регистрирани активни пожари во општините Чашка, Македонски Брод и Маврово – Ростуше. Ангажирани се два авиона, хеликоптери, 40 лица преку ДЗС во координација со „Македонски шуми“, како и месно население.

Во Чашка пожарот е кај селото Богомила, местото Бела Вода и во Урбанци, село Дреново. Пожарот е на терен непристапен за гаснење. Ангажирани се авионите на Дирекцијата за заштита и спасување и тој е локализиран. Авионите се упатени во селото Таор каде гори мешана шума.

Кај Македонски Брод пожарот е околу селото Калуѓерец и кај местото Сува Гора кај селото Волче, каде гори запалена сува трева и лисната постилка од борова шума.

Во општина Маврово – Ростуше регистриран е нов пожар на планината Бистра каде гори трева и смрека. На терен се лица од ЈП „Лопушник“.

Како што соопшти ДСЗ, изгаснати се пожарите кај кумановските села Проевце, Орашец, Слупчане и Умни Дол, во Беровско кај месноста Копан Поток, Маџила, село Будинарци и Кочански Рид, село Владимирово. Изгаснати се и пожарите кај гостиварската населба Грудеица и село Јеловце, охридското село Мраморец и кај неготинското село Челевец.

Од 7 часот авионите дејствувале на потегот Чашка, село Лисец и село Јаболчиште и тоа во четири налети. Во овој момент два авиони дејствуваат во село Богомила, Бела Вода.

Заклучно со вчерашниот ден, според ДСЗ, авионите вкупно имале 295 налети со 837 тони вода. Хеликоптерите се ангажирани во селото Дреново, кај месноста Урбанци.


Владата прогласи кризна состојба на териториите на Македонски Брод и на Чашка


Скопје, 5 август, 2017 - 21:59 (META) 

Владата вечерва одржа седница за состојбата со пожарите и донесе одлука за прогласување на кризна состојба на подрачјата на општините Македонски Брод и Чашка, затоа што таму веќе неколку дена има активни пожари, информираше министерот за внатрешни работи, Оливер Спасовски, кој е и претседател на Управувачкиот комитет за координација и управување со кризи.

– Анализирајќи ги сите состојби, пред сè во координација со сите релевантни фактори и институции кои се вклучени во справувањето со пожарите, прогласивме кризна состоја која ќе трае 30 дена од моментот на донесувањето на одлуката. Ова е донесено за сите надлежни институции во Македонија во координирана акција да можат да дејствуваат за ефикасно да се справат со оваа состојба со пожарите. И во наредниот период ќе имаме временски услови со висока температура, а со тоа и можност за ширење на пожарите. Ова е една од мерките која ќе гарантира безбедност за овие региони, успешно справување со пожарите и нивно целосно гаснење – изјави Спасовски.

Тој додаде дека сите надлежни институции се задолжени за да помогнат во делот на справување со оваа кризна состојба во овие две општини и каде што ќе треба.

– Ако немаме кризна состојба, Дирекцијата за заштита и спасување (ДЗС), односно локалните самоуправи ќе требаше самостојно да се справуваат. Вака, сите институции на Македонија ќе треба да се приклучат и да ги стават сите расположливи средства и ресурси во справувањето со овие состојби – појасни Спасовски.

Тој ги повика граѓаните да им помогнат на институциите во справувањето со пожарите.

– Поради временските услови, поради невниманието на граѓаните може да дојде до опожарување на кој било дел од територијата и затоа треба координирана акција, во која и граѓаните превентивно ќе треба да помогнат, покрај институциите кои се задолжени за тоа – рече Спасовски.


Николовски: Пожарите се гаснат со стара нефункционална механизација


Скопје, 5 август, 2017 - 17:27 (META) 

Министерот за земјоделство, шумарство и водостопанство, Љупчо Николовски, денеска беше на теренот кој беше опожарен во с. Моране, Скопско.

– Во овие моменти најважно е да се задржи присебноста и граѓаните да имаат доверба во институциите кои се на терен. Ангажирани се припадници на армијата, хеликоптерите на АРМ, дојдени се уште два хеликоптери на помош од Бугарија и од Турција. Имаме пожарникари на терен, вработени во државни институции и се работи да се локализираат сите пожари – изјави Николовски.

Тој додаде дека поради неодговорното работење на ВМРО- ДПМНЕ, денеска надлежните служби работат во нестандардни услови, со стара нефункционална механизација.

Николовски посочи дека во вакви тешки услови за работа, сите ангажирани лица даваат сè од себе за брзо и ефикасно гаснење на пожарите, за дел од кои постои сомнеж дека се намерно подметнати.

– Тоа што сигурно како Влада ќе го направиме, ќе биде реформа во системот за одговор на кризи. Овој хаос наследен од минатата Влада ќе биде доведен во ред, како и сè друго во нашава земја и веќе нема да се случува – додаде Николовски.

Министерството за земјоделство шумарство и водостопанство (МЗШВ) исто така информираше дека од денеска важи забраната за целосно движење во шуми.

Дирекцијата за заштита и спасување (ДЗС) денеска соопшти дека на територијата на Македонија има активни пожари. Сè уште е активен пожарот во атарот на селото Требовље, кој сега е префрлен во месноста Фојник и оди кон село Близанско.

Сува трева и нискостеблеста шума горат во Калуѓерец и Радуша. Во општина Чашка, на планински предел во селата Лисец и Јаболчиште активни се авионите на Дирекцијата за заштита и спасување.

На планинскиот предел во селото Дреново, активен е шумски пожар на непристапен терен за гасење.

Кај селото Копанце, Тетовско, гори сува трева по сртот на планината Жеден и не е зафатена шума. На терен се ангажирани лица од Територијалната противпожарна единица.