!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Мицкоски: Гасификацијата ќе чини 150 милиони евра


Скопје, 15 март, 2017 - 16:21 (META) 

„Владата предводена од ВМРО-ДПМНЕ досега ја изгради примарната гасоводна мрежа од Клечовце до Штип. Магистралниот гасовод  Штип – Неготино е во напредна фаза на изградба и се очекува да заврши до крајот на оваа година“, изјави денеска на прес-конференција членот на извршниот комитет на ВМРО-ДПМНЕ, Христијан Мицкоски.

Тој додаде дека во фаза на изградба е магистралниот гасовод Скопје – Тетово – Гостивар.

– Во програмата „Реално“ на ВМРО-ДПМНЕ е предвиден магистралниот гасовод Штип – Хамзали – Струмица – Гевгелија, како и ред други делници, за кои мнозинството граѓани на последните парламентарни избори дадоа поддршка. Но, СДСМ со своето деструктивно однесување го попречува реализирањето на овие проекти, од кои директна корист ќе имаат граѓаните – изјави Мицкоски.

Тој истакна дека дополнително, покрај примарната гасификација, огласите за изградба на секундарниот и на терцијарниот гасовод преку јавно-приватно партнерство се објавени во јавните гласила.

– Со тоа почнува процесот на секундарна и на терцијарна гасификација во Македонија, која се очекува да чини околу 150 милиони евра. Ќе бидат опфатени 17 општини во Скопскиот Регион, 36 општини во Источниот Регион и 26 општини во Западниот Регион – изјави Мицкоски.


ВМРО-ДПМНЕ: Благодарение на СДСМ, Куманово умира од загаденост


Скопје, 14 јануари, 2017 - 11:35 (META) 

„Изминатата ноќ Куманово беше најзагаден град во цела Европа. ПМ10-честичките достигнаа вредност од дури 1.000 милиграми на еден кубен метар. Загаденоста 10 пати ја надминува дозволената граница“, велат од ВМРО-ДПМНЕ.

„Благодарение на СДСМ, кои повеќе од 27 години владеат со Куманово, градот секојдневно умира од тивка еколошка катастрофа од загаденост и од негрижа за градот. Како последица на рекордното загадување, со години во Куманово во пораст е бројот на лица со малигни заболувања. Во пораст се и другите заболувања кои се резултат на негрижата на локалните власти. Додека карциномот тивко ги убива кумановчани, СДСМ нема никаков план и не презема мерки за загадувањето. Тие се одговорни што свесно ги оставаат кумановчани секојдневно да се задушуваат“, се вели во соопштението на партијата.

Од ВМРО-ДПМНЕ додаваат дека нема ни трага ни глас од гасификацијата на градот најавена од страна на СДСМ ниту од невладините организации кои, како што велат од партијата, криејќи се, избегнуваат да преземат што било во врска со заштитата на здравјето на кумановци.


Груевски промовираше мерки за намалување на загаденоста на воздухот


Скопје, 26 септември, 2016 - 15:38 (META) 

Лидерот на ВМРО-ДПМНЕ, Никола Груевски, промовираше мерки за намалување на загаденоста на воздухот во Музеј на македонската борба за државност и самостојност.

Како што истакна, најголемите загадувачи на воздухот се затоплувањето на домовите со дрва, автомобилите и индустријата и рече дека тие, како владејачка партија, во таа насока ќе донесат мерки за намалување на загаденоста.

Тој најави гасификација на државата и носење на гасот до домаќинствата, односно градење разгранета мрежа на цевковод за гас низ секој град.

– Придобивка од гасификацијата, освен намалување на загадување на воздухот, е заштеда на буџетот на оние кои го користат и тоа за 7 проценти поевтинување за оние кои се греат на дрво, поевтинување за 35 проценти за оние кои сега се греат на струја и поевтинување за повеќе од 50 проценти за оние кои користат друг вид на течни и тврди нафтени горива – изјави Груевски.

Тој додаде дека ќе се доделуваат субвенции до 70 проценти од трошоците на домаќинствата за замена на печките на дрва со печки, котли и цела опрема за системи на пелети, за највеќе до 30.000 денари по домаќинство.

Груевски истакна дека и автомобилите се едни од најголемите загадувачи на воздухот и најави мерки кои ќе го поттикнат купувањето на електрични автомобили.

Увозот на нови електричните возила ќе биде со нула проценти царина и без дополнителна акциза. При купување на нови електрични автомобили ќе се применува повластената даночна стапка од 5 проценти, наместо сегашните 18 проценти на данок.


СДСМ: Кој украде 53 милиони долари на гасоводот?


Скопје, 12 септември, 2016 - 16:53 (META) 

„Министерот за транспорт и врски, Владо Мисајловски, е добредојден во Струмица и во Куманово лично да се увери и да ги види единствените изградени дистрибутивни системи за природен гас во Македонија. Студијата за оправданоста на изградбата на делницата Клечовце – Штип предвидува дека изградбата ќе чини 24 милиони долари, а потрошени се вртоглави 77 милиони долари“, се вели во соооштението на СДСМ.

Во него се додава дека „во студијата за оправданост се разоткрива неспособноста на власта да реализира проекти за гасификација“.

„Крајниот рок до кога требаше да се осигура снабдување со природен гас на оваа приоритетна делница е 2015 година. Во 2016 година власта допрва ќе почнува со изградба. За 10 години неодговорно владеење на ВМРО-ДПМНЕ ниту домаќинствата ниту граѓаните дочекаа гасификација на Македонија. Владо Мисајловски да каже на чија сметка легнаа овие пари или тоа нека го направи Јавното обвинителство кое има обврска да дејствува по допрен глас,“ се додава во соопштението на СДСМ.


СДСМ: Провизии од 44 милиони евра во енергетскиот сектор


Скопје, 23 март, 2016 - 14:34 (META) 

Регулаторната комисија за енергетика, чиј претседател е од редовите на општинскиот комитет на ВМРО-ДПМНЕ од Кратово, трет ден молчи за чии интереси дозволува увоз на струја поскапа за неверојатни 41,7 проценти, кога цената на регионалните берзи е падната за 20 евра за еден мегават-час, се вели во соопштението на СДСМ.

Во него се вели дека додека се молчи за скапиот увоз, „Ставрески и Груевски со самонаречениот отчет сами влегле во енергетска треска, отворајќи го прашањето за десетгодишниот застој на гасификацијата на Македонија“.

„Дали Груевски и власта на ВМРО-ДПМНЕ за изградбата на гасоводната делница Клечовце – Штип склучиле договор со руска фирма која се наоѓа на црната листа на САД?! Дали изборот на фирмата е направен под сомнителни околности, без тендерска постапка?! Дали причината за доцнењето на изградбата на делницата Клечовце – Штип се провизии од вртоглави 44 милиони евра? Дали 61-километарската делница Клечовце – Штип чини 75,5 милиони долари, како што тврди власта на Груевски или реалната цена на гасоводот е 25 милиони евра? Зошто Ставрески и Груевски ја кријат студијата за оправданоста на гасификацијата на Македонија?“, прашуваат од СДСМ.

Оттаму додаваат дека „Ставрески го издаде Груевски кога ја најави делницата Неготино – Кавадарци – Битола за 400.000 евра по километар, а делницата Клечовце – Штип веќе влече од граѓаните неверојатни 1.240.000 евра по километар!“


Битола ќе се гасифицира, обезбедни се 39 милиони евра кредит


Скопје, 29 декември, 2015 - 14:16 (META) 

Обезбедени се 39 милиони евра кредит, од вкупно 46,5 милиони евра, кои се потребни за изградба на системот за топлификација за Битола, Новаци и за Могила. Другите 7,5 милиони евра ќе ги обезбеди ЕЛЕМ.

Со овој проект е предвидено да се употреби отпадната неискористена топлинска енергија од РЕК „Битола“, преку изградба на систем за топлинска енергија.

Освен домаќинствата во Битола, предвидено е на мрежата да се приклучат и 35 јавни објекти од општината.

Владата денеска потпиша договор со Германија и финансиски договор со развојната банка КФВ, a средствата се добиени со фиксна каматна стапка од 1,5 отсто, рокот на отплата е 15 години со грејс-период од четири години.

 


Се одложува гасификацијата на Скопје и на општините во источниот и во западниот регион


Скопје, 21 октомври, 2015 - 10:15 (META) 

Сè уште не е избрана компанија која ќе ја спроведе гасификацијата на Скопје и на општините во источниот и во западниот регион.

На петтиот по ред повик, се јавиле две компании, од кои едната се откажала, а другата побарала продолжување на рокот за евалуација.

Проектот за гасификација на 17 општини од скопскиот регион е 98,4 милиони евра, за гасификација на Централна и на Источна Македонија потребни се 28 милиони евра, а за гасификација на Западна Македонија и на Пелагонија планирани се 23 милиони евра.

Дистрибутивната мрежа во должина од 250 километри, треба да биде изградена со јавно-приватно партнерство.