Г.г Стефан: Не бараме ништо повеќе од она што го заслужува нашиот православен народ


Скопје, 5 април, 2018 - 9:59 (META) 

Поглаварот на Македонската православна црква – Охридска архиепископија, г.г. Стефан и Светиот архиерејски синод на МПЦ-ОА во посланието по повод претстојниот празник Воскресение Христово – Велигден истакнуваат дека животот на сите вистински следбеници на Христа е исполнет со искушенија, со духовни падови и подеми – со крст, но и со воскресение.

„Нашиот народ и нашата Охридска и Македонска црква се сведоци за тоа низ сета своја историја. За жал, еве и по 60 години, црковно оправданата постапка на македонскиот православен народ е дочекана со неодобрување, преку селективното и пристрасно разбирање на каноните, кои се толкуваат и применуваат по нечија дневна потреба – се вели во посланието.

Во него се вели дека Црквата и народот не губат надеж и веруваат дека ќе ни се врати местото во сеправославното семејство.

„Затоа, трпеливо молиме, бараме и чукаме на портите од срцата и совеста на нашите православни браќа. А што бараме? Бараме да нè препознаат дека сме тоа што сме биле, чеда на своја вековна Црква, во која исповедаме и живееме „според верата на апостолите и на отците, верата православна – верата што ја утврди вселената“. Не бараме ништо повеќе од тоа што го имал, од тоа што го заслужува, и што му припаѓа на нашиот православен народ. Зашто, со нашата полна црковна самостојност, ќе се збогати и ќе се умножи Црквата Христова. Со тоа и православните браќа и Помесните цркви ќе ја избегнат можноста да паднат во негативните расположби и постапки на своето историско минато“ стои во посланието.


Даниел Дончевски по петти пат го фати крстот во Скопје


Скопје, 19 јануари, 2018 - 13:11 (META) 

Даниел Дончевски од скопската населба Маџари го фати Светиот крст што во осветените води на реката Вардар во Скопје го положи поглаварот на Македонската православна црква – Охридска архиепископија, г.г. Стефан од мостот „Слобода“.

На денешната манифестација во Скопје, по крстот во реката Вардар скокаа 150 верници. Најсреќниот меѓу нив, Дончевски по петти пат го фаќа крстот во водите на Вардар.

– Го фаќам крстот по петти пат и сфаќам дека ова не е случајно. Крстот го фаќам секоја парна година и секогаш ми носи среќа – изјави Дончевски, кој им посаката здравје и среќа на сите православни верници.

Тој наградата и ја посвети на деветгодишната Биле Пешевска од Кратово, која се бори со тешка болест.

Пред положувањето на Светиот крст во водите на Вардар, г.г. Стефан пред присутните граѓани порача дека верските празници треба да не потсетат како живееме и како постапуваме кон себе и кон другите, да ги измијат сите лоши мисли и да донесат духовно освежување.

– Не е доволно да бидеме само крстени, туку е потребно и да живееме според учењето и заповедите на христовата вера. Не по името, туку по делата да бидеме вистински христијани – порача поглаварот на Македонската православна црква.


Православните верници го слават Богојавление – Водици


Скопје, 19 јануари, 2018 - 9:52 (META) 

Православните верници денеска го слават празникот Богојавление – Водици, поврзан со крштевањето на Исус Христос во водите на реката Јордан од страна на Јован Крстител. Празникот, кој уште се нарекува Водици поради големото осветување на водите што го извршува црквата на овој ден, се празнува уште од вториот век од нашата ера.

На овој ден, традиционално во реките се положуваат крстови. Оној што ќе го фати Светиот крст се верува дека ќе го следи среќа и благослов во текот на целата година.

Како и претходните години, најмасовна посетеност на манифестациите по повод Богојавление – Водици се очекува да има во Скопје и во Охрид. Во Скопје за учество на манифестацијата „Водици 2017“ се пријавени повеќе од 150 граѓани.

Централната манифестација ќе се одржи напладне, кога архиепископот охридски и македонски г.г. Стефан ќе го положи крстот во реката Вардар од мостот „Слобода“. Претходно, од 9 часот, поглаварот на Македонската православна црква – Охридска архиепископија ќе богослужи Златоустова литургија во црквата „Рожденство на Пресвета Богородица“.

Во Охрид во сите православни храмови ќе се служат, по што литиите ќе се упатат кон градското пристаниште, каде во 10 часот ќе бидат осветени езерските води и ќе биде фрлен Светиот крст.

По повод празникот, претседателот на државата Ѓорге Иванов упати честитка до поглаварот на Македонската православна црква – Охридска архиепископија, Архиепископот охридски и македонски, г.г. Стефан и до сите православни верници.

„Богојавление е симбол на духовното раѓање и новиот почеток во животот на верникот. Како симбол на новиот почеток, Богојавление треба да нè потсетува да не се навраќаме на старото, туку да се стремиме кон живот исполнет со љубов, понизност, милост и солидарност. Да се престигнуваме со добрина, и да го градиме нашето мултиетничко, мултирелигиско и мултијазично општество во мир, соживот и почитување на различноста“, се вели во честитката на Иванов.


Православните христијани денеска го слават Божиќ


Скопје, 7 јануари, 2018 - 10:30 (META) 

Православните христијани во Македонија денеска го слават Рождеството Христово-Божиќ. Во сите храмови на Македонската православна црква изутринава се одржуваат божиќни литургии, a централното одбележување е во Соборниот храм „Св. Климент Охридски“ во Скопје, каде што архиепископот охридски и македонски г.г. Стефан ќе богослужи литургија на Св.Василиј Велики.

Во неговата порака која што ја упати по пово Божик, тој рече дека „новородениот Богомладенец постојано не повикува преку верата и добрите дела да се спасуваме од суетите и минливоста, не повикува да не ги заборавиме оние коишто страдаат и имаат потреба од помош, од подадена рака и утеха.“

„Претстојното лето Господово нека биде исполнето со надеж дека и во Македонија, и помеѓу иселените нашинци и насекаде по светот ќе завладеат мирот и добрата волја. Ние како народ – тоа најдобро ќе го постигнеме ако живееме според верата и преданието на светата Црква. Треба да опстоиме во борбата за нашето право, достоинство и наследство, мудро чувајќи ја и вреднувајќи ја жртвата на нашите доблесни предци“, се вели во пораката на г.г Стефан.


Иванов: Овој Божиќ е уште една можност за да си простиме и да се помириме


Скопје, 6 јануари, 2018 - 10:35 (META) 

Претседателот Ѓорге Иванов, упати честитка до архиепископот охридски и македонски, г.г. Стефан и до сите христијани, по повод големиот празник Христово раѓање – Божиќ.

„Божјото поистоветување со луѓето преку Исус Христос е, воедно, и најсилната недвосмислена потврда на вроденото човеково достоинство и неотуѓивата вредност на секој човек, независно од етничката, јазичната, верската, социјалната припадност, независно од полот и возраста. Поради тоа, ние сме обврзани љубовта кон Бог да ја искажеме преку почитувањето на нашите ближни, семејства, соседи, сонародници и сограѓани. Денес, повеќе од кога било порано во Македонија ни е потребно одново да ја откриеме таа почит. Овој Божиќ е уште една можност за да си простиме, да се помириме и да се сплотиме околу трајните вредности. Ова е можност да градиме човечно, солидарно и праведно мултиетничко општество во кое ќе владеат праведни закони“, се вели меѓудругото во честитката на Иванов.


Г.г Стефан: Овде и меѓу иселениците нека завладеат мирот и добрата волја


Скопје, 5 јануари, 2018 - 10:12 (META) 

Архиепископот охридски и македонски г. г. Стефан испрати божикна порака по повод претстојниот празник Рождество Христово – Божик.

„Претстојното лето Господово нека биде исполнето со надеж дека и во Македонија, и помеѓу иселените нашинци и насекаде по светот ќе завладеат мирот и добрата волја. Ние како народ – тоа најдобро ќе го постигнеме ако живееме според верата и преданието на светата Црква. Треба да опстоиме во борбата за нашето право, достоинство и наследство, мудро чувајќи ја и вреднувајќи ја жртвата на нашите доблесни предци“, се вели во пораката на г.г Стефан.

Во неа исто така се додава дека „новородениот Богомладенец постојано не повикува преку верата и добрите дела да се спасуваме од суетите и минливоста, не повикува да не ги заборавиме оние коишто страдаат и имаат потреба од помош, од подадена рака и утеха.“


Г.г. Стефан и патријархот Неофит: Едногласно одлучивме БПЦ да ѝ биде мајка црква на МПЦ


Софија, 21 декември, 2017 - 16:27 (META) 

Поглаварот на Македонската православна црква – Охридска архиепископија (МПЦ-ОА), г.г. Стефан денеска бил примен од патријархот на Бугарската православна црква (БПЦ) Неофит, јавува бугарската новинска агенција БГНЕС.

Станува збор за прва средба на поглаварите на двете цркви, откако БПЦ прифати да и биде мајка црква на МПЦ, како чекор кој треба да доведе до признавање на нејзината автокефалност.

Архиепископот Стефан бил придружуван од митрополитот на преспанско-пелагониската епархија, Петар, одговорен за надворешните односи на МПЦ-ОА.

– Не е лесен крстот кој бугарската црква го има, бидејќи досега ништо не е сторено за проблемот со македонската архиепископија. Ајде сега, со Божјата премудрост, учесниците во меѓуцрковната комисија да го донесат резултатот што го сакаме – изјавил бугарскиот патријарх Неофит во емисијата „Вера и општество” на бугарската телевизија.

Поглаварот на МПЦ, архиепископот Стефан се заблагодарил на сите во Бугарија кои ја поддржуваат желбата на МПЦ да добие признание за својата незавиност и истакнал дека писмото со барањето до БПЦ било едногласно прифатено од Синодот на Македонската православна црква.

– Писмото што го испративме до Бугарската патријаршија дека таа може да е наша црква-мајка едногласно е прифатено од нашиот Свет синод. Некои од соработниците можеби и имаат свое видување, но важно е што решава и вели мнозинството – изјави архиепископот Стефан.

Синодот на Бугарската православна црква – Бугарска патријаршија го прифати барањето да ѝ биде мајка црква на Македонската православна црква и да ја застапува пред помесните православни цркви.

Писмото со барањето од архиепископот на МПЦ- ОА, г.г. Стефан беше испратено од БПЦ на 9 ноември.


Г.г. Стефан: Мора да сфатиме дека работите треба да се решаваат низ дијалог


Скопје, 7 декември, 2017 - 22:04 (META) 

„За нашиот верен народ и за нашата независна држава, сè уште останува еден од проблемите – тоа што Македонската православна црква (МПЦ) е неприфатена во сеправославното семејство, за жал, од политички причини. Па, Охрид и Црквата во Македонија ниту ги измисливме, ниту се создадени за штета на другите, туку за слава на Бога и за спасение на нашиот богољубив народ. Само така и единствено на тој начин треба да се сфатат последните, актуелни напори на Светиот архиерејски синод во решавањето на овој нелогичен и нецрковен проблем, поврзан со статусот на нашата Црква“.

Ова го истакна поглаварот на Македонската православна црква г.г. Стефан во своето обраќање на свечената академија во пресрет на утрешниот државен празник Свети Климент Охридски, што вечерва се одржа во Македонскиот народен театар (МНТ), под покровителство на премиерот Зоран Заев.

Иако не го спомена директно, станува збор за прва јавна изјава на поглаварот на МПЦ во врска со прифатеното барање Бугарската православна црква да ѝ биде мајка црква на МПЦ.

Според г.г. Стефан, покажаната иницијатива е во духот на љубовта кон својот народ и сето православие.

– Кој се обидува да ги решава проблемите на својот народ, тој покажува и преданост, и почит и дело на родољубивост. Ние мора да сфатиме дека работите треба да се решаваат низ дијалог, во кој ќе ги штитиме своите интереси и потреби, наоѓајќи ги најприфатливите за нас решенија – рече поглаварот на МПЦ.

Премиерот Зоран Заев во своето обраќање го честиташе 50-годишниот јубилеј од возобновувањето на автокефалноста на Охридската архиепископија во лицето на Македонската православна црква и истакна оти е убеден дека овој јубилеј ќе отвори и „надминување на повеќегодишните предизвици исправени пред МПЦ, која е реалност во православниот свет“.

– Како што успеал свети Климент во мисијата на неговото време, повикани сме да се обидеме и да успееме и ние, надминувајќи ги предизвиците трпеливо и мудро, како што ни доликува, заштитувајќи ги идентитетските вредности како граѓани, како народ и како држава – рече Заев.

На свечената академија присуствуваа високи претставници на МПЦ, пратеници, претставници на Владата, на амбасадите, професори, академици, претставници на верските заедници, на бизнис-заедницата и други гости.


Г.г. Стефан: Тешко ги договараме работите од национален и државен интерес


Тетово, 21 април, 2017 - 14:16 (META) 

Поглаварот на Македонската православна црква – Охридска aрхиепископија, г.г. Стефан, по служењето на архиерејската литургија во црквата „Пресвета Богородица“ во Тетово, по повод празникот Источен Петок, во својата беседа повика на обединување на македонскиот народ и на заштита на државните интереси.

– Ние, но особено други забележале дека сме добродушен, кроток, гостопримлив народ. За други сме подготвени да дадеме сè што имаме и лебот од устата да го поделиме. Тоа е поради христијанското во нас. Но, сосема сме други кога се во прашање меѓусебни односи, македонските односи и работи. Тешко меѓу нас ги договараме работите од национален и од државен интерес. Го гледаме најпрвин личниот или партискиот интерес – порача пограварот на МПЦ – ОА, г.г. Стефан.


Заев: Празникот на духовното помирување нека донесе лична и општествена зрелост


Скопје, 26 февруари, 2017 - 12:28 (META) 

По повод празникот Прочка, претседателот на СДСМ, Зоран Заев, упати честитка до граѓаните што го чествуваат овој голем христијански празник, до поглаварот на МПЦ, г.г. Стефан, до Синодот и до претставниците на МПЦ.

„На овој голем празник на духовно помирување, да се издигнеме над искушенијата што ја испитуваат нашата определба кон вредностите што ни се потребни како луѓе, но и како граѓани на едно општетство во кое живееме и имаме обврска да го градиме сите. Го избравме доброто наспроти злото, вистината наспроти лагата, правдата наспроти неправдата, заедничкиот живот наместо поделби. Покажавме трпение, толеранција, мудрост и отвореност кон решенијата што носат мир и благосостојба на секој човек. Тоа е патот на нашето индивидуално и колективно помирување, а таква силна порака носи и овој голем верски празник. Во нас е совеста, пред нас е институционалната и општествена зрелост“, вели Заев во честитката.