Во Охрид и Струга нема аптека со 24-часовно работно време и дежурни матични лекари


Охрид, 10 октомври, 2018 - 14:40 (META) 

Во Охрид и Струга каде што нема аптека со 24-часовно работно време, Приватните здравствени установи аптеки, кои имаат склучено договор со Фондот за здравствено осигурување спроведуваат дежурства на повик или состојба на готовност. Граѓаните реагираат дека ваквата состојба за нив претставува проблем, зошто понекогаш се приморани да чекаат до наредниот ден. Тие велат дека и туристите имаат потреба аптеките да работат цела вечер.

Во Охрид и Струга слична е ситуацијата и со матични лекари во вечерните часови и за време на викендите, бидејќи нема дежурни матични лекари. Поради тоа, итните случаи се препраќаат во градските болници, а најтешко е со болните деца.

– Јас ги жалам колегите кои се на детско одделение. Дали да ги гледаат тешките деца кои се болни и кои сакаат интензивен надзор или да решаваат проблем со пациент со дијареа. Се знае како се решава таа работа. Треба да има еден посебен оддел кој ќе биде како дежурна педијатриска амбуланта  –  изјави Никола Филев, лекар по семејна медицина од Охрид.

И матичните лекари велат дека фармацевтите и институциите мора да најдат начин како да го решат овој проблем, во интерес на пациентите.

„Навистина во лето има потреба од дежурна аптека, барем тоа да биде аптеката која работи во состав на Медицинскиот центар во Струга. Не можам да навлезам во тоа, како ќе го изведат“, рече Хаџер Алиед, лекар по семејна медицина.

Иако во минатото и во Охрид и во Струга имаше дежурни аптеки, во 2013 година, ФЗОМ донесе одлука за градовите кои имаат помалку од 15 аптеки и помалку од 30.000 жители, да има обезбедено дежурна аптека која ќе биде достапна на повик, а информациите на кој телефон ќе може да се повика аптеката во овие градови ќе ја има на веб-страницата на Фондот, како и во дежурните служби.


Таткото на Ева: Пред мене од ФЗОМ зборуваа со лекарот во Германија


Скопје, 24 август, 2018 - 13:52 (META) 

Моето дете ништо не може да го врати. Јас собрав од донации 200.000 евра, но сега сè е залудно. Велам дека не е точно тоа што се кажува за обидот да ја лекуваме Ева во Германија, за „Независен“ вели Благојче Крстаноски, татко на 11-годишната Ева, која почина пред да замине во странство.

– Не е важно дали државата ќе потроши 100.000 евра помалку или повеќе ако спаси еден детски живот. Ние не сме единствен случај, има доста и ќе има. Јас се молам да бидат што помалку. Зборувам јавно зошто не сакам ова да се повтори и на друго дете – вели Крстаноски  за „Независен“, одговарајќи на сочувството што вчера јавно, од прес-конференцијата во Владата му го изразија Ден Дончев, директор на Фондот за здравствено осигурување (ФЗОМ) и министерот за здравство Венко Филипче.

Крстаноски ги демантира тврдењата на Дончев дека немало понуда од германска клиника и тврди дека и тој лично, и претставници на ФЗОМ пред него комуницирале со лекарот што требало да ја прими Ева во болницата „Гисен“ во Германија, а доставил и уште една профактура од болница во Диселдорф. Од „Гисен“, каде што Крстаноски сакаа да ја лекуваат Ева, во имејл-комуникација одредиле приближна сума за лекувањето. Не издале профактура оти целата сума немало да ја плати ФЗОМ, туку требало да се вклучи и семејството со парите собрани од донации. Фондот инсистирал да добие профактура за да ги испочитува законските прописи.

Крстаноски објаснува и зошто одбивале да ја пратат Ева во Турција и мобилизирале роднини и пријатели од цел свет да се соберат донации.

– Уште пред да биде донесена одлуката на Фондот, разбрав дека секако ќе ја изберат Турција. Разбрав дека имале некој договор со турски клиники и затоа таму цената била пониска. Им реков да не нè праќаат таму, оти сите протоколи за лекување малигни болести се од Германија. Ниту еден протокол не е од Турција. Реков: Ако не одиме во Германија, ќе одиме во Италија“. Но никако во Турција. Три деца што јас ги знам претходно ги испратија во Турција не се вратија назад. Како да го пратам моето дете таму? – вели таткото на Ева за „Независен весник“.

Откако беше објавена статијата, реагираа од ФЗОМ, велејќи дека понуди за лекување на Ева побарале од 22 странски болници, меѓу кои и болницата Гисен, но поради итноста на случајот, комисијата донела одлука за 48 часа. Од Фондот велат и дека понудата што ја објави „Независен“ не им била презентирана, а за мејлот велат дека бил само информативен, а не понуда што може да се разгледува.

Исто така, во последните 12 месеци, имало неповолни исходи од лекување не само во турски болници, туку и во болници во Италија и Германија, нагласуваат од ФЗОМ.


Дончев: Болницата од Германија не испрати понуда за лечење на Ева


Скопје, 23 август, 2018 - 16:59 (META) 

Вкупно три понуди од странски болници добил Фондот за здравствено осигурување (ФЗОМ) за лекување на малата Ева Крстановска, од кои две од турски болници и една од болница од Италија. Од болницата во Германија не стаса понуда и демантираме дека лекувањето во неа би чинело 200.000 евра, рече на прес-конференција директорот на ФЗОМ, Ден Дончев.

Тој изрази сочувство до семејството на починатото девојче и рече дека сите процедури биле почитувани. Дончев појасни дека постапката почнала откако на 25 јуни годинава до Фондот било упатено барање за лекување во странство, со конзилијарно мислење од клиниката на која се лекувала дека нема можности таму да се заврши лекувањето. Потоа фондот побарал понуди од четири болници, од кои две турски, една италијанска и од болницата Гисен во Германија, но понуди стасале само од првите три и била избрана турска болница, но родителот на Ева не го прифатил, барајќи да се лекува во Германија, рече Дончев.

– Имајќи предвид дека пациентот беше во животозагрозувачка состојба, според Законот, ФЗОМ е обврзан да донесе одлука за лекување во странство во рок од  48 часа. Потоа стручната комисија на Фондот, составена од еминентни лекари од Универзитетските клиники во Скопје, се произнесе позитивно по добиените понуди за лекување, при што е избрана болница во Турција. Решението за лекување во странство е доставено до барателот на 28.06.2018 година за спроведување на хемотерапија и алогена трансплантација на коскена срцевина од несроден дарител. Барателот, незадоволен од одлуката на стручната комисија при Фондот,  поднесе приговор до второстепената комисија, со барање лекувањето да се спроведе во клиниката во Гисен, Германија со која што воспоставил личен контакт – рече Дончев.

Потоа, како што рече тој, ФЗОМ контактирал со лекар од германската болница, кој рекол дека состојбата на Ева е тешка, но сепак од болницата Гисен во Фондот не стасала понуда за лекување на Ева.

– Од друга страна, прифатената понуда од Универзитетската клиничка болница од Газиосман Паша од 145,000 евра и одобрените трошоци за санитетски авион, го опфаќаше целокупното лекување за временски период од 150 дена. ФЗОМ има документација за секој чекор од оваа постапка и јавно и транспарентно ви стојеме на располагање за секоја информација – рече Дончев.


ФЗОМ ќе ги зголеми квотите на лекови во аптеките за овој месец


Скопје, 16 март, 2018 - 13:30 (META) 

Фондот за здравствено осигурување на Македонија (ФЗОМ) одлучи да ги зголеми квотите на лекови за овој месец во износ од 15 милиони денари кои ќе бидат линеарно распределени по аптеките, рече денеска на прес-конференција директорот на ФЗОМ, Ден Дончев.

Тој додаде дека вкупниот буџет за лекови за годинава ќе се зголеми во износ од 100 милиони денари годишно, ќе има ревизија на Правилникот и методологијата на распределба на финансиските средства, квотите и надоместоците на аптеките.

Дончев најави и нова поправична и поефикасна распределба на квотите на аптеките и поефикасен систем за нивни надоместоци.

Во долгорочните мерки рече дека се предвидува разгледување на можностите за воведување интегриран и ефикасен електронски систем преку вклучување на сите институции и здравствени установи и работници од здравствениот систем со воведување електронско здравствено досие по пациент.


И годинава ФЗОМ автоматски ќе ги осигура лицата со ниски примања


Скопје, 31 јануари, 2018 - 16:08 (META) 

Здравственото осигурување на лицата со ниски примања, оние кои во 2017 година оствариле нето-приход под 144.000 денари, автоматски ќе се продолжи, така што, оваа категорија на граѓани нема потреба да се пријавуваат во подрачната служба на Фондот за здравствено осигурување на Македонија (ФЗОМ).

„Секоја година во периодот од 1 февруари до 31 март, лицата со ниски примања беа обврзани да дојдат да дадат изјава на шалтерските служби во Фондот, со цел да го продолжат правото на здравствено осигурување кое им го покрива државата преку Министерството за здравство.Оваа година продолжува автоматската пререгистрација и затоа сакаме да ги известиме лицата со ниски примања, кои во минатата година оствариле нето приход под 144.000 денари дека нема потреба да дојдат во подрачната служба на Фондот да се пререгистрираат и нивното здравствено осигурување автоматски ќе се продолжи“, се вели во соопштението на ФЗОМ.

Од таму додаваат дека Фондот автоматски ќе ги пререгистрира и лицата кои последните два месеци оствариле приход помал од 24.000 денари, а се во категоријата на осигуреници кои оствариле приход од 144.000 денари до 204.480 денари минатата година.

„Другите две категории осигуреници кои плаќаат 50 отсто или 100 отсто од здравствениот придонес на просечна плата, ако се во рамките на лимити 144.000 денари до 204.480 денари, исто така не е потребно да дојдат да се пререгистрираат на шалтерите на подрачните служби на Фондот“, додаваат од таму.

На осигурениците на кои автоматски ќе им се продолжи здравственото осигурување, нема да добиваат нови решенија по пошта.

Лицата на кои нема да им се продолжи здравственото осигурување поради повисоки приходи од наведените лимити ќе добијат решение по пошта и ќе треба да дојдат во подрачната служба да го регулираат своето здравствено осигурување.


Крај за сините картони – се бара решение за електронските здравствени картички


Скопје, 18 август, 2017 - 15:11 (META) 

Сини картони од денеска нема да се користат при одење на лекар, соопшти министерот за здравство, Арбен Таравари на прес-конференција.

Тој истакна дека електронската здравствена картичка (ЕЗК) која се користи од 2012 година и има важност од пет години, ретко се применува. За решавањето на овој проблем, Таравари рече имал средби со двајцата директори на Фондот за здравствено осигурување, со претставници на „Мој термин“, како и со претставници на приватните лекари. На состанокот се согласиле дека сините картони нема да бидат потребни, бидејќи лекарите можат во секој момент да го проверат статусот на осигурување на пациентот.

– Сини картони нема да бидат потребни, лекарите можат да го проверат статусот на осигурување на лице место и ако се во зелено, значи сè в ред, ако е црвено, значи не се осигурени – рече Таравари.

Од денеска пациентите наместо сини картони, ќе треба да носат само лична карта и електронската картичка. Таравари рече дека работат на изнаоѓање трајно решение за проблемот и дека треба да се истражи зошто електронските картички се нарачани со чип кој има рок на траење од пет години.

– Зошто направиле така, треба да се истражи. Бараме нов начин, можеби со картички кои ќе важат 10 или 20 години. Не е јасно и зошто воопшто се пуштени во оптек сините картони – рече Таравари.


Ден Дончев, нов директор на Фондот за здравство, на местото на Виктор Мизо – Александар Младеновски


Скопје, 10 август, 2017 - 16:07 (META) 

Владата на Република Македонија ја објави листата на новите директори на различни агенции, фондови, државни управи и казнено-поправни установи што се во нејзина надлежност. Сите именувани се само вршители на должноста.

Од позначајните функции, Ден Дончев е нов директор на Фондот за здравствено осигурување на Македонија, на чело на Агенција за филм на Република Македонија е именуван Горјан Тозија, додека директор на Управата за финансиска полиција ќе биде Арифат Муареми.

На местото на Виктор Мизо во Дирекцијата за технолошки индустриски развојни зони седнува Александар Младеновски, а нов прв човек на Управата за културно наследство е Елеонора Петрова.

Другите измени на раководни позиции може да се видат на владината веб-страница.


ФЗОМ склучи договори со нови шест специјалистички ординации


Скопје, 12 октомври, 2016 - 13:04 (META) 

Фондот за здравствено осигурување на Македонија склучи договори со шест нови специјалисти во четири градови во зејава, кои станаа дел од мрежата на здравствени установи и со тоа им овозможи на осигурениците да добиваат специјалистичка здравствена заштита на товар на Фондот.

Фондот за здравствено осигурување на Македонија склучи договор со приватните здравствени установи „Д-р Александар Манолев“ во Бутел, Скопје, „Вита мед-ЛД“ во Аеродром, Скопје, „Ехолаб плус“ во Гази Баба, Скопје, „Д-р Владо Хаџиев“ во Битола, „Калина“ во Струмица и „Медика Пењушкови“ во селото Ваташа, Кавадарци.

Фондот има склучено договор со 173 приватни специјалисти по медицина за кои годишно за исплата се предвидени 201 милион денари. Новите шест специјалисти кои склучуваат договор со Фондот за здравство ќе почнат со работа од 1 ноември 2016 година. За нив до крајот на годината за два месеци Фондот ќе исплати 864.000 денари, односно по 72.000 денари месечно по специјалист.

 


ФЗОМ одобри пари за лекување на Мартин Мицев


Скопје, 17 септември, 2016 - 18:21 (META) 

Фондот за здравствено осигурување денеска соопшти дека лекувањето за бебето Мартин Мицев е одобрено.

Како што пишува во соопштението на фондот, Мартин Мицев ќе се лекува во Германија, а неговото лекување, кое во целост ќе биде покриено од ФЗОМ, ќе чини 280.000 евра.

„Почитувани, по повод пишувањата на определени веб-портали и социјални мрежи кои повикуваат за донации, сакаме да ја известиме јавноста дека се одобри лекувањето во Р. Германија за бебето Мартин Мицев во целост во висина од 280.000 евра. Решението е предадено на родителите. ФЗОМ посакува побрзо излекување и закрепнување“, пишува во соопштението на фондот.


ФЗОМ: Ако лекот на рецепт ви го нема во првата аптека, прошетајте малку!


Скопје, 27 април, 2016 - 13:47 (META) 

Надоместоците што ФЗОМ ги исплаќа на аптеките се доволни за да има континуирана достапност на лекови на рецепт, тврдат од Фондот за здравствено осигурување (ФЗОМ), по вчерашната реакција на граѓани, кои тврдеа дека лекови на рецепт не можат да најдат во ниту една аптека.

„Доколку лекот за кој има потреба осигуреникот го нема во една аптека, поради искористеност на квотата, истиот има право на избор на аптека во која ќе го подигне лекот, а која сè уште ја нема реализирано квотата определена од Фондот. Колку за информација, реализираноста на квотите на ниво на територија на Република Македонија изнесува 94 проценти“, стои во одговорот од ФЗОМ на прашањето што да прават пациентите кои имаат потреба од лекарства, а кои во аптеките ги нема на рецепт, туку можат да ги набават само со плаќање на целата сума.

Како што вчера изјавија граѓани, со денови бараат лекови, но не можат да ги набават освен ако не ги купат „приватно“.

Како што велат тие, станува збор за антибиотици и за лекови за луѓе болни од рак, кои никаде низ Скопје ги нема на рецепт.

Од аптеките низ градот тврдат дека тие работат со квоти на лекови што можат да ги издаваат на рецепт и кога ќе им заврши предвидениот број, мора да се чека нов месец. Велат дека проблемот не е кај нив, туку до правилата востановени од Фондот за здравствено осигурување на Македонија (ФЗОМ).

Томица Новаковски, од скопски Аеродром, цел ден барал антибиотик на рецепт поради тоа што лекарот му констатрал воспалување на белите дробови. Но, како што тврди, никаде не можел да најде на рецепт, туку можел да си ги купи само по редовна цена.

– Цел град го поминав да го најдам антибиотикот и ништо. Веднаш им пишав и во Министерството за здравство, ама оттаму само ми рекоа дека наредните денови ќе има. Истото ми го тврдат и во аптеките. И сега, што треба да правам? Да чекам да дојде први? А моето здравје? Што ако немам пари да ги купам по редовна цена – прашува Новаковски.

Со истиот проблем се соочува и Соња Миленковска, која е болна од рак и прима редовна терапија од лекот „тамоксифен“.

– Никаде го нема на рецепт. Во аптеката им реков дека овој лек ми е многу важен, но тие креваат раменици и тврдат дека не е до нив. Не знам каде е проблемот, само вака не може да се живее. За некои луѓе лековите се побитни и од храната – вели Миленковска.

Од ФЗОМ велат дека ако осигуреникот го купи лекот и потоа сака да ги рефундира средствата, потребно е лекот од примарната здравствена заштита да е дефицитарен во аптеките, односно осигуреникот да достави три потврди за дефицитарност од три различни аптеки кои имаат договор со Фондот, за да може осигуреникот што го купил лекот да ги рефундира средствата.