!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Во Франција уапсени три лица кои подготвувале терористички напад


Париз, 21 февруари, 2017 - 17:01 (META) 

Три лица се уапсени во Франција под сомневање дека подготвувале терористички напад, потврдија полициски извори за француските медиуми.

Мажите се уапсени во Марсеј, Клермон-Феран, како и на подрачјето на Париз.

По серијата терористички напади во последните неколку години, Франција е во состојба на висок степен на готовност.

Полициски извор соопштил дека тројцата осомничени се уапсени во рамки на прелиминарната истрага почната во јануари, поради сомневање дека планираат да заминат во Сирија или да извршат терористички напад во Франција.


Спречен напад во Франција


Париз, 10 февруари, 2017 - 13:25 (META) 

Француската полиција уапси четири лица поради сомнеж дека планирале терористички напади. Осомничените се уапсени во Монпелје, а меѓу нив има и 16-годишно девојче.

Странските медиуми јавуваат дека антитерористичката единица пронашла работилница во која произведувале експлозиви.

Од канцеларијата на обвинителството се наведува дека се пронајдени 70 грама експлозив ТАТП. Станува збор за експлозив кој може да се направи од состојки достапни за сите.

Експлозивот е користен за време на терористичките напади во Париз од 2015 година, како и во минатогодишниот напад во Брисел.

Извор од полицијата рече дека еден од уапсените личности планирал самоубиствен напад.

Во Франција во 2015 и во 2016 година беа извршени терористички напади во кои 238 лица загинаа, а повеќе стотици беа повредени.


Немири во Париз поради полициска бруталност


Париз, 8 февруари, 2017 - 13:15 (META) 

Седумнаесет лица се уапсени во немири во предградие на Париз кои избија откако полицаец, наводно, со пендрек, сексуално малтретирал црно момче.

Демонстрантите во текот на ноќта палеле автомобили и контејнери, а насилствата од североисточното предградие на Париз се прошириле во уште пет града.

Протестите и немирите почнаа по извештаите дека полицијата минатата недела нападнала 22-годишен црнец за време на редовна проверка на лични документи.

За време на насилствата во понеделникот, полицијата привела 26 лица.

Момчето Тио, чие презиме не се открива, изјавило дека четворица полицајци го удирале, го прскале со солзавец и го силувале со полициска палка.

Еден полицаец во неделата е обвинет за силување, а тројца за тежок напад.

Тио добил тешки повреди и е опериран, но и понатаму е во болница, каде вчера попладне го посети претседателот Франсоа Оланд.


Саркози се соочува со судење за нелегално финансирање на кампањата во 2012 година


Париз, 7 февруари, 2017 - 11:35 (META) 

Поранешниот претседател на Франција, Николас Сакрози, треба да седне на обвинитела клупа во судски процес против него за нелегално финансирање на неговата изборна кампања во 2012 година, пренесува „Би-би-си“, повикувајќи се на судски извори.

Саркози се соочува со обвинение дека неговата партија ги фалсификувала сметките за да сокрие 22,5 милиони евра од трошоците за кампањата за претседателските избори во 2012 година.

Поранешниот франциски претседател неколкупати претходно изјави дека, наводно, не знаел за прекумерното трошење.

Тој на претседателските избори во 2012 година загуби од Франсоа Оланд, а неуспешен беше и неговиот обид за влез во изборната трка на претседателските избори што оваа година треба да се одржат во Франција.

Случајот за кој на Саркози му се заканува судење е познат и како афера „Бигмалион“, во чиј центар се тврдењата дека партијата на Саркози, тогаш позната како УМП, соработувала со пријателска компанија за да ги сокрие вистинските трошоци за неговата изборна кампања.

Франција има ограничувања за тоа колку пари смеат да се потрошат за потребите на изборна кампања, поради што фирмата „Бигмалион“ фактурирала средства на име на партијата на Саркози, а не за кампањата, со што ѝ овозможила на УМП да ги зголеми трошоците и да потроши повеќе пари во изборната кампања.

Вработени во „Бигмалион“, како што пренесува „Би-би-си“, признале дека знаеле за измамата, а против неколкумина членови на УМП веќе се поднесени обвиненија.


Утврден идентитетот на напаѓачот кај „Лувр“


Париз, 4 февруари, 2017 - 12:07 (META) 

Француските власти го идентификувале лицето што вчера со мачета нападна војници пред влезот на парискиот музеј „Лувр“, јавуваат француските медиуми.

Напаѓачот кој извикал „Алах е голем“ и веднаш бил ранет е идентификуван како египетски државјанин кој пристигнал во Франција кон крајот на јануари.

Полицијата кај напаѓачот, кој носел две торби, пронашла мобилен телефон со СИМ-картичка регистрирана на име на 29-годишниот Египќанец, Абдула ел Хамами. Француските истражители стапиле во врска со египетските колеги за разјаснување на случајот.

Извори блиски до истрагата посочуваат уште дека напаѓачот не им бил непознат на француските безбедносните служби и оти легално влегол во државата на 26 јануари со лет од Дубаи, со валидна шенген-виза.

Обвинителот на Париз, Франсоа Молан, синоќа соопшти дека идентитет на напаѓачот е познат, но дека не е „формално утврден“.

Истрагата ќе треба да ги утврди мотивите за нападот и дали напаѓачот дејствувал сам или по нечија наредба.


Напаѓачот кај „Лувр“ бил Египќанец, во Франција дошол на крајот на јануари


Париз, 3 февруари, 2017 - 20:52 (META) 

Мажот вооружен со мачета што претпладнево нападна и полесно рани војник во центарот на Париз, во близина на музејот „Лувр“, извикувајќи „Алах е голем“ (Алаху акбар), бил државјанин на Египет, а во Франција стасал на крајот на јануари, јавија светските агенции.

– Според првобитните наоди од истрагата, тој е египетски државјанин – вели извор во истрагата.

Напаѓачот тешко е повреден, но сè уште е жив, откако друг војник пукал во него, а француските власти покренаа истрага за нападот, кој го окарактеризираа како терористички.

Началникот на париската полиција Мишел Кодо потврди дека напаѓачот имал мачета и две торби и се обидел да влезе во подземниот трговски центар кај „Лувр“.


Опамети се Америко, порача Трамп по нападот со мачета кај „Лувр“


Вашигтон, 3 февруари, 2017 - 16:37 (META) 

Претседателот на САД, Доналд Трамп, по нападот кај „Лувр“ во Париз, наведе дека Америка мора да се опамети.

Новиот шеф на Белата куќа рече дека напаѓачот е „радикален исламистички терорист“, користејќи го терминот кој и претходно го користел за такви напади.

„Нов радикален исламистички терорист штотуку извел напад во музејот „Лувр“ во Париз. Туристите биле заклучени. Франција повторно е на раб. ОПАМЕТИ СЕ АМЕРИКО“, напиша Трамп на „Твитер“.

Маж вооружен со мачета нападна и полесно рани војник во центарот на Париз, во близина на музејот „Лувр“, извикувајќи „Алах е голем“ (Алаху акбар). Тешко е повреден откако друг војник пукал во него, а француските власти покренаа истрага за нападот, кој го окарактеризираа како терористички.

Засега нема информации за идентитетот на напаѓачот, кој е жив и покрај повредите.

Началникот на париската полиција Мишел Кодо потврди дека напаѓачот имал мачета и две торби и се обидел да влезе во подземниот трговски центар кај „Лувр“, пренесуваат француските медиуми.


Напаѓачот кај „Лувр“ извикувал „Алах е голем“


Париз, 3 февруари, 2017 - 13:59 (META) 

Француски војник отворил оган откако негов колега бил нападнат со мачета во центарот на Париз, кај познатиот музеј „Лувр“, јавуваат светските новински агенции, додавајќи дека напаѓачот извикувал „Алаху акбар“ (Алах е голем).

Француските медиуми наведуваат дека напаѓачот е погоден во нога и во стомак, а еден од војниците е полесно повреден, како и дека дел од „Лувр“ и трговскиот центар „Карусел“ се евакуирани и се под засилен полициски надзор.
Полициски извори велат дека напаѓачот носел два торби, чија содржина е испитана и утврдено е дека во нив нема експлозив. Контрадиверзионите екипи ја пребаруваат и околината на „Лувр“.

Францускиот премиер Бернар Казнев изјави дека станува збор за терористички напад.

Нападот се случил околу 10 часот наутро, на скалите во подземниот трговски центар кај „Лувр“, во близина на музејот, кога вооружениот напаѓач потрчал кон војникот и заканувајќи му се со мачетата, извикал „Алаху акбар“.

Еден војник добил полесни повреди, а друг истрелал пет куршуми во напаѓачот, погодувајќи го во нозете и во стомакот.

Полицијата половина час подоцна објави дека „ситуацијата е безбедна“. Уште едно лице е уапсено поради „сомнително однесување“, но не е пронајдена поврзаност со напаѓачот.

Министерството за внатрешни работи веднаш објави тревога и оцени дека инцидентот претставува „сериозно загрозување на безбедноста“.

Туристите кои се затекле во „Лувр“, пред евакуацијата добиле наредба да се соберат во ходниците и да седнат на под додека опасноста не помине, а сите врати од музејот биле заклучени.

На социјалните мрежи некои велат дека полицијата ги претресувала и нивните торби.

Во Париз од ноември 2015 година, поради серијата терористички напади, е зголемено нивото на безбедност.


Пукање кај „Лувр“, паника во Париз


Париз, 3 февруари, 2017 - 11:06 (META) 

Француски војник отворил оган откако е нападнат со нож во центарот на Париз, кај познатиот музеј „Лувр“.

Светските агенции јавуваат дека војникот застрелал човек кој, наводно, се обидел да влезе во музејот носејќи торба.

Француските медиуми наведуваат дека напаѓачот е погоден во нога и оти дел од „Лувр“ и од трговскиот центар „Карусел“ се евакуирани и опколени од безбедносни сили, како и дека ситуацијата е безбедна.

Засега не е јасно дали до пукањето дошло во галерија или на некој влез во комплексот, затоа што локалните медиуми не објавуваат поопширни информации.

Полицијата ја истражува содржината на торбата, а министерството за внатрешни работи објави тревога и го оцени инцидентот како „сериозен случај на загрозување на јавната безбедност“.


Администрацијата на Трамп е предизвик за Европа, оцени Оланд


Париз, 27 јануари, 2017 - 15:21 (META) 

Францускиот претседател, Франсоа Оланд, изјави дека администрацијата на новиот американски претседател, Доналд Трамп, е „предизвик“ за Европа.

Оланд, исто така, предупреди дека Европа е под сè поголема закана од популизам.

– Да бидеме искрени, постојат предизвици што ги создава новата американска администрација, предизвици кога станува збор за трговијата, начинот на решавање на судирите во светот – рече Оланд.

Тој истакна дека е потребно да се разговара со Трамп, затоа што американските граѓани го избрале за свој претседател.

– Но, ние треба да разговараме со него од европска гледна точка, да ги промовираме нашите интереси и вредности – рече францускиот претседател.