Германија и Франција ќе го зајакнуваат еврото


Берлин, 20 април, 2018 - 10:06 (META) 

Германија и Франција се договорија за заедничка позиција за реформи на еврото најдоцна до јуни, и покрај германската колебливост во врска со поголема монетарна унија. Ваквиот став е договорен при вчерашната посета на францускиот претседател Емануел Макрон на Берлин. Макрон претходно ги прифати идеите на Европската Комисија (ЕК) за создавање заеднички систем за гарантирање на депозитите, ЕУ фонд за спасување, како и буџет на Еврозоната и министерство за финансии.

Реформите се чекори кои треба да покажат дека ЕУ може да живее политички и без Обединетото Кралство и да спречи повторување на финансиска криза како таа од 2008 година.

Сепак, Германија е сè уште колеблива во поглед на финансирање од својот буџет на ваквите крупни зафати. И покрај ентузијазмот на францускиот претседател, кој повика на финансиска стабилност и опсежно зборуваше за реформите, Меркел беше поповлечена.

– Секогаш има различни појдовни точки кога станува збор за ставовите на Германија и Франција. Потребни ни се отворени дебати и ни треба подготвеност за компромис – рече таа.


Никола Саркози приведен на распит поради парите од Гадафи


Париз, 20 март, 2018 - 10:16 (META) 

Поранешниот француски претседател Никола Саркози е приведен во полиција, поради истрагата поврзана со финансиските нерегуларности на неговата изборна кампања во 2007 година, јавија француските медиуми. Тоа е потврдено од Министерството за правда на Франција.

За време на 2014 година, француската телевизија „Франс – 3“ подигна бура откако ја емитуваше аудио снимката од разговорот со Моамер Гадафи. Покојниот либиски лидер тврдеше дека во 2007 година ја финансирал претседателската кампања на Саркози.

Во изминатата претседателска изборна кампања 2016/2017 година, Саркози категорично ги демантираше овие обвинувања.

Саркози беше претседател на Франција од 2007 до 2012 година.

Еден бизнисмен во интервју за информативниот портал „Медиапарт“ изјави дека на крајот на 2006 или почетокот на 2007 година пренесол повеќе куфери со вкупно пет милиони евра, испратени од либискиот режим на Гадафи, во француското Министерство за внатрешни работи. Саркози во тоа време беше министер за внатрешни работи.

Париското обвинителство во април 2013 година поведе истражна постапка за случајот.


Французите се тепаа и си пуштаа крв поради евтината „Нутела“


Париз, 26 јануари, 2018 - 14:53 (META) 

Откако францускиот синџир супермаркети „Интермарш“ вчера воведе попуст од 70 отсто на популарниот крем „Нутела“, па теглите со тежина од 950 грама беа поевтинети од 4,5 на 1,4 евра, во голем број супермаркети избија тепачки.

Некои муштерии буквално се фрлале на вработените кои ги носеле палетите.

– Беа како животни. Една жена ја кубеа за коса, друга постара жена носеше цела палета на глава, трета беше со раскрвавени дланки – раскажува една жена која пазарувала во супермаркетот „Интермашр“ во Рив де Жир во централна Франција.

Купувачите постојано се туркале и се тепале, па морала да интервенира и полицијата, како во Острикур, каде избила тепачка меѓу купувачите, а исто било и во Рубо, Марл ле Мин и Па де Кале. Во Сен Сипријан купувачите се фрлале врз вработените што донесувале палети со тегли.

Според производителот „Фереро“, малку повеќе од една четвртина од светската потрошувачка на „Нутела“ отпаѓа на Франција.


Спречен терористички напад во Франција


Париз, 21 јануари, 2018 - 12:46 (META) 

Во Франција минатата недела бил спречен можен терористички напад. Уапсен бил 33 годишен маж од Париз, за кого има сомнение дека се подготвувал да изврши терористички напад.

Тој е уапсен во вторникот во јужниот град Ним, а во неговиот дом е откриен арсенал од експлозивни материјали.

Станува збор за прво вакво сомнение во Франција од почетокот на новата годината. Во минатата 2017 година беа спречени вкупно 20 терористички дејства.


Тимоние: Не го разбрав законот за јазици, постои простор за подобрување на текстот


Скопје, 21 јануари, 2018 - 10:36 (META) 

Мислам дека не сум единствениот што не успеал да го разбере законот за јазици, бидејќи се работи за многу комплициран текст, барем во однос на неговата содржина, но и на последиците и мислам дека постои простор за подобрување во самиот текст вели францускиот амбасадор Кристијан Тимоние во неделното интервју на „Радио Слободна Европа“.

Францускиот амбасадор вели дека сега доаѓа фазата на спроведување на рефрмските приоритети и дека тоа е најсложениот дел затоа што било изгубено големо количество енергија последните години.

Тој го поздравува фактот што ВМРО-ДПМНЕ присуствуваа на обраќањето на генералниот секретар на НАТО, Јенс Столтенберг во Собранието

-Тоа се гестови коишто се важни зашто покажуваат единство кај македонското општество за постигнувањето на големите цели во земјата. Без да сакам да давам совети и да се мешам, мислам дека ќе треба од секоја страна да се направат чекори кон другиот, затоа што постојат можности во рамки на Собранието. Ќе кажам дека господинот Џафери покажува голема трпеливост и желба во начинот на функционирање на собранието и голема објективност од негова страна и добивам впечаток дека постојат сили во рамки на собранието и кај опозицијата и кај мнозинството коишто сакаат нормализирање на односите – вели Тимоние.

Тој вели дека бил постигнат забележителен напредок во македонско-грчките односи и смета дека тој напредок треба да се искористи.

– Морам да кажам дека новата Влада даде сè од себе за подобрување на односите со Атина. Забележавме дека и грчките власти исто така покажаа дух на отвореност, којшто е нешто ново нели, за создавање на поинаква клима, бидејќи нели за танго се потребни двајца, а и со самиот факт што е постигнат договор за да се најде решение, тоа е нешто што само по себе е позитивно. Од друга страна, пак, тоа изолирање, кое што е ономастично за Македонија, повеќе не е одржливо, особено не на долгорочен план, и мислам дека постои генерална согласност кај меѓународната заедница за да мислиме дека е неопходно решение, затоа што не можеме повеќе да прифатиме дека таа блокада би можела постојано да се повторува, затоа што тоа не е добро и за европската изградба и генерално за безбедноста на Унијата, и сега се наоѓаме во период во којшто, најверојатно, од секоја страна има вистинска добра волја – вели францускиот амбасадор.


„Лакталис“ повлекува храна за бебиња поради салмонела


Париз, 12 јануари, 2018 - 19:26 (META) 

Француската компанија „Лакталис“ ќе го повлече млекото за бебиња произведено во фабриката во градот Краон, откако десетици бебиња заболеа од бактеријата салмонела. Досега се утврдени 35 вакви случаи во Франција, едно во Шпанија, а има еден сомнителен случај и во Грција, но допрва треба да се утврди дали бебето се разболело од млекото на „Лакталис“ произведено во Краон.

Министерот за финансии на Франција, Бруно ле Мер денеска информираше дека целото количество бебешка храна произведена во оваа фабрика во западна Франција кое е пуштено во продажба ќе биде повлечено.


За Божик во Франција ќе има 100.000 полицајци


Париз, 23 декември, 2017 - 11:01 (META) 

Во Франција во недела и во понеделник ќе бидат распоредени речиси 100.000 припадници на полициските и другите безбедносни сили за да се осигури безбедноста за време на славењето на Божик.

Ова го соопшти францускиот министер за внатрешни работи Жерар Коломб.

-На целата територија на Франција на 24 и 25 декември ќе бидат распоредени 97.000 припадниците на силите за безбедност – рече Коломб. Ова претставува 6.000 луѓе повеќе во споредба со минатата година.

Министерот оцени дека христијанскиот празник може да биде мета на повеќе терористички закани и додаде дека апсолутен приоритет е безбедноста на Французите и сите туристи.

Во терористички напади во Франција од 2015 година загина 241 лице.


Сугарески пред француски компании ги претстави инфраструктурните проекти


Скопје, 18 декември, 2017 - 14:51 (META) 

Министерот за транспорт и врски, Горан Сугарески, пред претставници на компании од Франција ги презентираше крупните инфраструктурни проекти кои во наредниот период ќе се реализираат во државата.

На средбата организирана од страна на францускиот амбасадор во Македонија, Кристиан Тимоние, министерот Сугарески посебен акцент стави на изградбата на автопатиштата и експресните патишта, железницата на Коридор 8 и гасификацијата.

– Во однос на железничката инфраструктура спомнав и претходно дека генереално сме фокусирани на Коридор 8, односно изградба на пругата кон Албанија на Запад и Бугарија на Исток. Пругата кон Бугарија се гради во три фази. Во тек е изградба на првата фаза, за втората фаза тек е тендерската постапака и очекуваме да се започне со изградба средината на 2018 година – рече Сугарески.

Тој додаде дека во наредниот период планирано е да се изградат и реконструираат преку 700 километри патна мрежа вклучувајќи ја изградбата на експресни патишта, реконструкција на преку 40 регионални патни правци и автопатски делници.

Сугарески ги повика сите заинтересирани компании да се вклучат на јавните повици при реализација на овие крупни капитални проекти.


Уапсени три лица поврзани со нападот на „Шарли ебдо“


Париз, 21 ноември, 2017 - 20:28 (META) 

Француската полиција уапсила три лица кои се поврзани со нападот на редакцијата на магазинот „Шарли ебдо“, што се случи во јануари 2015 година.

Како што јавуваат француските медиуми, уапсени се двајца мажи и една жена.

Досега се поднесени кривични пријави против 14 лица поврзани со овој напад, а 13 се наоѓаат во притвор, каде го чекаат судењето.

Во нападот на „Шарли ебдо“ загинаа 12 вработени во редакцијата, а полицијата уби тројца напаѓачи.

Неколку дена по нападот, еден од напаѓачите уби полицајка и четири лица во заложничка драма, која се одвиваше во близина на Париз.


Напад со автомобил во Франција, три лица се повредени


Тулуз, 10 ноември, 2017 - 19:08 (META) 

Во францускиот град Тулуз денеска се случи напад со возило врз пешаци, но за разлика од некои инциденти во изминатите две години во Франција, овојпат не станува збор за терористички напад.

Како што јавија француските медиуми, автомобил управуван од лице со психички проблеми удрило група студенти од Кина кои излегувале од средното училиште „Сент Егзипери“ во предградието Блања.

Повредените се две 23-годишни девојки и 22-годишно момче.

Возачот, кој е на возраст од 28 години, е уапсен, а на полицијата и бил претходно познат поради проблематично однесување. Тој изјавил дека „гласови“ му кажале дека треба некого да повреди.

Во објектот на училиштето „Сент Егзипери“ се одржуваат постдипломски студии од повеќе насоки.