!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Терорист уби две жени на железничка станица во Марсеј


Марсеј, 1 октомври, 2017 - 16:37 (META) 

Две жени денеска беа убиени со нож од напаѓач кој на железничката станица во Марсеј извикувал „Алах е голем“. Тој потоа бил погоден и убиен од војниците кои интервенирале.

Полицијата вели дека според досегашните сознанија, станува збор за терористички напад.

Во моментов кај станицата и пошироко се спроведува голема безбедносна операција.

Марсеј во август искуси два слични напади, а во изминативе две години имаше десетици жртви во терористички напади.

Сличен напад вчеравечер се случил во канадскиот град Едмонтон.


Исламист со нож нападна војник во Париз


Париз, 15 септември, 2017 - 10:51 (META) 

Маж вооружен со нож, извикувајќи „Господ е голем“ (Алаху акбар), утринава околу 6.30 часот нападна француски војник кој патролирал пред метро-станицата Шателет во Париз, соопшти француското Министерство за одбрана.

Како што јавуваат француските медиуми, напаѓачот му дошол од зад грб на војникот и го нападнал извикувајќи „Господ е голем“. Војникот некако успеал да го совлада напаѓачот и почекал да дојде полицијата, која го привела.

Ова е последен од серијата напади на безбедносните трупи на Франција кои патролираат на места кои се мета на терористички напади. Досега во неколкуте напади на исламистичките терористи во Франција загинаа повеќе од 230 лица.


Филип: Граѓаните гласаа за Макрон и за промените во законот за работа


Париз, 13 септември, 2017 - 11:00 (META) 

Францускиот премиер Едуар Филип соопшти дека без разлика на вчерашните протести, измените во законот за работа ќе се спроведат затоа што граѓаните на изборите гласале за тоа.

– Слушам и обрнувам внимание. Но, морам да кажам дека Французите, кога гласаат, исто така имаат право да бидат третирани со почит. А, реформите кои ги спроведуваме, ги најави претседателот Емануел Макрон за време на предизборната кампања – изјави Филип во интервју за телевизијата „Франс 2“.

Француската влада минатиот месец, по повеќенеделни преговори со синдикатите, воведе мерки што опфаќаат ограничување на исплатата на отпремнина во случај на отказ. Синдикатите оценија дека новите мерки се на штета на работниците и оти со нив се охрабруваат компаниите да отпуштаат и да вработуваат луѓе.


Немири на протестите против измените на законот за работа во Париз


Париз, 12 септември, 2017 - 17:12 (META) 

Париската полиција употреби солзавец за да го растури протестот против измените на законот за работа, откако демонстрантите почнаа да фрлаат камења кон безбедносните сили.

Во повеќе градови во Франција се одржуваат демонстрации против измените на законот што ги планира претседателот Еманиел Макрон. Колона пешаци, сочинета од неколку десетици илјади лица, околу 14 часот се упатија од плоштадот Бастилја кон плоштадот Италија.

Прошетката мина во мирна атмосфера, но млади облечени во темна облека се судрија со полицијата која ја следела колоната. Хулиганите палеле димни бомби и извикувале навредливи пароли, а полицијата одговорила со солзавец.

Генералната конфедерација за труд, еден од најголемите синдикати во Франција, ги повика своите членови на штрајк, а на улица се студентите и работниците од неколку области. Тоа е прв протест против предложените реформи.

Француската полиција на улиците на Париз распореди мобилни полициски единици.

Повеќе илјади синдикални активисти утринава протестираа во Марсеј, Арве и во други француски градови.


Франција ќе испрати нов експерт во СЕП за приближување на Македонија кон ЕУ


Скопје, 28 август, 2017 - 11:17 (META) 

Вицепремиерот задолжен за европски прашања, Бујар Османи се сретна со францускиот амбасадор во Република Македонија, Кристијан Тимоние со кого се договориле дека со завршувањето на мандатот на францускиот експерт Бертранд Милет, Франција да обезбеди присуство на нов експерт за европски прашања, што претставува директна политичка поддршка од страна на Франција, информираше кабинетот на вицепремиерот Османи.

Османи изразил задоволство од досегашната работа и помош која ја обезбедило присуството на експертот Милет.

-Иако сме свесни дека изминативе две години г-нот Бертранд работеше во услови на длабока политичка криза во Македонија, сепак неговиот ангажман имаше важна улога во градењето на капацитетот на Секретаријатот – истакна Османи.

Францускиот амбасадор изрази задоволство од успешната соработка на Секретаријатот со францускиот експерт и најавил посета на нов експерт, со цел Македонија полесно и поефикасно да се посвети на предизвиците кои стојат на патот на приближувањето на земјата до Европската Унија.


Нервно растроен маж со нож нападнал три лица во Марсеј


Марсеј, 26 август, 2017 - 16:28 (META) 

Три лица се полесно повредени откако со нож ги нападнал нервно растроен маж во центарот на Марсеј, пренесуваат француските медиуми повикувајќи се на полициски и правосудни извори, кои ја исклучуваат можноста за тероризам.

Триесет и петгодишниот напаѓач, чие однесување било крајно неурамнотежено, бил уапсен и пренесен во болница.

Напаѓачот не изговорил ништо што би можело да по поврзе со исламистите, соопшти претставник на полицијата.

Сите три лице се мажи, кои напаѓачот ги сретнал на улица во периодот меѓу 06.30 и 06.55 часот наутро.

Во понеделникот, исто така во Марсеј, ментално растроено лице уби една жена, а тешко повреди уште една откако со комби влета во две автобуски станици во градот.

Синоќа во Брисел и во Лондон беа изведени напади со нож, а двата напади се окарактеризирани како акт на тероризам.


Копривата како оружје во анти-ЕУ пропаганда преку сајтови и лица блиски до бившата власт


Скопје, 23 август, 2017 - 15:00 (META) 

Копривата неодамна стана оружје во пропагандната војна против ЕУ што со години се води во Македонија, откако некои македонски портали на крајот на минатата седмица лиферуваа неточни факти за регулативата на ЕУ, тврдејќи дека ќе се забрануваат лековитите билки, а првата ќе биде – токму копривата.

Текст со такво тврдење во петокот се појави на порталот „Старт“ на „Тотал Медиа“, зад која стои Драган Павловиќ – Латас, кој е и главен уредник на информативната програма на телевизијата „Сител“.

Почнувајќи од насловот „ЕУ ја забранува копривата (и не само неа), казната за нејзина употреба е две години затвор!?“, „Старт“ на почетокот на текстот изнесува тврдење дека „Земјите кои се кадидатки за членство во ЕУ ќе мора да прифатат забрана на лековити билки по европски закони“. Се застанува на тврдењето, а без докази, што воопшто не одговара на стандардите на исправен новинарски текст. Нема ниту линк до регулатива или предлог-регулатива на ЕУ, ниту пак посочување на вест објавена во некој медиум. Како „поткрепа“ се наведува само дека во Франција наводно е забранета копривата. „Имено, со регулатива на ЕУ на Французите им е забрането јавно да ја популаризираат копривата, како и нејзина употреба или во спротивно казната ќе биде две години затвор,“ се тврди во текстот.

start Latas 1aНо, само кратко пребарување на интернет доведува до информација дека во Франција било забрането на поединци да прават течно ѓубриво од коприва, што е стара традиција во Франција, но таа забрана воведена во 2006 година е поништена уште во 2011 година. Течноста произведена од коприва се користела и како средство за борба против инсектите на растенијата и против габичните зарази.

Пребарувањето на веб-сајтот на Европската комисија исто така не доведува до потврда дека ЕУ ќе забранува употреба на лековити билки.

Текстот во неделата е преобјавен и на друг портал на македонски јазик, по принципот „копи-пејст“.

Во изминативе години повеќепати се случуваше да се објавуваат текстови со шокантни тврдења за разни непопуларни мерки кои наводно ЕУ планира да ги спроведен. Посебно внимание покрена тврдењето од 2014 година, пренесено од голем број портали во земјава, дека наскоро во ЕУ задолжително ќе се ставаат РФИД идентификациски чипови на сите новороденчиња, што речиси во сите објави во Македонија беше оквалификувано како ставање на „жигот на Ѕверот“ споменат во Откровението, последната книга на Библијата. Но до такво нешто не дојде.

 

Интересно е што новиот текст, за наводната забрана на копривата, кој ја напаѓа ЕУ е објавен на портал зад кој, како што може да се утврди од Марнет, стои „Тотал Медиа Центар“, а како лице за контакт е наведен Драган Павловиќ – Латас. Тој во годините на владеењето на ВМРО-ДПМНЕ како уредник и коментатор беше еден од најистакнатите поддржувачи на власта на ВМРО-ДПМНЕ и човек што ја сметаше ЕУ заедно со САД како главните поборници за симнувањето од власт на Никола Груевски и ВМРО-ДПМНЕ.

Инаку, Латас и неговата фирма се обвинети во случајот „Тотал“ на Специјалното јавно обвинителство, објавен на 23 март годинава.  Според СЈО, сопственикот на споменатите компании во периодот од 2008 до 2015 година одбегнал плаќање данок во вредност од околу 180 илјади евра.


Напад со автомобил во Марсеј – има загинати и повредени


Марсеј, 21 август, 2017 - 11:57 (META) 

Најмалку едно лице загина, а најмалку едно е повредено откако автомобил удрил во две автобуски постојки во францускиот град Марсеј.

Засега не се знае дали станува збор за терористички напад или не. Како што пренесуваат светските агенции возачот, кој веќе е уапсен, околу 8.15 часот удрил во една автобуска станица во северниот дел на градот, а еден час подоцна, во јужниот дел на градот удрил во втора автобуска станица.

Полицијата е на терен и во тек е истрага. Сепак, засега не се открива ниту идентитетот, ниту националноста на возачот, како ни мотивите за нападот.

– Во овој момент немаме информации за мотивите на возачот – велат од полицијата во Марсеј.

Нападот доаѓа пет дена по нападот со комби во Барселона, во кој загинаа 13 лица, а повеќе од 100 се повредени.


Меѓународната заедница загрижена поради актуелната ситуација на Косово


Приштина, 13 август, 2017 - 16:41 (META) 

Амбасадорите на Франција, Германија, Италија, Велика Британија и САД се загрижени поради актуелната ситуација на Косово. Ставот на амбасадорите денеска го соопшти американската амбасада во Приштина.

„Косово се соочува со многу предизвици, како актуелни, така и долгорочни, вклучувајќи ја програмата со ММФ, енергетската ситуација, но исто така и потребата за економски развој, јакнење на владеењето на правото, европската перспектива и односите со Србија. Граѓаните на Косово заслужуваат парламент и влада која може да ги исполни овие предизвици“, стои во соопштението.

Во него се наведува дека одговорност на косовските лидери е да ги формираат овие институции на власта и да ги спроведат неопходните реформи за да нема блокади во иднина.

„Се надеваме дека косовските лидери, како во политиката, така и во граѓанското општеството, ќе го преземат водството во решавањето на ова прашање, вклучително и давањето на конкретни предлози. Првиот и важен принцип е избраните пратеници во парламентот на Косово да присуствуваат на седниците на парламентот и да овозможат да почне неговата работа“, се наведува во соопштението што го објави амбасадата на САД во Косово.


Уапсен напаѓачот од Париз


Париз, 9 август, 2017 - 16:29 (META) 

Француските власти денеска соопштија дека полицијата го уапсила лицето кое со возило прегази и повреди војници во париското предградие Левалоа-Пере.

Како што јавуваат француските медиуми, напаѓачот, чиј идентитет и националност засега не се откриваат, е ранет за време на престрелката што се случила при неговото апсење.

Апсењето се случило на автопатот A-16, на северот на Франција, но полицијата засега не открива детали за настанот.