ЕК понуди помош за пронаоѓањето на убиецот на бугарската новинарка


Софија, 8 октомври, 2018 - 11:20 (META) 

Европската комисија соопшти дека со шок ја примила веста за убиството на бугарската новинарка Викторија Маринова (30), која работела на истражување за злоупотреба на ЕУ фондовите во Бугарија и ја понуди својата помош за пронаоѓањето на убиецот.

– Повторно еден храбар новинар настрада во борбата за вистината и против корупцијата. Внимателно ќе ја следам истрагата и ја нудам помошта од агенциите на ЕУ – рече Франс Тимерманс, потпретседателот на Европската Комисија.

Маринова во саботата беше пронајдена во парк во северниот бугарски град Русе. Била силувана, давена и претепана до смрт.

Нејзиното убиство уследи по телевизискиот прилог за наводна злоупотреба на ЕУ фондовите од бугарската компанија ГП „Груп“.

Сепак, бугарскиот министер за внатрешни работи, Младен Маринов, порача оти нема докази дека убиството е поврзано со нејзината работа.

– Станува збор за силување и убиство – вели тој.

Бугарскиот премиер Бојко Борисов соопшти дека убиецот наскоро ќе биде фатен, оти имало многу докази.

– Прашање на време е кога убиецот ќе биде пронајден. Во Русе се испратени најдобрите криминолози, да не им правиме притисок. Обезбедено е големо количество ДНК – рече тој.

Убиството на Маринова се случува по убиството на Јан Куциак во Словачка во февруари годинава и на Дафне Каруана Галиција во Малта пред една година. И овие двајца новинари истражуваа корупција во владите и злоупотреби од различни компании и групи.


Европската комисија ги повика Шпанија и Каталонија на дијалог


Брисел, 4 октомври, 2017 - 18:42 (META) 

Европската комисија ги повика Шпанија и Каталонија на дијалог, дури и ако постои општ консензус дека Каталонците го прекршиле шпанскиот закон за распишување реферндум за независност.

Потпретседателот на Европската комисија, Франс Тимерманс, изјавил дека каналите на комуникација помеѓу Шпанија и Каталонија мора да останат отворени.

Тимерманс додал дека е време за разговор за да се најде решение за безизлезната ситуација, во рамките на шпанскиот уставен поредок.

Во однос на повикот од страна на Каталонците, ЕУ да интервенира во спорот помеѓу Барселона и Мадрид, тој додаде дека се работи за внатрешно прашање на Шпанија, кое мора да се реши во рамките на шпанскиот устав.


Тимерманс: Границите на Западен Балкан треба да исчезнат за да се избегне иден конфликт


Брисел, 23 март, 2017 - 19:36 (META) 

Потпретседателот на Европската комисија, Франс Тимерманс, изјави дека границите на Западен Балкан не треба да постојат и оти со нивно бришење ќе се избегнат идни конфликти во овој регион.

– Границите можат да бидат есенцијални, тие може да бидат важни, тие можат да бидат релативно важни, тие можат да бидат неважни, но денеска тие се постоечки. Доколку останат постоечки, имајќи го предвид составот на регионот во поглед на демографијата и на етничката припадност, тоа долгорочно гледано е рецепт за катастрофа – оцени Тимерманс.

Тој истакна дека една од убавините на евроинтеграциите е процесот на исчезнување на границите, кои остануваат важни, но едноставно повеќе не постојат.

– Tоа се случи меѓу Франција и Германија, меѓу сите други земји по падот на Берлинскиот ѕид, а тоа треба да го направиме и со Западен Балкан – рече Тимерманс.

Потпретседателот на Европската комисија истакна дека ќе остане посветен на процесот на интегрирање на земјите од Западен Балкан во ЕУ.

– Тоа нема да се случи во мандатот на оваа комисија. Жан-Клод Јункер беше многу јасен во однос на тоа, но ќе се случи во некое идно време – заклучи Тимерманс.


Полска ги отфрли критиките на ЕУ за спорната реформа на уставниот суд


Варшава, 21 февруари, 2017 - 11:27 (META) 

Полска вчера испратила одговор до Европската комисија во кој ги отфрла критиките на Брисел во врска со спорната реформа на полскиот уставен суд, со оценка дека „спорот е решен“, јавуваат светските агенции.

Инаку, Европската Унија ѝ се закани со санкции на Варшава, што е прв ваков случај, кога станува збор за земја членка на ЕУ, поради спорната реформа во уставниот суд на земјата.

Полската конзервативна влада во својот одговор до Европската комисија, ги оценува како неосновани изјавите дека постои системска закана за владеењето на правото во Полска.

Според мислењето на Варшава, законите што неодамна ги донесе полската влада, а кои опозацијата во земјата ги оцени како неуставни, одговараат на европските стандарди и водат сметка за цела низа препораки на Венецијанската комисија. На тој начин, било посочено во одговорот до Брисел, прашањето за работата на уставниот суд е „решено во целост и конечно“.

Полската влада, според агенциите, во писмото го обвинила потпретседателот на Европската комисија, Франс Тимерманс, дека го политизира случајот и дека ги повикува другите земји членки на ЕУ да формираат единствен фронт против Полска. Владата во Варшава го повикала Тимерманс да „престане со таквото дејствување“.

Спорната реформа на уставниот суд пред една година предизвика политичка криза и бројни протести на улиците во Полска.


Полска доби официјално предупредување од ЕУ поради измените во уставниот суд


Брисел, 1 јуни, 2016 - 16:13 (META) 

Европската Унија денеска на Полска и упати официјално предупредување дека измените на законот кои се однесуваат на уставниот суд го загрозуваат владеењето на правото во земјата, членка на Унијата.

Потпретседателот на Европската комисија, Франс Тимерманс, изјавил дека комисијата го усвоила мислењето во кое се критикува полската влада поради постапките со кои го парализира уставниот суд.

По доаѓањето на власт на партијата на законот и правдата, полскиот парламент изгласа закон со кој и се овозможи на владата да именува судии во највисокиот суд и да не ги признава судиите избрани претходно.

Тимерманс изјавил дека синоќа разговарал со полската премиерка, Беата Шидло и дека добил уверување оти полската влада сака да го продолжи дијалогот со ЕК околу ова прашање.

– Европската Унија е изградена на заеднички интереси, содржани во договорите. Осигурувањето на владеењето на правото е колективна одговорност на сите институции на ЕУ и на сите земји-членки – рекол Тимерманс, пренесува „Гардијан“.


Туск порача дека договорот со Турција е привремен


Брисел, 16 март, 2016 - 16:09 (META) 

Претседателот на Европскиот совет, Доналд Туск, им нагласи на лидерите на ЕУ дека планираниот договор со Турција за запирање на приливот на бегалци и на мигранти на грчките острови ќе биде „привремена и вонредна мерка“.

Во пораката што ја упати до лидерите се наведени принципите од спогодбата, за која Туск се надева дека ќе биде склучена на утрешниот самит на ЕУ, а потоа потврдена в петок, на состанокот на лидерите на ЕУ со турскиот премиер, Ахмет Давутоглу, во Брисел.

Во пораката е нагласена потребата бегалците што стигнале во Грција да бидат вратени во Турција откако ќе бидат разгледани нивните барања во согласност со законите на ЕУ, но се додава и дека е неопходно Турција да ги заштити.

Привремената спогодба меѓу ЕУ и Турција за запирање на приливот на мигранти во замена за отстапки за Анкара, не претставува „бесплатно возење“, изјави денеска потпретседателот на Европската комисија, Франс Тимерманс.

Тој истакна дека Турција би требало да ги спроведе потребните мерки до крајот на април, за до крајот на јуни да обезбеди безвизен режим во ЕУ.

Лидерите на ЕУ ќе ја разгледаат предложената спогодба на самитот во Брисел, закажан за четврток и за петок.

Тимерманс истакна дека Европската комисија верува дека ќе биде постигнат конечен договор.


Иванов побара од Тимерманс неодложна помош за справување со бегалската криза


Брисел, 23 ноември, 2015 - 20:18 (META) 

Претседателот на Република Македонија, Ѓорге Иванов, денеска во Брисел се сретна со Франс Тимерманс, прв потпретседател на Европската комисија, со кој разговарал за предизвиците со кои се соочува земјата поради мигрантската и бегалската криза, како и за актуелната безбедносна состојба на европскиот контитент.

Претседателот Иванов го информирал Тимерманс дека од почетокот на кризата земјата се потпира на сопствени ресурси, додека помошта од Европската унија изостанува и побарал неодложна техничка и финансиска помош за земјата.

– Македонија ги сноси последиците од „нефункционален механизам на Унијата“ и од неспроведување на регистрација во земја-членка на Унијата. Република Македонија ги почитува сите меѓународни обврски во третманот на мигрантите, обрнувајќи сериозно внимание на хуманитарниот аспект и покрај преоптоварените капацитети. Клучно е враќањето на контролата врз надворешните граници на ЕУ. Потребна е заедничка стратегија на ЕУ и координирана меѓународна акција за решавање на проблемот – рече Иванов.

‎Потпретседателот на ЕК, Тимерманс, истакнал дека има разбирање за предизвиците со кои се соочува земјата во справувањето со бегалската и мигрантската криза и истакнал дека ќе се заложи за што е можно побрзо обезбедување на помошта и на поддршката од ЕУ.


Иванов во дводневна посета на Брисел, ќе се сретне со Тимерманс и Столтенберг


Скопје, 23 ноември, 2015 - 9:50 (META) 

Претседателот на државата, Ѓорге Иванов, од денеска ќе престојува во дводневна работна посета на Брисел, соопштија од кабинетот на претседателот.

Како што е предвидено, Иванов денеска ќе се сретне со првиот потпретседател на Европската комисија, Франс Тимерманс, а утре македонскиот претседател ќе оствари средба со Генералниот секретар на НАТО, Јенс Столтенберг.

„Во фокусот на разговорите на претседателот Иванов со неговите соговорници во Брисел ќе биде интеграцијата на Република Македонија во Европската унија и во НАТО, како и актуелните состојби поврзани со мигрантската и со бегалската криза“, стои во соопштението од кабинетот на Иванов.

ЕУ е подготвена да продолжи да ѝ дава поддршка на Македонија преку хуманитарна и техничка помош, преку агенциите на Унијата, изјави, пак, вчера во Скопје претседателот на Европскиот совет, Доналд Туск, на заедничката прес-конференција со претседателот Ѓорге Иванов.

– Подготвени сме да обезбедиме многу повеќе откако ќе имаме проценка за вашите потреби. Ќе зборувам со земјите-членки на ЕУ за тоа што повеќе може да се направи во оваа смисла за да се осигураме дека нашата поддршка за вашата земја и за регионот ќе биде на исто ниво како предизвиците со кои се соочувате – рече Туск.

Според Туск, безвизниот режим и шенгенската зона може да опстанат само доколку им се помогне и на земјите кои се први на ударот на бегалскиот бран.

– Доколку сме сериозни и сакаме да го задржиме шенгенскиот систем и патувањето без визи, тогаш мора да бидеме и сериозни и да им помогнеме на земјите кои се на првата линија како што е вашата – рече Туск, додавајќи дека секоја земја има право и обврска да ја штити својата граница.

Претседателот Иванов, од друга страна, посочи дека Македонија ги чувствува последиците од нефункционалниот механизам на Унијата за распоредување на бегалците во земјите-членки, од неспроведувањето регистрација на бегалци и на мигранти во земја-членка на Унијата, како и од едностраните национални одлуки во земји-членки на Унијата кои го ограничија протекот на лицата без претходно да информираат за ваквите чекори. Иванов истакна дека Македонија досега нема добиено помош од ЕУ за справување со миграциската криза.