!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Трет Форум на цивилното општество од Балканот – претходница на самитот во Трст


Трст, 11 јули, 2017 - 15:51 (META) 

Третиот Форум на цивилното општество, кој е претходница на самитот на Западен Балкан, почна денеска во Трст со присуство на околу 200 претставници на граѓанскиот сектор од Албанија, Црна Гора, Босна и Херцеговина, Косово, Македонија, Србија и од другите делови од регионот, како и од Европа.

Хедвиг Моравија, извршна директорка на Европскиот фонд за Балкан, истакна дека препораките од Форумот директно ќе им бидат дадени на шефовите на дипломатиите, кои со своите премиери и други министри утре ќе учествуваат на самитот Западен Балкан – ЕУ, исто така во Трст.

– Ние се обидуваме да се занимаваме со вистински теми. Бидејќи никој нема да нè слуша ако дискутираме за јаболката, а сите се занимаваат со портокалите – изјави симболично Моравија.

Валтер Кауфман, шеф на германската фондација „Хајнрих Бел“ за Југоисточна Европа, порача дека вложуваат многу енергија во соработката меѓу цивилното општество и владите, бидејќи порано се случувало препораките од цивилното општество да не бидат сериозно разгледувани на државно ниво. Подоцна на средба со новинарите Кауфман изрази потреба од нов приод на цивилниот сектор.

– Цивилниот сектор понекогаш функционира во некој свој „балон“, во затворен круг, а тоа би морало да се промени. Мораме да го охрабриме повеќе да се работи со обичните луѓе, со луѓето на улица, за да се стори сè нивните гласови подобро да се слушнат. Со тоа политичарите – популисти, би имале помалку шанса да тврдат дека настапуваат во името на обичните граѓани – изјави Кауфман, чија фондација е соорганизатор на Форумот и на панел-дискусијата посветена на „Околината, енергијата и климатските промени“.

На Форумот се расправа за демократијата, за креативните индустрии и за младите, за чистата енергија и за климатските промени, за миграциите, за улогата на медиумите и за друго.

Од Македонија на Форумот во улога на панелисти или модератори се најавени Бардил Јашари од Фондацијата за интернет и општество „Метаморфозис“, Дона Костуранова од МОФ, Мартина Смилевска од Здружението на млади правници, Симонида Кацарска од Институтот за европски политики и други.

Форумот завршува утре, кога претставници од цивилниот сектор на шефовите на дипломатиите на шесте земји од Западен Балкан, меѓу кои и на Никола Димитров, ќе им ги предадат препораките.

Вчера во Сараево се одржа и друг традиционален Форум на невладини организации, чии препораки исто така се земаат предвид на самитот во Трст, бидејќи цивилното општество е задолжителен дел од т.н. Берлински процес за Балканот, кој треба да го доближи регионот до ЕУ.


Форум на невладините организации од Западен Балкан


Сараево, 10 јули, 2017 - 16:57 (META) 

Повеќе од 100 претставници на невладини организации од регионот на Западен Балкан и од ЕУ, се собраа денеска во Сараево за да дискутираат за проблемите на граѓанската организираност и за учеството на граѓаните во изградба на јавните политики, како и за поврзаноста на активностите во регионални рамки.

Станува збор за шести Форум на невладиниот сектор, кој е во организација на Европскиот економско-социјален одбор и на Регионалниот совет за соработка (РСС).

– Цивилното општество мора да има право на глас кога станува збор за реформирање и за развој на нашите општества. Постојат многу докази за тоа дека улогата на цивилните општества на Западен Балкан сè уште се потценува, иако сите имаат корист од силно, проактивно и независно цивилно општество – изјави генералниот секретар на РСС, Горан Свилановиќ.

Олаф Дусен, главен советник за човекови права при ЕУ-делегацијата во БИХ, смета дека колку се посилни цивилните општества внатре и надвор од Европа, толку се посилни и демократските институции и дека истото се однесува и на Западен Балкан.

Најважните теми на дневниот ред на Форумот на цивилното општество на Западен Балкан се улогата на невладините организации во помагање на одржливиот пораст, вработувањето, миграцијата, слободата на изразување и медиумите и правата на жените.

Овој форум е дел од Берлинскиот процес и заклучоците ќе бидат земени предвид во понатамошните регионални политики на владите од Балканот.


Курц: На ЕУ ѝ се потребни помалку правила, но тие треба да се јасни и да се почитуваат


Вахау, 10 јуни, 2017 - 17:01 (META) 

Австрискиот министер за надворешни работи, Себастијан Курц, изјави дека на Европската Унија ѝ се потребни помалку правила, но дека тие треба да бидат јасни и да се почитуваат.

„Денес мора да признаеме дека сме во критична фаза, но добрата вест е дека иако сме во Европската Унија, нам ни останува да осигураме дека таа се развива во добар правец. Правилата кои сами ги создадовме, мора да ги почитуваме“, изјавил Курц на Европскиот форум во Вахау.

Во однос на безбедноста, тој кажал дека Европа треба да соработува со партнерите, но мора да биде во состојба сама да ги штити надворешните граници.

„За решавање на мигрантската криза, потребна е соработка со соседите, но не и зависност од нив. Не смееме да дозволиме да нè уценуваат“, изјавил тој.


Форум во Белград: Македонија да спроведе реформи во управувањето со јавни финансии


Скопје, 8 јуни, 2017 - 16:16 (META) 

Еврокомесарот за проширување и за соседска политика, Јоханес Хан, претседателката на Сојузот на стопански комори на Македонија (ССК), Данела Арсовска, и министерот за економија на Албанија, Милва Економи, го отворија „Форумот за унапредување на инвестициската клима меѓу ЕУ и Западен Балкан“, во организација на Генералниот директорат за проширување на Европската комисија.

На првата панел-сесија, Хан и Арсовска дискутираа за неопходноста од структурните реформи за подобрување на инвестициската клима, регионалната економска интеграција, како и за приближувањето кон единствениот пазар на ЕУ.

Еврокомесарот Хан во своето обраќање истакна дека условот за креирање, имплементација и за следење на структурните реформи не се дополнителна пречка за земјите на нивниот пат кон членство во ЕУ.

Од заклучоците за економскиот и финансиски дијалог помеѓу ЕУ, државите од Западниот Балкан и Турција, произлезе потребата Македонија да усвои сеопфатна и веродостојна програма за реформи во управувањето со јавните финансии, како и да ја намали употребата на постапката за итност во законодавството за да се обезбедат соодветни и систематски консултации со засегнатите страни.


„Македонија 2025“ организира форум во Стокхолм за соработка помеѓу компаниите


Стокхолм, 26 мај, 2017 - 12:21 (META) 

Форум за претставување на можностите за соработка помеѓу Македонија и Шведска ќе се одржи на 13 и 14 јуни во Стокхолм. Форумот го организира платформата „Македонија 2025“ во соработка со Амбасадата на Македонија во Шведска и бизнис-регионот околу Стокхолм.

Овој настан е продолжение на иницијативата на „Македонија 2025“ за поврзување на македонски професионалци и експерти во различни сфери, кои живеат низ Европа, како и промовирање на потенцијалите за инвестиции и соработка во Македонија. Исто така, форумот е продолжение на самитот на „Македонија 2025“ лани, каде главните дискусии беа во областа на обновливите извори.

Фокусот на настанот во Стокхолм ќе бидат успесите во сферата на одржливиот развој на Стокхолм, технолошките достигнувања што се применуваат во Шведска во тој поглед, успешните примери на македонско-шведска деловна соработка и можностите за деловна соработка и инвестиции.

На форумот ќе настапат претставници и експерти од познати компании во Македонија и Шведска како и претставници од институциите на двете земји.


Претседателот Иванов ќе одржи предавање на Глобалниот лидерски форум во Турција


Анкара, 6 мај, 2017 - 11:19 (META) 

Претседателот Ѓорге Иванов ќе одржи предавање на Глобалниот лидерски форум, кој се одржува во Турција, соопштија од неговиот кабинет.

Темата на форумот е „Стратешки алијанси и нов поглед на лидерството во услови на глобален баланс на силите“.

Меѓу темите на дискусија на Глобалниот лидерскиот форум се „Претседателството на Трамп: Промени во американската политика и нејзиното влијание врз светскиот поредок“, „Идни сценарија за Европската Унија“, „Улогата на Јужна Америка во светскиот поредок“ и „Безбедноста и политички анализи за Средниот Исток“. 


Во Тирана се одржува Форум на граѓански здруженија од Западен Балкан


Охрид, 26 април, 2017 - 15:20 (META) 

Форум на граѓански организации од Западен Балкан се одржува во Тирана од денеска до 28 април, пишува весникот на македонски јазик „Илинден“.

Средбата е во функција на претстојниот Самиот за Западен Балкан, кој се планира да се одржи во јули во Трст.

Целта  е да се предложат конструктивни и изводливи политики, кои поддржуваат реформски процеси во земјите на Западен Балкан на нивниот пат кон ЕУ.

Учествуваат стотина претставници на граѓански организации од Македонија, Србија, Црна Гора, Босна и Херцеговина, и од домаќинот Албанија, како и претставници на европски институции, парламенти на земјите од Западен Балкан, како и италијанското Министертвото за надворешни работи.

На форумот се говори за тоа како граѓанскиот сектор придонесува во изградбата на европската агенда и европската политика, како и за соработката на младите, а ќе бидат формулирани препораки за Самитот во Трст.

Тие се однесуваат на иднината на Берлинскиот процес, соработката на младите, владеењето на правото и на антикорупцијата, иновациите, билатералните односи, јавуваат албанските медиуми.


Арсовска: Бизнис-секторот во Македонија се соочува со голема неизвесност


Истанбул, 5 април, 2017 - 15:52 (META) 

„Бизнис-секторот во Македонија се соочува со голема неизвесност поради внатрешни и надворешни фактори“, изјави претседателката на Сојузот на стопански комори на Македонија, Данела Арсовска, на обраќањето на 20. Евроазиски економски самит во Истанбул.

Таа како фактори ги посочи тешкотиите на економиите во регионот и влијанието на рецесијата во соседните земји, но пред сè мигрантската криза и бранот бегалци кои пристигаат на нашата јужна граница.

„Сведоци сме на перманентна криза и на огромни промени кои се случуваат на глобално ниво. Оваа состојба влијае не само на нашата економијата, туку и на сите европски држави по Коридорот 10, преку кризата предизвикана од блокади во патниот и во железничкиот сообраќај, а секако длабоко ги погодува секторите енергетика, трговија како и транспортната индустрија. Во вакви услови, бизнис-секторот меѓународно се воздржува од инвестиции и од развој и не ги вложува ресурсите за реализација на планираните проектните активности, што креира дополнителни долгорочни проблеми“, изјави Арсовска во своето обраќање.

Таа посочи дека потребно е да се движиме напред преку развиена економија во услови на здрава животната средина и преку поголемо искористување на модерната технологија во сите сегменти на животот.

На форумот во Истанбул присуствуваат претседатели на држави и на влади, како и истакнати високи владини претставници.


Иванов денеска и утре во работна посета на Азербејџан


Баку, 15 март, 2017 - 10:47 (META) 

Претседателот на државата, Ѓорге Иванов, денеска и утре ќе престојува во работна посета на Баку, Република Азербејџан, по повод учеството на петтиот Глобален форум, во организација на меѓународниот центар „Низами Ганџави“, соопштија денеска од кабинетот на Иванов.

Иванов во Баку ќе има обраќање на претседателската сесија на форумот на тема „Иднината на меѓународните односи: Моќ и интереси“, а за време на посетата предвидено е тој да се сретне со претседателот на Азербејџан, Илхам Алијев.

„На глобалниот форум ќе учествуваат повеќе од 100 актуелни и поранешни претседатели, премиери и министри, дипломати, голем број истакнати личности од општествениот и од политичкиот живот, универзитетски професори, како и претставници на програмата за млади лидери на Глобалниот форум. Меѓу другото, на годинешнот форум ќе се дискутира за иднината на Европа, улогата на Кина во меѓународните односи, односите меѓу Русија и Западот, предизвиците во справувањето со модерниот тероризам, за тоа дали екстремизмот и популизмот се најголема закана за безбедноста, иднината на трансатлантските односи, за алијанса меѓу западот и муслиманските држави“, стои во соопштението од кабинетот на Иванов.

Посетата на Иванов на Азербејџан се случува во период на тензична атмосфера и блокирани институции во земјава, откако претседателот одби да му го даде мандатот за состав на влада на лидерот на СДСМ, Зоран Заев.


Бизнис-форумот на Копаоник ќе се одржи од 7 до 9 март, ќе има и претставници од Македонија


Скопје, 3 март, 2017 - 10:47 (META) 

Традиционалниот бизнис-форум на Копаоник, годинава ќе се одржи од 7 до 9 март и на него ќе учествуваат повеќе од 1.000 учесници, високи државни функционери и влијателни бизнис-лидери, кои ќе ја разгледуваат програмата за реформи, не само во Србија, туку и во регионот.

На првиот ден на форумот, говорник ќе биде и претседателот на Стопанската комора на Македонија, Бранко Азески, кој ќе зборува на темата „Реформска програма на регионалните инвестиции: Еден регион, едно стопанство“.

Во хотелот „Гранд“ на Копаоник, каде ќе биде одржан тридневниот форум, ќе бидат одржани 20 панел-дискусии, три пленарни сесии, четири специјални случувања и две панел-презентации. Тема на форумот е „Програма за реформи во Србија: Што може да се научи од минатото и кои се решенијата за иднината“.