„Форбс“ ја објави листата на најбогати луѓе за 2018 година


Њујорк, 7 март, 2018 - 11:36 (META) 

Престижниот магазин „Форбс“ ја објави најновата листа на најбогати луѓе во светот за 2018 година.

На оваа листа се најдоа 2.208 милијардери од кои, Амерканците предводат со 585 милијардери, по што следува Кина со 373 милијардери.

Прв на листата на најбогати луѓе во светот е основачот на „Амазон“, Џеф Безос, а на второто место е сопственикот на „Мајкрософт“, Бил Гејтс.


Седма година по ред, Ангела Меркел е највлијателна жена според магазинот „Форбс“


Њујорк, 1 ноември, 2017 - 20:47 (META) 

Магазинот „Форбс“ ја прогласи германската канцеларка Ангела Меркел за највлијателна жена во светот за 2017 година. Меркел на врвот на листата на „Форбс“ се наоѓа веќе седма година по ред. Листата на 100 највлијателни жени беше објавена денеска.

На второто место се наоѓа британската премиерка Тереза Меј, која доаѓа на местото на поранешната државна секретарка на САД, Хилари Клинтон. Таа на оваа позиција на „Форбс“ беше лани.

На трето место на листата на највлијателни жени е и Мелинда Гејтс, сопругата на основачот на компанијата „Мајкрософт“, Бил Гејтс.

Помеѓу десетте највлијателни жени во светот се и директорките на компаниите „Јутјуб“, „Фејсбук“, како и шефицата на Меѓународниот монетарен фонд, Кристин Лагард.


Основачот на „Амазон“, Џеф Безос е најбогатиот човек во светот


Њујорк, 27 јули, 2017 - 20:25 (META) 

Основачот на „Амазон“, Џеф Безос, е на прво места на листата на најбогати луѓе во светот откако цената на акциите на компанијата се зголеми, пишува магазинот „Форбс“, кој секоја година прави ранг-листа на најбогати луѓе во светот.

Аналитичарите проценуваат дека цената на акциите на „Амазон“, која сега изнесува 1.071 долари за една акција, ќе се зголеми двојно. Безос поседува 17 проценти од акциите на „Амазон“ и неговото богатство се проценува на нешто повеќе од 90 милијарди долари.

На второ место по богатство е основачот на „Мајкрософт“, Бил Гејтс, кој беше прв на листата од 2013 година. Гејтс има една милијарда помалку од Безос, односно 89 милијарди долари.


Почина Мајк Илич, еден од најголемите донатори на ОМД


Детроит, 11 февруари, 2017 - 13:16 (META) 

Вчера на 87-годишна возраст почина Мајк Илич, еден од најбогатите Македонци во светот и еден од најголемите поддржувачи и долгогодишен донатор на Обединета македонска дијаспора (ОМД).

Веста ја соопштија локалните медиуми од Детроит, каде тој важеше за исклучително почитуван и влијателен граѓанин.

Мајк Илич (односно Мајк Илиевски, по татково презиме), е роден во САД, а по потекло е од Македонија. Тој е роден во 1929 година како прва генерација од децата родени во САД на македонските иселеници Сотир и Султана Илиевски.

Списанието „Форбс“ во листата на најбогати лица во светот за 2016 година, процени дека тој се наоѓа на 86. место меѓу 400 најбогати Американци. Неговото богатство беше проценето на шест милијарди долари.

Семејството Илич го поседува ланецот од пицерии „Малиот Цезар“ (Little Caesar’s Pizza) кој е распространет во САД и во Канада, и кој се смета дека е на трето место по „Пица хат“ и „Доминос“.

Илич беше сопственик и на хокеарскиот тим „Ред рок вингс“, како и на бејзбол тимот „Детроит тајгерс“.


Основачот на „Зара“, Амансио Ортега, е најбогатиот човек во светот


Њујорк, 9 септември, 2016 - 19:44 (META) 

Основачот на модниот бренд „Зара“, Амансио Ортега, е прогласен за најбогат човек во светот од страна на магазинот „Форбс“.

Неговите акции во компанијата „Индитекс“, во чијашто сопственост се наоѓа „Зара“, бележат пораст на вредноста за 2,5 проценти и тоа го зголеми богатството на Ортега на 79,5 милијарди долари, пишува „Форбс“.

По Ортега, втор најбогат човек е основачот на „Мајкрософт“, Бил Гејтс, чиешто богатство се проценува на 78,5 милијарди долари.


„Форбс“ повторно ја прогласи Меркел за најмоќна жена


Њујорк, 6 јуни, 2016 - 18:30 (META) 

Германската канцеларка Ангела Меркел шести пат по ред е на првото место на листата на најмоќни жени што ја објавува магазинот „Форбс“.

Листата од 2004 година се составува врз основа на повеќе фактори, меѓу кои парите, медиумскиот интерес и влијанието.

На листата на највлијателни жени на светот има 100 жени од 29 земји, а меѓу нив има политичарки, деловни жени, филантропи, вклучувајќи 12 лидери на држави и на влади, 32 директорки на големи компании и 11 милијардерки.

Најмлада жена на листата е 41-годишната директорка на „Јаху“, Мариса Маер, која се наоѓа на 55. место, а најстара е британската кралица Елизабета Втора, на 29. место.

Ангела Меркел. која шест години по ред е на првото место, досега вкупно 11 пати била највлијателна жена според „Форбс“.


Македонија на 39. место во светот за водење бизнис


Вашингтон, 8 јануари, 2016 - 12:37 (META) 

Американскиот бизнис-магазин „Форбс“ објави листа на најдобри земји за бизнис (The Best Countries for Business). Македонија се најде на 39. место, пред Србија, Албанија, Бугарија, Хрватска, Црна Гора и БИХ. Словенија е на 20. место, САД се на 22. позиција, Австрија е на 28. место, Унгарија на 42. место, под редните броеви 44, 45 и 46 се Романија, Бугарија, Хрватска, Црна Гора е на 49. позиција, Грција го има 50. место, Албанија е под реден број 69, БИХ е на 78. место, а соседна Србија е дури на 83. место.

На листата на „Форбс“ за најдобри земји за бизнис се вклучени 144 земји, подредени врз основа на 11 критериуми, меѓу кои се: право на имот, иновации, данок, технологија, корупција, слобода (лична, финансиска, пазарна), заштита и безбедност на инвеститорите.

Првите десет земји на оваа листа се Данска, Нов Зеланд, Норвешка, Ирска,
Шведска, Финска, Канада, Сингапур, Холандија и Велика Британија.


Владимир Путин е најмоќна личност според „Форбс“


Њујорк, 5 ноември, 2015 - 10:05 (META) 

Според најновата листа на најмоќни личности на магазинот „Форбс“ за 2015 година, рускиот претседател Владимир Путин се наоѓа на првото место трета година по ред. По него се лидерите на Германија и на САД.

– Путин и понатаму е еден од малкумината кои се доволно моќни да го прават тоа што го сакаат и тоа да „им помине“ – наведува „Форбс“ во своето објаснување.

На второ место е најмоќната жена, германската канцеларка Ангела Меркел, која годинава забележа скок од петтото место на кое беше минатата година.

Таа, како што пишува „Форбс“, е столб на 28 членки на Европската унија и е одлучна во решавање на проблемите со бегалците што доаѓаат во Европа, а и влијаеше врз решавањето на грчката финансиска криза.

Американскиот претседател Барак Обама, според „Форбс“, го губи своето влијание и се ноѓа на третото место.

Папата Франциск е на четврто место, а на петто е кинескиот претседател Си Џинпинг.

Критериумите по кои личностите се рангираат се однесуваат на тоа дали остваруваат власт над голем број луѓе, со колкави финансиски средства располагаат, дали се влијателни во повеќе сфери и дали активно ја спроведуваат власта.


Адам Сендлер е најпреплатен актер за 2014 година


Њујорк, 24 декември, 2014 - 15:25 (META) 

Комичарот Адам Сендлер е на врвот на листата на Форбс за преплатени холивудски актери веќе втора година по ред. Иако „Возрасните 2“ достигна 264 милиони долари на кино-благајните, не ги надомести претходните лоши остварувања со „Џек и Џил“ и „Тоа е моето момче“.

– Проценуваме дека за секој еден долар за кој Сендлер беше платен, тој заработи во просек по 3,20 долари. Тоа е најнискиот повраток на инвестиција на кој било актер што списанието го истражувал – велат од „Форбс“.

Џони Деп го зазеде второто место, со заработка во просек од 4,10 долари за секој платен долар, а комичарот Бен Стилер e на третото со заработка од 4,80 долари. На четврто место е Рајан Рејнолдс со 4,90 долари, а на петто Том Хенкс со 5,20 долари. Вил Фарел е на шестото место со заработка од 6,60 долари на платен еден долар, Ченинг Татум на седмото место со 6,70 долари, Дензел Вашингтон со 6,90 долари е на осмото место, Сандра Булок е девета со 9 долари и Бен Афлек е десети со 9,37 долари.


Македонија според „Форбс“ е на 31. место за водење бизнис


Њујорк, 18 декември, 2014 - 11:42 (META) 

Според извештајот за најдобри земји за водење бизнис во светот на финансискиот магазин „Форбс“, Македонија е рангирана на 31. место од 146 земји, што е подобрување од пет места во споредба со минатата година и за шест места во однос на 2012 година.

Најдобра земја за водење бизнис е Данска, која беше на прво место три години по ред, од 2008 до 2010. На второ место е Хонгконг, на трето Нов Зеланд, на четврто Ирска, на петто Шеведска.

Од земјите во регионот, Словенија е на 14. место, Бугарија на 42. позиција, Хрватска на 46. место, Црна Гора на 48. место, Грција на 51. позиција, Албанија на 58. место, а Србија на 84. позиција.

На дното на листата, како земји најнепогодни за бизнис се Гвинеја, Чад и Либија.