Унгарска вечер во Прилеп


Прилеп, 6 август, 2018 - 10:34 (META) 

Со почеток во 20.30 часот на просторот околу Градскиот Саат во Прилеп, денеска ќе се одржи Унгарска вечер, на која ќе настапат оркестарот „Фокош“ и ФГ „Селенце“. Овој културен настан е организира од Центарот за култура „Марко Цепенков“ од Прилеп, во соработка со Здружението на Унгарци „Телехаз“ и Амбасадата на Унгарија.

Интересно е што Фолклорната група „Селенце“ доаѓа од Бечеј, Војводина, односно Србија. Од истиот град доаѓа и оркестарот „Фокош“.


Македонија на Мултијазичен фестивал во Кожани


Атина, 13 јуни, 2016 - 11:40 (META) 

Македонија настапи на вториот Мултијазичен фестивал кој викендов се одржа во Кожани, Грција. На фестивалот учествуваше македонскиот фолклорен оркестар „Рудина“ од Битола, заедно со културно-уметнички друштва од Грција, Бугарија и од Турција.

Оркестарот се претстави со повеќе македонски фолклорни песни. Во пријатна атмосфера, оркестарот беше добро прифатен и направи одлична забава за посетителите. Веселите звуци на нашиот мелос ги поттикнаа на заедничко оро сите членови на културните здруженија од Грција, Бугарија, Турција кои настапуваа на фестивалот, но и голем број од посетителите на Кожани.

Учеството на фестивалот во Кожани на македонска група доаѓа само една недела откако на Фестивалот на мултијазичноста во Солун настапи македонски хор од Битола. Иницијатор на овие учества е генералниот конзулат на Македонија во Солун и конзулката Маја Апостолова.

За вчерашниот настап во Кожани, Апостолова ни изјави дека концертот покажал силен изблик на балканско братство и заедништво. Претходно, таа во обраќањето до присутните на настанот, посочи дека конзулатот ги поддржува целите на фестивалот, но и општо сите активности во насока на негување и на промоција на јазичната разноликост и на богатата музичка и фолклорна традиција во регионот.


Во Прилеп почнува фестивалот „Пеце Атанасоски“


Прилеп, 3 јули, 2015 - 11:03 (META) 

Денеска и утре, во Прилеп и на Рудина кај Долнени ќе се одржи 4. фестивал на народни инструменти и песни „Пеце Атанасоски“.

В сабота на Рудина, фестивалот ќе го поздрави претседателот на Македонија, Ѓорге Иванов. Во меѓувреме, од 30 јуни до крајот на фестивалот, се одржува семинар за изучување на македонскиот изворен мелос, беше соопштено на денешната средба со новинарите во Домот на културата „Марко Цепенков“ во Прилеп.

Според уметичкиот директор на фестивалот, Родна Величковска, фестивалот цели четири децении ја негува традиционалниот македонски фолклор.

– Од 500 пријавени, селекционата комисија избра 300 учесници од сите краишта на Македонија, а дваесетина што учествуваат на семинарот се од Русија и од Србија. Ансамблот „Волја“ од Вороњеж, Русија, го изучува традиционалното пеење, а гостите од Србија народните инструменти – рече Величковска.

Фестивалот почнува в петок, од 20 часот, со дефиле на сите учесници по булеварот Гоце Делчев, во центарот на Прилеп, а првата фестивалска вечер со учесниците на камената бина на плоштадот Александрија.
В сабота, од 11 часот, во киното „Мис Стон“ ќе се одржи презентација на филмот за јубилејното 40. издание на фестивалот, а од 12 часот во галеријата на Домот на културата „Марко Цепенков“ – трибина на тема „Влијанието на фестивалот во зачувување на македонскиот изворен мелос во Македонија и надвор од неа“.

Според Илчо Јованов, претседател на советот на фестивалот, тој ја исполнува својата мисија која ја почна неговиот основач, светскиот гајдаџија Пеце Атанасоски.

– Живее македонската традиционална музика и свирењето на инструменти. Семинарот на фестивалот го овозможува тоа зашто и македонските генерации и гостите од странство детално ја запознаваат македонската изворна песна. Предавачи на семинарот сме заедно со професорите Родна Величковска и Горанчо Ангелов од музичката академија при Универзитетот „Гоце Делчев“ од Штип. Новите генерации млади и студенти се едноставно вљубени во изворните инструменти: тапанот, гајдата, кемането – вели Јованов.

Досега, во четирите децении одржување на фестивалот учествувале повеќе од 9.000 исполнители на народни инструменти и песни од земјава и од речиси сите континенти. В сабота, фестивалот ќе ги додели наградите, главната награда за најдобри изведувачи и гајдата на „Пеце Атанасовски“ за најдобар странски изведувач на гајда која ја обезбедува Општина Долнени.


Повеќе од 300 изведувачи ќе настапат на фестивалот „Пеце Атанасовски“


Прилеп, 7 јуни, 2015 - 15:51 (META) 

Собранието на фестивалот „Пеце Атанасовски“, денеска, на состанок во Институтот за фолклор „Марко Цепенков“, ја детализираше годинашната програма, која ќе го врати и традиционалното дефиле на учесниците во центарот на Прилеп.

Според претседателот на Собранието, проф. д-р Илчо Јованов, фестивалот ќе донесе богата програма.

– На трети јули почетокот ќе го означи дефилето на учесниците во центарот на Прилеп. Ќе се разлеат народните инструменти и песни. Дел од нив ќе настапат на првата вечер на камената бина на плоштадот Александрија. Втората фестивалска вечер е на 4 јули, во сабота, на Рудина кај Долнени. Освен тоа, и годинава од 30 јуни до 3 јули ќе се одржи семинарот за изучување народни инструменти и песни, а најавени се учесници од Русија, Грција, Бугарија и од Србија. Фестивалот преку четири децении ги негува изворните фолклорни традиции во Македонија, ги зачувува и го претставува фолклорното богатство во светот – изјави Јованов.

Уметничкиот директор, проф. д-р Родна Величковска од Институтот за фолклор „Марко Цепенков“, вели дека селекцијата се заокружува и од преку 500 пријавени, тешко е да се одберат половината од учесниците.

– Има и многу млади кои ја продолжуваат богатата изворна традиција и тоа многу радува. Ги посетивме повеќето места во цела Македонија и секаде има извонредни пејачи и изведувачи на народни инструменти, на гајда, зурла, тамбура, тапан, кемане – вели Величковска.

Дел од програмата е традиционалната трибина за тековите на изворното творештво, годинава посветена на фестивалот „Пеце Атанасовски“ и неговата улога во зачувувањето и во афирмацијата на изворното богатство во Македонија и во светот. Ќе биде промовирана и документарната емисија „Непресушен извор“, посветена на 40. јубилејно издание на Фестивалот на народни инструменти и песни „Пеце Атанасовски“.


Во Тирана почина Цветан Мазнику, фолклорист и активист за правата на Македонците


Тирана, 8 јануари, 2015 - 9:49 (META) 

Во Тирана, на 80-годишна возраст, почина Цветан Мазнику, голем македонски активист и собирач на фолклорот на Македонците во Албанија. Автор е на една од двете првообјавени книги на македонски јазик во Албанија. Има објавено повеќе од 660 поговорки, а собрал околу 3.000 поговорки, клетви, благослови и други творби од областа на Голо Брдо. Од 1990 година активно собира народно творештво од овој крај.

Роден е во Клење, едно од 22-те села во оваа област. Заедно со професорот Ким Фетаху,од Тирана, го основаа Друштвото на Македонците „Мир“.

Македонското друштво „Илинден“ од Тирана, меѓу првите искажа најискрено сочувство кон семејството на, како што велат, големиот Македонец.

„Со длабока тага ја примивме веста за смртта на Цветан Мазнику. Мазнику беше долгорочен активист на Македонците од Голо Брдо, автор на неколку книги и статии. Со неговите дела помогнал многу за пренесување на македонските обичаи, фолклор, традици за помладите генерации на Македонците во Република Албанија – соопштија од друштвото.

Мазнику 20 години работел во рудникот за хром во Подградец, потоа во Тирана, во Институтот за истражување. Во Заедница на Македонците беше еден од најголемите поборници за остварување на нивните права во Република Албанија.


Македонско-хрватска фолклорна вечер во Прилеп


Прилеп, 13 ноември, 2014 - 10:31 (META) 

Вечерва, од 19.30 часот, во ЦК „Марко Цепенков“ во Прилеп, ќе се одржи македонско-хрватска фолклорна вечер, на која ќе настапат гостите КУД „Далмација – Дуги рат“ од Сплит, и домаќините, КУД „Мирче Ацев“  и КУД „Илинден“ од Битола.

Друштвото „Далмација – Дуги рат“ од Хрватска постои од 1967 година и го негува изворниот хрватски фолклор, особено од Далмација, како и фолклорот од загорското поднебје. Брои околу 200 членови, кои дејствуваат во шест групи.