!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Пет лица се убиени во напад на аеродром во Флорида


Мајами, 7 јануари, 2017 - 10:33 (META) 

Најмалку пет лица загинаа, откако напаѓач вчера попладнето отвори оган на меѓународниот аеродром Форт Лодердејл, на Флорида, пренесуват британските медиуми, повикувајќи се на официјални претставници и на сведоци.

– Во инцидентот пет лица се убиени, а осуммина се ранети – соопштија од канцеларијата на локалниот шериф.

Телевизијата „Ем-ес-ен-би-си“, повикувајќи се на очевидци, јавува дека напаѓачот е маж во 20-тите години и оти директно пукал во патниците кои го чекале багажот. Полицијата го застрелала кога се обидел да избега, по што е приведен.

Американските медиуми, повикувајќи се на претставник на американските правосудни власти, јавуваат дека напаѓачот е идентификуван. Станува збор за 26-годишниот Естебан Сантијаго, кој за ФБИ во ноември минатата година изјавил дека владата го контролира неговиот ум и го принудува да гледа видеоснимки на групата Исламска држава.

Роднини на напаѓачот изјавиле дека Сантијаго имал психички проблеми, од кои некои се појавиле по завршување на неговата мисија во Ирак, за што почнал да добива лекување во својот дом на Аљаска.

Веднаш по апсењето, Сантијаго е однесен на психијатриска проценка.

Напаѓачот во Форт Лодердејл пристигнал со лет од Енкориџ, а оружјето што кое употребил било скриено во неговиот единствен пријавен багаж. Полицијата вели дека не е необично патници на аеродромот со багажот да го чекираат и своето огнено оружје, затоа што во регионот има многу ловци.


Ураган ја погоди Флорида, илјадници домаќинства без струја


Вашингтон, 2 септември, 2016 - 10:19 (META) 

Рано утринава, по локално време, ураганот Хермин го погоди брегот на Флорида, предизвикувајќи прекин на снабдувањето со електрична енергија, јавуваат американските медиуми, наведувајќи дека 270.000 домаќинства се во мрак.

Ураганот Хермин на копното донел ветрови со брзина од 130 километри на час и силен дожд.

Националниот урагански центар предупредува дека во некои места се очекува нивото на водата во поплавените делови да достигне висина и до три метри.

Состојба на говотност е прогласена во 51 округ во Флорида, додека наставата е откажана во најмалку 20 училишта. Задолжителни евакуации се вршат во пет окрузи на северозападот на Флорида.


САД се соочуваат со првите случаи на заразени со вирусот зика на домашно тло


Мајами, 29 јули, 2016 - 18:59 (META) 

Соединетите Американски Држави најверојатно се соочуваат со првите случаи на лица заразени со вирусот зика на домашно тло, сооштиле денеска здравствените власти на САД, пренесува „Би-би-си“.

Загриженоста следува откако кај четири лица од американската сојузна држава Флорида бил констатиран вирусот, а кој, според информациите, не бил пренесен преку сексуален контакт или за време на патување во регионите каде е присутен вирусот, односно во земјите од Латинска Америка и на Карибите.

Четирите случаи, како што пренесува британскиот национален сервис, ги зголемуваат стравувањата дека комарците во САД сега можат да го пренесуваат вирусот зика.

Вирусот зика кај повеќето луѓе предизвикува благи заболувања, но е многу опасен за новороденчињата, кај кои предизвикува сериозни оштетувањата на мозокот.

Гувернерот на Флорида, Рик Скот, изјавил дека станува збор за тројца мажи и за една жена и дека ниту еден од нив не е хоспитализиран.

Сепак, американската агенција за храна и за лекови побарала донациите на крв во двете области во Флорида, каде живеат заболените, да бидат прекинати, а сите претходни да бидат тестирани за вирусот.

Досега во САД се регистрирани вкупно 1.650 случаи на заболени од зика, но случајот во Флорида најверојатно е првиот каде вирусот не е пренесен преку сексуален однос или патување во странство.

Во февруари оваа година, Светската здравствена организација (СЗО) го прогласи вирусот зика за глобална закана, поради ризикот по здравјето на новороденчињата.


Пукотници во ноќен клуб во Флорида, двајца убиени и 17 повредени


Форт Мајерс, 25 јули, 2016 - 10:32 (META) 

Најмалку едно лице е убиени за десетина се повредени во пукање во ноќниот клуб „Блу“ во Форт Мајерс, во сојузната американска држава Флорида, јавуваат американските медиуми. Според податоците на „Ен-би-си њуз“, пак, двајца се убиени, а 17 лица се повредени.

Инцидентот најверојатно се случил за време на тинејџерска забава, а според некои извори, посетителите биле на возраст од 13 години.

Засега нема официјални детали за инцидентот, ниту дали напаѓачот бил сам или имал помошници ниту, пак, дали сè уште е на слобода.

Одредени медиуми јавуваат дека уште две пукотници се слушнале во близина на клубот.


Во Флорида напаѓач пукал во болница, двајца загинати


Орладно, 17 јули, 2016 - 17:25 (META) 

Непознат напаѓач отворил оган во болница во градот Титусвил, во американската сојузна држава Флорида, и убил две лица, соопштија локалните власти.

Како што пренесуваат американските медиуми, тој убил постар пациент и болничарка во медицинскиот центар „Пери“.

Полицијата соопшти дека засега мотивот за убиството е непознат. Инцидентот се случил на третиот кат во медицинскиот центар. Локалните медиуми јавуваат дека полицијата го уапсила напаѓачот и дека истрагата е во тек.


Маж отвори оган во болница во Флорида


Тампа, 23 ноември, 2015 - 14:49 (META) 

Болница во американскиот град Тампа, на Флорида, е затворена откако маж отворил оган во објактот.

Телевизијата „Фокс 13“ јавува дека напаѓачот се самоубил откако застрелал еден од вработените во болницата. Повреденото медицински лице добило прострелна рана, но лекарите веднаш интервенирале.

Засега не се знаат причините за нападот ниту, пак, има прецизни официјални информации за тоа дали се повредени и други лица.