Тевдовски: Од годинава ќе стартува Регистарот на вистински сопственици на фирми


Скопје, 10 јануари, 2019 - 13:32 (META) 

Годинава ќе стартува регистарот на вистински сопственици со кој ќе се евидентираат физичките лица, сопственици на правни субјекти кои ги поседуваат или контролираат  фирмите. Ова беше истакнато на денешната работна посета на министерот за финансии Драган Тевдовски на Управата за финансиско разузнавање. Инаку, оваа новина е дел од новиот донесен Закон за спречување перење пари и финансирање на тероризам, кој е согласно европската регулатива.

Тевдовски истакна дека оваа и други мерки се во насока на зајакнување на капацитетите на институциите и борбата против корупцијата преку зајакнување на транспарентноста.

-Регистарот на Вистински сопственици треба да претставува систем кој има за цел да ги направи транспарентни сложените сопственички структури и правни аранжмани, односно да го разоткрие „скриеното“ сопствеништво. Имено истиот треба да го бележи сопственикот, односно сопствениците на правното лице или оние кои имаат реална или друг вид на контрола врз истото-истакна министерот за финансии – рече Тевдовски.

Тој посочи дека Министерството за финансии пропишало Правилник за регистрација во Регистарот  во кој е регулиран начинот на внесување, пријавување на вистински сопственици, изразување на уделот на сопствеништво, технички барања и начинот на одржување и администрирање.

Директорот на Управата за финансиско разузнавање Блажо Трендафилов истакна дека Македонија има значаен напредок во борбата против перењето на пари и спречување тероризам. Ова го потврдува и реномираниот „Базелски институт“ во својот извештај за 2018 година.

– Македонија е една од земјите која од 2018 година може да се пофали дека се наоѓа во листата на 10 земји во светот со низок ризик од перење пари и финансирање на тероризам, меѓу земји како Финска и Шведска. Република Македонија има напредок од преку 15 места на ранг листата на нискоризични држави во поглед на перењето пари и финансирањето на тероризам. За илустрација во извештајот за 2016 година Македонија била на листата на т.н. топ 10 „најголеми губитници“ со зголемувањето на степенот на ризик – рече Трендафилов.


Казните за граѓаните и фирмите ќе се намалат до 75 отсто


Скопје, 3 декември, 2018 - 10:07 (META) 

Во владина постапка влегува Законот за прекршоци во кој се предвидуваат измени за намалување на висината на казните за правните и физички лица, со што, како што велат од Владата се воведува разумна казнена политика.

„Предвидуваме намалување на глобите за физичките лица за 75 отсто. Со новото решение, минималната глоба за физичко лице е 15 евра, а максималната глоба ќе биде 250 евра, наместо досегашните 1.000 евра. За правните лица, при одмерување на глобата ќе се води сметка за приходот остварен во претходната година, број на вработени и претходно санкционирање за исти или слични прекршоци. Во законот прват се прави градација помеѓу малите, средни и големи претпријатија“, рече премиерот Зоран Заев кој измените ги презентираше со министерката за правда Рената Дескоска.

Дескоска рече дека казнената политика нема да биде политика за полнење на буџетот, туку ќе биде насочена кон опомена на оние кои што згрешиле.

Таа посочи дека околу 200 закони во кои е уредена висината на казната, ќе треба да се усогласат со Законот за прекршоци и нема да смеат да ги надминат утврдениот минимум и максимум.

„Доколку казната за нерегистрирано возило изнесувала 500 евра, со новиот закон ќе изнесува 250 евра, казната за технички неисправно возило сега изнесува 400 евра, со новиот закон истата не смее да надминува 250 евра, за предизвикување бучава казната сега изнесува 450 евра, со новиот закон сега казната нема да смее да надмине 250 евра“, рече Дескоска.

Извршната директорка на Стопанска Комора на Македонија, Билјана Пеева Ѓуриќ рече дека Законот за прекршоци е од особен интерес за претставниците на бизнис заедницата кој треба да биде коректив и поттик за деловните субјекти да можат да го корегираат своето работење и да ги исполнуваат сите предвидени законски обврски. Таа дополни дека бизнис-заедницата имала важна улога во процесот на креирање на законското решение.


Потпишани првите договори за програмата ИПАРД 2014-2020


Скопје, 6 март, 2018 - 14:00 (META) 

Денеска во Агенцијата за финансиска поддршка во земјоделството и руралниот развој се потпишаа првите договори за користење на финансиски средства од програмата ИПАРД 2014-2020.

Министерот за земјоделство, шумарство и водостопанство, Љупчо Николовски посочи дека ефикасното искористување на програмите ИПАРД е еден од главните приорити на МЗШВ, со цел приближување до европскиот аграр.

„Станува збор за 60 милиони неповратни средства, европски пари и нашата цел е ефикасно искористување на европските фондови. Ако изминатите години искористеноста била слаба, сега сакаме ова да биде една успешна политика на Владата“, изјави Николовски.

На првиот јавен повик од ИПАРД- програмата 2014-2020 кој беше објавен лани, има рекордно голем број на добиени барања за ко-финансирање. Пристиганти се 1.648 барања, со вкупна побарана финансиска поддршка од околу 73,6 милиони евра.

Вкупните финансиски средства од целата програма ИПАРД 2014-2020, која може да се користи до 2023 година, изнесува 79,6 милиони евра, од кои 60 милиони евра се од европските фондови, а останатите се национално буџетирање.

До денеска се одобрени пет решенија за одобрување на барање за финансиска поддршка од мерката 3 „Инвестиции во основни средства за преработка на земјоделски и рибни производи“ со вкупна вредност на финансиска поддршка до 310.000 евра, од кои  232.500 евра се европски средства.

Во тек се проверките на останатите предмети од трите мерки и се очекува овој и следниот месец, да бидат склучени договорите за сите мерки.

Еден од проблемите со кој се соочуваат потенцијалните корисници на програмите ИПАРД е недостаток на средства за реализација на инвестицијата, затоа, од МЗШВ велат дека во соработка со другите институции работат на воспоставување на механизам, односно гарантен фонд, кој би овозможил предфинансирање за програмите ИПАРД.


Азески побара со Грција да се склучи договор за одбегнување на двојното оданочување


Скопје, 8 февруари, 2018 - 15:04 (META) 

Повторно интензивирање на активностите за склучување на Договор за одбегнување на двојното оданочување помеѓу Македонија и Грција, побара претседателот на Стопанската комора на Македонија, Бранко Азески, од претседателот на Унијата на Грчките трговско-индустриски комори, Константинос Михалос.

„Стопанската комора на Македонија и Унијата на грчките трговско-индустриски комори уште во 2007 година пред надлежните органи го покренаа прашањето за склучувањето на Договор за одбегнување на двојното оданочување, но заложбите досега останаа без успех. Бизнисот беше тој кој во изминатите години непрекинато ја одржуваше билатералната соработка помеѓу двете земји, дури и кога политичките процеси затајуваа“, се вели во соопштението на Стопанската комора.

Азески во писмото до неговиот колега Михалос напишал дека бизнис-заедниците од двете држави од надлежните органи очекуваат создавање на поволно деловно опкружување и инвестициска клима.

– Нашите компании заеднички можат да постигнат многу, тие можат да бидат клучниот фактор за достигнување на посакуваното ниво на економски раст и развој во двете земји, но за тоа да се случи, на бизнисот мора да му бидат обезбедени потребните услови. Создавањето на предуслови за зголемување на обемот на размената и на инвестициите помеѓу нашите две земји треба непречено да се одвива, без оглед на развојот на политичките процеси – наведува Азески во писмото.

Грција е третиот трговски партнер на Македонија.

Обемот на размена е во постојан пораст – во 2017 година, вкупниот извоз изнесуваше 180,04 милиони евра, со пораст од 21,9 проценти во споредба со 2016 година, додека вкупниот увоз од 546,09 милиони евра има раст од 21,4 проценти во споредба со претходната година.

Обемот на грчките инвестиции во периодот од 2003 заклучно со 2016 година изнесува 157,41 милион евра, при што стотици компании со грчки капитал успешно работат во банкарскиот сектор, енергетиката, секторот на прехранбената и текстилната индустрија, градежништвото и трговијата на мало, вработувајќи повеќе десетици илјади работници.


Царовска: Во буџетот предвидени се повеќе пари за градинките и минималната плата


Скопје, 12 декември, 2017 - 14:30 (META) 

Предлог-буџетот на Министерство за труд и социјална политика e околу 700 милиони евра и е со највисок износ од сите владини ресори, а најголемиот дел од средствата одат директно кај граѓаните, рече денеска на прес-конференција, министерката за труд и социјална политика, Мила Царовска.

На презентацијата на предлог-буџетот, таа додаде дека повеќе пари се наменети за детски градинки и минимална плата, а укинати се нерационалните трошоци. МТСП ќе се фокусира на подобрување на опфатот на деца во детските градинки и подобрување на просторните и кадровски капацитети.

– Буџетот е дизајниран за поддршка на социјално загрозените категории, за инклузија и за помош на ранливите групи на граѓани. Имено, над 120 илјади граѓани се корисници на социјални надоместоци во износ од 8 милијарди денари. Тоа се средства наменети за правата од социјална заштита, детска заштита, цивилни инвалиди, борци и воени инвалиди итн – рече Царовска.

МТСП за активните мерки за вработување, предвидува околу 16 милиони евра, а за финансиска поддршка на фирмите, за исплата на минимална плата, планирани се 7.500.000 евра.

Министерката Царовска нагласи дека, во буџетот за идната година се намалени нерационалните трошоци за репрезентација во министерството и намалени се или укинати надоместоците за учество во комисии и работни групи, кои во изминатите години биле неоправдано високи.


ВМРО-ДПМНЕ: Груевски и Мијалков не се поврзани со приватизација на фабрики во Србија


Скопје, 3 декември, 2017 - 11:26 (META) 

Ниту претседателот на ВМРО-ДПМНЕ, Никола Груевски, ниту Сашо Мијалков има никаква поврзаност со приватизацијата на фабрики во Србија, реагираат од ВМРО-ДПМНЕ на интервјуто на поранешниот српски министер за надворешни работи и лидер на опозициската Народна партија, Вук Јеремиќ, во кое тој ги повика истражните органи во Србија да ги испитаат врските меѓу поранешната македонска влада и Војислав Спаравало, директорот на фирмата СЦМГ, која ја купи фабриката „14 Октомври“ од Крушевац.

„Ниту претседателот Никола Груевски, ниту Сашо Мијалков извлекувале пари од Македонија за да купуваат фирми во Србија, како што пренесуваат медиумите под контрола на СДС. Зоран Заев и СДС имаат потреба да ја дефокусираат јавноста со секакви манипулации за да го сокријат срамот што граѓаните секојдневно го гледаат. Изнесените наводи во интервјуто кое го пренесуваат порталите блиски до СДС се целосно неточни и најостро ги демантираме“, се вели во демантот на ВМРО-ДПМНЕ.


Осум компании со грчки капитал се дел од листата на 200 најголеми фирми во Македонија


Скопје, 30 ноември, 2017 - 10:14 (META) 

Осум компании со грчки или мешовит удел се дел од листата на 200 најголеми бизниси во Македонија во 2016 година, објави финансискиот магазин „Капитал“, а пренесе грчката новинска агенција АНА-МПА.

На трето место на листата, како и претходната година, се наоѓа ОКТА, односно групацијата „Хеленик петролеум“, која најдолго време е најголем снабдувач на горива во Македонија со промет од 311 милиони евра, односно 5,6 отсто помалку од минатата година. „Усје – Титан“ со промет од 72,4 милиони евра, односно 0,2 отсто помалку од минатата година, е на 22. место, а на 24. место е „Верополус“ со промет од 70,7 милиони евра, што е за 0,5 отсто повеќе од претходната година.

Помеѓу 200 најголеми компании во Македонија се наоѓаат и „Пивара Скопје“, „Актор“, „Жито лукс“ и „Мермерен комбинат“.

Севкупно, прометот на грчките претпријатија е 7 отсто од прометот на 200 најголеми македонски компании.

Во однос на профитот „Усје – Титан“ се наоѓа на 6. место со остварен профит од 19,5 милиони евра, по што следуваат „Пивара Скопје“, која се наоѓа на 10. место со профит од 12,4 милиони евра, и „Веропулос“ на 14. место со профит од 8,9 милиони евра.

Значителен пораст на профитот е забележан кај ОКТА, од 408 отсто, и кај „Актор“ од 286,4 отсто.

Најголема фирма во Македонија според остварените приходи и годинава е „Џонсон Мети“ со вкупни приходи од 1,34 милијарди евра, која лани имала пораст на приходите од 11,9 отсто. „Џонсон Мети“ истовремено е и најпрофитабилна фирма во земјава, чиј профит ја надмина границата од 100 милиони евра.

Според прелиминарните податоци на Државниот завод за статистика, во периодот јануари-септември 2017 година, според вкупниот обем на надворешно-трговска размена, најзначајни трговски партнери на Македонија се Германија, Велика Британија, Грција, Србија и Бугарија.


МВР: Шест лица и две фирми осомничени за перење пари


Прилеп, 24 ноември, 2017 - 12:12 (META) 

Шест лица и две фирми се осомничени за перење пари, со кое незаконски присвоиле 3.650.000 денари (околу 60.000 евра) преку договор за купопродажба на огревно дрво, соопшти МВР.

Како што информираат оттаму, станува збор за лицата И.К. (41) од Прилеп, Ј.Х. (34) од Крушево, Д.Б. (45) од Скопје, С.Д. (64) од Битола, Н.Д. (29) од Велес, Г.Н. (43) од Прилеп и за фирмите „Прлица“ ДООЕЛ Прилеп и „Дејо интернационал“ ДООЕЛ Скопје.

Според МВР, првоосомничениот во случајот, И.К., како прв основач и управител на фирмата „Прлица“ од Прилеп, заедно со Ј.Х., сопственик на фирма која се занимава со трговија на огревно дрво од Крушево, во првиот квартал од оваа година склучиле договор за продажба на огревно дрво помеѓу фирмата „Прлица“, како продавач, и синдикалната организација на „Фени индустри“ од Кавадарци, како купувач. Со договорот, прилепската фирма се обврзала да испорача 2.800 кубни метри дабови дрва од прва класа и 700 кубни метри буково дрво од прва класа, кои синдикатот на „Фени индустри“ требало да ги плаќа редовно на шест еднакви месечни рати.

„Паричните средства за првите три рати, кои биле уплаќани на жиро-сметката на првопријавената фирма, веднаш биле извлекувани, паралелно со нивниот прием и без какво било реално покритие“, стои во соопштението на МВР.

По исплатените три рати на сметка на „Прлица“, во висина од 3.650.000 денари (околу 60.000 евра), фирмата на средината на мај оваа година го известила синдикатот на „Фени индустри“ дека не е во можност да ги обезбеди договорените количества огревни дрва.

Инаку, како што додаваат од МВР, „Фени индустри“ повела судски спор за случајот.

„Пријавените, секој во својот домен, примале и вршеле пренос на парични средства за да ги прикажат трансакциите помеѓу себе како тековни активности на фирмата „Прлица“ ДООЕЛ Прилеп. На таков начин извлекле и противправно присвоиле парични средства во вкупен износ од 3.650.000 денари“, стои во соопштениеот на МВР.


Анѓушев: Промената на даночната политика ќе биде во прилог на граѓаните и на стопанството


Скопје, 25 октомври, 2017 - 15:34 (META) 

Kаква било промена на даночната политика ќе биде во прилог на граѓаните и на стопанството на Македонија, одговори на новинарско прашање вицепремиерот за економски прашања, Кочо Анѓушев, на отворањето на саемот „Технома“.

– Измената на даноците нема да се случи без поширока расправа и за неа и медиумите и граѓаните и стопанствениците ќе бидат навремено информирани – појасни вицепремиерот Анѓушев.

Од Министерство за финансии соопштуваат дека „стапката на данокот на додадена вредност нема да се менува и такво нешто не е предвидено ниту во програмата на Владата“.

„До крајот на годината ќе се отвори јавна дебата за евентуално воведување на прогресивна стапка на персоналниот данок на доход. Сите промени ќе се носат транспарентно и со вклученост на јавноста“, се вели во соопштението на Министерство за финансии.


ЕЛЕМ ќе купува струја за грејната сезона


Скопје, 5 октомври, 2017 - 15:00 (META) 

ЕЛЕМ денеска ќе распише повик, а на 10 октомври ќе биде одржана аукција за купување на 29,7 гигават-часови електрична енергија.

„Електричната енергија што е планирана да се купи во октомври е наменета за ноември, кога ќе биде зголемена побарувачката поради грејната сезона. Производството на ЕЛЕМ во тој период ќе биде недоволно поради тоа што еден блок на РЕК Битола сè уште ќе биде во ремонт, во РЕК Осломеј сè уште траат подготвителните активности за почеток на производството и за дополнителен ископ на јаглен, кој досега не бил обезбеден, додека хидроелектраните не располагаат со доволно акумулации за потребите на производството во зимскиот период“, соопштуваат од ЕЛЕМ.

Во соопштението се додава дека дополнителното количество електрична енергија потребно за ноември, ЕЛЕМ го набавува еден месец порано за со навремениот повик до фирмите увозници да обезбеди подобра конкуренција и пониска цена.

„За увоз на електрична енергија за втората половина на 2017 година претходното раководство на компанијата предвидело осум милиони евра, сума која сегашното раководство планира да ја намали преку планско и навремено купување на потребните дополнителни количества по најповолни цени во следните два месеца, колку што ЕЛЕМ има обврска да купува електрична енергија при недоволно домашно производство“, објаснуваат од компанијата.

Од 1 јануари во 2018 година оваа обврска повторно ќе ја преземе ЕВН, бидејќи резултатите од оваа година покажуваат дека новопреземената обврска на ЕЛЕМ за купување електрична енергија не го намали увозот и цените, туку напротив, ги зголеми во споредба со годините наназад кога увозот го вршеше ЕВН, односно од 44,6 евра за мегават-час просечна цена за увоз во 2016 година, а во 2017 година просечната цена е зголемена на 74,1 евра за еден мегават-час.