!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Финансиска полиција го чешла работењето на ЈП „Исар“


Штип, 16 декември, 2017 - 16:31 (META) 

Финансиска полиција ги проверува тендерските постапки во штипското комунално претпријатие „Исар“, реализирани од претходното раководство на компанијата, соопшти новиот в.д. директорот на ЈП „Исар“, Живко Тасев, додавајќи дека постојат индиции за прекумерно трошење пари.

– За девет месеци се набавени 7.000 метли, во вредност од 350.000 денари. Кога тие 7.000 метли ќе се поделат на 20 работника испаѓа дека за 30 дена имаат потрошено 35 метли. Ако се работни часа 24, еден работник користел по една и пол метла за еден работен ден. Значи, тука има индиции за злоупотреба на службена должност – рече Тасев.

Новиот директор истакна дека неговиот претходник во текот на 2016 и 2017 година во повеќе наврати го надминал лимитот за мобилен телефон од 4.000 денари, односно дека сметката во повеќето месеци била поголема од 22.000 денари. Тасев истакна дека претходниот директор разликата за сметката не ја исплаќан во благајната на претпријатието.

Финансиска полиција исто така го проверувала и тендерот за набавка на струја од една бугарска фирма, со која има договор за грејс период за плаќање на сметката од шест месеци. И покрај таквиот договор, претходниот директор на ЈП „Исар“ веднаш ги плаќал сметките кон бугарската компанија, но не ги плаќал сметките кон ЕВН, кои поради каматите достигнале износ од еден милион денари.

Финансиската полиција се уште го чешла работењето на ЈП „Исар“, кое во моментов има долг од 186 милиони денари.


Кривична пријава за ексдиректорката на Агенцијата за филм за серијата „Македонија“


Скопје, 6 декември, 2017 - 13:11 (META) 

До Основното јавно обвинителство за гонење организиран криминал и корупција, денеска Управата за финансиска полиција поднела кривична пријава за поранешната директорка на Агенцијата за филм, Мими Ѓорѓоска-Илиевска. Ја товари за злоупотреба на службената положба и овластување преку исплаќање повеќе од 1,1 милион евра на „Јадран филм“ за снимањето на серијата „Македонија“.

„Лицето како раководен субјект на Агенцијата за филм во периодот од октомври 2016 година до септември годинава, искористувајќи ја својата службена положба и пречекорувајќи ги границите на своето службено овластување, го оштетило буџетот на Република Македонија за износ од 68 милиони денари. Осомниченото лице овозможило Друштвото за филмска и видеопродукција „Јадран филм“ ДООЕЛ Скопје да стекне противправна имотна корист во погоре наведениот износ, а на штета на буџетот на Република Македонија“, соопшти Обвинителството за организиран криминал и корупција.

Ова обвинителство минатиот месец почна предистражна постапка за случајот со серијата „Македонија“, исто така по известување од Финансиската полиција.


Обвинителството отвори истрага за случајот со „Јадран филм“ и серијата „Македонија“


Скопје, 15 ноември, 2017 - 13:35 (META) 

Основното јавно обвинителство за гонење на организиран криминал и корупција денеска соопшти дека отворило предистражна постапка во врска со договорот меѓу Агенцијата за филм и продуцентската куќа „Јадран филм“ за снимањето на серијата „Македонија“.

Од Обвинителството велат дека предистражната постапка е отворена по известување од Управата за финансиска полиција.

„Надлежниот јавен обвинител ги презема сите неопходни дејствија за утврдување на фактите. Издадени се повеќе насоки и наредби за прибирање на материјални докази поврзани со севкупната постапка за снимање на играната серија. Во оваа фаза од постапувањето веќе е доставен дел од бараните докази, а побарано е и нивно дополнување“, стои во соопштеноето од Обвинителството.

Директорот на Агенцијата за филм, Горјан Тозија вчера на брифинг со новинарите во Владата, информираше дека согласно одлуката на Владата и согласно Законот за филмска дејност, Агенцијата повела постапки пред сите надлежни институции „поради очигледните прекршувања на потпишаниот договор од страна на видео-продукцијата „Јадран филм“ за реализација на играна серија „Македонија“, договор кој тежи 4,6 милиони евра“.

– Иако сите рокови од договорот се поминати, до ден денеска Агенцијата за филм нема добиено од продукцијата ниту серија, ниту документи, нема ниту никакви известувања каде се уплатените пари за првата серија во висина од 80 отсто, односно 68 милиони денари се потрошени (1,1 милион евра). Договорот за серијата изнесува 4 милиони и 602 илјади евра. После нашата преписка со продуцентот, престаната е комуникацијата, нема никакви одговори и Владата на Република Македонија донесе одлука да се раскине договорот и да се бара поврат на средствата – изјави Тозија.


Невладините бараат власта и институциите да ја испитаат работата на Тантуровски и на ДКСК


Скопје, 4 јуни, 2017 - 16:17 (META) 

Власта и институциите да ја проверат основаноста на контролите во невладините организации и да ја истражат злоупотребата на службената должност за политички притисок и дискриминација од сите засегнати раководители кои се дел од прогонот. Ова денеска повторно го побараа 22 граѓански организации и фондации во кои изминатите шест месеци Управата за јавни приходи (УЈП) и Финансиската полиција вршат контроли иницирани од Државната комисија за спречување на коруција (ДКСК).

Организациите велат дека се револтирани од изјавите на претседателот на Антикорупциската комисија, Игор Тантуровски, во кои, според нив, тој покажува целосно непознавање за начинот на нивното функционирање и работа.

„Ако подобро ја познава работата на НВО-секторот, тогаш Тантуровски ќе знае дека секој домашен и странски донатор што одлучил да поддржи проект и дал финансиска поддршка на невладина организација, пропишал правила според кои грантистите се обврзуваат да му подготвуваат детални месечни, квартални и годишни наративни и финансиски извештаи. На тој начин се следат трошењата на парите од страна на грантистите. Дополнително, организациите на крајот на проектите најчесто ангажираат надворешни ревизори чија лупа детално го котролира начинот на трошење. Тантуровски и неговите антикорупционери како државно тело имаат начини како да ги проверат средствата доколку им се сомнителни и притоа воопшто да не ги малтретираат организациите. Антикорупционерите само треба да ги земат податоците од Централниот регистар или од Управата за јавни приходи каде се евидентирани сите проекти за да ја проверат работата, наместо да иницираат повеќемесечни контроли кои ги чинат пари и организациите и граѓаните“, стои во заедничкото соопштение на 22 невладини организации.

Тие велат дека е смешна и неиздржана изјавата на Тантуровски дека „тој се исплашил од влезот на пари за тероризам во Македонија преку граѓански организации и фондации“.

„Образложението на Тантуровски, иако е апсурно смешно, покажува на сериозен проблем дека ДКСК наместо да ја врши работата за која е платена од народни пари и да трага по стотиците веќе откриени коруптивни скандали на политичари, државни институции или јавна администрација, се вплеткува во спроведувањето на груевистичките методи за линч на неистомислениците“, велат од НВО.

Од организациите велат дека сега, токму од Антикорупциската комисија очекуваат да се ангажира и да спроведе постапка за граѓански организации кои добивале пари од владата и да провери како тие ги трошеле народните пари во последните години.

„Тантуровски може да почне од последната распределба, објавена во „Службен весник на Република Македонија“ на 23 мај, вредна токму 800.000 евра дадени на граѓански организации главно непознати во Македонија“, се вели во соопштението.


Невладините организации бараат да сопрат инспекциите и политичкиот прогон


Скопје, 29 мај, 2017 - 13:51 (META) 

Невладините организации денеска ја повикаа новата власт и институциите веднаш да го прекинат политичкиот притисок на кој, како што рекоа, неправедно и намерно се изложени 20 граѓански организации уште од декември, кога ВМРО-ДПМНЕ повика на „прогон“ на граѓанските организации.

– Бараме и да се провери основаноста на контролите и да се истражи злоупотребата на службената должност за политички притисок и дискриминација, но и да се повлече одлуката на актуелната техничка влада да додели 800.000 евра на граѓански организации, за кои голем дел од јавноста првпат слушна по објавувањето на нивните имиња како примачи на пари од владата – порачаа, во името на 20 граѓански организации, Дона Костуранова од „Младински образовен форум“, Филип Стојановски од Фондацијата „Метаморфозис“ и Зекир Абдулов од организацијата КХАМ – Делчево.

Тие посочија дека изминатите месеци овие организации биле под постојан притисок на контролите од Управата за јавни приходи, Финансиска полиција и од МВР, а на барање на Јавното обвинителство, како и на Агенцијата за финансиско разузнавање и на Државната комисија за спречување корупција.

– Одговорно кажуваме дека како организации својата работа ја вршиме професионално и немаме проблем да дадеме отчет пред институциите како што тоа секојдневно го правиме и пред нашите членови, донаторите и пред граѓаните – рече Костуранова, истакнувајќи дека досегашното искуство на 20 невладини организации говори дека не станува збор за рутински и наменски контроли, туку за наменски контроли за да се нанесе штета на работењето.

Таа додаде дека инспекторите, гледајќи дека сè е в ред во работењето, барале законски дупки за да ги казнат невладините организации. Посочи и дека е сомнително тоа што во ист ден се давале наредби за контроли на неколку невладини организации.

Костуранова соопшти дека  досега се изречени и неколку казни, од кои како впечатлив беше посочен примерот на КХАМ – Делчево, која досега треба да плати 3.500 евра за персонален данок за поделена хуманитарна помош, како и камати за него поради задоцнето плаќање.

– Гледаме еден крајно селективен пристап и хајка на невладините организации. Во општините Делчево, Виница и Пехчево досега доделивме повеќе од 500 бебешки пакети, организиравме обуки на Ромки, организиравме довршување на основно и на средно образование на значителен број лица, обезбедивме возило за брза помош и патронажна служба, организиравме 450 превентивни прегледи и за сето тоа, за работа во полза на ранливите групи, на кои пред сè треба да им помага државата, а тоа го правиме ние, добивме казна од 3.500 евра – рече Абдулов.

Поради отежнатото работење на граѓанските организации, Македонија е изложена не само на ризикот да не добијат помош тие на кои им е најмногу потребна, туку и да загуби голема меѓународна помош, нагласи тој.

Покрај барањето да престане прогонот, неформалната коалиција граѓански организации побара и да се ревидира одлуката на техничката влада во заминување да подели 800.000 евра на непознати граѓански организации, сума која е најголема досега.

– Техничката влада во заминување нема морално право и мандат да носи вакви одлуки. Намерата е очигледна, затоа што повикот беше отворен среде политички прогон врз невладините организации, а истовремено истата влада сака да додели фонд повисок од кој било што го одвојувала за невладини организации. Додека минатата година се потпишувале договори до 5.000 евра, сега се зголемени до 50.000 евра. Поради сите овие причини, бараме оваа одлука за доделување на јавните средства да биде ревидирана во најкус можен рок – рече Стојановски.

Тој порача дека и покрај околностите и секојдневните притисоци во изминатите пет месеци, граѓанските организации кои се подложени на инспекции сепак не престанале да ја работат својата работа и посочи дека така ќе биде и во иднина.

– Ќе продолжиме да работиме одговорно и во интерес на сите граѓани на Македонија, како контролори на власта и на институциите. Ќе бидеме тука за да се грижиме дека ќе има одговорни институции и фукционално Собрание, отворено за граѓаните, кое ќе врши надзор на власта – рече Стојановски.

Невладините организации во изминатите пет месеци неколкупати се обраќаа до досегашната власт со апел да престане со политичкиот притисок преку инспекциите.


Финансиската полиција поднесе кривични пријави против поранешни градоначалници


Скопје, 15 мај, 2017 - 14:55 (META) 

Управата за финансиска полиција подготвила пет кривични пријави против поранешни градочалници на општините Струга, Свети Николе, Дебар, Студеничани и Долнени, како и против едно физичко и едно правно лице. Пријавите се поднесени во Основното јавно обвинителство за гонење организиран криминал и корупција, кое соопшти дека ги проучува пријавите и ќе се произнесе за нив.

„Кривичните пријави се поднесени поради основан сомнеж дека се направено кривични дела – злоупотреба на службената положба и овластување од член 353 од Кривичниот законик и злоупотреба на постапката за јавен повик, доделување договор за јавнa набавкa или јавно-приватно партнерство од член 275-в од Кривичниот законик“, соопшти Обвинителството.


УЈП и МВР по налог на ОЈО ги тресат граѓанските организации за парите од УСАИД


Скопје, 10 март, 2017 - 14:10 (META) 

Во повеќе од 20 граѓански организации сè уште се присутни инспектори на УЈП, а тоа што загрижува е што во последната недела 13 организации се посетени од инспектори на финансиската полиција и од припадници на МВР по барање на Основното јавно обвинителство, во предистражна постапка по непозната основа, изјави денеска извршната директорка на Фондацијата „Отворено општество“, Фани Каранфилова-Пановска, по промовирањето на проектот „Граѓанска алијанса за транспарентност – Набљудување на процесот на реформи на јавната администрација од страна на граѓанските организации“.

– Така како што ги водат постапките и нивниот број, упатува на тоа дека бараат сè и не знаат што бараат. Особено во последните три дена од организациите што се посетени се одземаат документи за плаќањата и за приливите направени од УСАИД – рече Каранфилова-Пановска, додавајќи дека се чешлаат само финансиите што се дадени во граѓанските организации, но не и средствата донирани во државните институции.

Таа оцени дека според начинот на кој се одвиваат работите и интензитетот, инструментите што се користат и целта кон која одат е да креираат случај за злоупотреба на парите. Таа истакна дека ако ситуацијата потрае и политичката криза не се реши наскоро, граѓанските организации можат да бидат сериозна колатерална штета иако сето ова време работеле само и во интерес на граѓаните.

На прашање дали очекуваат новата влада да ги заштити граѓанските организации, Каранфилова-Панова истакна дека во моментов немаме влада, а имаме институции предводени од нелегитимни претставници.

– Ако не се реши политичката криза, ова е злоупотреба од страна на институциите во ситуација во која во Македонија не се знае ниту кој јаде, ниту кој пие. Не се знае дали имаме еден легитимен претставник на кое било ниво на власт. Единствен легитимен претставник, формално, е претседателот Ѓорге Иванов, кој со последните две одлуки се делегимитираше комплетно во очите на граѓаните – рече Каранфилова-Пановска.

Извршниот директор на „Еуротинк“, Бојан Маричиќ, истакна дека сè уште не знаат зошто се случуваат инспекциите и што бараат органите на власта.

– Очекуваме да се формира нова влада за да престане институционалиот политички притисок што беше најавен со прогласот на ВМРО-ДПМНЕ – рече Маричиќ.

Тој рече дека неговата организација станала мета на инспекциите по последното негово гостување во „Топ тема“, во која, како што рече, се водела бурна дискусија и каде што двајца од учесниците ја напуштија емисијата.

– Налогот за контрола на УСАИД е со датум од 7 март, ден по таа емисија. Заклучоците носете ги сами, не можам да кажам дека е поврзано, но премногу случајности има во овој период за да кажеме дека има коинциденција – рече Маричиќ.

Претходно, евроамбасадорот Самуел Жбогар рече дека институциите, кои треба да бидат независни, во последно време удираат по граѓанскиот сектор.


Финансиската полиција ги проверува јавните набавки на Општина Струмица


Струмица, 28 јуни, 2016 - 16:43 (META) 

Четворица инспектори на финансиската полиција денеска влегле во Општина Струмица и почнале со проверки на документацијата за јавни набавки на Општината. Од Општината засега не прецизираат за кои јавни набавки се интересирале инспекторите.

Во писмена рекација оттаму велат дека од страна на Општината и на нејзините служби, обезбедени и дадени на увид биле сите неопходни документи.

„Не е првпат Општина Струмица да биде под инспекциски надзор од разни државни инспекциски служби. Тоа е дел од секојдневието во Општина Струмица, па така е и овојпат. Сите досегашни инспекциски контроли во Општина Струмица во изминатите години го покажаа законското работење на Општината и на градоначалникот, со што беше потврден епитетот на најтранспарентна општина во Република Македонија“, стои во реакцијата од Општина Струмица.

Оттаму не потврдуваат дали денешната посета на инспекторите од финансиската полиција е поврзана со тендерите за превоз на ученици за кои пратеникот на ВМРО-ДПМНЕ, Васил Пишев, изминатите десетина дена оддржа повеќе прес-конференеции на кои обвини дека Општината плаќала неколкукратно повисоки суми за превозот на ученици.


„Мост“: Финансиска полиција ни побара документација


Скопје, 6 април, 2016 - 12:31 (META) 

Граѓанската асоцијација „Мост“ во понеделникот добила најава за посета од Финансиската полиција, по што имале состанок на кој им биле побарани документи за нивното финансиско работење.

– Во понеделникот имавме состанок со Финансиската полиција на кој разговаравме со инспекторите. Коректно и прецизно ни побараа да ја подготвиме нашата документација и ни дадоа неколку дена за да ја доставиме. „Мост“ работи во согласност со законските прописи и ги почитува законите на Македонија – изјави Дарко Алексов од „Мост“.

Информацијата дека инспектори на финансиската полиција упаднале во невладина организација ја соопшти белгискиот експерт Питер Ванхауте на својот пртофил на „Твитер“, каде напиша:„Награда за владата за испраќање на финансиска полиција за да замолчи невладина која е критична за подготовките на избори“.

Во однос на шпекулациите што се појавија дека на некое лице му биле исплаќани десетици илјади евра, Алексов рече дека тие имале професионални ангажмани со домашни и странски експерти кои биле исплатени во согласност со нивните договори.

На прашањето дали од „Мост“ сметаат дека има услови за предвремени избори на 5 јуни, Алексов вели дека е добар момент ова прашање да се упати до ДИК и упати апел од таму да излезат и јасно да кажат дали постојат услови за избори.


Притвор за двајца од уапсените во акцијата „Геодет“


Скопје, 23 декември, 2015 - 10:39 (META) 

Судија на претходна постапка им одредил притвор на двајца од деветнаесеттемина уапсени во акцијата на Финансиската полиција под оперативното име „Геодет“, додека на другите им биле изречени превентивни мерки, соопшти денеска Основниот суд Скопје 1.

„Во Основниот суд Скопје 1 во текот на вчерашнот ден, пред судија на претходна постапка, беа доведени 19 лица од Скопје, приведени во акцијата во јавноста позната како „Геодет“, од кои од страна на Јавното обвинителство од Скопје за 17 лица до судија на претходна постапка е доставен предлог за определување превентивни мерки, а за две лица е доставен предлог за определување мерка притвор“, стои во соопштението на судот.

Двајцата осомничени, на кои им е одреден притвор, се товарат за примање поткуп и за злоупотреба на службената положба и овластување.

Забрана за напуштање на живеалиште, привремено одземање патна исправа и забрана за преземање работни активности поврзани со кривичното дело им е одредена на другите уапсени, осомничени за злоупотреба на службената положба и овластување, поткуп и за поднесување лажни докази.