Антикорупциска утврди злоупотреба на буџетски средства за финансирање на ДУИ


Скопје, 21 февруари, 2018 - 16:08 (META) 

Државната комисија за спречување на корупцијата (ДКСК) утврдила постоење на основано сомневање за злоупотреба на буџетски средства и средства од јавни фоднови во финансирањето на ДУИ и за тоа писмено го известила Основното јавно обвинителство Скопје заради понатамошно постапување соопшти Транспаренси Интернешнл – Македонија.

„По анализа на Годишниот извештај за членарини до донации за 2016 година, Транспаренси Интернешнл – Македонија забележа дека на листата како донатори се јавуваат и претпријатијата АД „Македонска пошта“, АД „Аеродроми на Македонија“ и ЈП „Македонски железници – инфраструктура“, што е спротивно на одредбите од Законот за спречување на корупцијата и Законот за финансирање на политичките партии. Поради тоа на 10.05.2017 година се обративме до Државната комисија за спречување на корупцијата, како надлежна за постапување во вакви случаи“, стои во соопштението на Транспаренси Интернешнл – Македонија.

Денеска, велат оттаму, добиле одговор од ДКСК дека од разгледувањето и анализа на добиените податоци и прибраните известувања од посочените претпријатија, Министерството за финансии и Државниот завод за ревизија утврдиле дека сомневањата од претставката се основани.

„Од прибраната документација произлегуваат факти и околности кои упатуваат на прекршување на одредбите од Законот за финансирање на политичките партии и Законот за спречување на корупцијата кои забрануваат користење на буџетски средства, средства од јавни фондови и средства од јавни претпријатија за финансирање на изборна активност, односно друга политичка активност. Документацијата од која произлегуваат овие сомневања Државната комисија за спречување на корупцијата ја предала во Основното јавно обвинителство Скопје, кое е надлежно за понатамошно испитување на овие информации“, се додава во соопштението.

Од Транспаренси Интернешнл велат оти се задоволни од постапувањето на ДКСК во врска со овој случај.

„Финансирањето на политичките партии, иако се актуелизира само за време на избори, континуирано останува сериозен проблем на корупција, а подготвува и широк терен за многу други коруптивни дејствија. Поради тоа ги повикуваме институциите уште пожестоко да се зафатат со сузбивање на незаконитите активности во финансирањето на политичките партии и со тоа да придонесат во обезбедување на владеење на правото“, порачуваат од невладината организација.


Николовски: Рекорден број на барања за средства од програмата ИПАРД


Охрид, 8 февруари, 2018 - 19:17 (META) 

На првиот јавен повик од програмата ИПАРД- 2014-2020 биле пристигнати рекордно голем број на добиени барања за ко-финансирање, изјави денеска министерот за земјоделство, шумарство и водостопанство, Љупчо Николовски на регионалната Работилница за имплементација на програмите ИПАРД, што се одржа во Охрид.

Тој додаде дека, биле пристигнати 1.649 барања и побарани над 55 милиони евра за ко-финансирање, а целата програма ИПАРД-2014-2020, која може да се користи до 2023 година, изнесува 60 милиони евра.

„Пред нас е предизвикот да се обработат сите барања и да се потпишат договори со корисниците, и оваа година да имаме исплати, за што Платежна агенција прави големи напори за да се забрза овој процес“, изјави Николовски.

Тој информираше дека програмата ИПАРД 1 завршила и последните исплати кон крајните корисници биле реализирани. Според податоците, биле доставени 3.069 барања за користење на средства ИПАРД, а се исплатиле 1.052 барања, во вредност од 16 милиони евра.

Како проблем кој што го истакна при реализацијата на програмата ИПАРД е недоволен број на кадри во Платежната агенција и Телото за управување со ИПАРД, за што во тек е процес на нови вработувања.


Заврши финансиската блокада на американската влада


Вашингтон, 23 јануари, 2018 - 9:54 (META) 

Тридневната блокада на Владата на САД е завршена, откако Сенатот на американскиот Конгрес го усвои предлог законот за привремено финансирање на владата на САД.

За повторно отворање на федералните агенции гласале 81 сенатор, додека 18 биле против. За гласањето за буџетските прашања потребно беше мнозинство од 60 сенатори.

Американската влада беше блокирана од саботата откако не беше постигнат договор за буџетот што демократите го условуваа со договорот за заштита од депортација на околу 700 илјади имигранти кои во земјата се доведени како деца и останале илегално.

Десетици илјади сојузни административци престанаа да работат на првиот ден од блокадата, но клучните сервиси за безбедност и одбрана продолжија да функционираат.

Во Сенатот е постигната согласност до 8 февруари да почне дебата за предлог законот за имиграцијата.

Потпретседателот Мајк Пенс од Ерусалим порача дека со постигнувањето на договорот пропаднала „Шумеровата блокада“.

-Ја поздравуваме веста дека блокадата во Вашингтон завршила, за што се заслужни цврстиот став на претседателот Трамп и на републиканците од Претставничкиот дом и Сенатот – порача Пенс.


Американската влада во финансиска блокада


Вашингтон, 20 јануари, 2018 - 11:29 (META) 

Делумно затварање на американските федерални служби стапи на сила по неуспешниот обид републиканците и демократите во Сенатот да постигнат компромис за буџетот.

Претставничкиот дом изгласа закон со кој се продолжува финансирањето на буџетот до 16 февруари, но Сенатот не го потврди и покрај интензивните преговори на републиканците и демократите и интервенцијата на американскиот претседател Доналд Трамп.

Откако двата дома на американскиот Конрес до полноќ не успеаја да постигнат договор за усвојување на предлогот за продолжување на финансирање на федералната влада во Вашингтон, дојде до финансиска блокада.

За да помине законот беа потребни 60 гласа од вкупно 100, но само 50 го поддржаа.

Затварање на некои сојузни агенции стапи на сила на полноќ, но не е можно да се предвиди колку ќе трае.
Блокадата на владата нема да го опфати финансирањето на секоја агенција, програма и услуга која ја финансира федералната влада, додека вработените во агенциите и министерствата кои не се сметаат за клучни ќе престанат да работат се додека Конгресот не биде во состојба да го усвои законот за федералниот буџет.

Појавата на финансиска блокада е невообичаена но се случувала и порано. Од 1981 година имало 12 вакви случаи, а блокадите варирале по должина на траењето.


Тевдовски: Најновата еврообврзница е со досега најниска каматна стапка


Скопје, 12 јануари, 2018 - 16:31 (META) 

Парите од еврообврзницата, со која Македoнија на странскиот пазар се задолжи за половина милијарда евра, ќе бидат потрошени за покривање на буџетскиот дефицит, враќање на стари долгови, реализација на капитaлни инвестиции, зголемување на средствата за одбраната и за зголемени плати во образованието и здравството, информираше денеска министерот за финансии, Драган Тевдовски.

Според него, историски најниската каматна стапка од 2,75 проценти за еврообврзницата е показател дека на меѓународниот финансиски пазар и меѓу инвеститорите постои доверба во перспективите на македонската економија и стабилноста на земјата.

Просечната каматна стапка на претходните еврообврзници изнесуваше 5,34 проценти.

– Парите од оваа евробврзница нема да се трошат за непродуктивни работи, споменици и фасади. Дел од овие пари ќе се потрошат и за покривање на стари долгови по овие ставки. Во буџетот, кој што е изгласан од Собранието, е проектирано за кои капитални инвестиции ќе бидат потрошени парите – нагласи министерот за финансии.

Тој додаде дека, првпат во историјата каматната стапка на еврообврзницата е пониска од проектираниот пораст на економијата од 3,2 проценти. Со еврообврзницата ќе бидат вратени и претходно направени долгови, па така на 29 јануари ќе се отплати првата рата на „Пи би џи“ (PBG) кредитот земен во 2013 година во износ од 95 милиони евра.

– Исто така, ги искористивме поволните услови на меѓународните пазари и срушивме дел од огромниот ѕид на долгови со кои се соочува Македонија во 2020 година. Предвреме вративме една третина од еврообврзницата од 270 милиони евра издадена во 2015 година, која достасува во декември 2020, и чија што каматна стапка на издавање од 4,875 проценти е значително повисока од каматна стапка на новоиздадената еврообврзница од 2,75 проценти. Со ова го намаливме долгот кој достасува во 2020 година и обезбедивме значително понизок ризик на рефинансирање – додаде Тевдовски.

Тој појасни дека, имајќи предвид што со еврообврзницата враќаме речиси 200 милиони евра претходно наталожени долгови, нето-задолжувањето со оваа еврообврзница изнесува околу 300 милиони евра.

На новинарско прашање во однос на транспарентноста на целата постапка за задолжување со еврообврзницата, министерот за финансии рече дека и при претставувањето на буџетот во Собранието најавил дека дефицитот ќе се финансира од позајмување од домашниот или од странските пазари, но под услов каматните стапки да се поволни.

Одлуката за новото задолжување била објавена во Службен весник, но не е најавена на прес-конференција оти ако било соопштено дека се планира издавање на еврообврзница, тоа би можело да ја крене цената, бидејќи станува збор за ценовно чувствителна информација.

– Со тоа што излеговме на меѓународен пазар, средствата на домашните банки ги оставивме слободни и може да се употребат за финансирање во домашната економија – дополни Тевдовски.


Балканските земји бараат СБ и ЕИБ повеќе да финансираат во новите хидроелектрани


Подгорица, 26 ноември, 2017 - 15:16 (META) 

Државните електростопанства на земјите од Балканот бараат од меѓународните финансиски институции, како Светската банка (СБ) и Европската инвестициска банка (ЕИБ) повеќе да ги финансираат новите проекти за изградба на хидроелектрани на Балканот.

Ова било истакнато на дебатата на конференцијата „Хидроенергија Балкан 2017“ (Hydro Power Balkans 2017) која се одржа во Подгорица, Црна Гора, на која се дискутирало за проблемите во планирањето и изградбата на нови хидроелектрани, соопштија од „Електрани на Македонија“ (ЕЛЕМ), чии претставници учествувале на конференцијата.

„Учесниците од земјите од регионот се согласија дека е потребно забрзување на сложениот процес на усогласување на дел од локалните закони со законите на Европската Унија, во делот на заштитата на животната средина, бидејќи меѓународните финансиски институции влегуваат во финансирање само на проекти за нови хидроелектрани кои ги запазуваат високите стандарди на ЕУ за заштита на околината“, стои во соопштението.

Претставниците на ЕЛЕМ на конференцијата ја истакнале нужноста од инвестирање во производството на овој вид електрична енергија, како чиста и долгорочно најисплатлива, и во таа насока ги презентирале идните развојни проекти, хидроелектраните „Чебрен“ и „Галиште“ и дел од Вардарска Долина.

„Со оглед на тоа што овие проекти не се наоѓаат во заштитени подрачја за кои важат посебни одредби, истите предизвикаа интерес кај меѓународните инвеститори, како и кај производителите на опрема, присутни на конференцијата“, велат од ЕЛЕМ.


Путин го потпиша законот за „странски агенти“


Москва, 25 ноември, 2017 - 18:09 (META) 

Рускиот претседател, Владимир Путин, денеска го потпиша законот со кој медиумите што добиваат финансиска помош од странски земји или од странски организации може да бидат означени како „странски агенти“, јавуваат агенциите.

Станува збор за реакција на Москва на обврската која во САД ја имаат руските медиуми, конкретно „Раша тудеј Америка“ и „Спутник“, кои Вашингтон бара да се регистираат како „странски агенти“ во САД.

Законот, кој Долниот дом на рускиот парламент го усвои кон средината на ноември, а Горниот дом оваа недела, денеска е објавен на официјалната интернет-страница со правни документи и на сила стапува веднаш.

Според законот, странските медиуми имаа обврска на руските власти да им даваат информации за својата финансиска состојба и во сите свои документи да назначат дека се „странски агенти“.

Формално, новиот текст само го проширува законот од 2012 година, кој досега се однесуваше само на невладините организации.

Како први потенцијални мети на новиот закон се споменуваат „Гласот на Америка“ и „Радио Слободна Европа/Радио слобода“, кои ги финансира Конгресот на САД.

Законот беше остро критикуван организациите „Хјуман рајтс воч“ и „Амнести интернешенл“.


Собранието ја укина радиодифузната такса


Скопје, 19 септември, 2017 - 13:42 (META) 

Собранието денеска го донесе законот за укинување на радиодифузната такса, кој беше предложен во скратена постапка. За измените на Законот за аудио и аудиовизуелни медиумски услуги „за“ гласаа 70 пратеници, а „против“ и „воздражани“ немаше.

Бидејќи овој закон се носи и со Бадентерово мнозинство, укинувањето на радиодифузната такса го поддржаа 20 пратеници од немнозинските заедници.

Координаторот на пратеничката група на СДСМ, Томислав Тунтев, рече дека со ваквото решение граѓаните ќе се ослободат од една непотребна давачка, а од друга страна ќе се зголеми ефикасноста на работата на „Македонската радио-телевизија“.

Со законот се предвидува приходот што досега го добиваше МРТВ преку собирање на оваа давачка, да се финансира од државниот буџет и тоа во износ од 0,5 отсто од вредноста на буџетот на годишно ниво. За таа цел потребно е да се одвојат 885 милиони денари на годишно ниво од државниот буџет за 2018 година. Покрај од буџетот, МРТВ ќе се финансира и од други средства, односно од приходи на кабелските оператори и од приходи остварени со продажбата на програма произведена во МРТ.

Претходно денеска пратениците во Собранието го донесоа законот за стечајни работници, со кој на околу 3.000 лица им се овозможува да добиваат месечен надомест од 8.356 денари. Вчера беше изгласан и законот за минимална плата од 12.000 денари.


Селмани: Правдањето на Владата дека нема пари за МРТВ е неубедливо и несериозно


Скопје, 17 септември, 2017 - 10:59 (META) 

За Здружението на новинарите на Македонија (ЗНМ) е неприфатливо тврдењето на Владата дека нема пари за финансирање на МРТВ со еден отсто од државниот буџет, вели претседателот на ЗНМ, Насер Селмани, во неделното интервју на „Радио Слободна Европа“.

Здружението неодамна ги достави своите забелешки за измените и за дополнувањата на Законот за аудио и аудиовизуелни медиумски услуги, од кои главната забелешка е процентот на финансирање на „Македонската радиотелевизија“, кој, според Владата, треба да биде 0,7 отсто од државниот буџет, а ЗНМ бара таа сума да биде 1 отсто или околу 25 до 30 милиони евра, годишно.

– Ние сметаме дека околу 25 до 30 милиони евра се доволни за почеток „Македонската радио-телевизија“ да има оптимум средства на располагање за да може да се поврати, затоа што очигледна е стратегијата на партиите, не само на претходната власт, туку и пред тоа, да се умртви МТВ, а да се игра со приватните телевизии за полесно да се контролира или да се манипулира јавното мнение. На сегашната власт, на која лани кога беше во опозиција не ѝ пречеше еден отсто од буџетот, сега го намалуваат на 0,7 отсто – вели Селмани.

Тој истакнува дека ќе ги направат сите напори да ја убедат Владата дека еден отсто е оптимумот за почеток за финансирањето на МТВ.

– Единствен аргумент со кој Владата се бори во ова е дека немаат пари, што за мене како оправдување е неубедливо и несериозно. Ние како Здружение нема да дозволиме и ќе бидеме отворени и за домашната и за меѓународната јавност дека ваквото однесување на Владата е неприфатливо. Со 0,7 отсто од буџетот МТВ нема да биде ниту независна ниту професионална и таа оценка ќе ја слушне и македонската и меѓународната јавност – нагласи Селмани.

Според претседателот на ЗНМ, зајакнувањето на капацитетите на МРТВ ќе доведе и до зголемување на платите на новинарите, од кои речиси половината сега земаат плата под просечниот личен доход во земјава.

 

foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ – Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка на „Фондацијата Отворено општество – Македонија“.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на „Фондацијата Отворено општество – Македонија“.


Пријавувањето за упис на Универзитетот „Св. Кирил и Методиј“ ќе биде на 17 и 18 август


Скопје, 14 август, 2017 - 10:25 (META) 

Пријавувањето за упис во прва година во академската 2017/2018 година на Универзитетот „Св. Кирил и Методиј“, Скопје ќе биде в четврток и петок на 17 и 18 август.

Според објавениот конкурс за запишување студенти на прв циклус студии за претстојната студиска година, слободни се вкупно 10.818 места.

Од нив, 5.865 се за редовни студенти за кои годишната партиципација е 200 евра, 3.793 места се за редовни со кофинансирање на студиите со 400 евра годишно и 1.160 за вонредни студенти кои, исто така, плаќаат 400 евра.

Кандидатите кои ќе го пропуштат првиот рок за пријавување оваа недела, може да се пријават во вториот рок на 4 септември, а на факултетите на кои ќе има слободни места третиот рок за пријавување за упис е на 15 септември.

Новина во конкурсот е укинувањето на дисперзираните студии.