!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

„Карван на парите“ денеска во Велес и во Неготино


Велес, 29 март, 2017 - 10:09 (META) 

Како дел од одбележувањето на Глобалната недела на парите (27 март ‒ 2 април), во Велес и во Неготино денеска ученици – основци и средношколци, ќе слушаат објаснувања за парите, штедењето, тргувањето, банкарскиот сектор, инвестирањето, осигурувањето, пензискиот сектор и за други теми поврзани со функционирањето на финансиските системи.

По денешната посета на „Карванот на парите“ на Велес и на Неготино, на 5 април ќе бидат посетени училишта во Тетово и во Гостивар, а на 7 април – во Охрид и во Струга.

Народната банка на Република Македонија, Министерството за финансии, Агенцијата за супервизија на осигурувањето, МАПАС и Комисијата за хартии од вредност, во соработка со Бирото за развој на образованието и со Сојузот на микрофинансиски организации, во понеделникот го одбележаа почетокот на Глобалната недела на парите. Се организираа посети од страна на четири основни и средни училишта од Скопје во просториите на сите овие инстируции, како и на Македонската берза, Музејот на пари при Народната банка, еден пензиски фонд, инвестициски фонд, комерцијална банка, штедилница и осигурителна компанија.

Годинашното одбележување на Глобалната недела на парите во Македонија е најголемо досега во поглед на институциите што учествуваат. За време на посетите се изведуваат едукативни предавања на теми од областите на парите, штедењето, тргувањето, банкарскиот сектор, инвестирањето, осигурувањето, пензискиот сектор и други теми поврзани со функционирањето на финансиските системи.

Крајот на овој проект за годинава ќе се означи на 19 април во Градски парк во Скопје.

Глобалната недела на парите, во организација на Меѓународната организација за финансиска едукација на деца и на млади (Child and Youth Finance International), се одржува на светско ниво уште од 2012 година.


Македонија со слаб систем за бесплатна правна помош за своите граѓани


Скопје, 21 март, 2017 - 15:11 (META) 

Иако законот за бесплатна правна помош постои седум години, пристапот до помош е рестриктивен и селективен, а според истражувањата, може да го користат само 1,1 отсто или околу 18.000 граѓани.

Ова беше кажано на денешната прес-конференција оддржана во ЕУ-Инфоцентарот во Скопје, каде беа презентирани резултатите од досегашното спроведување на проектот за „Пристап до правдата“, кој е финасиски поддржан од ЕУ, а го реализара Фондацијата „Отворено општество“ – Македонија, со мрежа граѓански организации кои се лиценцирани за давање правни совети.

Забелешки има и Европската Унија, која сепак ќе продолжи да работи со земјата на унапредување на ова прашање.

– Засега многу малку луѓе ја примаат или, пак, предоцна ја добиваат правната помош во Македонија, што е еден од претпристапните услови за членство во Европската Унија – изјави шефот на oдделот за економија и финансии, јакнење на институционалните капацитети и за прекугранична соработка во Делегацијата на ЕУ во Скопје, Јаромир Левичек.

Тој додаде дека е неопходно менување на законот, зголемување на свеста и на образованието, видливоста, но и на буџетот за бесплатна паравна помош, кој е еден од најмалите во Европа.

Според Надица Наумовска, координаторка на проект во ФООМ, Македонија годишно издвојува околу 44.000 евра за бесплатна правна помош, но и таа сума не се троши во целост.

И покрај бројните документи, како што е Европската конвенција за човекови права, разни директиви на ЕУ, па и практиката во земјите од Унијата, во Македонија пристапот до бесплатна правда е особено „рестриктивен и дискриминаторски“, како што беше речено, во кривичната материја. Само тие осомничени или обвинети за кривични дела за кои е предвидена казна затвор од најмалку десет години, имаат право на бесплатна правна помош.

Притоа, исто како и другите граѓани, претходно треба да ги исполнат трите услови во законот, да имаат семејни приходи помалку од половина од просечната плата во РМ, да се корисници на некое социјално право (социјална помош, детски додаток, нега и издршка) и нивниот севкупен имот да не надминува пет просечни бруто-плати во земјата.

Доколку ги исполнат, треба да го почекаат министерот за правда и формално да ја одобри бесплатната правна помош, што, како што беше наведено на прес-конференцијата, е единствен случај споредено со другите законодавства во Европа и во светот и тоа доведува до просечно доцнење од 40-50 денови, наместо гарантираните 20 денови.


Светска банка ќе издвои 57 милијарди долари за Африка


Вашингтон, 20 март, 2017 - 12:35 (META) 

Светска банка соопшти дека ќе издвои околу 57 милијарди долари за инвестиции во следните три години во државите во Африка.

Најголем дел од тие средства, 45 милијарди долари, ќе ги издвои Агенцијата за меѓународен развој во рамките на Светска банка, која ќе дава бескаматни кредити на најсиромашните земји.

Претседателот на Светска банка, Џим Јонг Ким, оваа недела ќе ги посети Руанда и Танзанија каде што со властите ќе разговара за финансиската поддршка на тој дел на Африка.

Светска банка е одговорна за обезбедување финансии и за давање совети на земјите за да се засили нивниот економски развој и да се намали сиромаштијата, но и за да се сочуваат меѓународните инвестиции.


Банките имаат вишок пари за кредити кои малку се бараат поради кризата, велат од НБРМ


Скопје, 15 март, 2017 - 14:56 (META) 

Ликвидноста во банкарскиот систем се зголемува петти месец по ред, што се должи на редовните трансакции на државата, како и на интервенциите на Народната банка на девизниот пазар за нето-откуп на девизи, велат од Народна банка.

Во услови на солидна девизна ликвидност кон средината на месецот, на меѓубанкарскиот пазар се јави вишок понуда на девизи.

– Порастот на потенцијалната ликвидност на банките, која тековно е насочена кон расположливите депозити кај Народната банка, се одвива во околности на намалена кредитна побарувачка во последниот период, што е резултат на неизвесноста поврзана со политичката криза. Во такви околности, како и поради тоа што банките немаат можности да инвестираат во други домашни долгорочни финансиски инструменти, на седницата беше заклучено да се повлече дел од овие средства, кои веќе добиваат карактер на структурен вишок на ликвидност во банкарскиот систем – велат од НБРМ.

Во однос на кредитната активност, првичните податоци заклучно со февруари покажуваат продолжување на порастот на кредитите на годишна основа и задржување на трендот на поизразено кредитирање на населението.

Последните податоци за кредитната активност упатуваат на послаби остварувања во однос на проектираните за првиот квартал на 2017 година, во согласност со октомвриската проекција.


Полиција во седиштето на партијата на Марин ле Пен


Париз, 20 февруари, 2017 - 20:59 (META) 

Француската полиција врши истрага во седиштето на Националниот фронт во Париз за наводни злоупотреби на фондовите на Европската Унија, пишува „Гардијан“.

Од Европскиот парламент наведуваат дека врвот на партијата во периодот од 2011 до 2012 година партиските функционери ги плаќал од фондовите на ЕУ.

„Гардијан“ истакнува дека правилата на ЕУ наложуваат нивните фондови да се користат само за асистентите на европарламентарците.

Ле Пен ги негираше обвинувањата за измама и наведе дека целта на истрагата е уривање на нејзиниот кредибилитет во текот на кампањата.

Според анкетите, Ле Пен би можела да влезе во завршниот круг на француските претседателски избори во мај годинава.

Претходно таа го одби барањето да врати 300.000 евра од фондовите на ЕУ за кои Европскиот парламент наведе дека се несоодветно искористени.


На земјите од Западен Балкан, ЕУ ќе им додели 50 милиони евра за енергетски проекти


Скопје, 9 февруари, 2017 - 15:59 (META) 

Педесет милиони евра за финансирање енергетски проекти ќе добијат земјите од Западен Балкан од Европската Унија преку Програмата за регионална енергетска ефикасност и Фондот за зелен раст.

Договорите за финансиите ги потпишаа претставници од Европската банка за обнова и развој (ЕБРД), Европската инвестициона банка (ЕИБ) и банкарскиот концерн KfW, во рамките на Програмата за регионална енергетска ефикасност (РЕЕП) и Фондот за зелен раст (GGF – Green for Growth Fund ), во рамките на денешниот министерски состанок на земјите од Западен Балкан.

Според еврокомесарот Јоханес Хан, предвидените финансии треба значително да му помогнат на јавниот и на приватниот енергетски сектор во шесте држави и да придонесат за заштеда на енергија и за намалување на емисиите на штетни гасови.

Хан истакна дека со овие дополнителни средства земјите од Западен Балкан ќе можат да постигнат 1,6 терават-часови електрична енергија годишно.


Азески: Блокадите на Евзони негативно влијаат врз економијата и на двете земји


Скопје, 7 февруари, 2017 - 15:05 (META) 

Блокадите на граничниот премин Евзони негативно се одразуваат врз економско-финансиското работење на стопанството во Македонија, а негативни ефекти чувствува и стопанството во Грција, пишува во писмото на претседателот на Стопанската комора на Македонија, Бранко Азески, до претседателот на Унијата на грчките трговско-индустриски комори, Константин Михалос, како и до амбасадорот и шеф на Канцеларијата за врски на Грција во Македонија, Димитриос Јанакакис.

Азески во писмото бара тие да се вклучат во наоѓањето решение за нормализирање на нарушените сообраќајни комуникации.

– Имајќи предвид дека е неизвесно до кога ќе трае блокадата, а не исклучувајќи ја и можноста ситуацијата да ескалира со блокирање и на другите гранични премини меѓу двете земји, Стопанската комора на Македонија, како најбројна бизнис-асоцијација во земјата, апелира за интензивирање на контактите со надлежните органи, институции и влијателни фактори на внатрешен и на меѓународен план, во барање помош за нормализирање на состојбите и за создавање услови за непречени деловни комуникации – вели Азески во писмото до Михалос.


Трамп го потпиша указот за изградба на ѕид на границата помеѓу САД и Мексико


Вашингтон, 26 јануари, 2017 - 9:32 (META) 

Американскиот претседател Доналд Трамп го потпиша указот за изградба на ѕид на границата меѓу САД и Мексико. Претседателот на Мексико, Енрике Пења Нието, изрази жалење и ја осуди таквата одлука.

– Мексико не верува во ѕидови. Неколкупати кажав дека Мексико нема да плати за ѕидот – напиша Пења Нието на „Твитер“.

Тој размислува дали да ја откаже планираната посета на Вашингтон на 31 јануари.

Ѕидот што треба да се гради на границата со Мексико, треба да спречи незаконско влегување во САД од Мексико.

Американскиот претседател Трамп рече дека новиот ѕид ќе чини помеѓу 4 милијарди и 10 милијарди долари, но од Универзитетот во Масачусетс наведуваат дека изградба на ѕид долг 1.609 километри ќе чини помеѓу 27 и 40 милијарди долари.


БИРН: Странците инвестирале седум пати помалку од најавеното


Скопје, 23 јануари, 2017 - 11:51 (META) 

Странските инвеститори инвестирале седум пати помалку од најавеното и отвориле три пати помалку работни места отколку што ветиле, покажува базата на податоци  „Странски инвестиции под лупа“ изработена од новинарскиот тим на БИРН Македонија.

Истражувањето опфатило 138 инвестиции што биле најавени или промовирани од Владата во период од 2007 до 2016 година. Тоа покажува дека дури 43 од најавените странски инвестиции воопшто не се реализирани или, пак, се пропаднати, што е речиси третина од вкупниот број инвестиции опфатени во базата.

Податоците што произлегоа од истражувањето на БИРН покажуваат дека само четири странски компании што инвестирале во земјава, вложиле толку пари колку што ветиле или дури и повеќе од тоа, а другите инвестирале значително помалку средства или воопшто не инвестирале.


Саманта Пауер го повика Трамп да не гo намалува финансирањето во ОН


Њујорк, 14 јануари, 2017 - 14:48 (META) 

Американската амбасадорка во заминување при Обединетите нации, Саманта Пауер, ја повика администрацијата на Доналд Трамп да не го намали финансирањето во Обединети нации.

Таа рече дека тоа ќе биде штетно за САД и ќе биде во корист на земји како Кина и Русија.

– Ние делумно го водиме светот затоа што сме водечка земја при Обединетите нации – рече амбасадорката на својата последна прес-конференција пред нејзиното заминување од функцијата на 20 јануари, кога должноста ја презема администрацијата на Трамп.

Поддржувачите на Израел во американскиот Конгрес предложија низа закони за намалување на финансирањето во ОН во знак на протест што претседателот во заминување, Барак Обама, дозволи усвојување на резолуција во Советот за безбедност на штета на Израел.

САД финансираат 22 отсто од регуларниот буџет на ОН, како и 25 отсто од буџетот за мировните мисии на ОН, во кои има околу 100.000 војници од разни земји членки на светската организација.

Пауер рече дека намалувањето на финансиите би ги загрозило самите Обединети нации на кои им е неопходна финансиска поддршка за решавање конфликти и за хуманитарните операции.