„Исцелител“ повторно во Кина


Шангај, 18 јуни, 2018 - 14:36 (META) 

Филмот „Исцелител“ на младиот Ѓорче Ставрески ќе се прикажува на 21-то издание на Филмскиот фестивал во Шангај, Кина.

Ова ќе биде трето прикажување на „Исцелител“ на фестивал од А категорија, покрај прикажувањата на „Црни Ноќи“ во Талин, Естонија и на интернационалниот филмски фестивал во Гоа, Индија.

На фестивалот во Шангај, филмот ќе се прикаже во ревијалната програма Спектрум, која е дел од Интернационалната филмска панорама на фестивалот.

Оваа година на фестивалот во Шангај освен „Исцелител“ ќе се прикажува и уште еден македонски филм, „Година на мајмунот“ на режисерот Владимир Блажевски.

Фестивалот во Шангај е основан 1993 година и е еден од најголемите филмски настани во Азија. Тој е единствен фестивал во Кина кој е дел од престижната А категорија на фестивали акредитирани од светската организација ФАПФ.

„Исцелител“ ќе има три прикажувања на фестивалот – денеска, на 22 и на 24 јуни.

Изминатите денови „Исцелител“ ја доби наградата за филм од М.А.Н – Македонски алтернативни награди. Ова е трета домашна награда за филмот, кој досега освои и 9 меѓународни награди, од кои 5 за најдобар филм и учествуваше на вкупно 24 светски фестивали.

Во Македонија „Исцелител“ досега се прикажа во кината во Скопје, Битола, Штип, Кочани, Кичево, Куманово, Прилеп, Свети Николе, Велес, Богданци, Гевгелија и Гостивар, каде го гледаа приближно 14.000 гледачи. Филмот имаше и проекција под отворено небо во Градскиот парк во Скопје, на која имаше околу 8.000 гледачи.

Од денеска до задутре филмот ќе се прикажува во Центарот за култура во Неготино.


Филмот „Исцелител“ на СЕЕ Фест во Лос Анџелес


Скопје, 27 април, 2018 - 13:41 (META) 

Филмот „Исцелител“ на младиот режисер Ѓорче Ставрески ќе се прикажува во натпреварувачка програма на СЕЕ Фест во Лос Анџелес, САД.

Фестивалот СЕЕ Фест е основан во 2002 година. Тој е посветен на филмови кои подлабоко ја раскажуваат приказната за Јужна и Источна Европа. Заедно со „Исцелител“ во натпреварувачката програма ќе се прикажат уште девет филма меѓу кои и словенскиот „Рудар“, добитник на награда во Трст, косовскиот „Бракот“, добитник на награда во Талин, азејберџанскиот „Овоштарникот со калинки“, добитник на наградата Еурасиан и други.

По Кливленд, Минеаполис и Санта Барбара, ова е четврти фестивал во САД на кој ќе учествува „Исцелител“. На фестивалот во Санта Барбара, македонската црна комедија ја освои наградата за најдобар филм.

Изминатите денови филмот ја освои наградата за најдобар дебитантски филм на „Let’s CEE“ во Виена, а беше прикажан на меѓународните филмски фестивали во Техеран и во Пекинг. По пет месеци од неговата премиера филмот освои 9 меѓународни награди и признанија и беше прикажан на вкупно 23 фестивали низ светот.


Со три проекции вечерва завршува 21. Скопје филм фестивал


Скопје, 26 април, 2018 - 13:50 (META) 

Со проекциите на филмовите „Самит“, „Диви момчиња“ и „Пеперутки“ вечерва завршува 21-то издание на Скопје филм фестивал.

Во рамките на фестивалот публикaта можеше да гледа повеќе од 50 нови филмови, од кои голем број биле дел од големите светски фестивали или го свртеле вниманието на критиката со иновативниот израз и авторски пристап. Покрај тоа имаше и работилници и гостувања на нови европски филмски имиња, промоции и дискусии.

На скопскиот филмски фестивал се случија и премиерите на новиот македонски игран филм „Година на мајмунот“ во режија на Владимир Блажевски и на документарниот филм за Шабан Трстена „Кобра“ во режија на Игор Иванов Изи.

Исто така, публиката имаше прилика да ја види скопската премиера на краткометражниот филм „Види ја ти неа“ што победи на престижниот фестивал Санденс, на режисерот Горан Столевски, како и уште неколку премиери на кратки македонски филмови на режисерите Милиана Ленак, Кирил Каракаш и Светислав Подлешанов, Батухан Ибрахим и Ханис Багашов.
Исто така беа прикажани и филмовите „Последните камбани“ на Николче Поповски и „Македонскиот Дон Кихот“ на Константин Плевнеш.


Филмот „Исцелител“ по наградите во Бергамо и Софија, на фестивал во Обањ


Скопје, 21 март, 2018 - 14:20 (META) 

Филмот „Исцелител“, кој минатата недела освои две значајни награди на два престижни меѓународни филмски фестивали, утре ќе биде дел од  натпреварувачката програма на фестивалот во Обањ, Франција, каде е во конкуренција за награда со девет други филмови.

На филмскиот фестивал во Бергамо, Италија минатата недела „Исцелител“ на младиот режисер Ѓорче Ставрески беше избран за најдобар филм во главната натпреварувачка конкуренција, а на филмскиот фестивал во Софија доби специјална награда од жирито на Балканската програма.

Покрај овие два фестивала, „Исцелител“ истовремено беше прикажан и на „Франкофилм“ во Рим и на „Фебиофест“ во Прага, каде сите проекции беа целосно распродадени.

Филмскиот фестивал во Обањ е основан 2001 година како фестивал кој е посветен на промоција на нови кинематографски остварувања со посебен акцент на музиката во филмовите. „Исцелител“ досега учествуваше на 16 филмски фестивали и освои пет меѓународни награди, а во Македонија го гледаа околу 12.000 гледачи.


Филмот „Исцелител“ на Ѓорче Ставрески награден на фестивалот во Санта Барбара


Санта Барбара, 10 февруари, 2018 - 19:43 (META) 

Филмот „Исцелител“ на режисерот Ѓорче Ставрески, ја освои наградата за најдобар филм во меѓународната селекција на фестивалот во Санта Барбара, Калифорнија, една од најзначајните смотри на независен авторски филм во САД.

Ова е трета фестивалска награда за „Исцелител“, по признанието од публиката во Солун, и онаа за најдобро сценарио на Фестивалот на медитерански филм во Брисел.


Филмот „Исцелител“ на Ѓорче Ставрески ја освои наградата на солунската публика


Солун, 12 ноември, 2017 - 20:35 (META) 

Дебитантскиот филм на Ставрески ја освои наградата на публиката „Фишер“ во рамки на популарната програма „Балкански преглед“ на 58-тиот Интернационален филмски фестивал во Солун, кој заврши вечерва со доделување на наградите и проекција на британскиот филм „Забава“ на Сели Потер.

Македонско-грчката копродукција на Ставрески ја имаше светската премиера на солунскиот фестивал под интернационалниот наслов „Тајната состојка“ („Secret ingredient“). Сторијата на Ставрески говори за синот Веле (Благој Веслеинов) и таткото Саздо (Анастас Тановски). Таткото е тешко болен од рак, но го притиска и чувството на вина за сообраќајката во која загинале сопругата и помладиот син. Синот работи како механичар во депото на Железницата, каде што не земал плата 3-4 месеци, и бара секаква можност да најде пари за лекови, па подлегнува пред предизвикот да ја украде дрогата што ја бараат и полицијата и мафијата во еден од вагоните. Не е секој роден за дилер на дрога, па Веле одлучува да направи колач со марихуана. Тој чудотворен колач ќе го опорави татко му, ќе му помогне и на соседот кој има реума, и низ градот ќе се расчуе за новиот „исцелител“, па пред станот на Веле се собираат десетици намерници со нивните маки. Но, и мафијата е на неговата трага…

Во филмот играат и Аксел Мехмет, Александар Микиќ и Симона Димковска, а кинематографер е Дејан Димески. Музиката е на членовите на групата „Фолтин“, а филмот ќе ја има скопската премиера на затворањето на фестивалот „Синедејс“ на 19 ноември, а месецов ќе биде и во натпреварувачката селекција на фестивалот во Талин.

Солунскиот фестивал ги наградува првите и вторите остварувања на авторите, па фаворит на годинешното жири е „Гаврани“ на шведскиот режисер, семејна драма за недоразбирањата на релација татко-син, кој ја доби наградата „Златен Александар“, а Реине Бринолфсон е прогласен за најдобар актер. Со „Сребрен Александар“ се закити иранскиот „Без датум, без потпис“ на Вахид Џалилванд, драма за лекар-форензичар кој ќе направи сообраќајка во која ќе биде полесно повредено едно дете. Детето подоцна ќе се затруе со расипана храна и ќе поччине, но лекарот е под притисок на сопствените морални дилеми дали тој е виновникот за неговата смрт. „Бронзениот Александар“ отиде во рацете на авторот на исландскиот филм „Зимски браќа“ на Хлинур Палмасон, интересна драма за двајца браќа.

Наградата за најдобра женска улога ја доби Дарја Жовнер за рускиот филм „Близина“ на Кантемир Балагов, драма за млад брачен пар во турбулентниот кавкаски регион. Овој филм ја доби и наградата за хумани вредности на грчкиот парламент.

Неодамна починатиот култен американски актер Хари Дин Стентон, чија последна улога беше во „Лаки“ на Џон Керил Линч во официјалната конкуренција, доби специјално признание од жирито и награда од публиката.

Во натпреварувачката интернационална конкуренција „Без датум, без потпис“ја освои наградата на критиката ФИПРЕСЦИ, „Зимски браќа“ доби специјално признание, а „Премногу информации во мојата глава“ на грчкиот автор Василис Хрисофилакис беше најдобар според во домашната конкуренција.

Стојан Синадинов


„Тајната состојка“ на Ставрески го зачини филмскиот фестивал во Солун


Солун, 8 ноември, 2017 - 16:45 (META) 

Ако задачата на филмот како уметност, во духот на најславната парола на париската револуционерна 1968 година, „Да бидеме реални, да го бараме невозмозното!“, е да го најавува духот на новото време, тогаш не треба да му се лутиме за сите тие депресивни и црни слики што ни ги нуди?! И кој ја има формулата на онаа тајна состојка што ветува добар филм и добар фестивал?

Веќе со години во извештаите од европските фестивали во најголема мера се говори за безбројните нијанси на сивилото во транзициските и во посттранзициските општества. И извештаите од 58. Интернационален филмски фестивал во Солун, кој се одржува од 2 до 12 ноември, не се поинакви, особено кога станува збор за насловите од источноевропксите кинематографии, но и од латиноамериканските и од азиските (особено иранската кинематографија).

festival-1

Меѓу стотината наслови во годинешното издание на солунскиот фестивал, селектирани во десетина програми, за место пред публиката се избори и македонско-грчката копродукција „Исцелител“. Дебитантскиот филм на Ѓорче Ставрески, чиј интернационален наслов е „Тајната состојка“ (Secret ingredient), денес ја имаше својата проекција за новинарите, а утревечер и в петок ќе ја има својата светска премиера пред солунската публика, во рамки на програмата „Балкански преглед“. Филмот на Ставрески, кој е автор и на сценариото, говори токму за таа веќе традиционална тема со која се преокупирани источноевропските и балканските кинематографии: има ли излез од маѓепсаниот круг на вечна транзиција, која никако да престане да ги меле човечките судбини?

Сторијата на Ставрески се врти околу (не)можноста на главните ликови, синот Веле (го игра младиот Благој Веслеинов) и таткото Саздо (Анастас Тановски), да создадат нов живот, заглавени во егзистенцијалното и емоционалното мочуриште. Таткото е тешко болен од рак, но и постојано растревожен од грижата на совеста дека ја преживеал сообраќајната несреќа во која загинале сопругата и помладиот син. Синот, пак, е растргнат меѓу љубовта кон татко си, барајќи секаква можност да му ги олесни болките и своевидното докажување пред родителот дека и покрај загубата на половина семејство, и тој е вреден да го живее животот, макар и не завршил факултет како што посакувал татко му, туку заработува за гол живот како механичар во депото на железницата.

Соочен со сè потешките фази на болеста на татко му, а пред предизвикот да ја украде дрогата што ја бараат и полицијата и мафијата во еден од вагоните, Веле се одлучува за второто. Но, и за препродавање на дрога треба знаење, искуство и план, нешто што Веле ги нема, па сурфајќи по интернет, одлучува да направи колач со марихуана. Тој чудотворен колач ќе го спаси татко му од смртта, ќе му помогне и на соседот кој има реума, но кога ќе се расчуе за новиот „исцелител“ во градот, Веле ги има пред својата врата десетината намерници кои се повеќе во потрага по надеж отколку по лек, но и локалната мафија, која не се откажува од привремено загубениот пакет дрога. Ќе успее ли Веле да го задржи татка си сè уште жив, а и мафијата да биде сита?
Во одлично снимениот филм на Ставрески (кинематограф е Дејан Димески) ги видовме повремено несигурниот Веселинов и стамениот, искусен Тановски, енергичниот Аксел Мехмет, ефектните епизоди на Александар Микич и Симона Димковска. Инаку, филмот ќе ја има скопската премиера на затворањето на фестивалот „Синедејс“, па останува простор за вреднување.

Во меѓувреме, кога сме на темата балкански кинематографии, потегот на солунскиот фестивал на годинешното издание да ја претстави специјалната програма „Од зборови до слики: балканската литература и филмот“ речиси од сите критичари е оценет како одличен.

Секако, и во духот на годинешното неформално мото на фестивалот, за корените и за гранките на филмската уметност, овој омаж е составен од 11 незаборавни филмови, базирани на некои од најзначајните дела на литературите на народите од Југоисточниот Медитеран. Александар Петровиќ со „Три“, Боштјан Хладник со „Танц на дождот“, „Бреза“ на Анте Бабаја, „Враќањето на мртвата армија“ на Димитер Анагости, „Професионалец“ на Душан Ковачевиќ се некои од тие филмови кои ги лоцираат корените на кинематографиите од овој простор.

Стојан Синадинов


Фестивал на новиот германски филм во Прилеп


Прилеп, 10 октомври, 2017 - 10:09 (META) 

Од 12 до 14 октомври во киното „Мис Стон“ во Прилеп ќе се одржи Фестивал на новиот германски филм, во соорганизација на Центарот за култура „Марко Цепенков“ и на Амбасадата на Германија.

Свеченото отворање е в четврток, во 20 часот, а на него ќе присуствуваат и претставници на Амбасадата на Германија. Ќе се прикажува филмот „Чик“, кој е од жанрот драма и комедија, а е снимен во режија на Фатих Акан. Филмот е за публика над 12 години.

В петок, со почеток во 18 часот, ќе се проектира трагикомедијата „Тони Ердман“ на режисерот Марен Аде, кој исто така е за публика над 12 години. Од 20 часот ќе почне проекцијата на „Херберт“, во режија на Томас Штубер.

В сабота од 16 часот ќе се проектира детскиот филм „Авантурата на Нели“, во режија на Доминик Весели. Од 18 часот ќе се проектира филмот за младинци „На иста висина“, во режија на Јоаким Долхопф, а од 20 часот ќе биде прикажан филмот „24 недели“, драма наменета за публика над 12 години, во режија на Ане Зохра Берахед.


Французинот Пиер Лом е добитник на наградата за животно дело на „Браќа Манаки“


Скопје, 22 август, 2017 - 14:44 (META) 

Францускиот кинематографер од светски глас Пјер Лом е добитникот на наградата Златна камера 300 за животно дело на годинашното 38. издание на меѓународниот фестивал на филмска камера „Браќа Манаки“. Фестивалот ќе се одржи од 23 до 30 септември во Битола, а Лом, иако е во поодминати години, ќе присуствува на фестивалот.

– Пиер Лом е легенда на француската и европската кинематографија, она што е најзначајно и карактеристично во опусот на овој кинематографер е што тој соработувал со значајни и големи имиња на француската кинематографија, а тој со својата вештина да се адаптира на сечиј стил беше еднакво успешен и во соработките со неколкумина странци, како што е на пример, американскиот режисер Џејмс Ајвори, со кого има снимено четири, многу важни  филмови за неговото творештво. Во неговата 40-годишна кариера тој ги има снимено некои од ремек делата на француската кинематографија, вклучувајќи го и филмот „Сирано де Бержерак“. Ние со гордост го очекуваме да биде наш ценет гостин, иако е во поодминати години, тој во својата прва реакција веднаш најави дека ќе биде наш гостин заедно со својата сопруга Рене – изјави директорот на Фестивалот, Благоја Куновски – Доре, на денешната прес конференција во ЕУ Инфо Центарот во Скопје.

На годинашното издание на „Браќа Манаки“ за наградите Златна, Сребрена и Бронзена Камера 300 на годинашниот фестивал ќе решава петчлено жири, составено од Пол Рене Ростад, кинематографер од  Норвешка и актуелен претседател на ИМАГО, како и Лука Коасин, кинематографер од Италија, Јани-Петери Паси, кинематографер од Финска, Даријан Пејовски, режисер и сценарист од Македонија и Ерол Зубчевиќ, кинематографер од Босна и Херцеговина.


Завршува Меѓународниот студентски филмски фестивал „Филмоција“ во Охрид


Охрид, 12 март, 2017 - 10:45 (META) 

Во Охрид денеска завршува Меѓународниот студентски филмски фестивал „Филмоција“, во организација на Институтот за филм – Филмска академија.

Во 11 часот ќе биде прикажан анимираниот филм „Тор и легендата за Валхала“, синхронизиран на македонски јазик. Проекцијата за  љубителите на анимирани филмови ја овозможија „Узенгија дистрибуција“ и Агенција за филм на Република Македонија .

Од 12 часот ќе има средба на филмски работници.

Свеченото затворање е во 17 часот, додека од 20 часот македонска премиера ќе има филмот „Триото од Белвил“ на познатиот режисер Силвиан Комет, номиниран за две награди „Оскар“.
Проекцијата ќе биде придружена од музичка изведба во живо на музичарот и композитор Дејан Петровиќ.