!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Завршува Меѓународниот студентски филмски фестивал „Филмоција“ во Охрид


Охрид, 12 март, 2017 - 10:45 (META) 

Во Охрид денеска завршува Меѓународниот студентски филмски фестивал „Филмоција“, во организација на Институтот за филм – Филмска академија.

Во 11 часот ќе биде прикажан анимираниот филм „Тор и легендата за Валхала“, синхронизиран на македонски јазик. Проекцијата за  љубителите на анимирани филмови ја овозможија „Узенгија дистрибуција“ и Агенција за филм на Република Македонија .

Од 12 часот ќе има средба на филмски работници.

Свеченото затворање е во 17 часот, додека од 20 часот македонска премиера ќе има филмот „Триото од Белвил“ на познатиот режисер Силвиан Комет, номиниран за две награди „Оскар“.
Проекцијата ќе биде придружена од музичка изведба во живо на музичарот и композитор Дејан Петровиќ.


Премиерата на новиот македонски филм „Кога денот немаше име“ на Берлинале


Скопје, 25 јануари, 2017 - 16:51 (META) 

Новиот македoнски филм „Кога денот немаше име“ на Теона Стругар-Митевска, премиерата ќе ја има на престижниот филмски фестивал во Берлин, соопшти продуцентската куќа „Сестри и брат Митевски“. „Кога денот немаше име“ ќе биде претставен во програмата „Панорама специјал“ на Берлинале, на 14 февруари, во 19 часот, во киното „Зоо палас“.

Во филмот улогите ги толкуваат актерките Ратка Радмановиќ, Николина Кујача, Ана Костовска и Лабина Митевска и шесттемина натуршници Леон Ристов, Ханис Багашов, Стефан Китановиќ, Игорчо Постолов, Драган Мишевски и Иван Вртев-Шоптрајанов. Сценариото е на Елма Татарагиќ, снимател е Французинката Агнес Годар, сценограф е Вук Митевски, а костимите се на Словенката Моника Лорбер.

Филмот на Теона Стругар-Митевска од Агенцијата за филм на Македонија доби 30 милиони денари (речиси 488.000 евра), како и пари од „Еуримаж“.


Утре во Тетово почнува интернационалниот филмски фестивал „Ода“


Тетово, 3 октомври, 2016 - 13:52 (META) 

Неделава тетовци ќе имаат можност да уживаат во проекција на 36 краткометражни филмови и на четири долгометражни од 25 држави во светот. Филмовите ќе се прикажуваат во рамки на интернационалниот филмски фестивал „Ода“, кој ќе почне утре а ќе заврши на 8 октомври.

– За овој фестивал аплицираа 855 филма, а избравме 37 краткометражни. Според програмата на интернационалниот филмски фестивал „Ода“, од вторник до петок во 13 часот ќе се прикажува детска програма, во 14 часот и во 16.30 часот краткометражни филмови, а со почеток во 20 часот ќе биде проекцијата на долгометражните филмови – изјави Сабедин Селмани од фестивалот „Ода“.

Организаторите на фестивалот посочуваат дека во Тетово недостига филмската уметност, а „Ода“ преставува ретка можност да се пополни таа празнина.

– На Тетово му се потребни вакви фестивали. Од овој фестивал ќе произлезат и критики, па и за самата организација, па здравје, на основа на критиките ќе се потрудиме наредниот фестивал да биде уште поквалитетен – изјави Африм Спахиу од фестивалската управа.

В среда, со почеток во 20 часот, ќе биде прикажан филмот „Медена ноќ“ во режија на Иво Трајков. Филмскиот фестивал „Ода 2016“ ќе заврши в сабота, со прогласување на наградените филмови. Влезот за сите љубители на филмската уметност е слободен.


На затворањето на „Браќа Манаки“, водителката ги собу чевлите и ги фрли кон публиката


Битола, 18 септември, 2016 - 12:50 (META) 

На свеченото затворање на фестивалот „Браќа Манаки“ во Битола, водителката се качи на сцена и се собу боса, а чевлите ги фрли кон публиката.

По ова, обезбедувањето ја отстрани од сцената.

Девојката што ја отстранија од сцената требаше да учествува во перформансот на Мартин Кочовски за затварањето, чија изведба беше откажана.

Кочовски го обвини фестивалот дека го цензурира, а од управата на фестивалот изјавија дека перформансот е откажан од технички причини бидејќи на сцената требало да се истури смет од овошје, кое не ќе можело бргу да се исчисти за да продолжи церемонијата на доделувањето на наградите.


Почнува четвртото издание на меѓународниот филмски фестивал „Вач аут“


Тетово, 24 мај, 2016 - 15:44 (META) 

Вечерва во дворот на Музејот на комунистичката партија во Тетово, почува петто издание на Меѓународниот филмски фестивал „Вач оут“во организација на Центарот за балканска соработка „Лоја“. Свеченото отворање е во 19.30 часот, а првиот филм ќе биде прикажан во 20 часот. Фестивалот кој е уникатен во Македонија со проекции на отворено ќе трае четири дена.

– За овој фестивал аплицираа 240 филмови и ќе бидат прикажани најдобрите 27. Фестивалот ќе се одржи на отворено, што го прави уникатен во Македонија – изјави Александар Стојановски – Цули од Центарот за балканска соработка „Лоја“.

Со фестивалот велат од „Лоја“, сакаме да ги децентрализираме културните активности кои претежно се случуваат само во Скопје.

– Ние на овој фестивал не гледаме само како на уметничка понуда, туку и на децентрализација на културата. Сакаме со овој фестивал да ги раздвижиме младите, кои се однесуваат апатично во поглед на културните збиднувања и активности – изјави Бујар Љума од Центарот за балканска соработка.

За време на четирите фестивалски дена, ќе се прикажуваат филмови од различни жанрови, Во случај на врнежливо време и други временски неприлики, филмските проекции од фестивалот, ќе се прикажат во просториите на Центарот за балканска соработка „Лоја“.


Почнува фестивалот на независен филм „Санденс 2016“


Парк Сити, 21 јануари, 2016 - 18:58 (META) 

Денеска во Парк Сити почнува годинешното издание на најголемиот американски фестивал на независен филм „Санденс 2016“.

Ова издание на фестивалот ќе го отвори документарниот филм „Норман Леар: Уште една твоја верзија“ (Norman Lear: Just Another Version Of You) на истакнатите документаристи Хајди Јуинг и Рејчел Грејди, за еден од најуспешните продуценти во историјата на телевизијата.

На програмата на фестивалот „Санденс 2016“, кој ќе се одржи од 21 до 31 јануари, ќе бидат прикажани 123 долгометражни филмови од 37 земји во светот, од кои 49 се филмиски првенчиња. Од нив дури 30 се влезени во официјалната конкуренција на фестивалот.

Филмскиот фестивал „Санденс“ е основан во 1985 година, на иницијатива на американскиот актер и режисер Роберт Редфорд и традиционално се одржува во јануари во градовите Парк Сити, Солт Лејк Сити, Огден и Санденс во сојузната американска држава Јута.

Фестивалот секоја година носи некои од најдобрите филмски остварувања во играна, документарна и во краткометражна конкуренција, ги претставува избраните филмови од целиот свет и открива нови имиња на филмската сцена.