Закинтос ги загуби сите 18 Сини знамиња


Атина, 23 јули, 2018 - 10:38 (META) 

На Закинтос, еден од најпопуларните острови во Јонсокото море, му се одземени сите Сини знамиња. Локалните медиуми јавија дека Хеленското друштво за заштита на природата и Советот за туризам ги отстраниле сите Сини знамиња од островот Закинтос по жалбите дека плажите на кои им се доделени овие признанија не ги исполнуваат критериумите.

Сино знаме за плажи и марини е меѓународен еколошки стандард за квалитет на заштита на животната средина на морето и брегот. Сини знамиња се доделуваат секоја година на плажи и марини кои ги исполнуваат строгите меѓународни стандарди според 33 критериуми.

Причините за повлекување се жалби во врска со управување со течен отпад, а посебно одлив на отпадни води во реката Агиос Хараламбос. На почетокот од јули имаше инцидент во подрачјето на реката Агиос Хараламбос кога после пропуст на вработени во комуналната хигиена кои затвориле само една од две пумпи, канализацијата завршила во реката.

Другите фактори кои се додадени на одлуката за повлекување на овие признанија се присуството на смет на улиците на кој многу туристи се пожалиле, како и отсуство на спасувачи на плажите со Сино знаме.

Минатата година беа отстранети пет сини знамиња од плажи на Закинтос, како и на плажата Миртос на блискиот јонски остров Кефалонија.


#Одговорност е канализациска мрежа, а не септичка јама


Скопје, 4 ноември, 2016 - 9:58 (META) 

Пребарувањето по интернет со зборовите „без канализација“ и слични формулации дава поразителни резултати: освен за значителен број села и помали места во Македонија, фекалната канализација во втората деценија на 21 век е фантазија и за делови од градското јадро на Скопје!

Според публикацијата на Државниот завод за статистика, „Статистика на животна средина, 2015 во која се користени податоци од пописот во 2002 година, во тоа време на јавна канализација биле приклучени 60 отсто од домаќинствата, а другите биле со септички јами, со слободен истек (односно истек во водотеци) и без инсталации, односно со нужници биле 7,4 отсто од домаќинствата.

Оттогаш (2002 година), работите несомнено се напреднати, но, сепак, реалноста е таква што не само во голем број села (кои не се многу оддалечени од градовите), туку и во некои населби во Скопје, домаќинствата сè уште користат септички јами. Таков е случајот со делот на Топана под касарната Илинден, не многу далеку од скопски Центар, каде нема фекална канализација. Истите маки ги имаат и жителите во Трпејца, бисерот на Охридското Езеро, како и во Љубаништа, каде што, иако, уште во 2014 година почнале да се преземаат одредени чекори во оваа насока, сепак, досега (октовмри 2016 година) не е решен проблемот со фекалната канализација. Речиси идентична ситуација се забележува и во Стар Дојран и во Нов Дојран, каде половина од домаќинствата проблемот со одвдот го решиле со септички јами.

 


Шилегов: Мегаломанскиот проект „Скопје 2014“ станува опасен по животот на граѓаните


Скопје, 9 септември, 2016 - 13:58 (META) 

Последните дождови покажаа дека „Скопје 2014“, мегаломанскиот проект на Никола Груевски, освен што е пералница за пари, станува реална опасност по безбедноста на граѓаните на Скопје, изјави денеска портпаролот на СДСМ, Петре Шилегов.

Тој рече дека два дена екипите на комуналните претпријатија дежураат во „прескапо платените градби во центарот на Скопје и од нив вадат фекалии кои директно ја загрозуваат безбедноста на граѓаните“.

„Она што постојано беше предвидувано од експертите, за жал, почна да се потврдува. Додека архитектите и урбанистите предупредуваа на опасностите, Груевски и неговите послушници заслепени од дебелите провизии продолжуваа да го урнисуваат центарот на Скопје. И покрај сите ревизии и покрај сите докази за лошо спроведните планови за градба, досега никој не поднесе одговорност. Што уште треба да се случи за некој да понесе одговорност за загрозување на безбедноста на скопјани? До кога граѓаните на Скопје ќе стравуваат од најобичен дожд? Постои ли план за заштита на градбите покрај Вардар? Јавноста мора да знае дали некои од објектите од мегаломанскиот проект, претставуваат закана за општата безбедност“, изјави Шилегов.

Тој ги повика сите институции да дозволат непречен пристап на новинарските екипи во подрумите и во темелите на објектите за да видат како изгледаат тие.

„И наместо да ѝ објаснат на јавноста што сè се прави за заштита на градбите, власта преку нејзините послушници напаѓа и брка новинари кои известуваат за штетите од криминалниот проект. Но, колку и да се трудат, не можат да ги сокријат катастрофалните последици од криминалниот проект. „Скопје 2014“ почнува да тоне, а на површина ќе останат само фекалиите, лагите и измамите на Груевски“, додаде Шилегов.

Изминативе три дена сообраќајниците и мостот кај зградата на Министерството за надворешни работи и новата зграда на Факулетот за драмски уметности се блокирани, бидејќи екипи на Јавното претпријатие „Водовод и канализација“ ја испумпуваат водата и фекалиите од ископ за објект до зградата на ФДУ. Ископот, како што пренесуваат медиумите, почнал да се полни со вода од обилните дождови, а фекалиите се од скинатата главна цевка од канализационата мрежа. Дел од водата и фекалиите се исфрлаат на кејот на Вардар.


Скината одводна цевка го блокираше центарот на Скопје


Скопје, 8 септември, 2016 - 18:22 (META) 

Полициски возила и денеска ја блокираа улицата кај новата зграда на Факултетот за драмски уметности во центарот за Скопје, спроти Министерството за надворешни работи, поради скината главна цевка од канализациската мрежа, пренесува „24 Вести“.

Според работници на Јавното претпријатие „Водовод и канализација“, како што пренесува телевизијата, проблемот настанал поради тоа што инвеститорот, кој гради во близина, копајќи вчеравечер ја скинал цевката од главната фекална канализација, по што ископот за новиот објект се полни со фекалии.

На дел од телевизиските екипи денеска грубо им беше забрането да снимаат на местото, бидејќи станувало збор за приватен имот, иако околу објектот што се гради нема поставено табла за инвеститорот и за изведувачот.

Градежен инспектор на Општина Ценатр ја запрел градбата на објектот, а ќе се бара и ќе се испитува дали инвеститорот има елаборат за заштита на градежната јама. Според Општината, како што пренесува „24 Вести“, инвеститор на објектот е „Волис Проперт“, изведувач е фирмата „Рапид билд“, а надзор на објектот има „Поинт дизајн“.

Во ископот, поради големото количество вода, има потопен багер, а се забележува и големо свлечиште кое може да предизвика уривање на зградата на Факулетот за драмски уметности, која нема потпорен ѕид. Поради тоа на улицата не е дозволен пристап на возила и единствено можат да се забележат камиони на ЈП „Водовод и канализација“ кои ја испумпуваат водата, но и цевки кои го празнат ископот и фекалиите ги исфрлаат на кејот на реката Вардар, пренесува телевизијата.


Фекалии од септички јами избиваат во домови во Брвеница


Тетово, 6 март, 2015 - 13:07 (META) 

Фекалиите од септичките јами почнаа да избиваат во домовите на жителите од Брвеница. Поројните дождови и снежните врнежи ги наполнија јамите иако се чистат двапати месечно, велат мештаните кои стравуваат од појава на заразни болести.

– Во Брвеница не се живее, фекалиите од септичките јами избиваат и во дворовите, а сега фекалии имаме и по домовите. Докторите кај секој член од моето семејство пронајдоа бактерија предизвикана од нечистотија – изјави Ефто Блажевски, жител на Брвеница.

Во Брвеница има повеќе од 1.000 куќи. Секој дом има по една септичка јама, кои шират непријатна миризба и преставуваат потенцијална еколошка бомба. За да се надмине проблемот, потребно е во селото да се изгради фекална канализација, велат мештаните.

Градоначалникот на Општина Брвеница, Енвер Пајазити, вели дека проблемот ќе се надмине и дека напролет ќе почнат градежни активности за изградба на фекална канализација, а парите ќе ги обезбеди Владата.
.
– Пари за фекална канализација ќе обезбеди Владата на Македонија, која на 33. седница во ноември минатата година нè задолжи да изработиме техничка документација за изградба на канализацијата – изјави Пајазити.

Во Брвеница нема ниту атмосферска канализација и по секој дожд улиците и тротоарите пливаат во вода.


(ВИДЕО) 100 тони фекалии од француските земјоделци за власта


Тулуз, 11 ноември, 2014 - 9:07 (META) 

Француските земјоделци истурија околу сто тони фекалии и арско ѓубре пред административните згради за време на нивните протести во Тулуз и во Нан, на 5 ноември.

Протестите се одговор на новото европско законодавство, кое го регулира количеството на нитратите.