Скандалозната „Кембриџ аналитика“ прогласи банкрот


Лондон, 3 мај, 2018 - 10:36 (META) 

Британската интернет-аналитичка компанија „Кембриџ аналитика“, којашто се најде во центарот на скандалот поради злоупотребата на личните податоци на над 80 милиони корисници на „Фејсбук“ во политички кампањи, соопшти дека прогласува банкрот.

„Кембриџ аналитика“ има седиште во Велика Британија, а синоќа челниците на компанијата им соопштиле на вработените да ги вратат своите картички и компјутерите, затоа што компанијата престанува со работа.

Првите луѓе на компанијата за британските медиуми изјавиле дека после скандалот кој што изби околу „Фејсбук“, „Кембриџ аналитика“ ги загубила сите големи клиенти, по што компанијата морала да прогласи банкрот.

Портпаролката на компанијата, Кларенс Мичел за „Би-би-си“ изјавила дека таа компанија во последните месеци била на мета на бројни неосновани обвинувања и покрај сите обиди да ги исправи работите. Според Мичел, активностите на „Кембриџ аналитика“ не само што не биле илегални, туку тие биле широко распространети во онлајн огласувањето како и во политичките активности.


Закерберг: Откривме профили од Македонија кои ширеа лажни вести


Скопје, 22 март, 2018 - 15:56 (META) 

Сопственикот на „Фејсбук“, Марк Закерберг, во интервју за „Си-ен-ен“ вели дека минатата година пуштиле нови алатки за вештачка интелигенција, за да откријат лажни профили што се обидуваат да шират лажни вести, и дека пронашле голем број такви профили од Македонија.

Ова е прво појавување на Закерберг во медиумите откако беше откриен скандалот со „Кембриџ Аналитика“, фирма за податоци која имала врски со кампањата на претседателот на САД, Доналд Трамп во 2016 година.  Фирмата наводна имала пристап до информации на повеќе од 50 милиони „Фејсбук“ корисници без нивно знаење.

Закерберг се извини за скандалот и потенцираше дека „Фејсбук“ вложува напори за да спречи мешање во изборите во 2018 година.

– Во 2017 година, за време на изборите за Сенатот во Алабама, пуштивме нови алатки што ги направивме за да откриеме лажни профили кои се обидуваа да шират лажни вести и пронајдовме многу различни профили од Македонија. Треба напорно да работиме за да им отежнеме на земји како Русија да се мешаат во избори и да направиме тролови и други луѓе да не можат да шират лажни вести – вели Закерберг во интервјуто.


Поради говор на омраза, „Фејсбук“ ги затвори страниците на партијата „Британија на прво место“


Лондон, 16 март, 2018 - 13:44 (META) 

„Фејсбук“ со официјално соопштение извести дека ги избришала официјалните страници на партијата на екстремна десница „Британија на прво место“ (Britain First) и на нејзините лидери поради говор на омраза.

Според лондонски „Гардијан“, „Фејсбук“ ги отстранил главната страница на партијата, која имала над 2 милиони фанови, како и страниците на партиските челници Пол Голдинг и Џејда Франсен поради „ширење говор на омраза наменет да предизвика омраза против групи во нашето општество“.

Од социјалната мрежа наведуваат дека според нивните стандарди, говорот на омраза е неприфатлив, односно, како што стои во образложението, на оваа социјална мрежа политичките ставови мора да се изразуваат без омраза. Од „Фејсбук“ велат и оти постапуваат и ги отстрануваат содржините во кои таквиот говор е присутен секогаш кога ќе им биде предочен таков случај. Истовремено, се потенцира дека нема да се дозволи екстремистичката група да отвори нови страници.

Вонпарламентарната партија „Британија на прво место“  е озлогласена поради своите кампањи против мултикултурализмот и директни акции од т.н. „христијански патроли“ против џамии низ Велика Британија. Групата е често квалификувана како фашистичка, и е позната по тоа што интензивно користи онлајн активизам.

Заменик-претседателката на партијата, Џејда Франсен, чие судење за говор на омраза на јавен митинг во Белфаст е во тек, стана меѓународно позната откако претседателот на САД Доналд Трамп ретвитна неколку нејзини исламофобни твитови на почетокот на март. Овој потег на Трамп беше критикуван и од британската премерка Тереза Меј.

Од„Фејсбук“ наведуваат дека наспроти тоа што повеќепати испратиле предупредувања до администраторите на сега затворените страници, тие продолжиле да објавуваат содржини кои ги прекршуваат правилата на платформата.


Анализа: Градоначаниците не ги користат социјалните мрежи за да ги слушнат граѓаните


Скопје, 17 декември, 2017 - 13:45 (META) 

Осумдесет од вкупно 81 градоначалник ја користат социјалната мрежа „Фејсбук“ во својата работа, покажа анализата направена од тим специјалисти за социјални медиуми, во периодот помеѓу 04 и 15 декември 2017 година.

Втор на листата на „омилени“ социјални медиуми кои ги користат градоначалниците е „Инстаграм“. Анализата покажува дека 21 градоначалник го користат „Инстаграм“, а само пет од 81 градоначалник го користи „Твитер“.

Сепак, специјалистот за нови медиуми и односи со јавност, Бојан Кордалов, вели дека повеќето од градоначалниците еднонасочно ги користат социјалните медиуми, односно само за промоција на нивната работа, но не и за да контактираат и да ги слушнат проблемите и идеите на граѓаните.

– Тоа што недостасува кај поголемиот дел од нив е да бидат секојдневно присутни онлајн, но не само за да се претстават, туку да го слушнат мислењето, критиките и предлозите кои доаѓаат преку социјалните медиуми. Разликата во бројот на градоначалници кои користат „Фејсбук“ споредено со „Инстаграм“ веројатно се должи на недостатокот на професионални лица и тимови за социјални медиуми кои секоја општина е потребно да ги има. Активното користење на „Твитер“ од само 5 градоначалници можеме да го толкуваме како недостаток на ресурси, но пред сè и како избегнување на оваа публика која важи за најкритизерска. Ова не е добро и мора да се промени – вели Кордалов, кој е и автор на анализата.

Само тројца градоначалници истовремено користат Фејсбук, Твитер и Инстаграм во својата работа, а само еден градоначалник, односно градоначалникот на Ранковце, Ивица Тошевски, воопшто не ги користи социјалните медиуми, покажа Анализата.

Сепак, градоначалниците се поактивни на „Фејсбук“ споредено со пратениците и министрите. Ваква анализа, направена во март годинава година, откри дека 110 од вкупно 120 пратеници користат „Фејсбук“, додека слично истражување објавено во јуни годинава покажа дека 20 од вкупно 26 министри се редовно активни на овој социјален медиум.


„Фејсбук“: Руската пропаганда ја виделе 20 милиони Американци


Вашингтон, 2 ноември, 2017 - 10:16 (META) 

Околу 20 милиони Американци можеле на „Инстаграм“ да видат содржини креирани од руски оператори пред американските избори, објави „Фејсбук“.

Податоците се изнесени во рамки на истрагата пред разузнавачкиот одбор на американскиот Сенат, за тоа како Русија ги користела социјалните мрежи за да се обиде да влијае на изборите во САД.

Одборот ги сослуша претставниците на „Фејсбук“, „Твитер“ и на „Гугл“ во врска со овие прашања.

Правниот директор на „Фејсбук“, Колин Треч, за време на сослушувањето рекол дека околу 16 милиони Американци можно е да биле изложени на руските информации преку „Инстаграм“ од почетокот на октомври 2016 година, а пред тоа тие материјали ги виделе четири милиони корисници.

Компанијата „Фејсбук“ претходно неделава објави дека 126 милиони корисници на „Фејсбук“ и на „Инстаграм“ виделе такви содржини во текот на 2015 и 2016 година.

Вкупно околу 150 милиони лица биле изложени на руските дезинформации на овие две платформи, рече Стреч.


72,2 отсто од населението во Македонија користи интернет


Скопје, 23 октомври, 2017 - 10:44 (META) 

Вкупно 1.503.000 жители на Македонија, односно 72,2 отсто од населението користи интернет, а милион од нив се приклучени на социјалната мрежа „Фејсбук“, покажуваат податоците на специјализираната статистичка веб-страница „Интернет ворлд стат“.

Според истражувањето, македонските граѓани повеќе користат интернет во споредба со жителите на Црна Гора (69,9 отсто), БИХ (69,3), Грција (69,1), Србија (67,1), Албанија (66,4) и Бугарија (59,8 проценти), но помалку во споредба со Словенците (75,5 отсто) и со Хрватите (74,4 проценти).

Според податоците на „Интернет ворлд стат“, 3,88 милијарди лица или 51,7 отсто од светската популација користи интернет, а 1,7 милијарди луѓе се регистрирани на „Фејсбук“.


„Фејсбук“: Околу 10 милиони лица ги виделе „руските огласи“ за американските избори


Вашингтон, 3 октомври, 2017 - 16:28 (META) 

„Фејсбук“ соопшти дека околу 10 милиони лица пред и по изборите во САД во 2016 година ги прегледале огласите што се поврзуваат со руска агенција.

Компанијата претходно објави дека му предала на Конгресот околу 3.000 реклами кои се поврзуваат со Русија, а кои се фокусираат на различни социјални и политички пораки, вклучувајќи и ЛГБТ-права, имиграцијата и правото на оружје.

Огласите, како што се наведува, во многу случаи ги охрабриле луѓето да ги следат страниците за тие прашања.

Нешто помалку од половина од огласите се прегледани пред изборите, а 56 отсто по нив. Некои од тие огласи се платени со руска валута.


Зукерберг ги отфрли обвинувањата на Трамп дека „Фејсбук“ работи против него


Лос Анџелес, 28 септември, 2017 - 12:52 (META) 

Основачот на социјалната мрежа „Фејсбук“, Марк Зукерберг ги отфрли обвинувањата искажани од претседателот на САД, Доналд Трамп кој рече дека оваа компанија е против него.

-„Фејсбук“ од секогаш беше против Трамп. Социјалните мрежи секогаш биле против Трамп – напиша претседателот на САД, на својот „Твитер“ профил обвинувајќи ги и медиумите „Њујорк Тајмс“ и „Вашингтон пост“ дека работат против него и запраша дали можеби тие соработуваат.

Зукерберк на „Фејсбук“ објави дека тој секојдневно работи на поврзување на луѓето и градење на заедница за сите.

Тој напиша дека за време на кампањата во 2016 година во САД Интернетот за прв пат служел како средство за примарна комуникација на кандидатите.

Зукерберк исто така напиша дека жали што после изборите рекол дека е „лудо“ да се помисли дека дезинформациите на „Фејсбук“ го промениле исходот на изборите.

„Фејсбук“ наскоро на увид на конгресните истражители ќе им предаде околу 3.000 политички реклами за кои се сомнева дека најверојатно ги купиле Руси за време на претседателските избори и после тоа.

И самиот Трамп се рекламираше на „Фејсбук“, а за време на кампањата потрошил приближно 70 милиони долари за објави на таа мрежа.

Претставници на „Фејсбук“, „Твитер“ и „Гугл“ повикани се да сведочат пред Истражувачкиот комитет на американскиот Сенат на 1 ноември за наводите во врска со мешањето на Русија во американските избори.


„Фејсбук“ работи на заштита на изборите во Германија од руско влијание, вели Зукерберг


Менло Парк, 22 септември, 2017 - 15:05 (META) 

Основачот и директор на „Фејсбук“,Марк Зукерберг во видео-обраќање изјави дека социјалната мрежа ќе и помогне на Германија во спречувањето на евентуално мешање на Русија во парламентарните избори во земјата, закажани за в недела.

„Работиме на тоа да обезбедиме интегритет на германските избори за време на викендот, од преземање на мерки против неколку илјади лажни профили, до соработка со властите…како и размена на информации за безбедносните постапки со кандидатите и партиите“, вели Зукерберг во обраќањето, објавено синоќа, во кое ги наведе мерките што „Фејсбук“ ги спроведува и планира да ги спроведе за заштита на интегритетот на демократските изборни процеси во светот од руско влијание.

Тој наведе дека „Фејсбук“ отстранил илјадници лажни профили поврзани со Русија, а преку кои имало обид да се влијае на гласањето во неколку земји, меѓу кои неодамна била и Франција. Зукерберг додава дека засега не е забележан сличен обид и во Германија, но, во тек е анализата на активностите на отстранети профили во оваа земја.

Основачот на „Фејсбук“ соопшти дека компанијата ќе сподели 3.000 политички реклами поврзани со Русија, со истражителите во САД, во врска со претседателските избори што се одржаа минатата година, на кои победи Доналд Трамп.

На ваквите наводи веднаш реагираше Кремљ, нагласувајќи дека Русија никогаш не огласувала на „Фејсбук“ во обид да влијае на американските претседателски избори.

„Ние не знаеме како да поставиме оглас на ‘Фејсбук“. Ние тоа никогаш не сме го правеле, и Русија никогаш не била вмешана“, изјавил синоќа, портпаролот на Кремљ, Дмитри Песков.

Инаку, Зукерберг во обраќањето ветува дека политичкото рекламирање на неговата мрежа во иднина ќе биде потранспарентно.

„Ние ќе работиме со другите за да создадеме нов стандард за транспаретност за политичкото рекламирање он-лајн“, вели Зукерберг.


„Фејсбук“ има докази дека Русија се мешала во изборите во САД


Вашингтон, 7 септември, 2017 - 11:16 (META) 

Американската компанија „Фејсбук“ открила извори поврзани со Русија кои платиле околу 100.000 долари за неколку илјади политички реклами на оваа социјална мрежа, пренесува „Би-би-си“.

Од „Фејсбук“ за тоа ги известиле американските власти кои ја истражуваат наводната вмешаност на Русија во претседателските избори во САД во 2016 година.

„Во рамки на проруската кампања се потрошени 100.000 долари за околу 3.000 реклами во период од две години, заклучно со мај 2017 година“, соопшти компанијата што ја поседува социјалната мрежа.

Доказите се предадени на специјалниот обвинител Роберт Милер, кој раководи со истрагата за вмешаноста на Русија во минатогодишните претседателски избори.

Платените огласи ги пренасочувале корисниците кон 470 профили кои ширеле лажни информации или ги кршеле условите на оваа социјална мрежа.

„Рекламите и профилите се фокусирале на ширење различни општествени и политички пораки“, стои во соопштението на „Фејсбук“ и се додава дека профилите сега се исклучени.

Проруската кампања е откриена во рамки на интерната истрага на „Фејсбук“ за можни злоупотреби на социјалната мрежа во предизборната кампања во САД.