!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Коми: Нема сомнеж дека Русија се мешала во изборите во САД


Вашингтон, 8 јуни, 2017 - 21:12 (META) 

Немам сомнежи дека Русија се мешала во претседателските избори во Соединетите Американски Држави, но нема докази дека успеала да ги намести гласовите, изјави поранешниот директор на Федералното биро за истраги (ФБИ), Џејмс Коми на денешното сослушување пред комисијата за разузнавачките служби на американскиот Сенат.

„Русија се мешала во нашите избори и тоа го правеле со цел и на многу софистициран начин и во тоа нема никаков сомнеж“, неколку пати повтори Коми во текот на сослушувањето.

Поранешниот директор на ФБИ рече дека неговите разговори со американскиот претседател Доналд Трамп биле многу вознемирувачки и дека здравиот разум му говорел дека Трамп барал нешто за возврат за да го задржи на местото директор на ФБИ.

Тој рече дека Трамп не бил под истрага додека тој бил директор на ФБИ, но истакна дека поранешниот советник за национална безбедност на американскиот претседател, Мајкл Флин бил во „законска опасност од кривичен прогон“.

На прашање од сенаторот од таборот на демократите, Марк Ворнер околу водењето на белешки од сите средби со Трамп, од првиот до деветиот, Коми рече дека бил загрижен оти тогаш избраниот претседател би можел да лаже.

„Знаев дека би можело да дојде ден кога моите белешки би можеле да бидат важни за да ја заштитам службата и себе“, рече Коми.

Тој истакна дека откако бил отпуштен од ФБИ побарал од негов пријател да ја сподели со медиумите содржината од белешките бидејќи сметал дека нивното објавување ќе доведе до поставување на специјален обвинител за случајот.

Коми истакна оти верува дека е отпуштен поради истрагата за мешањето на Русија во претседателските избори. Тој, исто така, рече дека администрацијата на Трамп го омаловажила него и ФБИ со изјавата дека оваа институција е во хаос.

„Иако, според законот не е нужно да постојат било какви причини за смена на директорот на ФБИ , администрацијата на Трамп се одлучи да ме клевети мене и, што е уште поважно ФБИ, со тврдењата дека оваа организација е во хаос, дека е лошо водена и дека вработените изгубиле доверба во директорот. Тоа беа чисти лаги“, рече Коми.


Зетот на Трамп во фокусот на ФБИ истрагата за контакти со Русија


Вашингтон, 27 мај, 2017 - 11:37 (META) 

Зетот на американскиот претседател Доналд Трамп и негов близок соработник, Џаред Кушнер имал најмалку три неоткриени контакти со рускиот амбасадор во САД.

Ова се случувало за време и по претседателската изборна кампања во 2016 година, објавуваат американските медиуми.

Во контактите спаѓаат и два телефонски повици направени помеѓу април и ноември минатата година, за што Кушнер сега е во фокусот на ФБИ истрагата.

Новите информации за двата повика покажуваат дека контактите на Кушнер со Сергеј Кислјак биле побројни отколку што Белата куќа објавила.

Весникот „Вашингтон пост“ открива дека имало најмалку 18 неоткриени повици и меилови помеѓу соработниците на Трамп и лица поврзани со Кремљ седум месеци пред претседателските избори, вклучувајќи и шест повици со Кислјак.


ФБИ ја истражува улогата на зетот на Трамп во руското мешање во американските избори


Вашингтон, 26 мај, 2017 - 10:41 (META) 

Истрагата која ја води ФБИ за руското мешање во претседателските избори во САД во 2016 година се повеќе укажува на повеќекратна улога на зетот на Доналд Трамп и висок советник на Белата куќа, Џаред Кушнер.

Истрагата за улогата на Кушнер е насочена на прашања како што се операцијата на анализа за податоци од кампањата на Трамп, неговиот однос со поранешниот советник за државна безбедност Мајкл Флин, и контактите на Кушнер со Русите, велат американските претставници кои се добро упатени во истрагата, јавува „Си-ен-ен“.

Нема показатели дека Кушнер во моментов е под истрага и не постојат наводи дека нправил нешто нелегално.

Исто така не е јасно дали ФБИ планира да разговара со Кушнер, но истражителите сметаат дека тој би можел да пружи информации кои би помогнале во истрагата.

Извор близок до Кушнер изјавил дека тој не знае за интересот на ФБИ за него и дека не го контактирале. Неговата адвокатка изјавила дека нејзиниот клиент е волен да разговара со ФБИ доколку тоа се побара од него.


Трамп уверува дека потрагата за нов шеф на ФБИ се одвива брзо


Вашингтон, 15 мај, 2017 - 20:49 (META) 

Претседателот на Соединетите Aмерикански Држави, Доналд Трамп, изјави дека неговата потрага за нов шеф на ФБИ се одвива брзо.

– Процесот се одвива брзо – изјави Трамп.

Американскиот претседател претходно изјави дека сака бргу да именува нов директор на ФБИ на местото на сменетиот Џејмс Коми, напомнувајќи дека тоа би можело да се случи до петок, а веќе почнал и со разговори со кандидатите за таа функција.

Трамп во саботата на новинарите кои патувале со него во авионот за Вирџинија им кажал дека кандидатите што ги разгледува се генерално добро познати, високо уважени и талентирани луѓе.


„Викиликс“ нуди 100.000 долари за снимка од разговорот меѓу Трамп и Коми


Вашингтон, 13 мај, 2017 - 11:36 (META) 

„Викиликс“ објави дека ќе плати 100.000 долари за снимка од разговорот на американскиот претседател Доналд Трамп и на доскорешниот директор на ФБИ, Џејмс Коми. Пораката е објавена на твитер-профилот на „Викиликс“ неколку часа откако Трамп, исто така на „Твитер“, го предупреди Коми да не оддава премногу информации на медиумите за нивната средба.

„Њујорк тајмс“ пренесе дека колегите на Коми изјавиле дека на вечерата на поранешниот директор со Трамп во јануари, од него била побарана лојалност. Коми, според тврдењата, тоа го одбил и понудил „чесност“.

Кога Трамп потоа го притиснал да му даде „чесна лојалност“, Коми му кажал на американскиот претседател „Ќе го добиете тоа“, изјавиле колегите, кои за „Њујорк тајмс“ потврдиле дека се сложиле да не го откриваат тоа сè додека Коми е директор на ФБИ. Трамп ги негираше тврдењата.

 


Трамп се закани на Коми, размислува да ги укине брифинзите за новинари


Вашингтон, 12 мај, 2017 - 18:03 (META) 

Претседателот на САД Доналд Трамп со неколку твитови денеска предизвика вистинска сензација во јавноста, откако порача дека „можеби е подобро“ да се укинат брифинзите за новинарите во Белата куќа, а потоа му се закани на сменетиот директор на ФБИ, Џејмс Коми да не искажува негативни ставови за претседателот во јавноста, споменувајќи „снимки“.

„Бидејќи сум многу активен претседател а многу работи се случуваат, не е можно моите соработници да застанат на говорница и да бидат совршено точни. Можеби е најдобро да се укинат сите идни брифинзи за новинарите и во интерес на вистината да се даваат писмени одговори???“, напиша Трамп на Твитер.

Овој потег е испровоциран од непријатностите со кои се соочи Белата куќа поради различните објаснувања за причините Трамп да го смени директорот на ФБИ, Џејмс Коми.

Откако Трамп го смени Коми, неговите советници изјавија дека тоа го направил по препорака на заменик министерот за правда Род Розенстајн. Потоа и самиот Трамп и неговите советници истакнаа дека тој планирал да го отстрани Коми од функцијата уште пред да ја добие препораката.

По првиот твит, уследи уште еден во кој Трамп го предупредува Коми навестувајќи дека е можно да има снимки од нивните разговори.

„Коми подобро нека се надева дека нема „снимки“ од нашите разговори пред да почне да дава информации во медиумите“, напиша Трамп.


Новиот шеф на ФБИ најави продолжување на истрагата за руското мешање во изборите


Вашингтон, 11 мај, 2017 - 21:12 (META) 

Федералното биро за истраги (ФБИ) ќе ја продолжи истрагата околу наводните врски помеѓу Русија и изборниот тим на Доналд Трамп и по разрешувањето на досегашниот директор на ФБИ, Џејмс Коми, изјави денеска неговиот наследник, Ендрју Мекејб, пред комитетот за разузнавање на Сенатот, пренесува „Би-би-си“.

Мекејб пред комитетот на Сенатот изјави дека разрешувањето на Коми не влијаело на работата на ФБИ, додавајќи дека неговиот досегашен шеф имал „широка поддршка“ внатре во агенцијата.

Изјавите на Мекејб се во спротивност со тврдењата на официјалните претставници на Белата куќа, според кои Коми бил разрешен бидејќи ФБИ ја изгубило довербата во него, односно дека неговата стручност била доведена во прашање поради начинот на кој го водел случајот за електронската пошта на кандидатката за претседател на Демократската партија, Хилари Клинтон. Од друга страна, пак, критичарите го обвинуваат американскиот претседател, Доналд Трамп, дека го разрешил Коми поради водењето на истрагата за руското мешање во претседателските избори.

„Директорот Коми имаше широка поддршка во ФБИ и сè уште ја има. Можам искрено да ви кажам дека големо мнозинство вработени имаат длабока и позитивна врска со директорот Коми“, рекол Мекејб пред комитетот на Сенатот.

За испитувањето на наводите за влијанието на Русија во американските претседателски избори, тој истакнал дека станува збор за „многу значајна истрага“.

Мекејб, исто така, нагласил дека нема да доставува информации до Белата Куќа за статусот на истрагата и дека ќе го извести Сенатот за секој обид за мешање во случајот.


Трамп го отпушти директорот на ФБИ, Џејмс Коми


Вашингтон, 10 мај, 2017 - 10:30 (META) 

Претседателот на САД, Доналд Трамп, го смени директорот на ФБИ, Џејмс Коми, соопшти Белата куќа.

Коми беше на чело на истрагата за наводната вмешаност на Русија во американските претседателски избори.

– Претседателот го прифати предлогот на државниот обвинител Џеф Сешонс, за разрешување на директорот на ФБИ, Џејмс Коми – изјави портпаролот на Белата куќа, Шон Спајсер.

Во соопштението на Белата куќа се наведува дека потрагата по нов директор на ФБИ ќе почне веднаш.

Коми, кој беше поставен за директор на ФБИ за време на администрацијата на Барак Обама во 2013 година, со десетгодишен мандат, жестоко ја критикуваше администрацијата на Трамп поради истрагата водена против Хилари Клинтон поради користење на приватни меилови додека беше на местото државен секретар.

Во писмото упатено до Коми, Трамп го известил дека одлуката за смена стапува на сила веднаш.
„Иако многу го ценам тоа што во три одвоени пригоди ме известивте дека не сум под истрага, сепак се согласувам со оценката на Министерството за правда дека Вие не сте во состојба ефикасно да го водите ФБИ“, се наведува во писмото на Трамп.

Демократската кандидатка за претседател на САД, Хилари Клинтон, претходно го обвини Коми дека ги упропастил нејзините шанси да дојде на чело на државата со тоа што објави дека е обновена истрагата за нејзиниот начин за користење електронска пошта.

По отпуштањето на Коми, привремен директор на ФБИ ќе биде Ендрју Мекејб.


ФБИ и НСА го негираат тврдењето на Трамп за прислушување


Вашингтон, 20 март, 2017 - 18:47 (META) 

Директорите на американските водечки безбедносни и разузнавачки агенции изјавија дека немаат информации што би ги потврдиле тврдењата на претседателот на САД, Доналд Трамп, дека неговиот претходник Барак Обама прислушувал пред изборите.

– Со почитување на претседателските твитови за тоа дека претходната администрација го прислушувала, јас немам информации што би ги поддржале тие твитови – изјави директорот на ФБИ, Џејмс Коми, за време на неговото сведочење во Конгресот на САД.

Според неговите зборови, ист став има и министерството за правда, кое ја надгледува работата на ФБИ и на другите агенции.

Коми додаде дека ниту еден поединец не може да нареди прислушување на некој граѓанин на Америка, туку дека дозвола за тоа даваат судовите по ригорозен процес на одлучување.

Пред Конгресот сведочеше и директорот на НСА, Мајк Роџерс, кој ги отфрли сугестиите на Трамповата администрација дека Националната безбедносна агенција барала од британските разузнавачки служби да го шпионираат претседателот на САД.


ФБИ: Да се отфрлат обвинувањата на Трамп за прислушување


Вашингтон, 6 март, 2017 - 10:05 (META) 

Американското Федерално биро за истраги (ФБИ) побара од Министерството за правда да ги оспори наводите на претседателот Доналд Трамп дека неговиот претходник, Барак Обама, го прислушувал пред претседателските избори.

Трамп на „Твитер“ го обвини поранешниот претседател Обама дека го прислушувал пред претседателските избори, одржани на 8 ноември минатата година, и побара од Конгресот да истражи дали администрацијата на неговиот претходник ги „злоупотребила своите овластувања“ за време на кампањата во 2016 година, соопштено е синоќа од Белата куќа.

Директорот ФБИ, Џејмс Коми, рече дека обвинувањата се лажни и мора да се исправат, објави вчера весникот „Њујорк тајмс“.

Во изјава дадена вчера, портпаролот на Белата куќа, Шон Спајсер ги оцени како многу загрижувачки непрецизните наводи за потенцијални, политички мотивирани истраги во пресрет на изборите во 2016 година.

Спајсер рече дека „истрагата за мешањето на Русија во изборите, исто така треба да ја опфати и можната злоупотреба на позицијата на поранешниот претседател Обама“. Тој додаде дека ниту Белата куќа, ниту претседателот Трамп нема да даваат понатаму изјави на оваа тема.