Загрозениот сведок во „Монструм”: Слушнав истрели пред да ги видам телата


Скопје, 31 август, 2018 - 10:53 (META) 

Пред да ги види телата на четирите убиени момчиња кај Смиљковското Езеро, загрозениот сведок Е1 слушнал и повеќе истрели, рече тој на денешното судско рочиште за случајот „Монструм”. Сепак сведокот потенцираше дека не видел кој пукал, а прашан зошто сега првпат кажува дека слушнал истрели, рече дека не бил прашан.

Адвокатот Насер Рауфи реагираше дека сведокот досега сведочел осум пати, а се до минатото рочиште не кажал дека видел тела или дека слушнал истрели. Специјалната обвинителка Фатиме Фетаи реплицираше дека тоа е така зашто сега првпат му се поставени такви директни прашања.

На 12 април 2012 кај скопското Смиљковско Езеро беа убиени Филип Славковски, Александар Наќевски, Цветанчо Ацковски и Кире Тричковски (на возраст од 18 до 21 година), сите од Радишани, Скопје, и 45-годишниот рибар Борче Стевковски од Црешево.


Заштитениот сведок препозна неколкумина од обвинетите во „Монструм“


Скопје, 22 август, 2018 - 12:41 (META) 

Заштитениот сведок кој беше сослушан преку камера од друга просторија на денешното рочиште за случајот „Монструм“ на СЈО со модифициран глас кажа дека си останува на исказот даден на претходна постапка и препозна тројца од обвинетите.

Сведокот рече дека од 30 сантиметри до 30 метри далечина, во неколку наврати, секој ден пред да се случат убистватат ги гледал на местото Фејзи Аџири, Агим Исмаиловиќ и Сами Љута, кои денес директно ги опиша и ги посочи во судницата. Лицето со брада што го гледал исто така, не е овде, рече сведокот.

На прашање од обвинителката од СЈО, Фатиме Фетаи, тој рече дека за настанот дознал од медиумите и сам од морални причини се пријавил во полиција за да каже што знае.

Сведокот кажа дека три-четири дена пред настанот видел четири лица со црн „Голф 3“ со затемнети стакла на местото на настанот. Посочи дека имало црн висок човек, едниот имал лузна на левата страна, друг бил ќелав, еден на 50-тина години, а друг на 35-6 години.

Прашан како се однесувале, рече „нормално како сите луѓе“. Последен пат ги видел на 12 април. Обвинителката Фетаи му посочи дека има разлики во исказите во однос на времињата дадени претходно и сега, на што сведокот одговори дека поминало многу време и оти не се сеќава.

Заштитениот сведок рече дека вршел препознавање во обвинителство, каде му биле покажани фотографии, без притисоци и закани.

Фетаи побара од сведокот да каже дали препознава некој од тие што ги видел на местото на настанот сега да се присутни во судницата. Препозна неколкумина и ги опиша, по што обвинителката Фетаи ги посочи Агим Исмаиловиќ и Самир Љута.

Фетаи побара Самир Љута да стане, на што сведокот кажа дека е 100 отсто сигурен дека е тоа лицето со лузна. Прашан од која далечина ги видел овие лица, кажа дека секогаш различно и дека ги имал видено од пет метри до еден метар близина.

Сведокот тврди дека ги видел на местото и на 12 април 2012, еден час пред убиството, истите овие луѓе што ги гледал секој ден, претходните 3-4 дена.


Обвинителката Фетаи бара екстрадиција на Африм Исмаиловиќ и Алил Демири


Скопје, 22 август, 2018 - 12:02 (META) 

Обвинителката од СЈО, Фатиме Фетаи, на почетокот на рочиштето за случајот „Монструм“ побара од судот да започне постапката за екстрадиција на обвинетите Африм Исмаиловиќ и Алил Демири, кои се на Косово и се недостапни за македонските власти, а по нив е распишана меѓународна потерница.

Судијата Огнен Ставрев кажа дека веќе се во контакт со косовските власти за постапката за екстрадиција.

Во однос на барањето за исклучување на јавноста од сослушувањето на заштитениот сведок, Фетаи рече дека не гледа ниту една причина тоа да биде направено. Според Законот за заштита на сведоци, а и во интерес на сите нас е јавноста да биде присутна на сослушувањето, рече Фетаи.

Судијата Ставрев кажа дека јавноста нема да биде исклучена и ќе може да присуствува на сослушувањата на заштитениот сведок во „Монструм“.

На последното рочиште за „Монструм“ на 11 јули се гледаа аудио и видео снимка од испрашувањето на заштитениот сведок Хаки Азири од 7 мај 2012 година од страна на истражен судија и обвинител во Кривичниот суд. Пред Судот исказ даваше и сведокот Сашо Лазаревски, сосед на едно од убиените момчиња.

За петкратното убиство кај Смилковско езеро на 12 април 2012 година, кога беа убиени момчињата Кире Тричковски, Филип Славковски, Цветанчо Ацковски, Александар Наќевски и рибарот Борче Стефановски, беше отворен предмет „Монструм“, а на доживотен затвор беа осудени Алил Демири, Африм и Агим Исмаиловиќ, Езим и Хаки Азири и Сами Љута.

Врховниот суд во декември лани ги укина пресудите, ги ослободи од притвор осудените Агим Исмаиловиќ, Хаќи Азири, Сами Љута и Фејзи Азири, и им определи мерки на претпазливост. По укинувањето на пресудите, случајот „Монструм“ го презеде СЈО и предметот беше вратен на повторно судење.


Фетаи побара приведување на Груевски, судењето за „Насилство во Центар“ продолжува на 30 август


Скопје, 13 јули, 2018 - 14:09 (META) 

Со доцнење на обвинетиот Никола Груевски, барање на специјалната обвинителка Фатиме Фетаи тој да биде приведен и со сослушување сведоци, во скопскиот Кривичен суд денешното рочиште од случајот „Насилство во општина Центар“ беше едно од подинамичните.

Следното ќе се одржи на 30 август.

На почетокот, бидејќи Груевски не беше дојден, Фетаи побара тој да биде приведен бидејќи упорно доцни на судења.

– Вас не ве почитува чесен суде, не нас обвинителите. Пратете полиција по него, поминаа 20 минути како го чекаме сите овде седнати во судницава – додаде обвинителот Гаврил Бубевски.

Тогаш Груевски дојде во судницата, а судијата Душан Јосифов го опомена дека пречесто доцни и оти тоа веќе на ништо не личи. Груевски само го погледна и ништо не одговори.

Денеска беа сослушани двајца поранешни советници во Општина Центар од коалицијата предводена од СДСМ – Јован Тагасовски и Дарко Гигоски.

Првиот рече оти се сеќава дека група луѓе фрлале тврди предмети, при што повредиле една советничка и дека тој се обидел да им објасни дека на дневниот ред на седницата на Советот на општина Центар нема одлука за рушење на црквата „Св.Константин и Елена“.

Гигоски препозна тројца во судницата кои учествувале во групата која упаднала на седницата.

Во овој случај обвинети се поранешниот премиер Никола Груевски, поранешниот министер за транспорт и врски Миле Јанакиески, советничката на ВМРО-ДПМНЕ во тоа време Даниела Рангелова и уште неколкумина кои биле дел од толпата која на 10 јуни 2013 година протестираше пред Општина Центар.


Судењето за „Шамарите во Центар“ не почна – обвинет заминал во Хрватска


Скопје, 1 јуни, 2018 - 12:48 (META) 

Во Основниот суд Скопје 1 денеска рочиштето за случајот „Насилство во Центар“ не почна, поради тоа што обвинетиот Александар Трајковски, вработен во општина Гази Баба заминал на службен пат во Хрватска, со потпис на градоначалникот Борис Георгиевски.

– Барам од судот да му испрати допис на градоначалникот и да го праша дали знаел дека денеска обвинетиот има покана за судско рочиште и зошто го пуштил да патува – побара специјалната обвинителка Фатиме Фетаи, која го води овој случај.

Следното рочиште ќе се одржи в среда. Денешното рочиште требаше да биде првото по речиси месец и половина.

Обвинети во овој случај се поранешниот премиер Никола Груевски, кој според обвинението, ги нарачал насилствата во Општина Центар во јуни 2013 година, потоа поранешниот министер за транспорт и врски Миле Јанакиески, пратеничката Даниела Рангелова и уште девет лица.


Хаки Азири рече дека притисок му вршел Љупчо Тодоровски – Радникот


Скопје, 23 мај, 2018 - 16:43 (META) 

Обвинетиот Хаки Азири во продолжението на судењето за „Монструм“, откако специјалната обвинителка Фатиме Фетаи на својот телефон му покажа фотографија од поранешниот директор на Бирото за јавна безбедност, Љупчо Тодоровски – Радникот, рече дека тоа е инспекторот што му вршел притисок и му рекол дека сите судии и обвинители се нивни, па мора да застане зад изјавата што му била дадена да ја потпише.

– Радникот беше тој со повисок полициски чин кај кого ме однесоа во зградата во МВР, откако претходно бев држан во Кочани. Тој ми рече дека мора да ја потпишам веќе подготвената изјава за убиството и пред судот да го кажам тоа што го пишува на листот – рече Хаки Азири на денешното судење.

На прашањето од Фетаи, тој рече дека контактирал телефонски со бегалците Алил Демири и Африм Исмаиловиќ, по кои се распишани меѓународни потерници.

На првото продолжение од денешното рочиште, Хаки Азири, кој првично бил загрозен сведок,  раскажа како на 1мај 2012 година бил брутално апсен, тепан, плашен, носен по полициски станици низ Македонија, но и во МВР, присилуван да признае дека помогнал тероризам, поради што и на крајот пред истражен судија дал изјава под притисок на инспектори од МВР.

Според обвинението тој со свое возило ги презел од „опел омегата“ прво и второобвинетите Алил Демири и Африм Исмаиловиќ веднаш по убиството. Биле со црни ракавици и фантомки, му кажале: „Направивме гомнарија, убивме човек“.


Азири, обвинетиот во „Монструм“ тврди дека бил тепан за да го признае делото


Скопје, 23 мај, 2018 - 12:49 (META) 

Обвинетиот во „Монструм“ Хаки Азири, кој првично бил загрозен сведок, на денешното рочиште во Основниот суд Скопје 1 раскажа како на први мај 2012 година бил брутално апсен, тепан, плашен, носен по полициски станици низ Македонија, но и во МВР, присилуван да признае дека помогнал тероризам, поради што и на крајот пред истражен судија дал изјава под притисок на инспектори од МВР.

-Дента кога дојдоа да ме уапсат, татко ми лежеше на подот, а полицијата го тепаше мојот малолетен брат. Кога побарав да стане татко ми, ме удрија со клоца во лице. Потоа ме однесоа во полициска станица и ме распрашуваа за 12 април. Кажував што правев дента, но ми велеа дека тоа не е вистина и дека заедно со сега обвинетите сме го извршиле убиството. Ми рекоа дека се уапсени моите роднини и дека дел од нив ќе ги убијат. Потоа ме тепаа, по што ме однесоа во една зграда, ме ставија во една канцеларија и ме врзаа за еден столб со лисици. Подоцна ми викаат дека нема да ме остават жив мене и моето семејство ако не признаам дека Алил Демири со неговите другари го извршиле убиството. Продолжија да ме малтретираат и да ми кажуваат како да сведочам – рече Азири.

Обвинителката од СЈО Фатиме Фетаи побара да се чита изјавата на Хаки Азири од 2 мај таа година пред истражен судија, а и да се прегледа аудиовизуелната снимка по пет дена што ја дал, за да се види, како што рече, дали имало некакви промени и повреди кај него, зашто тврдеше дека на први и деновите потоа бил брутално тепан и малтретиран.

Азири рече дека во МВР инспектори и еден со повисок чин и функција му кажале што треба да кажува пред истражен судија, ако сака да ги види живи членовите на неговото семејство.

-Ми рекоа истражниот судија е наш човек, обвинителот е наш човек, а ние ќе им речеме како да прават. Ми рекоа и да не ангажирам адвокат. Било кој од присутните во судница да го земат и да му го направат тоа што мене ми го направија ќе го признае не само ова убиство, туку и секое друго, бидејќи ми вршеа физички и психички тортури – рече Азири.

Кога се предомислил дека не сака да биде загрозен сведок рече дека бил однесен во притвор, а по шест месеци нашле друг заштитен сведок.

На 12 април, вечерта кога се случи петкратното убиство, посочи дека имал слободен ден, а инаку работел како шофер. Посочи и дека е можно тој ден да ја садел бавчата, бидејќи секој април го правеле тоа. Рече и дека е можно истиот ден да се видел и со обвинетиот Алил Демири, а за останатите средби не се сеќава. Вечерта пак бил кај негов роднина каде што играле друштвена игра.

Според обвинението тој со свое возило ги презел од „опел омегата“ прво и второобвинетите Алил Демири и Африм Исмаиловиќ веднаш по убиството. Биле со црни ракавици и фантомки, му кажале: „Направивме гомнарија, убивме човек“.

Обвинителката Фетаи побара пауза, најавувајќи дека распитот на Азири ќе трае долго. Судијата Огнен Ставрев, пак, рече дека поради тоа што на снимката не се гледа дали Азири има повреди од тепањето, на следното рочиште со посебна техника тој ќе биде зумиран.


По три часа исказ на Фејзи Азири прекинато рочиштето за „Монструм“


Скопје, 16 мај, 2018 - 17:10 (META) 

По тричасовниот исказ на обвинетиот Фејзи Азири судот го прекина денешното прво рочиште од повторениот судски процес за случајот „Монструм”.

Пред Азири, исказ даде Агим Исмаиловиќ, кој рече дека неговиот брат Африм Исмаиловиќ е во Косово.

– Мојот брат е во Косово, комуницирав со него преку Вибер – рече тој.

На прашање на обвинителката Фатиме Фетаи која е точната адреса и каде точно се наоѓа неговиот брат Африм Исмаиловиќ, обвинет во оваа постапка кој се бара по потерница, Агим рече дека тој живее во Приштина, дека адресата не ја знае, но дека косовската полиција има точни податоци и многу добро знае каде живеат и неговиот брат Африм како и обвинетиот бегалец Алил Демири.

Судскиот процес за случајот „Монструм“ продолжува на 23 мај со одбрана на останатите двајца обвинети.


Фетаи го прочита старото обвинение за „Монструм“ и ги расплака роднините на убиените


Скопје, 16 мај, 2018 - 12:23 (META) 

Со читање на старото обвинение за „Монструм“ почна повторениот судски процес за петкратното убиство кај Смилковскo Езеро.

Обвинителката Фатиме Фетаи рече дека за овој случај ќе бидат приложени нови докази.

Деталите од обвинението, меѓу кои е и начинот на кој биле убиени четирите момчиња и рибарот, ги расплакаа роднините на убиените, кои седат во последниот ред во големата судница во Кривичниот суд и го следат судењето.

По читањето на обвинението судот почна со распит на обвинетите.


Алими и Гури не се чувствуваат виновни за „Титаник 3“


Скопје, 11 мај, 2018 - 12:42 (META) 

Обвинетите Ејуп Алими и Исмет Гури на денешното рочиште кажаа дека го разбираат обвинението што го презентира обвнителката Фатиме Фетаи, но оти не се чувствуваат виновни.

Според СЈО, двајцата обвинети со своите дејствија влијаеле директно врз изборниот резултат во општина Чаир.

– Тие имале криминален нагон да ја фалсификуваат изборната волја на граѓаните на Чаир со цел да остварат политичка моќ – истакна обвинителката Фетаи.

Таа образлагаше дека незадоволни од вистинскиот изборен резултат, тие формирале група за дејствување, односно имале цел да генерираат поволен изборен резултат. Со закана успеале да го скршат отпорот на сведоците и ги приклучиле кон себе. Групата ја обезбедиле според позната изрека за стапот и морковот, односно ги уцениле со зборовите „доколку не го сториш ова нема да поминеш добро. Имаме договор со ВМРО, ништо нема да ви се случи“, рече обвинителката.

Адвокатите на Алими и Гури пред судот кажаа дека со повеќе докази во текот на постапката ќе докажат дека нивните клиенти не се виновни, како и дека во спорниот момент на обвинението немале никаква функција со што би влијаеле да се стори кривичното дело за кое ги обвинува СЈО.

Судењето продолжува на 19 мај.