!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Савески: Ќе има ли еден аршин за Богоевски, друг аршин за обвинетите од Левицa


Скопје, 18 јануари, 2018 - 11:53 (META) 

Познатиот активист д-р Здравко Савески ја поздрави одлуката на Обвинителството да не го гони Павле Богоевски, но порача дека треба да се има еднаков пристап и кон членовите на Левица, кои се исто така обвинети поради активностите во Шарената револуција. Во пост на неговиот Фејсбук-профил рече дека ако членовите на Левица, чиј основач е тој, не бидат еднакво третирани како Богоевски, тоа ќе значи дека со критичарите на власта се постапува по друг аршин.

„Обвинителството нема да го гони Павле Богоевски. Правилен потег. Немаше основа за кривично гонење. Но, во контекст на тоа што кривичната постапка против нас, членовите на Левица, поради нашето учество во протестите во 2016 година, се уште трае – да се повлече обвинението против Павле Боговски, а да не се повлече против нас – ќе да тоа посочува на двојни аршини. За тој што е во власта еден аршин, а за тој што критикува друг аршин“, напиша Савески.

Поранешниот универзитетски професор реагира и дека судскиот процес против него се развлекува безмалку две години, а како што вели, може да продолжи и до 10 години постојано малтретирање со влечкање по судови.

„На 25 јануари повторно ќе се појавам на суд. Судскиот процес трае без малку 2 години, а постапката е буквално на самиот почеток. Ќе дочекам пресуда за помалку од 10 години или во мојот случај на тој начин ме казнуваат за критиките кон претходната и кон сегашната власт – со влечкање по судови што е можно подолго?“, прашува Савески.


Тевдовски: Најновата еврообврзница е со досега најниска каматна стапка


Скопје, 12 јануари, 2018 - 16:31 (META) 

Парите од еврообврзницата, со која Македoнија на странскиот пазар се задолжи за половина милијарда евра, ќе бидат потрошени за покривање на буџетскиот дефицит, враќање на стари долгови, реализација на капитaлни инвестиции, зголемување на средствата за одбраната и за зголемени плати во образованието и здравството, информираше денеска министерот за финансии, Драган Тевдовски.

Според него, историски најниската каматна стапка од 2,75 проценти за еврообврзницата е показател дека на меѓународниот финансиски пазар и меѓу инвеститорите постои доверба во перспективите на македонската економија и стабилноста на земјата.

Просечната каматна стапка на претходните еврообврзници изнесуваше 5,34 проценти.

– Парите од оваа евробврзница нема да се трошат за непродуктивни работи, споменици и фасади. Дел од овие пари ќе се потрошат и за покривање на стари долгови по овие ставки. Во буџетот, кој што е изгласан од Собранието, е проектирано за кои капитални инвестиции ќе бидат потрошени парите – нагласи министерот за финансии.

Тој додаде дека, првпат во историјата каматната стапка на еврообврзницата е пониска од проектираниот пораст на економијата од 3,2 проценти. Со еврообврзницата ќе бидат вратени и претходно направени долгови, па така на 29 јануари ќе се отплати првата рата на „Пи би џи“ (PBG) кредитот земен во 2013 година во износ од 95 милиони евра.

– Исто така, ги искористивме поволните услови на меѓународните пазари и срушивме дел од огромниот ѕид на долгови со кои се соочува Македонија во 2020 година. Предвреме вративме една третина од еврообврзницата од 270 милиони евра издадена во 2015 година, која достасува во декември 2020, и чија што каматна стапка на издавање од 4,875 проценти е значително повисока од каматна стапка на новоиздадената еврообврзница од 2,75 проценти. Со ова го намаливме долгот кој достасува во 2020 година и обезбедивме значително понизок ризик на рефинансирање – додаде Тевдовски.

Тој појасни дека, имајќи предвид што со еврообврзницата враќаме речиси 200 милиони евра претходно наталожени долгови, нето-задолжувањето со оваа еврообврзница изнесува околу 300 милиони евра.

На новинарско прашање во однос на транспарентноста на целата постапка за задолжување со еврообврзницата, министерот за финансии рече дека и при претставувањето на буџетот во Собранието најавил дека дефицитот ќе се финансира од позајмување од домашниот или од странските пазари, но под услов каматните стапки да се поволни.

Одлуката за новото задолжување била објавена во Службен весник, но не е најавена на прес-конференција оти ако било соопштено дека се планира издавање на еврообврзница, тоа би можело да ја крене цената, бидејќи станува збор за ценовно чувствителна информација.

– Со тоа што излеговме на меѓународен пазар, средствата на домашните банки ги оставивме слободни и може да се употребат за финансирање во домашната економија – дополни Тевдовски.


Големо невреме во БиХ, урнати дрвја и бандери, летале покриви и фасади


Бања Лука, 12 декември, 2017 - 10:55 (META) 

Во налетот на силните ветришта што ноќеска ја погодија БиХ, претежно нејзиниот источен дел, нанесени се бројни штети, со многу урнати дрвја и бандери и одлетани покриви и парчиња од фасади.

Според Хидрометеоролошкиот завод на Република Српска, во текот на ноќта ветерот во Бања Лука дувал со брзина од 115 километри на час, а претпладнево ослабнал до брзини од 60 до 70 километри на час. Пожарникарите интервенирале 26 пати, главно за отстранување паднати дрвја и гранки на сообраќајниците. Голем број оштетени возила и скршени прозорци има во населбата Обилиќево, а во други населби е сопрена водата.

Три лица се полесно повредени во куќа во која одлетал дел од покривот и пропаднал плафонот, а покривите од ламарина на голем број згради се истргани.

Забранет за сообраќај е патот Бања Лука – Кнежево, поради можноста да паѓаат стебла и да се јават одрони.

Во Зеничко-добојскиот кантон има големи штети во Зеница, Маглај и Тешањ. Во Зеница паднато парче од фасада оштетило автомобил, а има и голем број срушени дрвја. Исто така се забележани и проблеми со пропаѓање на покриви, а во Тешањ ветрот срушил минаре на џамија.

Во општина Соколац 25 села останаа без струја поради штетите што ветриштата ги нанесоа на електропреносната мрежа. Кај болницата во Зворник паднато дрво оштетило три автомобили. Штети има и во општините Скелани и Сребреница, како и во Бајина Башта во Србија.


Повеќе од 60 згради во Велика Британија не ги задоволуваат противпожарните стандарди


Лондон, 26 јуни, 2017 - 10:59 (META) 

Британската влада вчеравечер соопшти дека досегашната истрага утврдила дека најмалку 60 згради во Британија не ги исполнуваат и се во спротивност со безбедносните стандарди против пожари. Локалните власти во земјата се на готовс во случај на нови евакуации на станари по неодамнешниот пожар во зграда во Лондон, во кој загинаа 79 лица.

„Сите надлежни служби, станари и пожарникари ги добија резултатите од тестовите и сега сите сме во контакт за преземање конкретни мерки“, изјавил британскиот министер за локални заедници, Саџид Џавид, јавуваат агенциите.

Министерот претходно изјави дека примероците од надворешните фасади на 34 згради не ги задоволуваат безбедносните стандарди.

Повеќе од сто станари во четири згради во Лондон во саботата биле исселени поради опасност од пожар и поради итно поставување противпожарна заштита.

Во зградата „Гренфел“ во Лондон, која изгоре ноќта меѓу 13 и 14 јуни, живееле сиромашни луѓе, приматели на социјална помош, кои со години се жалеле на проблеми со струјата и на други недостатоци, поради што зградата минатата година била реновирана.

Сомневањата се дека зградата брзо изгорела бидејќи при реновирањето бил вграден ефтин и запаллив термоизолациски материјал.


Се санираат фасади од староградската архитектура во Струга


Охрид, 15 декември, 2016 - 14:51 (META) 

По обновата на неколку објекти од староградската архитектура во Охрид, НУ Завод за заштита на спомениците на културата и музеј од Охрид со истата активност продолжи во Струга, каде веќе ја заврши обновата на фасадата на еден објект лоциран во старото градско јадро.

Целосно е обновена надворешноста и покривната конструкција на објектот на улицата Гоце Делчев бр. 84, попознат како куќата на Роза Несторова-Ристова.

Станува збор за објект од 19 век со типична староградска архитектура, кој со овие конзерваторски активности ја сочува својата впечатлива надворешност.

Сега се во тек активностите за конзервација и за реставрација на фасадата на објект лоциран на улица Браќа Миладиновци, број 32, попознат како Куќата на Љуба Блажеска, а ќе се работи и на други објекти.

– Со проектот за конзервација на фасади на повеќе објекти од староградска и градска архитектура низ градовите во Македонија, тие се заштитуваат од понатамошно пропаѓање и од целосно губење на автентичноста. Исто така, се подобруваат и визурите на карактеристични делови од старото градско јадро, како и амбиентот и ликот на амбиенталните целини на цели улички – велат во Завод и музеј во Охрид.


500 јавувања во ЦУК за пријава на штети од земјотресите


Скопје, 13 септември, 2016 - 9:57 (META) 

Околу 500 граѓани деновиве пријавиле штети на објекти по серијата земјотреси што се случија во Скопскиот Регион. Пријавите кои во најголем дел се однесуваат на разурнати фасади, оштетени покриви, скршени прозорци, паднати плафони и оштетени возила, граѓаните ги пријавиле во Центарот за управување со кризи.

Штетите на објектите може да се пријават на бесплатниот телефонски број за итни повици 195, а ако граѓаните не можат да добијат слободна линија од Центарот апелираат да испратат податоци, име, презиме, телефонски број за контакт, точна адреса и краток опис на штетата предизвикана од земјотресот, на mail@cuk.gov.mk.

Од ЦУК информираат дека по синоќешниот земјотрес во 19.53 часот со магнитуда од 4 степени според Рихтеровата скала, освен привремени прекини на снабдувањето со електрична енергија во одредени делови на градот, не се пријавени позначителни штети.


Манчевски: На поплавените да им се дадат по 90.000 денари надомест


Скопје, 22 август, 2016 - 15:11 (META) 

Дамјан Манчевски, потпретседателот на СДСМ, денеска побара интервентниот надомест да се зголеми од 30.000 на 90.000 денари. Тој обвини дека власта целосно потфрлила во реакцијата за поплавите.

– За жал, корупцијата и алчноста за пари однесоа човечки животи. Државните институции дејствуваа конфузно и без почитување на процедурите. Не се изврши евакуација на населението. Овие наши сограѓани целосно треба да ги реконструираат своите домови. За девет дена почнува училишната година. На овие семејства им требаат чиста вода, храна, нова облека, книги, училишен прибор. Интервентниот надомест на штета од 30.000 денари кои власта под контрола на Груевски ја планира за настраданите не е доволна. На овие луѓе, кои останаа без ништо, итно им се потребни пари. Бараме интервентниот надомест да се зголеми на 90.000 денари за домаќинство – вели Манчевски.

Тој смета дека за да се обезбедат овие пари, веднаш треба да запре изградбата на панорамското тркало, кое чини 18 милиони евра, кулата на Водно, која чини 12 милиони евра, и барокните фасади во Скопје.


Министерство за култура: На националните установи нема да им се менува фасадата


Скопје, 5 јули, 2016 - 20:08 (META) 

Министерството за култура најостро ги демантира информациите дека постојните фасади на националните установи Македонска опера и балет и Национална и универзитетска библиотека „Свети Климент Охридски“ во Скопје ќе добијат барокен изглед.

Од Министерството за култура овие информации ги оценуваат како паушални и невистинити и велат дека станува збор за национални установи чии објекти се изградени според конкретни идејни решенија во втората половина на минатиот век и нивниот изглед е автентичен, па поради тоа нема да има никаква промена на фасадите на овие објекти.

„Министерството за култура континуирано вложува во унапредување на условите во сите установи од областа на културата, а меѓу многубројните проекти, во моментов во тек е целосната обнова на големата сала во Македонската опера и балет, како и проектот за реконструкција на објектот на НУБ „Свети Климент Охридски“, како и целосна обнова на читалните во оваа установа“, пишува во соопштението на министерството.


Тунтев: Власта крати средства за основните потреби на граѓаните


Скопје, 4 јули, 2016 - 15:27 (META) 

„Оваа власт крати на основите потреби на граѓаните и со тоа продолжува да ги осиромашува и да го кочи развојот на економијата. Со ребалансот на буџетот се кратат 45 милиони евра за капитални инвестиции“, изјави пратеникот на СДСМ, Томислав Тунтев, на денешната прес-конференција.

Според него, во првиот квартал реализирани се само 13 проценти од предвидените инвестиции во инфраструктурата.

– Само за пример, во последните шест години, на криминален начин од буџетот се потрошени најмалку 630 милиони евра за споменици и за фасади, додека 75 проценти од средствата за реконструкција и за одржување на патиштата се од заеми и од кредити. Затоа еден километар автопат во Македонија чини трипати повеќе отколку во другите земји од регионот – вели Тунтев.

Тој додава дека ситуацијата дополнително ќе се влоши со скратувањето на средствата од ИПА-фондовите, што ќе се одрази врз слабиот инфраструктурен развој.


Oбновa на фасадите на два објекта на булеварот Илинден


Скопје, 18 јуни, 2015 - 11:02 (META) 

Во тек е изведбата на санаторско-реставраторските работи на фасадите на објектите бр. 68 и бр. 80 на булеварот Илинден во Скопје, датирани од периодот меѓу двете светски војни.

Фасадите на објектот на булеварот Илинден бр.80 (или позната како зградата на МЦМ) ќе бидат готови во текот на летото. Санацијата на фасадите на булеварот Илинден бр. 68 треба да биде завршена до почетокот на есента 2015 година.

Во текот на 2015 година ќе бидат изработени и пет основни проекти за конзервација и за реставрација на објекти во Стара скопска чаршија.

Проектот е дел од акцискиот план на Владата и на Министерството за култура за обнова и за конзервација на повеќе фасади од старата градска архитектура во значајните градски јадра во нашата земја.