Прилепскиот загубар „Еуроинвест“ ќе прогласи технолошки вишок


Прилеп, 25 септември, 2018 - 10:04 (META) 

Прилепскиот загубар „Еурокомпозит“ до крјаот на овој месец ќе ја објави листата на вработени кои што ќе бидат прогласени за технолошки вишок. Според вицепремиерот за економија, Кочо Анѓушев ова е една од мерките за консолидација на овој прилепски загубар со околу 260 вработени, кои што со децении живеат во агонија за својата работна судбина.

„Оваа компанијата се соочува со сериозни тешкотии што настанале во 2011, 2012 и 2013 година. Но, на добар пат сме да го решиме. До крајот на месецот како што се договоривме со Синдикатот и раководството ќе биде прогласен технолошки вишок, за да може сите тие луѓе да си ги остварат своите права, во рамките на законите, за да бидат згрижени. Оттука натаму, по први октомври ќе премине во период на реорганизација, значи пред стечајна реорганизација во која што се обезбедени инвеститори за да може „Еурокомпозит“, да продолжи да работи како нормална компанија“, рече вицепремиерот за економија Анѓушев.

Тој се надева дека за две години, оваа државна компанија ќе се реорганизира и ќе постигне резултати, бидејќи компаниите од дејноста што ја обавува „Еурокомпозит“ во регионот работат успешно.

„Еурокомпозит“ е единствена фабрика за наменско производство за потребите на одбраната и безбедноста, целосно во државна сопственост. Од осамостојување на Македонија до денес вработените оствариле десетици средби со сите македонски влади и добиле ветувања дека проблемот со овој загубар ќе биде решен. Но, наместо подобро, останувала практиката само преку штајк да обезбедуваат аванси за плати, зашто придонесе не им се плаќаат со години.


Руска сајбер шпионка роварела во Македонија по кумановските настани


Велес, 20 јули, 2018 - 14:14 (META) 

Заедничката истрага на „Базфид њуз“ и Проектот за известување за организиран криминал и корупција (OCCRP) покажува дека индустријата за политички вести на Велес не е започната „спонтано од аполитични тинејџери“.

Според истражувањето, по разгледувањето на објавите на социјалните медиуми, државните записи, информациите за регистарот на доменот и архивираните верзии на лажни веб-сајтови за вести, како и интервјуирањето на клучните играчи, сајтовите со лажни вести во Велес ги започнал македонскиот адвокат Трајче Арсов – кој тесно соработувал со двајца американски партнери од висок профил во период од најмалку шест месеци за време на периодот што се преклопуваше со денот на изборите.

Ana Bogacheva

Истрагата, исто така, открива дека барем еден член на руската „фабрика на тролови”, Ана Богачева, обвинета од американскиот специјален советник Роберт Мулер за наводно мешање во изборите, била во Македонија само три месеци пред да биде регистриран првиот веб-домејн.

Имиграционите записи кои ги добиле новинарите покажуваат дека Богачева била во Македонија во средината на 2015 година, ја напуштила земјата преку копно во Грција на 26 јуни таа година, но, нема записи за нејзиното влегување во земјата.

Имаку на 9 и 10 мај истата, 2015 година во Македонија се случи една од најголемите кризи, контроверзините „кумановските настани“ кај Диво Насеље, во кои загинаа 8 полицајци. Основниот суд Скопје 1 во ноември 2017 година изрече седум доживотни затворски казни, а на 13 обвинети им изрече единствена затворска казна во траење од 40 години.

На прашањето на новинарите зошто била во Македонија во 2015 година, Богачева изјавува „се извинувам, ама не збрувам за мојата работа“.

Богачева е една од 13-те руски државјани обвинети во февруари за наводното мешање во американските избори.

Обвинението се фокусираше на улогата на истражувачката агенција во Санкт Петерсбург – често нарекувана „фабрика за тролови” – која произведувала онлајн пропаганда и ширела пораки преку социјалните медиуми со цел да му помогне на Трамп и да го порази својот ривал, Хилари Клинтон.

Репортерите не пронашле врска помеѓу Богачева и македонските веб-страници, а Арсов негира било каква поврзаност со Русија.

Без одговор се прашањата со кого Богачова имала контакти во Македонија, кој и дозволил да ја напушти земјата ако веќе немало запис дека легално влегла, и каква е нејзината улога во креирањето други „фабрики на тролови“.


Заложничка криза во Москва – еден убиен и тројца ранети


Москва, 27 декември, 2017 - 14:33 (META) 

Едно лице е убиено, а три се ранети во пукање во московската кондиторска фабрика „Маншевик“. Убиецот земал неколку лица за заложници.

Новинската агенцијата „РИА новости“ наведува дека директорот на фабриката, која се наоѓа во југоисточниот дел на Москва, влегол во фабричкиот круг, го убил чуварот и ранил три лица, а сега со пиштол в рака се шета во зградата на фабриката, додека неколку лица држи како заложници.

Некои московски медиуми објавија дека директорот на фабриката го застрелал својот деловен ривал.

Според некои извори, пукањето во фабриката во југоисточниот дел на Москва уште трае. Околу фабриката е поставен кордон, а распоредени се и специјални единици. Полицијата во моментов се обидува да воспостави контакт со убиецот, кој засега, како што јавуваат медиумите, нема изнесено никакви барања.

Телевизијата „Маш њуз телеграм“наведува дека меѓу повредените е и судски извршител, кој дошол во фабриката за да ги реши финансиските проблеми на компанијата.


Силна експлозија во кинескиот град Нингбо, најмалку двајца загинати


Нингбо, 26 ноември, 2017 - 10:47 (META) 

Две лица загинале, а десетици се повредени во силна експлозија во близина на пристанишниот град Нингбо, во источниот дел на Кина, јавуваат светските медиуми.

Експлозијата се случила денеска во 9 часот по локално време, во ненаселена зона на градот, соопштиле локалните власти и додале дека две лица загинале, а две се тешко повредени. Медиумите пренесуваат дека во експлозијата се повредени 30 лица кои биле префрлени во болница.

Новинската агенција „Синхуа“ јавува дека експлозијата се случила во близина на фабрика, а од полицијата соопштиле дека е отворена истрага која треба да ги утврди причините за експлозијата, кои сè уште се непознати.

Медиумите наведуваат дека во Кина се чести експлозиите во индустриските зони, поради непочитување на правилата за безбедност.


Пет загинати и 16 повредени во експлозија во фабрика во Турција


Анкара, 8 ноември, 2017 - 14:31 (META) 

Во експлозија во фабрика за текстил во Турција загинаа пет лица, а ранети се 16, соопшти турската министерка за труд, Жулиде Сариероглу.

Од јачината на експлозијата, која веројатно е предизвикана од бојлер, во делот од фабриката каде што се продаваат бои се урнал покрив, а оштетени се и возила што биле паркирани во близина.

– Иницијалниот извештај од таа област покажува дека пет работници загинаа, а 16, меѓу кои и граѓани кои во моментот се нашле во фабриката, се повредени – вели Сариероглу.
Повредените се хоспитализирани, но ниту еден од нив не е во критична состојба.


„Југохром“ ќе стави филтри за да спречи загадување и ќе почне да работи догодина


Скопје, 12 октомври, 2017 - 14:03 (META) 

Фабриката „Југохром“ од Јегуновце ќе почне со работа кон крајот на мај или на почетокот на јуни наредната година, а планирано е да се постави филтер за отпрашување на печките 7 и 8 за да се спречи загадувањето.

Ова беше истакнато на денешното потпишување на меморандумот за разбирање помеѓу Владата и „Југохром“.

– Фабриката ќе продолжи да работи, сопственикот ќе инвестира во системот за отпрашување, односно во поставување филтри. Владата се обврзува да ги сервисира побрзо административните процедури – рече вицепремиерот за економски прашања, Кочо Анѓушев.

Претставникот од „Југохром“, Васко Скендеровски, увери дека „Југохром“ нема да работи без филтри и најави дека тие етапно ќе се поставуваат.

Тој рече дека градежните работи на терен се почнати, а исто така потсети дека претходно имале рок од две години за да го постават системот за отпрашување, што не беше испочитуван поради неможноста да ги добијат потребните дозволи од институциите, а потоа не им било дадено продолжување на рокот.

Целата инвестиција за системот за отпрашување чини 12 милиони евра и ја обезбедил сопственикот на фабриката.

„Југохром“ целосно го запре производствениот процес на 2 ноември 2016 година, со што околу 800 вработени останаа без работа. Раководството на комбинатот одлучи да ја спроведе одлуката на Испекторатот за животна средина за затворање на фабриката поради непочитување на крајниот рок за изградба на филтер-станица, кој истече на 30 октомври 2016 година.


Затруени 23 работници во фабрика во Штип


Штип, 7 октомври, 2017 - 10:20 (META) 

Најмалку 23 вработени во фабрика во Штип вчера попладне се пренесени во болница со знаци на труење. По укажаната лекарска помош, лицата се пуштени на домашно лекување, а еден е задржан за понатамошна опсервација.

Инспектори на Државниот санитарен и здравствен инспекторат веднаш излегле на терен.

– Затворивме две трпезарии каде што се јадело и мензата каде што се подготвувала храната што се носела во канистри. Државниот санитарен и здравствен инспекторат зеде брисеви и мостри од храната и од сите површини во трпезариите и во мензата – изјави директорката на ДСЗИ, Ирина Бухова.

Засега од ДСЗИ не сакаат да ја коментираат причината за труењето и најавуваат дека ќе излезат со поконкретни информации откако ќе завршат сите испитувања.


Анѓушев: Обезбедени се средства за плати и за нормално работење на „Колска“


Скопје, 29 септември, 2017 - 13:01 (META) 

Вицепремиерот за економски прашања, Кочо Анѓушев, на новинарското прашање во врска со штрајкот на работниците во фабриката за шински возила „Колска“ од Велес, извести дека проблемот е надминат и дека е најдено подолготрајно решение за функционирање на компанијата.

– По вчерашниот штрајк на работниците од „Колска“, утринава лично бев во фабриката за да се видам со работниците и да им потврдам дека Владата има решение за нивниот проблем, бидејќи очигледно дека некој манипулира и пренесува погрешни информации на работниците. Владата донесе заклучок со кој се обезбедени 15 милиони денари за „Колска“, со кои не само што ќе се исплатат плати, туку ќе се искористат и за набавка на репроматеријал, за фабриката да продолжи да работи. Многу важно за работниците е фабриката да има иднина и да продолжи да работи и да функционира, а сето тоа ќе се изведе во рок од седум до десет дена, во согласност со законските процедури – рече Анѓушев.

Работниците во „Колска“ се сретнаа со Анѓушев на 11 септември и го информираа за долгогодишните проблеми во работењето. На 12 септември, Владата одлучи финансиски да ја поддржи фабриката за да се воспостави редовен тек на работите и грижа за работниците.


Отворена фабриката на „ОДВ Електрик“, Анѓушев порача дека инвеститорите се добредојдени


Струга, 15 септември, 2017 - 19:42 (META) 

Вицепремиерот Кочо Анѓушев денеска на отворањето на фабриката на „ОДВ Електрик“ во технолошко-индустриската развојна зона во Охридско им честиташе на менаџментот и на вработените во компанијата и ги претстави главните насоки на планот за економски пораст, информира кабинетот на вицепремиерот.

– Компаниите, каква што е и „ОДВ Електрик“, се добродојдени во Македонија и ќе бидат сестрано поддржани. Новите инвестиции, кои ќе се вклучат во новата програма за поддршка, која вчера ја промовиравме, ќе бидат уште посилно поддржани од Владата на Република Македонија. Доколку „ОДВ Електрик“ немаше потпишано договор за државна помош и сега донесеше одлука за инвестиција, јас ви гарантирам дека државната поддршка би била и повисока – нагласил Анѓушев.

Според на менаџментот на „ОДВ Електрик“, оваа компанија досега инвестирала 4,7 милиони евра во изградба на производствениот погон и во набавка на опрема, а во компанијата работат 220 лица.


Анѓушев: Проблемите во „Колска“ се влечат со години, треба трајно решение


Велес, 11 септември, 2017 - 11:16 (META) 

Вицепремиерот за економски прашања, Кочо Анѓушев, се сретна со претставниците на синдикатот на вработените во фабриката за шински возила „Колска“ од Велес, кои подолг период не зеле плати.

„Проблемите се со подолг рок и се влечат веќе со години. Владата ќе го реши проблемот и вработените ќе добијат плата. Но, во исто време, целта е да се најде трајно и системско решение, со кое фабриката ќе има работа, а вработените навремено ќе ги добиваат своите примања, како и социјално и здравствено осигурување“, нагласи вицепремиерот.