Драстично поскапување на патарините во северна Грција од Нова година


Атина, 20 декември, 2018 - 15:47 (META) 

Од 1 јануари патарините во Грција ќе поскапат драстично, некаде и до 150 отсто по километар, известува грчкиот весник „ИЕфимерида“. Ќе поскапи и најкористената патарина од Македонците – онаа по граничниот премин „Богородица – Евзони“, на која наместо досегашните 1,8 евра, ќе се плаќа по 3 евра за автомобил.

На автопатот „Егнатија“, кој се протега од јонскиот брег сè до границата со Турција, како што се најавуваше уште летоска, патарините ќе поскапат драстично, според договорот на грчката влада со концесионерите.

Воведена е нова пресметка – по километар, и грубо кажано, од 3 центи, како што беше во најголем дел досега, новите патарини за автомобилите ќе поскапат меѓу 0,03 до 0,05 евра по километар, што е просечно зголемување за 66 отсто.

Но на некои патарини, зголемувањето достигнува и до 150 отсто. На пример за отсечка од 59,7 километри, за која до сега се плаќало од 1,2 евра патарината ќе се зголеми на 2,98 евра.

Дополнително, покрај сега познатите патарини, ќе се воведат уште 43 излезни наплатни рампи.

На излезот кај Аспровалта ќе се плаќаат 1,42 евра, а излезот за Кавала ќе се плаќаат 2,36 евра.

На наплатната рампа Тириа, меѓу Игуменица и Јанина, наместо досегашните 2,10 евра, отсега ќе се плаќаат 3,42 евра.

На вертикалните исклучоци кај Јеропиги ќе се плаќаат 2,36 евра, а на наплатната рампа што најмногу ги засега Македонците, онаа близу „Евзони“ патарината од  досегашните 1,8 евра е зголемена на 3 евра.

На наплатната рампа Промахона патарината е непроменета – 2,4 евра.


Штрајкот на грчките цариници на полноќ ќе ги затвори граничните премини Евзони и Дојрани


Атина, 31 мај, 2017 - 16:29 (META) 

Патувањето кон Грција утре ќе биде отежнато поради 24-часовниот штрајк на грчките цариници кои реагираат поради владините мерки за штедење. Од граничните премини Евзони и Дојрани велат дека границите ќе бидат затворени од полноќ вечерва до полноќ в четврток, а работата ќе се нормализира в петок.

Од Евзони во телефонски разговор за „Мета“ потврдија дека границата ќе биде главно затворена и се очекуваат проблеми и долги задржувања за патничките возила поради штрајкот. Посочуваат дека ќе има само гранично обезбедување и дека ќе може да се преминува пеш.

Неофицијално, од грчката граница велат дека има шанси да се отвори преминот во одреден момент на кратко за да се пропуштат одредени возила или камиони кои се итни случаи, како и дека доколку има голема редица и за да им се излезе во пресрет на патниците, но велат дека главно преминот ќе биде блокиран во текот на речиси целиот ден поради договорениот штрајк на цариниците и на вработените во Министерството за економија.

Од преминот Дојрани кај Дојран, пак, велат дека границата ќе биде затворена и нема да се пропуштаат ниту патнички возила ниту камиони во текот на целиот ден.

Граничарите и вработените во министерството бараат подобрување на работничките услови, проценката на нивната работа и плати, а најавуваат и протест пред просториите на министерството во Атина утре изутрина.

Штрајк за утре најави и грчката железница, поради што нема да има ниту еден воз во Грција во текот на целиот ден.

Од македонското Министерство за внатрешни работи попладнево соопштија дека добиле известување од грчките власти за еднодневниот генерален штрајк на грчките царински служби, поради што од вечерва па во наредните 24 часа, во прекин ќе биде сообраќајот на сите три гранични премини кон Република Грција.


Евозни отворен за сите видови возила


Скопје, 18 февруари, 2017 - 12:10 (META) 

Штрајкот на грчките земјоделци е прекинат. Граничниот премин Евзони е отворен за сообраќај за сите видови на возила, соопштуваат од Авто-мото сојузот на Македонија.

Од АМСМ информираат дека на граничните премини нема подолги задржувања за влез и за излез од државата. Оваа информација се однесува само за македонската страна на премините.

Сообраќајот на државните патишта се одвива по претежно суви коловози, освен на осојничавите места. Намалена видливост поради појава на магла до 50 метри има на патниот правец Гевгелија – Удово и од 50 до 100 метри на патниот правец Неготино – Градско.

Сообраќајот на патниот правец А3 Прилеп – Битола – Ресен, преку обиколница Битола е во прекин поради свлечиште кое е расчистено, но од превентивни причини сообраќајот се уште се пренасочува преку градот Битола.


Прекината блокадата на Евзони, соопшти АМСМ


Скопје, 17 февруари, 2017 - 12:26 (META) 

Граничниот премин Евзони денеска е прооден за сите видови на возила, а блокадата од трактори е отстранета, соопшти АМСМ и додаде дека на преминот нема подолги задржувања за влез и за излез од Македонија.

Грчките земјоделците претходно соопштија дека на пладне ќе почнат да се повлекуваат од блокадата.

– Одлучивме во петок на пладне да започнеме да се повлекуваме од клучката кај Идомени, блиску до преминот Евзони на границата меѓу Грција и БЈРМ и да се вратиме на нашите ниви – изјави Томас Карипидис, претставник на земјоделците кои го блокираа Евзони за грчката информативна агенција АПЕ.

По средбата со вицепремиерот Драгасакис  фармерите не добија решение на повеќето барања, но Владата се обврза да достави до парламентот на гласање некои олеснувања во даночната и осигурителна програма.

Преминот Евзони беше блокиран од земјоделците од 30 јануари. Целосната блокада создаде огромни проблеми и за туристите и за товарниот превоз, за македонската индустрија и за солунското пристаниште кое беше преполнето со контејнери со производи за македонските компании.


Грчките земјоделци почнуваат да се повлекуваат од Евзони


Атина, 17 февруари, 2017 - 9:34 (META) 

Земјоделците кои го блокираа граничниот премин Евзони денеска ќе почнат да се повлекуваат од блокадата. Како што јавуваат грчките медиуми, земјоделците од пладне ќе започнат да го напуштаат блокот на граничниот премин.

„Одлучивме во петок на пладне да започнеме да се повлекуваме од клучката кај Идомени, блиску до преминот Евзони на границата меѓу Грција и БЈРМ и да се вратиме на нашите ниви“, изјави Томас Карипидис, претставник на земјоделците кои го блокираа Евзони за грчката информативна агенција АПЕ.

По средбата со вицепремиерот Драгасакис  фармерите не добија решение на повеќето барања, но Владата се обврза да достави до парламентот на гласање некои олеснувања во даночната и осигурителна програма.

Преминот Евзони беше блокиран од земјоделците од 30 јануари. Целосната блокада создаде огромни проблеми и за туристите и за товарниот превоз, за македонската индустрија и за солунското пристаниште кое беше преполнето со контејнери со производи за македонските компании.

Македонското МНР вчера по речиси три недели блокада испрати протестна нота до Грција за блокадата.


МНР реагира до Атина и Брисел за блокадата на границата на Евзони


Скопје, 16 февруари, 2017 - 16:46 (META) 

Министерството на надворешни работи (МНР) официјално реагирало до грчките власти како и до Европската комисија за блокадата на граничниот премин Евзони, потврдија од МНР за „Мета“.

Од Грција по дипломатски пат добиле објаснување дека и тие вложувале напори за решавање на проблемот и правеле се што можат, бидејќи и тие трпеле штети, а не само Македонија.

Во писмото до Европската комисија, МНР навеле дека со тековната блокада на граничниот премин која трае веќе 18 денови се крши Спогодбата за стабилизација и асоцијација со ЕУ која гарантира слободно движење на стоки и луѓе и е потпишана од Грција.

Од МНР го посочуваат пристаништето во Драч како алтернатива за дел од македонските компании, во зависност од товарот што се превезува.

Поради блокадата на грчката граница од страна на грчките земјоделци, македонските превозници ги користат граничните премини Меџитлија и Ново Село.


Евзони се уште затворен за сообраќај


Скопје, 16 февруари, 2017 - 9:41 (META) 

Граничниот премин Евзони на македонско-грчката граница и денеска е затворен отако синоќа пропаднаа преговорите на грчките земјоделци со властите во Атина.

Грчките земјоделци штрајкуваат од 30 јануари, а блокадата која се однесува за целиот сообраќај предизвика штети на транспортните компании и нивните коминтенти.

Евроамбасадорот во Македонија Самуел Жбогар вчера изјави дека ЕУ и Брисел внимателно го следат проблемот со блокадата на граничниот премин Евзони од страна на грчките земјоделци и оти очекува дека во најскоро време ќе следи реакција и обид за негово трајно решавање.

Од АМСМ денеска соопштија дека премините Меџитлија (Битола) и Дојран сe отворени за сообраќај за секаков вид возила. На граничните премини, освен кај Богородица, нема подолги задржувања


Сообраќајот се одвива по суви коловози освен по осојничавите места


Скопје, 15 февруари, 2017 - 18:42 (META) 

Поради штрајк на грчките земјоделци, граничниот премин Евзони и понатаму е затворен за сообраќај за сите видови на возила, а граничните премини Меџитлија и Дојран се отворени, информираат од Автомото-сојузот на Македонија.

Сообраќајот на државните патишта сe одвива по суви коловози, освен на осојничавите места.

Во клисурите и засеците можна е појава на помали одрони, особено на патните правци: Кочани – Македонска Каменица – Делчево, Виница – Берово, Гостивар – Стража, Маврово – Дебар-Струга, Демир Капија – Удово, Катланово-Велес, Крушево – Демир Хисар и Ресен-Буково.


Брисел внимателно го следи проблемот со блокадата на Евзони, изјави Жбогар


Гевгелија, 15 февруари, 2017 - 14:51 (META) 

Европската Унија и Брисел внимателно го следат проблемот со блокадата на граничнот премин Евзони која е последица на штрајкот на грчките земјоделци, соопшти денеска евроамбасадорот Самуел Жбогар, додавајќи дека очекува во најскоро време да се најде трајно решение.

Жбогар за блокадата на преминот „Евзони“ денеска разговарал и со градоначалникот Иван Франгов, кој неодамна и писмено помагал помош од ЕУ за деблокирање на границата. Франгов во писмото посочил дека блокадата нанесува огромни штети на Македонија, особено на Гевгелија.

– Имам сознание дека двете влади се обидуваат да најдат начини како да го олеснат овој проблем со пренасочување на сообраќајот преку Дојран и Битола. Исто така добив информација дека добра кои се со ограничен рок на траење ќе бидат дозволено да се пренесат преку овој граничен премин. ЕУ и Брисел внимателно го следат овој проблем и очекувам дека во најскоро време ќе следи реакција и обид за трајно решавање на овој проблем, рече Жбогар одговарајќи на новинарско прашање при посетата на Гевгелија.

Во однос на политичката ситуација во земјата, Жбогар кратко одговорил дека е оптимист, дека ќе се реши политичката криза во земјата и оти наскоро ќе се соберат потребните 61 потпис за формирање на влада во Македонија.


Грчките земјоделци ќе протестираат се додека не се сретнат со Ципрас


Атина, 14 февруари, 2017 - 11:14 (META) 

Граничниот премин Евзони останува затворен и денеска. Земјоделците од Северна Грција кои веќе две недели ја блокираат грчко-македонската граница остануваат на своите места без никаква најава за повлекување на блокадата, додека не се сретнат со грчкиот премиер Алексис Ципрас.

Грчкиот весник „Прото тема“ јавува дека дел од земјоделците од Северна Грција планираат тричасовна блокада на клучката кај Херсо, која води кон граничниот премин Дојран на македонско-грчката граница. Според најавата, блокадата треба да започне во 12 часот по локално време, односно 11 по македонско и ќе трае три часа.

Земјоделците од останатиот дел на Грција денес се во Атина и ќе одржат протест во центарот на градот. Протестот ќе го поддржат Комунистичката партија и работничкиот синдикат АДЕДИ.

Двонеделните блокади и денешниот протест се одржуваат во знак на револт на земјоделците против владината политика и кратењата во земјоделскиот сектор. Поконкретно бараат намалување на возрасната граница за пензионирање, финансиски бенефиции за нив и семејствата, поефтина нафта која нема да биде подложна на повисоките даноци.