!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Собранието не расправаше за законот за јазиците, пауза до утре поради локалните избори


Скопје, 13 септември, 2017 - 15:57 (META) 

По подолга пауза, Собранието попладнево ја прекина 15. седница, на која требаше, меѓу другото, да расправа за Законот за употреба на јазиците, со образложение дека сите парламентарни партии имале обврски поради пријавувањето на кандидати за локалните избори.

Претходно експресно беше изгласана одлуката за објавување јавен оглас за избор на член на Државната изборна комисија (ДИК), која беше уфрлена како дополнителна точка.

Денешната седница мина со две гласања за симнување на законот за јазиците од дневниот ред и со две барања за пауза, кои претседателот на Собранието, Талат Џафери, ги одобри, а последната потраја многу подолго од предвиденото.

Пред давањето пауза во 13.40 часот во Собранието се случуваше жестока расправа за дневниот ред на седницата, кога пратениците од ВМРО-ДПМНЕ излегоа на собраниската говорница. Опозициската партија бараше пауза откако нејзините претставници не успеаја нивните обиди законот за јазиците да се симне од дневниот ред.

Речиси сите координатори на пратеничките групи на ВМРО-ДПМНЕ во расправата бараа да се симне законот од дневниот ред. Тие велеа дека законот не може да има европско знаменце оти не е наведено со кој пропис на ЕУ се усогласува, како и дека е прекршен деловникот, оти не бил даден во Комисијата за политички систем како матична комисија, туку на Комисијата за европски прашања.

Седницата ќе продолжи утре во 11 часот.


Османи: Законот за јазиците има европско знаменце затоа што е дел од евроинтеграцијата


Скопје, 5 септември, 2017 - 16:11 (META) 

Владата одлучи да му додели статус на европско знаменце на предлог-законот за употреба на јазиците затоа што тој е дел од Рамковниот договор, кој, пак, е дел од процесот на европската интеграција на земјата, соопштија денеска од кабинетот на вицепремиерот за европски прашања, Бујар Османи.

„Имплементацијата на Рамковниот договор е нераскинливо поврзана со процесот на европската интеграција на земјата, за што говорат и низата заклучоци на Советот на ЕУ изминативе години, кои укажуваат на потребата од целосна имплементација на истиот како камен-темелник за понатамошно градење на демократско општество со мултиетнички карактер, како рамка за обезбедување на иднината на демократијата во Македонија и овозможување на развојот на поблиски и поинтегрирани односи помеѓу Република Македонија и Евроатлантската заедница“, се вели во соопштението од СЕП.

Од таму додаваат дека Владата го имала предвид Процесот за стабилизација и асоцијација, преземените обврски со Спогодбата за стабилизација и асоцијација, како и обврските од Пристапниот дијалог на високо ниво и реформските приоритети, преку кои подготвувањето на предлог-законот за употреба на јазиците стана и дел од планот „3-6-9“.

Премерот Зоран Заев на денешната прес-конфернеција, на која даваше отчет за првите 100 дена од новата Влада, рече дека Законот за употреба на јазиците е последното отворено прашање од Охридскиот рамковен договор.

Тој рече дека очекува низ дебата, без криење и во отворен процес да се затвори ова прашање.


ВМРО-ДПМНЕ бара Законот за употреба на јазиците да не се носи во скратена постапка


Скопје, 5 септември, 2017 - 12:12 (META) 

Координаторите на пратеничките групи на ВМРО-ДПМНЕ, Антонио Милошоски и Илија Димовски, побараа да биде повлечен Законот за употреба на јазиците, кој денеска е на дневен ред на Комисијата за европски прашања во Собранието.

Милошоски побара од законот да биде тргнато „европското знаменце“, бидејќи тоа се злоупотребува за да се забрза носењето закон кој е неуставен и спротивен на сите законски прописи.

– Европското знаменце е злоупотребено како „смоквин лист“ за да ја скрие неуставноста и немоќта на креаторите на законот да разговараат со релевантните институции. Овој предлог-закон треба да оди на јавна дебата. Барам министерот за правда да каже со кој акт или европска директива се усогласува законот. Барам и присутните дипломати да кажат кој е актот со кој се усогласува законот – рече Милошоски, додавајќи дека ниту во еден извештај на Европската Унија двојазичноста не била критериум за членство на Македонија и дека опозцијата не е против да се дискутира за законот, туку е против злоупотребата при неговото носење.

Димовски истакна дека се крши процедурата бидејќи за Законот првин треба да се произнесе матичната Комисија за политички систем и да има дебата на која ќе бидат поканети професори од областа на правото, образованието и од другите сфери.

Предлозите на Милошоски и на Димовски беа одбиени од членовите на Комсијата, чиј претседател, Артан Груби, даде половина час пауза по расправијата со Милошоски околу тоа дали пратеникот на ВМРО-ДПМНЕ има деловничко право за збор или не.

На седницата се присутни и странски дипломати.


Собранието усвојувало „европски“ закони со заобиколување на процедурата


Скопје, 18 мај, 2017 - 15:19 (META) 

Собранието усвојувало повеќе „европски“ закони заобиколувајќи ја целата процедура предвидена за законите со европско знаменце во периодот од 2014 до 2016 година. Во годишниот извештај за работата на Собранието во 2016 година се вели дека Собранието донело вкупно 14 закони што произлегуваат од Национална програма за усвојување на правото на Европската Унија и претставуваат усогласување со правото на ЕУ. Притоа, симптоматично е што 13 закони воопшто не се разгледувани на седница на Комисија за европски прашања, за нив нема европско знаменце, нема изјава за усогласеност ниту коресподентна табела, иако се прикажани како „европски“ закони.

Ова се дел од клучните наоди на истражувачите на Институтот за демократија „Социетас цивилис“ (ИДСЦС), објавени во краткиот документ за јавни политики „Ефективен собраниски надзор: Отсликување на реалноста во процесот на правна хармонизација со ЕУ“, изработен заеднички од организациите „Евротинк“, „Еко-свест“, „Реактор“ и „Зенит“.

„Загрижувачки е податокот дека Комисијата за европски прашања се заобиколува и притоа се оневозможува да ја извршува својата примарна надзорна и контролна функција, имено, следење на процесот на усогласување на националното со законодавството на ЕУ“, порачува ИДСЦС.

Исто така, според ИДСЦС, загрижувачки е фактот што ниедна од политичките партии присутни во Собранието, не ја забележала оваа практика и не интервенирала со препорака таа да се напушти.