!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Сениорската женска кошаркарска репрезентација пријавена на квалификациите за Евробаскет 2019


Скопје, 31 март, 2017 - 14:20 (META) 

Сениорската кошаркарска репрезентација во женска конкуренција по три години отсуство од кошаркарската сцена во Европа, ги почнува активностите. Тоа што претседателот на Македонската кошаркарска федерација, Петар Наумоски, како и генералниот секретар, Моника Гаврилоска, го најавија минатата година на собирот со сениорките, оваа година ќе стане реалност – националниот А-тим е пријавен и ќе учествува во квалификациите за Европското првенство, кое ќе се одржи во 2019 година, соопшти Македонската кошаркарска федерација.

Ждребот за групите ќе биде одржан на 4 јули 2017 година во Минхен, по завршувањето на годинашното Европско првенство што ќе се одржи во Чешка.

Сите селекции ќе се натпреваруваат во двокружен систем (дома-гости). Првите евроквалификациски натпревари ќе се одиграат на 10 и на 14 ноември 2017 година, а вторите наредната година, на 10 и на 14 февруари, додека последните натпревари од квалификациите ќе се одиграат на 17 и на 21 ноември 2018 година.

Само 16 национални селекции ќе учествуваат на Европското првенство во 2019 година, од кои едно или две ќе бидат резервирани за домаќинот односно домаќините.

Последна активност на националниот состав во женска конкуренција се квалификациите за Евробаскет 2015, одржани во 2013 година, кога сениорската репрезентација не успеа да се избори за пласман на еден континентален собир.


Португалија е нов европски првак во фудбал


Париз, 11 јули, 2016 - 1:46 (META) 

Фудбалската репрезентација на Португалија е нов европски првак, откако во големото финале Европското фудбалско првенство ја совлада домашната селекција на Франција со 1-0.

Стрелец на победничкиот гол беше Едер во 109. минута од натпреварот.

УЕФА го прогласи дефанзивецот на Португалија, Пепе, за најдобар играч на финалето на Европското првенство помеѓу Португалија и Франција. Фудбалерот на Реал Мадрид одигра одлично финале од 120 минути.


Британски новинар незабележан ја поминал сигурносната зона на стадионот во Марсеј


Марсеј, 11 јуни, 2016 - 15:22 (META) 

Репортер на британскиот таблоид „Сан“ успеал да се инфилтрира во сигурносната зона на стадионот „Велодром“ во Марсеј без никој да го запре.

Рос Кембел успеал незабележан да пројде до местото на стадионот каде никој не смее да има пристап без акредитација, наведувајќи дека на својот пат не наишол на ниту една проверка, иако француските власти уверуваат дека се преземени сите мерки за ги спречат „непоканетите гости“ и евентуалните терористички напади.

Тој влегол во стадионот низ влезот за автомобили и таму никој не го спречил. Кембел вели дека можел слободно да шета низ стадионот 20 минути без никаква контрола и додава дека не забележал сигурносни камери.

Француските власти поради страв од терористички напади за време на Европското првенство во фудбал, најавија дека ќе воведат досега невидени мерки за контрола, за кои ќе потрошат, само во Марсеј, околу 1,85 милиони евра.

Околу стадионот „Велодром“ би требало да циркулираат околу 1.000 полицајци и 1.850 припадници на обезбедувањето, додека најмалку стотина војници ќе бидат распоредени во градот.


Во Марсеј тепачка помеѓу навивачи на Русија и на Англија


Марсеј, 11 јуни, 2016 - 11:11 (META) 

Група руски и англиски навивачи се степаа во Марсеј, а снимката од тепачката во која летале шишиња и столови е објавена на интернет.

Тепачката се случила во пресрет на натпреварот на двете фудбалски репрезентации на Европското првенство во фудбал, кое вчера почна во Франција.

Полицијата против напаѓачите употребила солзавец. Во тепачката учествувале околу 200 луѓе, а двајца Англичани се уапсени.

Натпреварот помеѓу репрезентациите на Русија и на Англија се игра вечерва, со почеток во 21 часот, на стадионот „Велодром“ во Марсеј.


Вежба за спречување терористички напад на стадионот во Лион


Лион, 31 мај, 2016 - 10:01 (META) 

Вчера вечер на стадионот „Парк олимпик“ во предградието на францускиот град Лион се одржа масовна воена вежба за спречување на терористички напади за време на Европското првенство во фудбал.

Според сценариото пред натпреварот Украина-Северна Ирска двајца напаѓачи се кренале во воздух на влезот на стадионот, при што загинале десет, а ранети се 80 лица. Гледачите се во паника, а обезбедувањето на стадионот, полицијата и жандармеријата преземаат мерки за нивно совладување.

Во вежбата учествувале војници, медицински лица, противпожарни и спасувачки служби.

Весникот „Монд“ објави дека во вежбата учествувале неколку стотици лица, меѓу кои и службениците во локалната власт на Лион и околните градови, соработници на УЕФА, вработени во француските железници и на лионскиот аеродром.

„Евро 2016“ се отвора на 10 јуни и ќе трае до 10 јули.


Македонија изигра нерешено со Норвешка


Варшава, 25 јануари, 2016 - 20:20 (META) 

Македонската ракометна репрезентација изигра нерешено против репрезентацијата на Норвешка. Натпреварот од втората фаза на Европското првенство, кое се игра во Полска, заврши со резултат 31:31.

На полувремето македонските ракометари водеа со четири поени разлика (17:13).

Играч на натпреварот беше Кире Лазаров, кој постигна 11 гола. Пет гола даде Дејан Манасков, а три Филип Миркуловски. Борко Ристовски имаше 11 одбрани. Кај Норвешка, Кристијан Бјорнсен даде шест гола, а Магнус Јондал пет.

По овој бод, Македонија сега ќе треба да се надева Полска да победи во следните два свои натпревари, а Франција да ги победи Норвежаните за официјално да обезбедиме пласман на олимпискиот турнир.

Нашите ракометари утре имаат слободен ден, а в среда го играат последниот меч на овој шампионат против селекцијата на Белорусија.