!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Груби – Вајгл: Посветено работиме, очекуваме и ЕУ да го испорача ветеното


Брисел, 7 декември, 2017 - 11:07 (META) 

Претседателот на собраниската Комисија за европски прашања и пратеник од ДУИ, Артан Груби, за време на неговата дводневна посета на Брисел се сретна со европратеникот, Иво Вајгл, кој е известувач за Македонија во Европскиот парламент.

На средбата Груби истакнал дека Македонија ја цени досегашната поддршка на ЕУ на политички и на економски план, но побарал да се валоризираат напорите на државата за реализирање на бараните реформи со отстранување на условената препорака и со добивање датум за преговори за прием во ЕУ.

– Парламентарното мнозинство, но и граѓаните на Македонија, со посветеност работат на исполнување на очекувањата од Брисел и очекуваме дека и пријателите од Европската Унија догодина ќе испорачаат во согласност со нашите стремежи – рече Груби.

Во врска со подготовката на годишната резолуција за напредокот на Македонија, во Комисијата за надворешна политика – АФЕТ – на Европскиот парламент, како нејзин известител, Вајгл истакнал дека извештајот ќе биде афирмативен, но и дека е потребен, пред сè, политички, граѓански и етнички консензус за заедничко дејствување во спроведувањето на ЕУ-реформите, при што како приоритетни ги посочи судските реформи и реформите од корпусот на владеењето на правото.

Вајгл ја прифатил поканата да учествува на регионалната конференција организирана од Комисијата за европски прашања на Собранието на Република Македонија во февруари следната година.


Заев до Тајани: Посветени сме и имаме енергија да испорачаме резултати


Брисел, 6 декември, 2017 - 13:37 (META) 

Премиерот Зоран Заев, вицепремиерот задолжен за економски прашања, Бујар Османи, и министерот за надворешни работи, Никола Димитров, денеска се сретнаа со претседателот на Европскиот парламент, Антонио Тајани.

На средбата Заев нагласил дека сега е време да се искористат напорите и во првата половина на 2018 година, Советот на ЕУ да усвои одлука за почеток на пристапните преговори, за која се очекува да пристигне од страна на Европската комисија.

– Нашиот пристап во политиката, и во домашната, и во меѓународната политика, е без скриени агенди и искрено решавање на сите прашања, без разлика колку се тие лесни или тешки. Драго ни е што нашата амбиција и подготвеност за вистински чекори во процесот на пристапување во ЕУ се совпаѓаат со обновениот импулс и интерес за проширување во ЕУ – истакнал Заев.

Тој нагласил дека кај Владата постои јасна и неспорна посветеност и енергија за да се испорачаат резултати.

– Испораките на вистинските резултати од реформите како наш аргумент, се нашиот билет, без кој не можеме да побараме и да очекуваме одлука за почнување на преговорите за пристап. Вложуваме напори за повторно воспоставување на Македонија како кредибилен партнер на своите меѓународни пријатели – истакнал Заев.

Од владината прес-служба информираат дека Тајани изразил честитки за резултатите од реформскиот процес, дека искажал отворена поддршка од Европскиот парламент за Република Македонија и најавил интензивирање на соработката на Собранието.

Тој изразил очекување дека во новата стратегија за проширување на ЕУ ќе биде испратена јасна порака дека Република Македонија и другите земји од Западен Балкан се во приоритетите на таа стратегија.


Попоски во Брисел побара поголема присутност на претставниците на ЕУ во Македонија


Брисел, 21 ноември, 2017 - 18:22 (META) 

Пратениците Артан Груби, Никола Попоски и Фадил Зендели, вчера и денеска учествуваат на конференција посветена на интеграцијата на земјите од Западен Балкан во Европската Унија, која се одржува во Европскиот парламент во Брисел.

На конференцијата, како што соопштија од собраниската Комисија за европски прашања, особен акцент бил ставен на силната заинтересираност на Европската Унија за стабилизација на европскиот континент, при што било нагласено дека тоа нема да се постигне сè додека земјите од Западен Балкан не станат дел од Унијата.

Европратениците на конференцијата испратиле порака дека проширувањето на Унијата ќе продолжи и дека земјите од Западен Балкан во согласност со степенот на реализација и на исполнување на неопходните критериуми имаат јасна перспектива во наредниот период да се приклучат кон ова семејство.

Пратеникот Груби, како што се наведува во соопштението, ги информирал европратениците за текот на реформскиот процес во Македонија, за посветеноста на новото мнозинство да ги зацврсти поставените задачи од Брисел за до крајот на годината да се добие безусловна препорака за почеток на преговори, па дури и конкретен датум за нив.

Пратеникот Попоски упатил апел до претставниците на Унијата за поголема нивна присутност во Република Македонија, како и за поголема соработка на сите земји од регионот во поглед на европската агенда.

– Успехот во интеграцијата зависи од можноста за поголема контрола на Владата од страна на Собранието – рече Попоски.


Вајгл: Процесот „Жан Моне“ не е замена или продолжување на Договорот од Пржино


Скопје, 10 ноември, 2017 - 13:36 (META) 

Последната недела на јануари следната година, претставници на политичките партии, европратеници, експерти од ЕУ, заедно со еврокомесарот за проширување и добрососедска политика Јоханес Хан и претставници на францускиот Парламент и на француската влада, во Париз ќе го почнат процесот на меѓусебен дијалог за важни прашања насловен како „Жан Моне“, информираше денеска известувачот на Европскиот парламент за Македонија, европратеникот Иво Вајгл.

Тој потенцираше дека ова нема да значи замена или продолжување на „Договорот од Пржино“, кој ќе остане ист, ниту пак значи промена на препораките од експертот Рајнхард Прибе.

– „Жан Моне“ е можност за интеракција на европскиот со македонскиот парламент и ќе даде можност за отворена дебата, но без присутност на јавноста и медиумите. Охрабрен сум од атмосферата што ја имав на средбите во Скопје со координаторите на пратеничките групи, кај кои преовладува духот на соработка, меѓусебна почит и волја да се работи во интерес на граѓаните – рече Вајгл.

Тој потенцираше дека првата средба ќе биде во куќата на Жан Моне во Париз, која е симбол за интеграција, но другите средби ќе бидат или во Македонија или во други земји на ЕУ. Вајгл информираше дека, по иницијатива на претседателот на Собранието, Талат Џафери, првата тема ќе бидат процедурите во Собранието и етичкиот кодекс на претставниците во Парламентот, но ќе се зборува и за владеење на правото.

Европратеникот потенцираше дека процесот „Жан Моне“ не значи решавање на проблемите, туку дека тие ќе се решаваат во законодавниот дом на Македонија, кој е суверена институција.

Вајгл изрази надеж дека политичките партии ќе го имаат интересот на државата во прв план и дека ќе се вклучат во конструктивен дијалог во интерес на граѓаните.

Собранискиот спикер, Џафери, од друга страна, кратко рече дека овој процес треба да придонесе следниот извештај од Европската комисија да биде позитивен и да ги започне процесите на патот на македонската евроинтеграција.


ЕП ќе помага во дијалогот меѓу власта и опозицијата во Собранието


Скопје, 9 ноември, 2017 - 18:15 (META) 

Претседателот на Собранието, Талат Џафери и европратеникот и известувач за Македонија во Европскиот парламент, Иво Вајгл, кој е во дводневна посета на земјава, на денешната средба разговарале за можноста за отпочнување на дијалог меѓу различните пратенички групи во Собранието, под покривителство во Европскиот парламент.

Ваквиот дијалог, како што се наведува во соопштението од средбата, има за цел да придонесе кон создавањето на позитивна атмосфера во Собранието и подобрена комуникација меѓу опозицијата и власта по одредени прашања.

На средбата, Џафери го информирал Вајгл за актуелните случувања на политички план и за планираните активности на Собранието до крајот на оваа календарска година.

Вајгл истакнал дека Европскиот парламент ја поддржува Македонија на патот кон Европската Унија и работи на тоа земјите од Западен Балкан да имаат еднаков третман во регионален контекст.

Собранието и понатаму останува посветено на реформите кои се неопходни за приближување до Европската Унија и добивање на позитивна препорака од страна на Европската комисија во првата половина од следната година, нагласил претседателот на законодавниот дом на средбата.


Ветер во грб побара Димитров од европарламентарците


Брисел, 10 октомври, 2017 - 15:45 (META) 

„Градењето модерна европска демократија е, пред сè, во интерес на нашите граѓани, во интерес на земјите од регионот и од интерес на ЕУ. Стабилна, економски просперитетна и успешна Република Македонија подразбира стабилен и просперитетен регион“, порачал министерот за надворешни работи, Никола Димитров, во денешното обраќање пред Комитетот за надворешни работи во Европскиот парламент (АФЕТ), соопшти Министерството за надворешни работи.

Во освртот Димитров ги презентирал мерките за спроведување на клучните реформи во земјата, како и посветеноста на Владата на градењето регионална и меѓународна соработка. Тој на европарламентарците им порачал дека е време за поголема стимулација на Македонија.

– Предолго искусуваме ветер в лице, дајте ни ветер во грб, а ние ќе возвратиме со мирни води и со плодна жетва – рекол шефот на македонската дипломатија, нагласувајќи дека сега е вистинското време да се препознае моментот за енергичен и позитивен ангажман кон повеќе, а не помалку ЕУ-интеграција.

По обраќањето пред парламентарната комисија, Димитров се сретнал со неколку европратеници, повторувајќи го притоа апелот за поддршка за Република Македонија да направи суштински чекор во процесот на европските интеграции во текот на 2018 година.


Постои нова динамика во земјата на нејзниот пат кон ЕУ, оценија Вајгл, Кукан и Фленкештајн


Скопје, 1 септември, 2017 - 15:27 (META) 

Европратениците Кнут Флекештајн, Едвард Кукан и Иво Вајгл, вчера и денеска имаа средби со претседателот на Собранието, Талат Џафери, со лидерите на политичките партии и со координаторите на пратеничките групи, со кои разговараа за актуелните случувања во земјата и за зајакнување на политичкиот дијалог во Собранието.

Тројцата европратеници, како што се наведува во заедничката изјава, со македонските политичари и функционери, разговарале за реформската агенда неопходна за членство на земјата во ЕУ и за ефикасното институционално функционирање на Собранието.

„Разговаравме за предизвиците во Собранието во актуелната политичка клима и се согласивме дека политичкиот дијалог е суштински за напредок во однос на итните реформи и за подобрување на парламентарната култура и атмосфера во парламентот“, велат европратениците.

Тие наведуваат дека нивните соговорници ја поздравиле посветеноста на Европскиот парламент и неговите предлози за поддршка на дијалогот и за потрага по компромиси, што е карактеристично за сите ефективни и модерни парламентарни институции.

„Разговаравме како да го продолжиме политичкиот дијалог во парламентот и како да го поддржиме градењето на капацитетите за вработените и за пратениците, вклучувајќи ја и техничката експертиза поддржана од Европската комисија“, се вели во изјавата и се додава дека во соработка со еврокомесарот Јоханес Хан, секогаш ја покажувале својата солидарност да работат со Собранието, поддржувајќи ја евроинтеграцијата на земјата.

Тројцата европратеници наведуваат дека забележале нова динамика во земјата, како и интерес од Џафери и од лидерите на политичките партии да се вклучат во дијалог за прашања од стратешка важност за државата и за нејзините граѓани, вклучувајќи ги и реформите потребни за земјата да напредува на патот кон европската интеграција.

„Пред локалните избори, ние исто така ги охрабруваме сите политички претставници и институции да дејствуваат одговорно и да гарантираат дека сите граѓани ќе имаат право слободно да го остварат своето демократско право“, велат Вајгл, Кукан и Фленкештајн.


Мекалистер: Брисел беше изненаден од дипломатскиот спор меѓу Србија и Македонија


Белград, 25 август, 2017 - 13:08 (META) 

Брисел бил изненаден од дипломатскиот спор меѓу Србија и Македонија, но е задоволен што раководствата на двете држави овозможиле да се дојде до решение преку дијалог на дипломатско ниво без ескалации, вели известувачот за Србија во Европскиот парламент и шеф надворешнополитичкиот совет на ЕП, Дејвид Мекалистер во интервју за балканскиот сервис на „Радио Слободна Европа“.

Мекалистер вели дека вчера разговарал со српските претставници околу контроверзниот спор меѓу Србија и Македонија од чија страна, како што наведува, му било кажано дека „тоа прашање е решено“.

Околу дипломатскиот спор, европарламентарецот вчера разговарал и со шефот на српската дипломатија Ивица Дачиќ.

– Ми беше соопштено дека конфликтот, ако така го нарекуваме, е решен. Тука беше и повикот од сите институции на Европската Унија двете страни да останат смирени, колку што е можно повеќе – вели Мекалистер.

Тој додава дека разговорот бил доверлив и поради тоа не може да зборува за деталите.

– Очигледно е дека Србија била разочарана од одредени активности кои Македонија ги презела против српските дипломати. Мислам дека сега ја разјаснија ситуацијата, дека двете страни го промениле мислењето по тоа прашање и се надевам дека нема да видиме повторување на ваквите чекори – наведува европратеникот.

Прашан каде е интересот на Србија за вклучување во македонските политички прилики и обратно, кој е интересот на Македонија тоа да го прави во Србија, Мекалистер вели дека не може да каже „која била причината за македонските акции, и што бил мотивот тоа да го направат“, бидејќи нема информации. Тој, додава оти смета дека сите земји од Западен Балкан треба да гледаат напред и дека сите држави од регионот треба да прават сè за да не се блокираат едни со други на нивниот пат кон членство во Европската Унија.

– Македонија е државата која со години беше блокирана, поради спорот околу името со Грција, и јас се надевам дека тој спор конечно ќе биде разрешен. И на тој начин и на оваа држава исто така би можеле да и ја понудиме ЕУ перспективата и да направиме неколку конкретни чекори – вели Мекалистер, кој денеска ја завршува дводневната посета на Белград каде имал разговори со највисоките државни претставници и со претставници на дел од опозицијата.


Поведена истрага против лидерот на француската левица


Париз, 19 јули, 2017 - 10:09 (META) 

Обвинителството во Париз поведе уште една истрага против лидерот на левицата Жан-Лик Меланшон, поради наводното вработување асистенти.

Постои сомневање дека тој ги вработувал асистентите на фиктивни работни места во Европскиот парламент. Претставничката на обвинителството, Анјес Тибо, рече дека со истрагата, освен Меланшон, се опфатени уште 19 лица и нивни некогашни асистенти во ЕП.

Истрагата треба да утврди дали парламентарните асистенти, кои работеле за француските политички партии, незаконски биле плаќани со пари на ЕП.

Меланшон, лидер на партијата Непокорна Франција и жесток критичар на актуелниот претседател Емануел Макрон, ги негираше ваквите обвиненија.

Слична истрага се води и против лидерката на десничарската Национален Фронт, Марин ле Пен, која, исто така, ги отфрли ваквите наводи.


Јункер до Тајани: Смешен си!


Брисел, 4 јули, 2017 - 18:10 (META) 

Претседателот на Европската комисија, Жан-Клод Јункер, денеска го нарече претседателот на Европскиот парламент, Антонио Тајани, „смешен“, по малата расправа за присуството на мал број европратеници на пленарната седница на Европскиот парламент.

Јункер им се заблагодари на пратениците за присуството и рече дека малиот број е одраз на тоа дека „парламентот е несериозен“.

Од повеќе од 700 европратеници, на седницата присуствувале неколку десетици.

Тајани побара „поголемо почитување“ и додаде дека Комисијата не го контролира Парламентот, туку обратно.

– Само неколку членови на парламентот ја контролираат Комисијата. Смешен си! – возврати Јункер.

И Тајани и Јункер припаѓаат на Европската народна партија.