!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Делегација на Собранието ќе учествува на интерпарламентарна конференција во Брисел


Скопје, 19 јуни, 2017 - 10:45 (META) 

Делегација на Собранието на Република Македонија ќе учествува на интерпарламентарна конференција што денеска и утре ќе се одржи во Брисел, на тема „ЕУ законодавен процес – од законодавна иницијатива до имплементација и мониторинг“.

Конференцијата, како што соопштуваат од Собранието, е во рамките на програмата за поддршка на парламентите од земјите на Западен Балкан и од Турција, а ја организира Европскиот парламент.

Македонската делегација ќе ја претставуваат пратениците Бетиан Китев од СДСМ, Шпреса Хадри од ДУИ, Илија Димовски, од ВМРО-ДПМНЕ и Африм Гаши од Беса.

Во фокусот на конференцијата ќе биде законодавниот процес на Европската Унија, со акцент на улогата на парламентарните комисии како алатки за зајакнување на надзорната улога на законодавната власт наспроти извршната власт, а ќе се разгледуваат и најдобрите законодавни практики на Европскиот парламент и можноста и начините за нивна примена во националните парламенти.

„На претстојната интерпарламентарна конференција се очекува учество на европратеници и членови на различни комисии во рамките на Европскиот парламент, како и учество на претставници од парламентите на земјите на Западен Балкан и на Турција, за да ги споделат регионалните искуства и видувањата за идните предизвици во овој домен“, стои во соопштението на Собранието за конференцијата.


ЕП ја изгласа резолуцијата за Македонија: Прво резултати од реформите, па потоа преговори


Стразбур, 14 јуни, 2017 - 15:47 (META) 

Со 503 гласа „за“ и со 113 „против“, Европскиот парламент денеска ја усвои резолуцијата на специјалниот известувач на Европскиот парламент за Македонија, Иво Вајгл, која се однесува на извештајот на Европската комисија за 2016 година. Вкупно 45 европратеници беа воздржани за резолуцијата со која се препорачува Македонија да продолжи по патот на евроинтеграциите.

Европратениците го поздравија формирањето на новата влада на 31 мај и ја повикаа, заедно си сите политички партии да ја врати довербата во државата и во институциите. Тие, исто така, ја повикаа новата влада да продолжи со напорите за интегрирање во ЕУ и целосно да се посвети на робусните реформи во областа на владеењето на правото, правдата, корупцијата, основните човекови права, внатрешните односи, како и на добрососедските односи.

„Откако ќе има видлив напредок во имплементирањето на Договорот од Пржино од 2015 година и во спроведувањето на реформските приоритети, Европскиот парламент ќе го поддржи отворањето на преговорите за влез во ЕУ“, се наведува во резолуцијата.

Во однос на 2016 година, европратениците изразија жалење што Македонија продолжила да ги одолговлекува реформите во судството и го осудија повторното политичкото мешање во назначувањето и во промовирањето судии и обвинители. Европратениците, исто така, се загрижени за политичките напади и опструкциите на работата на Специјалното јавно обвинителство.

– Европскиот парламент донесе позитивен извештај за напредокот на Македонија кон членството во ЕУ. Новата влада е посветена на важните реформи, што ѝ овозможи на земјата да одржи транспарентни избори и да ја надмине долготрајната политичка криза. Македонија сега треба да го забрза процесот на усвојување на европските стандарди, вредности и принципи и на тој начин, исто така, да придонесе за стабилноста на Западен Балкан – рече Вајгл.


Европскиот парламент денеска ќе гласа за резолуцијата за Македонија


Стразбур, 14 јуни, 2017 - 10:41 (META) 

Европскиот парламент (ЕП) денеска во Стразбур ќе гласа за резолуцијата за Република Македонија, која е препорака на парламентот поврзана со извештајот на Европската комисија за 2016 година.

За резолуцијата предложена од европратеникот Иво Вајгл од Словенија, инаку специјален известувач на ЕП за Македонија, се дебатираше на 5 април, а денеска се очекува нејзино изгласување во рамките на тридневната пленарна седница. На дневен ред на седницата се и резолуциите за Србија и за Косово, а ќе се решава и за други работи во надлежност на ЕП.

Се очекува гласањето да биде пред 15 часот.

Со оваа резолуција, која беше усвоена од Комисијата за надворешни работи на ЕП, се препорачува почнување на преговорите за членство на Република Македонија со Европската Унија.


Кукан, Вајгл и Флекенштајн очекуваат Европскиот парламент да го изгласа извештајот за Македонија


Брисел, 2 јуни, 2017 - 12:25 (META) 

Тројцата европратеници Иво Вајгл, Едуард Кукан и Кнут Флекенштајн го поздравија формирањето на новата влада и порачаа сите партии да дејствуваат во конструктивен дух на помирување. Тие порачуваат дека по три одложувања поради политичката несигурност, очекуваат Европскиот парламент да гласа за извештајот за државата за 2016 година на закажана седница во јуни.

„Исто така, се радуваме на соработка на Европскиот парламент со Собранието за исполнување на аспирациите на граѓаните и за неопходните реформи, кои ќе ѝ овозможат на државата да преземе конкретни чекори кон членство во ЕУ“, стои во изјавата од тројцата европратеници.

Тие му честитаа на Заев за формирањето на новата влада.

„Му честитаме на премиерот Заев за формирањето на новата влада и за нејзината програма. Охрабрени сме од конструктивната парламентарна дебата за програмата и од заложбата на владата да ја обедини земјата околу една програма што треба да им служи на сите граѓани, да испорача резултати за реформските приоритети и да работи на евроатлантска интеграција. Се надеваме дека сите политички партии сега ќе дејствуваат во конструктивен дух на помирување, за заеднички интерес на сите граѓани и ќе работат со новата влада на враќање на довербата во државата и во нејзините институции, вклучувајќи целосно спроведување на Договорот од Пржино и реформски приоритети. Македонскиот народ веќе долго чекаше и заслужува да види дека новата влада енергично напредува во својата инклузивна и реформска агенда“, се вели во заедничкото соопштение на Вајгл, Кукан и Флекенштајн.


Извештај на ЕП: Македонија на дното по медиумски слободи на Балканот


Скопје, 12 мај, 2017 - 11:27 (META) 

Македонија се наоѓа на последното место на Западен Балкан за почитување на медиумските слободи, оценува „Истражувачкиот центар на Eвропскиот парламент“, кој во мај годинава објави извештај за состојбата со слободата на говорот во земјите од Балканот, соопшти денеска Здружението на новинарите на Македонија (ЗНМ).

„Трендот на ерозија на слободата на медиумите е особено забележлив во Македонија, која бележи најголем пад на ранг-листите за слободата на медиумите“, се наведува во извештајот.

Во него, како главни причини за лошата медиумска клима во Македонија се наведени повеќе фактори, односно неспроведувањето на постоечките закони, медиумите во сопственост на лица блиски до власта, зголемено насилство врз новинарите, клиентелизмот, политизацијата и корупцијата, како и недостигот од политичка волја за промовирање на плурализмот во медиумите.

„Европскиот парламент повикува на проактивна улога на професионалните организации и саморегулаторни тела, подобрување на ефикасноста на судскиот систем, политичка посветеност и поголема улога на граѓанското општество, кои на долг рок сите заедно треба да придонесат за подобрување на медиумската клима“, стои во соопштението на ЗНМ.


Попоски учествуваше на конференција во Брисел посветена на Холокаустот


Брисел, 26 април, 2017 - 19:30 (META) 

Министерот за надворешни работи, Никола Попоски, денеска учествуваше на меѓународна конференција на тема „Незавршена правда: реституција и сеќавање“, посветена на жртвите од Холокаустот, која се одржа во Европскиот парламент во Брисел.

„Македонија веројатно е еден од најдобрите примери во регионот и во Европа, што во целост се има погрижено и за делот на враќање на имотите на Евреите, но исто така и за одржување на меморијата, на сеќавањето и на одржување на врската, за што го има изградено и еден од позначајните меморијални центри на Холокаустот во светот“, истакнал Попоски.

Во рамки на посетата, од Министерството за надворешни работи информираат дека Попоски во Брисел се сретнал со повеќе европратеници, во контекст на подготовката на резолуцијата на Европскиот парламент за Македонија.

„Надминувањето на политичката криза на одржлив начин е возможно само преку домашен дијалог во демократски институции, проследен со враќање на европската перспектива за Македонија“, нагласил Попоски.


ЕП: Ситуацијата во Македонија е многу сериозна, кризата ја оддалечува од ЕУ


Стразбур, 6 април, 2017 - 11:16 (META) 

На пленарната седница на која се разгледуваше извештајот што известувачот Иво Вајгл го подготви за напредокот на Македонија во 2016 година, Европскиот парламент синоќа изрази загриженост поради политичката состојба во Македонија.

Европарламентарците оценија дека ситуацијата во Македонија е многу сериозна и оти со продлабочувањето на политичката криза се загрозува европската перспектива на земјата. Тие побараа да се деблокираат процесите за конституирање на Собранието и за формирање влада.

Претставникот на малтешкото претседателство, Јан Борг, зборувајќи во име на Советот на Европската Унија, рече дека Македонија страда од поларизација и од култура на поделби и дека системски недостатоци се регистрирани во судскиот систем, човековите права и борбата против корупцијата.

Известувачот Вајгл истакна дека Собранието не може да работи и да се формира нова влада поради системски опструкции и однесувањето на шефот на државата. Тој, исто така, ги повика земјите од регионот да не се мешаат во внатрешните работи на Македонија, особено во период кога ситуацијата во земјата е толку проблематична и комплицирана.

– Не треба да ја правите ситуацијата уште потешка со мешање во внатрешните работи. Македонија се соочува со големи предизвици на патот кон ЕУ. Сепак, очекувам дека ќе дојде крајот на кризата, дека владата ќе се формира и дека ќе се обнови нормалното функционирање на Собранието – порача Вајгл.

Известувачот „во сенка“, европратеникот Кнут Фленкештајн, порача дека е лошо да се држи цела земја заложник затоа што не се оствариле очекувањата на една партија за останување на власт.

– Поголемиот дел од земјата мисли дека демократијата функционира само ако победат – рече Флекенштајн.

Европратеникот и известувач во сенка, Едвард Кукан, го повика претседателот Иванов „да ја почитува волјата на мнозинството и да го даде мандатот за формирање влада, а Собранието да почне да работи според нормална процедура“.

Гласањето за резолуцијата е предвидено за првата сесија на Европскиот парламент во мај.


Вајгл, Кукан и Флекенштајн: Нема оправдување за тактиките на одолговлекување


Стразбур, 5 април, 2017 - 15:56 (META) 

Не гледаме никакво оправдување за одолговлекувачките тактики што се користат во Собранието за одложување на изборот на нов спикер и за формирање влада, стои во заедничкото изјава на тројцата европратеници, Иво Вајгл, Едвард Кукан и Кнут Флекенштајн, по средбата со шефот на македонската дипломатија во заминување, Никола Попоски, во Стразбур.

Попладнево Европскиот парламент на пленарна седница треба да расправа за ситуацијата во Македонија.

– Како членови на Европскиот парламент кои ги поддржаа сите напори за надминување на актуелната криза и кои работеа напорно за поддршка на европската перспектива на македонските граѓани, длабоко сме загрижени за неоправданото пролонгирање на кризата и за порастот на последици за земјата, вклучувајќи го и влошувањето на меѓуетничките односи. Гласањето за извештајот за земјата за 2016 година веќе беше двапати одложувано како директна последица на несигурноста во земјата и вечерва на пленарна седница на Европскиот парламент ќе дебатираме за ваквата ситуација. И покрај ова, ние силно веруваме дека ситуацијата во земјата може да се подобри преку спроведување на демократски процеси, кои треба да доведат до надминување на политичката криза – стои во изјавата на тројцата европратеници.


Европратеник суспендиран поради сексизам


Брисел, 14 март, 2017 - 15:33 (META) 

Европскиот парламент денеска суспендираше полски пратеник на 10 дена откако за време на дебата изјави дека жените треба помалку да заработуваат од мажите затоа што се „послаби, понежни и помалку интелигентни“.

Претседателот на парламентот, Антонио Тајани, рече дека Јануш Корвин Мике е суспендиран од обврските во парламентот на 10 дена, нема да добива дневници 30 дена и ќе му биде забрането да го претставува законодавното тело цела година.

– Нема да толерираме такво однесување. Со навредувањето на жените, тој покажа презир кон фундаменталните вредности – рече Тајани.

Корвин Мике на 1 март, за време на дебатата за платите на мажите и на жените, рече дека жените треба да бидат помалку платени.

– Секако дека треба да бидат помалку платени затоа што се послаби, понежни и помалку интелигентни – рече Корвин Мике, кој ја предводи радикалната десничарска полска партија.


Тајани: Во некои земји од Западен Балкан нарушени се демократијата и стабилноста


Брисел, 9 март, 2017 - 19:53 (META) 

Претседателот на Европскиот парламент, Антонио Тајани, на почетокот на дводневниот самит на Европската Унија во Брисел, изјави дека во некои од земјите на Западен Балкан нарушени се демократијата и стабилноста.

Тајани во својот говор на почетокот на заседанието на шефовите на држави и на влади на земјите членки на ЕУ рече дека „Европската Унија во минатото била светилник за многу земји“ и дека „тоа мора и понатаму да биде така за сите земји од Западен Балкан“.

„Но, во некои од тие земји се забележуваат знаци кои алармираат дека стабилноста и демократските процеси се нарушени. Тука Европа мора да го покаже своето водство, да остане норма и да искаже голем степен на единство“, истакна Тајани.

Европскиот парламент, наведе тој, е целосно посветен на политичката и на економската соработка со тие земји.

„Наша цел и понатаму останува овие земји да станат членки на Унијата“, нагласи Тајани.