Тевдовски: Јавните финансии се во добра кондиција


Јавните финансии се транспарентни, јавниот долг е под контрола, а во процедура се и реформи за унапредување на јавниот финансиски систем. Ова го посочи министерот за финансии Драган Тевдовски на Конференцијата на Македонската aкадемија на науките и уметностите (МАНУ), зборувајќи за реформи во системот на јавните финансии.

Министерот посочи дека јавните финансии сега се во добра кондиција, но и дека се изготвени мерки за подобрување на системот.

-Преку нов закон за буџети, подобрен систем за јавни набавки, објавување на расходите на веб платформа и други мерки, ќе се подобри управувањето со јавни финансии. Со ова ќе се обезбеди стабилен и одржлив економски раст, а со тоа и подобар стандард за граѓаните – рече Тевдовски.

Тој додаде дека по долго време јавниот долг е ставен под контрола.

– После девет години имаме намалување на јавниот долг на годишно ниво. Долгот е ставен под контрола. Истовремено имаме подобрување ако се гледаат каматите и структурата. Значително е намалена каматната стапка на државните хартии од вредност. Ова е резултат на зголемување на довербата на инвеститорите. Таа доверба се покажа и при издавањето на еврообврзницата. Постигната е историски најниска камата од 2,75 проценти. Тоа е двојно па и трикратно помалку во споредба со претходно издадени еврообврзници – рече Тевдовски и додаде дека е зголемена и рочноста на издадените државни хартии од вредност, што го прави долгот поодржлив.

Тевдовски посочи и дека зголемувањето на транспаретноста им дава на граѓаните контрола над трошењето на државните пари.

– Транспарентноста е најдобриот механизам за поефикасно и ефективно управување со јавните финансии. Направивме низа чекори во оваа насока изминатиов период, што беше забележано од меѓунардните финансиски институции, но и Европската унија. Објавени се низа податоци и извештаи кои претходно не беа објавувани, направен е „Граѓански буџет“, а буџетските корисници имаат обврска да ги објавуваат договорите и анексите за јавни набавки, како и завршните сметки на своите веб страници. Преземени се и низа други мерки, а ќе се преземаат и во иднина. До крајот на годината граѓаните преку веб ќе можат да ги следат исплатите од Трезорот, а Буџетот ќе им стане подостапен преку веб-апликација и други алатки  кои ги подготвуваме – рече Тевдовски.

Министерот за финансии посочи дека една од клучните реформи во јавните финансии се прави во системот за јавни набавки. Со новиот закон е предвидена поголема транспаретност во јавните набавки, а во предвид ќе се зема економски најисплатливата понуда. Законот е усогласен со европските пракси.

Научната конференција која ја организираше Академијата беше посветена на идните предизвици на економскиот развој и економските политики кои се водат во Македонија. На конференцијата свое излагање имаа и премиерот Зоран Заев, вицепремиерот Кочо Анѓушев, претседателот на МАНУ Таки Фити, гувернерот на Народната банка Анита Ангеловска Бежоска, универзитетски професори и претставници на бизнис секторот.


Тевдовски: Помошта од ЕУ годишно изнесува 90 милиони евра


Штип, 7 септември, 2018 - 16:09 (META) 

Вкупната помош од Европската Унија за Македонија изнесува 90 милиони евра годишно односно 260.000 евра дневно, со почнување на претпристапните преговори овие средства само ќе растат, порача денеска министерот за финансии, Драган Тевдовски од Штип, кој градоначалникот на оваа општина го оцени како еден од највредните.

Тевдовски истакна дека речиси секоја недела учествува на настани за изградба на патишта, пречистителни станици, детски градинки, училишта, гранични премини финансирани од европски фондови.

Градоначалникот на Општина Штип, Благој Бочварски вели дека градот се развива преку инфраструктурата и најави проекти кои се веќе подготвени и со кои општината ќе аплицира за европски средства.


Османи се заблагодарил на Гарет за упорноста во решавањето на политичката криза


Скопје, 3 јули, 2018 - 10:41 (META) 

Вицепремиерот задолжен за европски прашања Бујар Османи се сретнал со амбасадорот на Обединетото Кралство во Македонија, Чарлс Гарет по повод завршувањето на неговиот мандат.

Османи се заблагодарил на Гарет за ангажманот, посветеноста и како што се вели во соопштението „упорноста да ни се помогне да ја пребродиме длабоката политичка и институционална криза, а потоа и да ја вратиме Македонија на евроатлантскиот пат“.

„За неполна недела, Лондон ќе биде домаќин на земјите од Западниот Балкан, кои заедно со претставниците на Европската унија, како дел од т.н. Берлински процес, ќе ја реафирмираат својата евроатлантска ориентација, ќе ги разгледаат предизвиците за унапредувањето на меѓусебната соработка, и ќе ги отворат можностите за побрза интеграција на Западниот Балкан во Европската Унија“, изјавил Османи.

Покрај стратешките цели на државата како што се ЕУ и НАТО интеграцијата, Османа посочил и на постигнатиот напредок во соработката во различни области: поддршка на реформите во македонската администрација, образованието, во правосудниот систем, демократијата и социјалната кохезија, реформи во безбедносниот систем итн.


Еден милион евра за проекти за 30 општини и за осумте плански региони   


Скопје, 12 јуни, 2018 - 15:28 (META) 

Министерот за локална самоуправа, Сухејл Фазлиу и постојаната претставничка на УНДП, Луиза Винтон, денеска го отворија форумот на кој се презентираа условите и критериумите за финансирање на проекти во планските региони и во општините, во рамките на  проектот „Подобрување на општинското управување”, финансиран од Европската унија, во вкупна вредност од 2,4 милиони евра.

– Во рамките на проектот што Министерството го имплементира со УНДП, се финансираат осум проекти во осумте плански региони, a во втората фаза ќе бидат финансирани проекти и во 30 општини, во вкупна вредност од еден милион евра. Денеска, со учество на сите присутни  ги договараме генералните услови за подготовка и избор на првите осум проекти. Целта на Министерството за локална самоуправа е функционални единици на локалната самоуправа и конкурентни плански региони. Преку подобро управување на локално ниво да обезбедиме подобар пристап до услугите и подобар квалитет на живеење за сите граѓани – рече Фазлиу.


Османи: Владата го усвои договорот за Фронтекс, подготвени сме да го потпишеме


Брисел, 6 јуни, 2018 - 16:59 (META) 

Вицепремиерот задолжен за европски прашања, Бујар Османи заедно со Министерот за економија Крешник Бектеши, во Брисел се сретнаа со Димитрис Аврамопулос, еврокомесар за миграција и внатрешни работи на кого му ја претставиле содржината на новиот реформски план „18“ со акцент на на делот со миграциите, односно унапредување на соработката со Фронтекс.

– Носам добри вести од Скопје, каде вчера, Владата, донесе одлука со која го усвои текстот на договорот меѓу Република Македонија и Европската Унија, со кој се регулира статусот на пограничните служби и соработката со европските погранични органи – Фронтекс – рекол Османи на средба, испраќајќи притоа отворена покана до еврокомесарот Аврамопулос за посета на земјава на која би се потпишал и официјализирал овој договор.

Османи го информирал еврокомесарот за новиот план „18“ и изразил надеж дека ќе има успешен резултат од јунските самити на Европската Унија, со одлука која ќе ја забетонира евроатлантска иднина на Македонија.

– Се надевам дека многу скоро спорот меѓу Македонија и Грција ќе биде надминат со што ќе се создадат услови за забрзано продлабочување на добрата соработката меѓу двете земји – додаде Османи.

Во рамките на дводневната работна посета на Брисел, Османи денес ќе има средба и со Кристијан Даниелсон, генерален директор во Директоратот за Европска соседска политика и преговори за проширување на која ќе биде презентиран новиот реформски план.

Утре вицепремиерот Османи ќе има средба и со високата претставничка на Европската Унија за надворешни работи и безбедносна политика и потпретседателката на Европската Комисија, Федерика Могерини, и ќе одржи брифинг со претставниците на земјите членки на Европската Унија во работната група КОВЕБ, а на маргините на посетата ќе има и свое обраќање за европските интеграции на Македонија пред дипломатските претставници како и претставниците на граѓанскиот сектор во Брисел, во организација на Фондацијата „Ханс Зајдл“.


Османи во Брисел ќе го презентира планот „18“


Брисел, 6 јуни, 2018 - 9:31 (META) 

Вицепремиерот за европски интеграции Бујар Османи денеска и утре во Брисел пред високи претставници на Европската Унија ќе ги презентира мерките предвидени во новиот реформски план „18“.

На средбите, како што соопштија од неговиот кабинет, ќе бидат отворени и сите останати теми поврзани со европските интеграции на земјава, а во насока на очекувањата од претстојните Самити на Европската Унија кон крајот на месецот.

Во рамки на посетата Османи ќе се сретне со високата претставничка на Европската Унија за надворешни работи и безбедносна политика и потпретседателката на Европската комисија, Федерика Могерини, со Димитрис Аврамопулос, комесар за миграција и внатрешни работи, како и со Кристијан Даниелсон, генерален директор во Директоратот за Европска соседска политика и преговори за проширување.

Во рамките на посетата на Брисел, вицепремиерот Османи заедно со министерот за економија Крешник Бектеши ќе се сретнат и со комесарката за трговија, Сесилија Малстром, каде тема на разговор ќе бидат трговските односи меѓу Република Македонија и Европската Унија, особено предизвиците кои произлегуваат од влошувањето на односите во делот на трговијата со челик меѓу Европската Унија и САД.

Вицепремиерот Османи во Брисел ќе одржи брифинг со претставниците на земјите членки на Европската Унија во работната група КОВЕБ, а на маргините на посетата ќе има и свое обраќање за европските интеграции на Македонија пред дипломатските претставници како и претставниците на граѓанскиот сектор во Брисел, во организација на фондација Ханс Зајдл.


Димитров: Стартот на преговори не е исто што и пристапувањето во ЕУ


Брисел, 29 мај, 2018 - 13:15 (META) 

Треба да има јасна дистинкција дека стартот на преговори не е исто што и пристапувањето во ЕУ, изјави министерот за надворешни работи Никола Димитров во тесен круг на експерти и новинари во Брисел.

– Ова треба да биде признаено. Има два до три изборни циклуси помеѓу двата настани, а пристапувањето е алатка што е тука да ги помогне реформите. Ако го барате истото ниво на демократска зрелост како онаа што се бара за влез во ЕУ тогаш процесот нема смисла – рече Димитров.

Според него, има искуства со земји што почнале преговори, а потоа се нашле блокирани.

– Нема автоматизам. Секогаш кога се политизира овој процес тој не успева. Дали е тоа за да се турка земјата напред или да се задржи назад, ова функционира само доколку земјата е оценувана индивидуално и врз основа на заслуга – изјави министерот за надворешни работи на конференција во Брисел организирано од Европскиот центар за политики, на прашање на модераторката околу тоа кои се аргументите на Македонија да ги убеди земјите членки кои се скептични за старт на преговори со земјата.


Повлечени споровите против државата, по донесувањето на законот за енергетика


Скопје, 28 мај, 2018 - 15:06 (META) 

Секретаријатот на Енергетската заедница денеска ги повлече поднесените барања за спорови против Македонија, соопштија од кабинетот на вицепремиерот за економски прашања Кочо Анѓушев.

„По серија на јавни расправи во кои беа вклучени сите засегнати страни, во транспарентна постапка, Собранието на 21 мај 2018 година го донесе новиот Закон за енергетика, во кој се транспонирани ЕУ директивите и регулативите на Третиот енергетски пакет. Со новиот закон се враќа основното човеково право на избор на потрошувачот од кого ќе се снабдува со енергија, а воедно и се исполнуваат условите за отворање на пазарот на електрична енергија, што ќе донесе поголема конкуренција и подобар квалитет на услугите на граѓаните“, се вели во соопштението.

Од таму потсетуваат дека законот требаше да биде донесен најдоцна до 1 јануари 2015 година, а поради ненавременото исполнување на превземените обврски од Европската унија и не транспонирање на Третиот енергетски пакет, Секретаријатот на Енергетската заедница имаше покренато постапки за спорови кон Македонија.


Набиена агенда на Заев во Софија, ќе се сретне со Ципрас, Макрон, Меркел, Курц, Руте


Скопје, 15 мај, 2018 - 10:44 (META) 

Премиерот Зоран Заев на 17 мај ќе учествува на Самитот на Европската унија за Западен Балкан што ќе се одржи во Бугарија, земја претседавач на Европскиот Совет. За време на Самитот, предвидена е и средба со премиерот на Грција, Алексис Ципрас.

„Премиерот ќе учествува во работната пленарна сесија на тема „Поврзување“ (Connectivity), а за време на работниот ручек на шефовите на владите и на држави, со највисоките претставници на телата на Европската унија, ќе зборува на темата „Заедничко справување со заканите“. Заев ќе има билатерални средби со повеќе премиери и шефови на држави. Планирани се билатерални средби со претседателот на Франција, Емануел Макрон, со канцеларката Ангела Меркел, како и со премиерот на Холандија, Марк Руте“, информираат од Владата.

Во агендата на премиерот Заев се испланирани и билатералните средби со премиерите на Австрија, Шведска и Естонија, Себастијан Курц, Стефан Лофвен и Јури Ратас.

Заев е поканет да учествува и да говори на конференции кои се одржуваат паралелно со Самитот на ЕУ во Софија.

На Самитот во Софија ќе учествуваат и вицепремиерот задолжен за европски прашања, Бујар Османи и министерот за надворешни работи, Никола Димитров.


Заев – Хан: Граѓаните ја заслужија препораката, Македонија е повторно на европскиот пат


Скопје, 18 април, 2018 - 9:53 (META) 

Владата сега уште поенергично ќе ги води реформските процеси , изјави премиерот Зоран Заев утрово на заедничка прес конференција со еврокомесарот за проширување и соседска политика Јоханес Хан.

– Подготвени сме за нов чекор напред. Чистата препорака е силен мотив за следната тешка, но достижна цел. Одлуката за добивање датум за преговори на Самитот во јуни е нашата следна цел. Цврсто сме определени да спроведеме суштински реформи. Ќе определиме нов план за реализација на реформите до крајот на 2018. Извештајот на Европската комисија ги вреднува сите наши почнати заложби што се одлика на една демократски ориентирана држава – изјави Заев кој им за заблагодари на сите граѓани, на граѓанскиот сектор и на сите политички партии за овој успех.

Еврокомесарот за проширување и соседска политика, Јоханес Хан рече дека е среќен што е во Скопје и им честиташе на Владата и опозицијата.

– Да уживаме во моментот и обврската да се продолжи она што беше започнато. Ова е пат кон ЕУ, и мислам дека е добар пат. Останува уште многу да се направи. Сега мора да се спроведат во практика законите. Не е доволно само да се сменат законите. И честитам на Владата и опозицијата бидејќи беа конструктивни за оваа национална цел. Граѓаните на Македонија ја заслужија оваа препорака. Земјата помина долг пат и покрај тешките околности и сте цврсто назад на европскиот пат – рече Хан кој лично му го предаде извештајот за напредокот на премиерот Заев.