!На 1 февруари 2017 година, завршува промотивниот период на слободно користење, без регистрација и без претплата, на содржините на „Мета“, кое беше воведено за да им овозможиме полесен пристап на корисниците до навремени и проверени вести. За начинот на пристап и за претплата, од 1 февруари 2017 година ќе информираме дополнително. При пренесувањето и преземањето на содржините од „Мета“, задолжително е атрибуирање и линкување.

Стапката на инфлација во еврозоната е највисока во последните три години


Брисел, 4 јануари, 2017 - 14:07 (META) 

Официјалните бројки покажуваат дека инфлацијата во државите што припаѓаат на еврозоната, во декември се зголеми на највисоко ниво во последните три години, главно поради зголемување на трошоците за енергија.

Европската статистичка агенција (Евростат) соопшти дека годишната стапка на инфлација се зголемила на 1,1 процент во декември од 0,6 отсто во ноември.

Декемвриската стапка е највисока од септември 2013 година, кога инфлацијата исто така изнесувала 1,1 процент.

Бројката е во прилог на Европската централна банка, која настојува да ја намали инфлацијата под два проценти.


ЕЦБ ја продолжи финансиската помош за Грција под построги услови


Атина, 7 јули, 2015 - 10:23 (META) 

Грција доби зелено светло од Европската централна банка за продолжување на итната помош за ликвидност, но по повисока цена. ЕЦБ одлучи да ја продолжи програмата во исти рамки, но ги скрати колатералните гаранции, кои се користат за ликвидноста на банките.

Според аналитичарите, тоа значи дека за две третини се намалува лимитот на финансии што банките може да ги влечат од итниот фонд за ликвидост. Оваа одлука се оценува како јасна и директна порака до грчката влада да се постигне договор по секоја цена на денешните состаноци во Брисел. Доколку не се постигне договор и не се смири ситуацијата, со намалениот лимит на средства што ги имаат сега на располагање, грчките банки може да се соочат со дополнителни оперативни проблеми, да бидат во неможност да продолжат со какви било трансакции и да бидат прогласени за несолвентни.

Весникот „Катимерини“ ги пренесува процените на банкарскиот сектор дека со оваа одлука, од 18 милијарди евра, колку што имале на располагање до понеделник, сега на располагање имаат само 5 милијарди евра.

Чекорот на ЕЦБ се смета како дополнителен притисок за постигнување договор.

Советот на ЕЦБ ќе се состане и утре за да разговара за грчката ситуација по денешните состаноци и одлуки на еврогрупата и на Самитот на ЕУ. Оцените се дека доколку не се постигне договор, можно е да следат уште построги мерки од ЕЦБ, кои дополнително ќе ја влошат ситуацијата за грчкиот банкарски систем.

Банките во Грција остануваат затворени за трансакции до среда вечер.

Редиците пред банкоматите продолжуваат, граѓаните чекаат еден зад друг за своите 60 евра во секое време од денот, независно дали е рано наутро, напладне или, пак, полноќ.


Грција задоволна од Еврогрупата


Атина, 9 март, 2015 - 18:21 (META) 

Грчката влада изрази првично задоволство од денешниот состанок на Еврогрупата. Од Атина ги толкуваат позитивно денешните пораки од Брисел, истакнувајќи дека има добра вест за Грција бидејќи Еврогрупата дала зелено светло да почнат да се применуваат одлуките од 20 февруари, со што Европската централна банка ќе треба да ја олабави ригорозната позиција што ја има кон Грција.

Според информациите од извори од грчката влада, Еврогрупата политички ги прифатила предлозите на Атина. Со ова од среда во Брисел почнуваат преговорите со техничките групи за да се договорат детали за законодавството и за новите реформи.

Изворите од грчката влада коментираат дека со денешните разговори, европските партнери покажале желба да се решат проблемите со финансирањето на Грција.

Според Атина, договорот со европските партнери и понатаму ќе се развива и ќе се подобрува и грчката влада ќе продолжи да предлага нови, дополнителни реформи за подобрување на ситуацијата во државата.