Османи: Очекуваме помош од Германија и во финалната фаза за евроинтеграциите


Скопје, 5 октомври, 2018 - 14:32 (META) 

Вицепремиерот задолжен за европски прашања, Бујар Османи оствари средба со Торстен Фрај, пратеник во германскиот Бундестаг, кој е во посета на Македонија на покана на Фондацијата „Конрад Аденауер.“

На средбата соговорниците се осврнале на најновите случувања и текови во однос на напредокот на земјата во процесот на европска интеграција, особено во контекст на резултатите од референдумот и евроатлантските перспективи на земјава.

„Добивме јасна порака од граѓаните до политичките елити да ја преземат одговорноста и да и обезбедат на земјата евроатлантска иднина“, потенцираше Османи, посочувајќи на Парламентот како институција каде треба да продолжи имплементацијата на Договорот од Преспа во чија реализација треба да се вклучат сите политички фактори.

„Имплементацијата на овој Договор ќе се движи паралелно со процесите на имплементација на реформите и обврските дефинирани во заклучоците на јунските самити, како и соодветната реализација на објаснувачкиот скрининг со Европската Комисија кој започна минатата недела“ – истакна Османи.

Османи пренесе благодарност во името на Владата за севкупната поддршка од страна на Германија на Македонија, изразувајќи надеж дека и во оваа финална фаза, заеднички ќе ги надминеме последните предизвици за заокружување на евроатланската перспектива на земјава.


Македонија денеска го почнува скрининг процесот за членство со ЕУ


Скопје, 27 септември, 2018 - 9:40 (META) 

Во Европската комисија во Брисел се наоѓа 40-члена делегација составена од експерти од надлежните државни институции кои имаат надлежности во дадената област, предводена од главниот политички преговарач вицепремиерот за европски прашања Бујар Османи, а во нејзиниот состав се и министерката за правда Рената Дескоска, главниот технички преговарач Бојан Маричиќ и експерти од Секретаријатот за европски прашања. Скринингот ќе почне со Поглавјето 23 – Правосудство и фундаментални права.

Овој прв објаснувачки состанок ќе трае два дена за време на кои ЕУ ќе ги презентира законски одредби, судски одлуки, или, пак, т.н.р. „најдобри практики“ кои во текот на самите преговори ќе им бидат водилка на земјите преговарачи на патот кон зачленувањето во Унијата.

За два месеца, во текот на ноември, треба да се одржи вториот состанок, посветен на поглавјето 24 наречен „правда, слобода и безбедност“.

Според новата методологија на преговори со ЕУ, воведена по последниот бран проширување, сите нови земји кандидати задолжително започнуваат со овие две поглавја, клучни за консолидирање на владеењето на правото, човековите права и правдата.

Во следните месеци, па сѐ до јуни 2019, кога Советот на ЕУ треба и официјално да го даде зеленото светло за старт на преговори доколку Македонија ги исполни зададените услови, треба да се одржат 31 слични состаноци на денешниот за секое од останатите преговарачки поглавја, од земјоделство до животна средина или, пак, конкурентност.

Сите овие подготвителни состаноци ќе се одржуваат заедно со албанската делегација, поради фактот што двете земји во јуни заедно добија условен датум за старт на преговори. Оваа практика не е вообичаена за ЕУ, која претпочита секоја земја да напредува според сопствените заслуги, но во оваа подготвителна фаза одлучено е двете земји да одат во пакет. Понатаму, во текот на самите преговори за членство, се очекува да се примени принципот на „секој по сопствена заслуга“, брифираат дипломатски извори во Брисел.

Состанокот започнува утринава, во девет часот, и ќе трае до петок попладне. Во петок комесарот Јоханес Хан се очекува да одржи прес-конференција со Бујар Османи и неговиот албански колега, додека на маргините на овој прв скрининг, Рената Дескоска треба да оствари средба со евркомесарката за правда, Вера Јурова.


Македонија утре го почнува скрининг процесот за преговорите со ЕУ


Скопје, 26 септември, 2018 - 9:33 (META) 

Во Европската комисија во Брисел утре заминува 40 члена делегација составена од претставници на повеќе министерства и институции, предводена од вицепремиерот Бујар Османи, која ќе го започне скринингот за поглавјето 23 – правосудство и фундаментални права. Во делегацијата ќе биде и министерката за правда Рената Дескоска.

Отворањето на првото од 33 поглавја од првата фаза значи дека ќе има 33 посети на Брисел или над 1.000 луѓе кои ќе земат учество во овој објаснувачки скрининг. Потоа ќе се подготвува втората фаза или т.н билатерален скрининг што ќе биде уште покомплексен и пообемен.

Процесот се очекува да заврши до јуни 2019 година по што треба да започнат и преговорите за членство во ЕУ.

Со цел да можат да се вклучат сите кои сакаат и можат да помогнат во скринингот и преговарачкиот процес, Владата распиша оглас за создавање Регистар на надворешни експерти. До 10 октомври заинтересираните треба да достават работна биографија и мотивациско писмо со наведено поглавје или подтема за која има експертиза.

Европската комисија во извештајот за земјава на 17 април годинава препорача Македонија да ги почне преговорите со ЕУ.

Европскиот совет на 26 јуни ја поддржа одлуката за условен почеток на преговори со Македонија, што треба да се отворат во јуни 2019. Тоа ќе зависи од исполнување на четири услови – спроведување на итните реформски приоритети, спроведување на Договорот за името, позитивен извештај на Европската комисија и одлука на Советот на ЕУ.


Македонија в четврток го започнува скрининг процесот за пристапување во ЕУ


Скопје, 24 септември, 2018 - 9:39 (META) 

Во Европската комисија во Брисел в четврток заминува 40 члена делегација составена од претставници на повеќе министерства и институции, предводена од вицепремиерот Бујар Османи, која ќе го започне скринингот за поглавјето 23 – правосудство и фундаментални права. Во делегацијата ќе биде и министерката за правда Рената Дескоска.

Вицепремиерот Османи вчера на прес-конференција рече дека почетокот на т.н. објаснувачки скрининг е пресвртената точка со која Македонија и формално го почнува последниот дел од патот кон ЕУ.
Отворањето на првото од 33 поглавја од првата фаза значи дека ќе има 33 посети на Брисел или над 1.000 луѓе кои ќе земат учество во овој објаснувачки скрининг. Потоа ќе се подготвува втората фаза или т.н билатерален скрининг што ќе биде уште покомплексен и пообемен.

Процесот се очекува да заврши до јуни 2019 година по што треба да започнат и преговорите за членство во ЕУ.

Со цел да можат да се вклучат сите кои сакаат и можат да помогнат во скринингот и преговарачкиот процес, Владата распиша оглас за создавање Регистар на надворешни експерти. До 10 октомври заинтересираните треба да достават работна биографија и мотивациско писмо со наведено поглавје или подтема за која има експертиза.

Советникот за евроинтеграциите Бојан Маричиќ кој е и главен технички преговарач вели дека целта е создавање база на експерти од едно или повеќе поглавја во правото на ЕУ за ангажирање на краток или долг рок, во текот на целиот процес.

Скринингот е формална и техничка операција што ја врши Европската комисија, со цел да се подготват преговорите за членство со земјата-кандидат. Како процес, тој има за цел, од една страна – да ги запознае земјите кандидати со правото на ЕУ и на тој начин да ги подготви за преговорите. Од друга страна, целта е да се овозможи Комисијата и земјите-членки да го оценат степенот на подготвеност на земјата- кандидат.

Скринингот трае околу една година и се спроведува врз основа на изготвен распоред од страна на Комисијата. По извршениот скрининг на соодветното поглавје, Советот одлучува за започнување на преговорите, по препорака на Комисијата.


Даниелсон: Референдумот ќе ја одреди иднината на вашата земја


Скопје, 29 август, 2018 - 17:10 (META) 

На 30 септември граѓаните ќе направат избор што ќе ја одреди иднината на вашата земја и тој избор ќе има последици за идните генерации. Ве повикувам да го искористите вашето демократско право и да гласате на претстојниот референдум, порача Кристијан Даниелсон, директорот на Директоратот за проширување и соседска политика на Европската комисија, на промоцијата на новата кампања на ЕУ канцеларијата во Скопје наречена „Замисли иднина заедно“.

Тој упати честитки до премиерот и до македонските институции за постигнување на договорот со Грција за решавање на прашањето со името што, според него, го отвора патот на земјава кон Европа.

Евроамбасадорот во земјава Самуел Жбогар рече дека преку ЕУ-фондови во изминатите 20 години се внесени една милијарда евра европски пари преку проекти што генерирале огромни резултати.


Димитров: Политичарите може да живеат од нерешен спор, ама и да го решат


Брисел, 29 август, 2018 - 15:22 (META) 

Политичарите можат да направат цела кариера и да живеат од нерешен спор, а можат и да се вложат и да го решат, заштитувајќи го најважното за двете страни, за граѓаните на нивните држави да живеат подобро, порача министерот за надворешни работи, Никола Димитров, зборувајќи пред Комисијата за надворешни работи во Европскиот парламент (AFET), на чија агенда е и првото читање на предлог резолуцијата на ЕП за Македонија.

На денешниот состанок Димитров пред членовите на Комитетот елаборираше за актуелностите во Република Македонија, во пресрет на историски важниот референдум и за спроведување на клучните реформи во земјата и подготовките за скрининг процесот со Европската комисија.

– Не бараме скратени патишта или незаслужени награди. Но, би сакале успешните приказни и шанси да бидат соодветно валоризирани и искористени, особено во време кога на Регионот, но и пошироко му требаат такви примери – порача Димитров.

Шефот на македонската дипломатија изрази благодарност за поддршката и конструктивниот пристап на Европскиот парламент во процесот на пристапување на Македонија во Европската Унија, рефлектирана меѓу другото и преку Жан Моне процесот на соработка со Собранието на РМ, како и во резолуциите за Македонија.

МНР Димитров оствари средби и со евро-пратениците Удо Булман (Претседавач на групата на социјалисти и демократи во ЕП), Андреј Ковачев (потпретседавач на групата ЕПП), Иво Вајгл (известител за РМ во ЕП, член на групата на Европски либерали и демократи), со Јоханес ван Бален (претседател на Групата на пријатели на РМ во ЕП, АЛДЕ), како и со Дејвид МекАлистер (претседавач на АФЕТ, член на ЕПП).


ЦРМ: Процесот на медиумски реформи мора да продолжи


Скопје, 13 јули, 2018 - 13:50 (META) 

Центар за развој на медиуми (ЦРМ) и група експерти за медиумски политики апелираат до сите политички партии да се заложат за итно започнување на реформите во медиумскиот сектор ветени со договорот од Пржино од 2016 година и поставени како барања од Европската комисија во документот Итни реформски приоритети.

„Реформите во медиумскиот сектор се предуслов за ослободување на медиумите и јавноста во Македонија и за сигурно започнување на бескомпромисни евроинтеграциски процеси. Воедно, убедени сме дека овие реформи се неопходен квалитет што Македонија треба да го приложи во скрининг процесот што беше најавен како услов за добивање датум за преговори во следната година“, се вели во соопштението на ЦРМ.

Во него се додава дека „прв чекор во започнување на реформите треба да биде итно усвојување на измените на Законот за аудио и аудиовизуелни медиумски услуги, кој во моментов е заглавен во собраниска процедура.“

„Токму затоа од матичната Комисија за транспорт и врски бараме веднаш да го продолжи процесот на прифаќање на предлог-законот и искрено да се стави во функција на итни реформи во медиумскиот систем.  Но, усвојувањето на овие измени треба да е само почеток на медиумските реформи. За да се спроведат добро осмислени чекори што ќе водат кон отстранување на системските недостатоци во медиумскиот систем, потребно е, низ широк и инклузивен процес, да се изработи сеопфатна медиумска стратегија“, се додава во соопштението.

Тие му предлагаат на надлежното министерство да формира група составена од експерти и претставници на медиумските организации, која ќе работи на стратегијата што ќе ги утврди насоките, мерките и активностите за спроведување на реформите.

„Информираме дека групата медиумски организации која ги предложи итните и системските медиумски реформи како дел од Блупринт иницијативата во следниот период ќе преземе низа чекори и активности со цел да се започне со ветените реформи на медиумскиот сектор“, велат од ЦРМ.


ЕК одобри стабилизациски пакет за Грција


Брисел, 11 јули, 2018 - 12:56 (META) 

Европската Комисија (ЕК) донесе одлука за активирање на рамката на засилено набљудување за Грција, како поддршка за спроведувањето на договорените реформи, соопштија од Брисел. Одлуката доаѓа по успешното завршување на Европскиот механизам за стабилност (ЕСМ).

Со денешната одлука за новата рамка, ЕК вели дека ќе ја потпомогне нормализацијата на Грција врз основа на досега постигнатите резултати, односно ќе го подджи завршувањето и постојаното спроведување на договорените реформи.

Новата рамка ќе профункционира на 20 август и се очекува да ја закрепне позицијата на Грција на пазарите.


Заев – Хан: Почна подготовката за скенирање, процесот треба да биде инклузивен


Брисел, 28 јуни, 2018 - 17:09 (META) 

Премиерот Зоран Заев, во придружба на вицепремиерите Радмила Шекеринска и Бујар Османи и министерот за надворешни работи Никола Димитров попладневно се сретнаа со еврокомесарот за соседска политика на ЕУ и преговори за проширување, Јоханес Хан.

Од владиниот кабинет информираат дека со овој состанок започнала подготовката за скенирање на состојбата на поглавјата што се нотирани заедно со датумот за преговори и дека се разговарало за предвидената серија чекори што претстојат во спроведувањето на договорот со Република Грција, но и за главните насоки за засилување на реформите во поглавјата што први ќе бидат отворени во јуни идната година – владеењето на правото и правосудството и фундаменталните права.

Двете делегации изразиле уверување дека и понатаму останува искрениот и партнерски однос на Европската Комисија и се договориле дека следува заеднички предлог за преговарачка рамка која реално ќе ги претстави состојбите во Република Македонија, и од која ќе произлезат насоките со најважните приоритети за реформите во наредниот период.

„Заедничка констатација на средбата беше дека овој процес треба да биде максимално инклузивен за да ги анимира сите структури во македонското општество за да се создадат најдобри тимови кои ќе работат на усогласување на поглавјата од европското „аки“. Заедничка порака од оваа средба е дека нема време за прослави и дека претстојат 365 работни дена за интензивна работа за да се оствари историската задача на успешни и брзи преговори за членство на Република Македонија во ЕУ“, се вели во владиното соопштение.


Рама, Бушати: Голем ден за Албанија, за Македонија, но и за ЕУ


Тирана, 27 јуни, 2018 - 10:23 (META) 

Албанскиот премиер Еди Рама, во првата куса изјава околу одлуката за почнување преговoри на Албанија и на Македонија во јуни 2019 година, оценува дека тоа е голем успех на владите на двете земји.

– По 72 часа помеѓу внатрешните бранови на ЕУ, Албанија успеа да добие датум за влез во пристаништето на обединета Европа. Резултатите од нашите реформи ги натераа и скептиците да ги препознаат заслугите на Албанија и на Македонија. Добиена е една многу тешка битка, војната продолжува – порача Рама.

И шефот на албанската дипломатија Дитмир Бушати ја поздрави одлуката на министрите за надворешни работи на Европската Унија за отворање на преговорите за Албанија и Македонија во јуни 2019 година.

– Ова е голем ден за Албанија и за Македонија, секако и за иднината на ЕУ. Благодареност до сите земји-членки на ЕУ и до Европската комисија за нивната поддршка – вели Бушати.