Процесот „Жан Моне“ одложен за мај поради организациски причини


Скопје, 9 март, 2018 - 14:00 (META) 

Процесот „Жан Моне“, инициран од тројцата европратеници Иво Вајгл, Кнут Флекенштајн и Едуард Кукан е одложен за мај, потврдиле за МИА од канцеларијата на Вајгл.

Средбите меѓу претставници на пратеничките групи од македонското Собрание и претставници на Европскиот парламент и функционери на ЕУ требаше треба да се одржат од 15 до 17 март во Охрид каде се очекуваше присуство и на еврокомесарот за проширување и соседска политика, Јоханес Хан.

Од канцеларијата на европратеникот Иво Вајгл истакнуваат дека средбата се одложува за мај само поради организациски причини.

Претседателот на Собранието, Талат Џафери, на брифингот за новинари минатата недела рече дека теми на разговорите ќе бидат Деловникот за работа на Собранието како и етичкиот кодекс.

– Теми на дискусија ќе бидат промените на Деловникот во однос на времетраењето односно злоупотребата на седниците како што имаше во минатото, планот „3-6-9“, етичкиот кодекс кој се однесува на поведението на пратениците, извештајот на Прибе, внатрешната сигурност на Собранието. Сега постои комуникација имаме со сите политички партии на сите нивоа, постојат разговори и за законите кои треба да се донесат со двотретинско мнозинство – рече Џафери.

Европратениците првично иницираа разговори во куќата на Жан Моне кај Париз и таа средба беше планирана за крајот на јануари. Но, поради неможност претставници на опозицијата да присуствуваат, средбата во Париз беше одложена.


Џафери се сретна со европратениците Вајгл и Кукан


Скопје, 26 февруари, 2018 - 13:00 (META) 

Претседателот на Собранието Талат Џафери денеска се сретна со пратениците на Европскиот парламент, Иво Вајгл и Едуард Кукан, кои се наоѓаат во посета на Република Македонија во рамките на Конференцијата на парламентарните Комисии за европски прашања и интеграции на државите опфатени во процесот за стабилизација и асоцијација од Југоисточна Европа – КОСАП, што се одржува во Собранието на Република Македонија.

Претседателот Џафери ги информирал европратениците за тековните активности на Собранието на Република Македонија и за последните случувања во земјата на политички план.

„Европратениците изразија задоволство од постигнатите резултати и стабилизацијата на работата на законодавниот дом. Исто така, изразија подготвеност да ги поддржат сите активности кои би ја подобриле соработката на парламентарното мнозинство и опозицијата, со цел да се заокружат реформските процеси и земјата да се движи во позитивна насока на патот кон пристапување во Европската Унија“, информираат од кабинетот на Џафери.

Вајгл и Кукан ги потврдиле заложбите на Европскиот парламент да се зајакне соработката со Собранието во насока на поддршка на евроинтегративните процеси на земјата и реализацијата на реформските процеси, неопходни за добивање на позитивен извештај за напредокот на Република Македонија и за отпочнување на преговори за полноправно членство во европското семејство.


Ахмети: Евентуален референдум за името може да го комплицира процесот


Скопје, 2 февруари, 2018 - 13:47 (META) 

Евентуалниот референдум во Македонија за ново име на државата што би го договориле Македонија и Грција може да го комплицира процесот, рекол лидерот на ДУИ, Али Ахмети на средбата со европратениците од групата на Прогресивната алијанса на социјалистите и демократите, Виктор Боштинару, Тања Фајон и Тонино Пицула.

Ахмети на средбата истакнал дека компромис за решавање на спорот за името треба да се постигне сега „почитувајќи ги карактеристиките на страните и размислувајќи за заедничката иднина во евроатланското семејство“.

„Ахмети ја поздрави подгорвеноста на европратениците и рече дека периодот што претстои пред нас е одлучувачки, не само за Македонија, туку и за регионот. Тој ги увери гостите дека храброста во нас нема да недостига и повтори дека решението побрзо се постигнува со ратификација на договорот за името во парламентот, додека евентуалниот референдум може да го комплицира процесот“, стои во соопштението на ДУИ за средбата.

Лидерот на ДУИ нагласил дека спроведувањето на системските реформи во земјата нема да запре и изразил уверување дека опозицијата ќе учествува во овој процес за доброто на граѓаните.

Претставиците на групата на Прогресивната алијанса на социјалистите и демократите во Европскиот Парламент истакнале оти даваат целосна поддршка на агендата на парламентарното мнозинство и на влада ставајќи се на располагање за да ѝ помогнат на Македонија и на регионот.


Груби – Фленкенштајн: Потребна ни е поддршка и од институциите на ЕУ и од земјите членки


Брисел, 6 декември, 2017 - 10:19 (META) 

Претседателот на собраниската комисија за европски прашања и пратеник од ДУИ, Артан Груби, во Брисел се сретнал со европратеникот Кнут Фленкештајн, со кој разговарал за ситуацијата во Македонија и за европската перспектива на земјата и на регионот.

Груби го запознал Фленкенштајн со реализацијата на обврските на земјата, како што се законот за заштитени сведоци, законот за судскиот совет, како и изборот на нов државен јавен обвинител.

Тој од Фленкенштајн побарал поддршка, нагласувајќи дека таа е потребна не само во европските институции, туки и од земјите членки на ЕУ.

Груби го поканил Фленкенштајн во февруари да го посети Скопје и да учествува на Конференцијата на комисиите за европски прашања на парламентите на земјите од регионот.


Груевски им се пожалил на европратениците дека Владата прекршува закони


Скопје, 1 септември, 2017 - 14:15 (META) 

Лидерот на ВМРО-ДПМНЕ, Никола Груевски, заедно со партискиот генерален секретар Христијан Мицковски, со Антонио Милошоски, Александар Николоски и со Влатко Ѓорчев, денеска во седиштето на партијата се сретна со европратениците Иво Вајгл и Едвард Кукан.

Од партијата соопштуваат дека на средбата се разговарало за актуелните политички теми и за стратешките приоритети на државата.

„Од страна на ВМРО-ДПМНЕ беше истакната загриженоста поради случаите на самоволие и на отворено прекршување на законите од актуелната влада во поглед на именувањата и работењето на конкретни институции на владата. На средбата беа посочени случаи на притисоци зад кои стојат политички мотиви врз администрацијата, како и дискриминација по повеќе основи. Беше истакната и загриженоста за актуелната економска ситуација и за негативните трендови во однос на макроекономската состојба, која може да доведе до рецесија и до слабеење на економскиот стандард на граѓаните“, се вели во партиското соопштение.

Груевски пред бриселската тројка посочил дека стратешки интерес на државата останува членството во Европската Унија и во НАТО.


Кукан, Вајгл и Флекенштајн очекуваат Европскиот парламент да го изгласа извештајот за Македонија


Брисел, 2 јуни, 2017 - 12:25 (META) 

Тројцата европратеници Иво Вајгл, Едуард Кукан и Кнут Флекенштајн го поздравија формирањето на новата влада и порачаа сите партии да дејствуваат во конструктивен дух на помирување. Тие порачуваат дека по три одложувања поради политичката несигурност, очекуваат Европскиот парламент да гласа за извештајот за државата за 2016 година на закажана седница во јуни.

„Исто така, се радуваме на соработка на Европскиот парламент со Собранието за исполнување на аспирациите на граѓаните и за неопходните реформи, кои ќе ѝ овозможат на државата да преземе конкретни чекори кон членство во ЕУ“, стои во изјавата од тројцата европратеници.

Тие му честитаа на Заев за формирањето на новата влада.

„Му честитаме на премиерот Заев за формирањето на новата влада и за нејзината програма. Охрабрени сме од конструктивната парламентарна дебата за програмата и од заложбата на владата да ја обедини земјата околу една програма што треба да им служи на сите граѓани, да испорача резултати за реформските приоритети и да работи на евроатлантска интеграција. Се надеваме дека сите политички партии сега ќе дејствуваат во конструктивен дух на помирување, за заеднички интерес на сите граѓани и ќе работат со новата влада на враќање на довербата во државата и во нејзините институции, вклучувајќи целосно спроведување на Договорот од Пржино и реформски приоритети. Македонскиот народ веќе долго чекаше и заслужува да види дека новата влада енергично напредува во својата инклузивна и реформска агенда“, се вели во заедничкото соопштение на Вајгл, Кукан и Флекенштајн.


Манчевски во Брисел: Ќе продолжат демократските процеси во Македонија


Брисел, 5 мај, 2017 - 15:21 (META) 

Потпретседателот на СДСМ и пратеник во Собранието на Република Македонија, Дамјан Манчевски, при вчерашната посета на Европскиот парламент, присуствувал на заедничкиот состанок на пратеници од Европскиот парламент, на кој биле и еврокомесарот за проширување, Јоханес Хан, и амбасадорот на Македонија во ЕУ, Андреј Лепавцов.

„На состанокот, еврокомесарот Хан ги оцени случувањата во Собранието на Република Македонија минатиот четврток, како незамислив акт на насилство и побара да се најдат извршителите и да изведат пред лицето на правдата. Еврокомесарот Хан го поздрави изборот на Талат Џафери за претседател на Собранието и истакна дека следен чекор е избор на реформска влада, која ќе биде ориентирана кон исполнување на реформските приоритети, што ќе создаде услови за отворање на пристапните преговори на Македонија за членство во ЕУ“, соопштува СДСМ.

Манчевски имал и одвоени средби со европратениците Кнут Флекенштајн, Едвард Кукан, Иво Вајгл, Виктор Боштинару, Јенс Нилсон, Тонино Пицула, како и со европратеникот и претседател на Партијата на европски социјалисти, Сергеј Станишев.

„Сите го осудија насилството врз новинарите и врз пратениците во Собранието, го поздравија изборот на новиот претседател на Собранието на Македонија и изразија поддршка на продолжувањето на демократските процеси и формирање на новата реформска влада, како и силните заложби на мнозинството кон евроатлантските интеграции“, соопштува СДСМ.


Вајгл, Кукан и Флекенштајн: Очекуваме влада за две недели, одложувањето ќе има последици


Брисел, 2 мај, 2017 - 17:33 (META) 

Европратениците Иво Вајгл, Едвард Кукан и Кнут Флекенштајн, кои беа посредници во постигнувањето на Договорот од Пржино во јули 2015 година, денеска во заедничка изјава повторно го повикаа претседателот Ѓорге Иванов да ја почитува волјата на парламентарното мнозинство и побараа тие што имаат политичка и криминална одговорност за насилствата да сносат соодветни последици.

„Официјалната истрага треба ефикасно да ги идентификува и да ги гони извршителите на овие неприфатливи криминални напади. Политичката одговорност исто така треба да се утврди и да има соодветни последици за да се спречат вакви недемократски активности“, се вели во изјавата.

Тројцата европратеници го поздравуваат изборот на Талат Џафери за нов претседател на Собранието, изразувајќи поддршка и очекување дека новиот спикер целосно и веднаш ќе ги преземе своите одговорности во интерес на земјата и на сите граѓани.

„Како што разбравме, новиот спикер ќе го информира претседателот Иванов дека парламентот бара од него да ја преиспита својата позиција и да прифати дека на лидерот на мнозинството треба да му биде овозможено да формира влада без понатамошно одложување. Очекуваме ова да доведе до назначување нов премиер во наредните две недели. Го повикуваме претседателот Иванов да ја почитува волјата на парламентот и да престане со опструкциите на демократските процеси и желбата на граѓаните на земјата за крај на кризата“, стои во изјавата на европратеничката тројка.

Тие во заедничката изјава нагласуваат дека „понатамошните одложувања на формирањето на новата влада ќе има неизбежни последици“.

„Ги споделуваме желбите на граѓаните на Македонија да го видиме крајот на актуелната криза. Неможноста за формирање влада во следните две недели ќе претставува неуспех за политичките лидери на земјата да ги исполнат желбите на своите граѓани. Уште еднаш му препорачуваме на Европскиот парламент гласањето за извештајот за земјата за 2016 година да се одложи во исчекување на развојот на настаните во наредните две недели“, велат европратениците во својата изјава.


Попоски учествуваше на конференција во Брисел посветена на Холокаустот


Брисел, 26 април, 2017 - 19:30 (META) 

Министерот за надворешни работи, Никола Попоски, денеска учествуваше на меѓународна конференција на тема „Незавршена правда: реституција и сеќавање“, посветена на жртвите од Холокаустот, која се одржа во Европскиот парламент во Брисел.

„Македонија веројатно е еден од најдобрите примери во регионот и во Европа, што во целост се има погрижено и за делот на враќање на имотите на Евреите, но исто така и за одржување на меморијата, на сеќавањето и на одржување на врската, за што го има изградено и еден од позначајните меморијални центри на Холокаустот во светот“, истакнал Попоски.

Во рамки на посетата, од Министерството за надворешни работи информираат дека Попоски во Брисел се сретнал со повеќе европратеници, во контекст на подготовката на резолуцијата на Европскиот парламент за Македонија.

„Надминувањето на политичката криза на одржлив начин е возможно само преку домашен дијалог во демократски институции, проследен со враќање на европската перспектива за Македонија“, нагласил Попоски.


Вајгл, Кукан и Флекенштајн: Нема оправдување за тактиките на одолговлекување


Стразбур, 5 април, 2017 - 15:56 (META) 

Не гледаме никакво оправдување за одолговлекувачките тактики што се користат во Собранието за одложување на изборот на нов спикер и за формирање влада, стои во заедничкото изјава на тројцата европратеници, Иво Вајгл, Едвард Кукан и Кнут Флекенштајн, по средбата со шефот на македонската дипломатија во заминување, Никола Попоски, во Стразбур.

Попладнево Европскиот парламент на пленарна седница треба да расправа за ситуацијата во Македонија.

– Како членови на Европскиот парламент кои ги поддржаа сите напори за надминување на актуелната криза и кои работеа напорно за поддршка на европската перспектива на македонските граѓани, длабоко сме загрижени за неоправданото пролонгирање на кризата и за порастот на последици за земјата, вклучувајќи го и влошувањето на меѓуетничките односи. Гласањето за извештајот за земјата за 2016 година веќе беше двапати одложувано како директна последица на несигурноста во земјата и вечерва на пленарна седница на Европскиот парламент ќе дебатираме за ваквата ситуација. И покрај ова, ние силно веруваме дека ситуацијата во земјата може да се подобри преку спроведување на демократски процеси, кои треба да доведат до надминување на политичката криза – стои во изјавата на тројцата европратеници.